Jeŋ Muu Fɛɛ Naanyobɔɔ ni Susuɔ Amɛteŋ Mɔ Fɛɛ Mɔ He

GBƆMƐI yɛ he fɛɛ he ni hiŋmɛi lɛ baanyɛ ana nii lɛ kɛyashɛ. Amɛteŋ mɛi babaoo egbɔlɔ, ni amɛteŋ mɛi komɛi hu bɛ gbɔmɔtsoŋ hewalɛ kwraa akɛ ewa dani amɛnyɛɔ amɛnyiɛɔ. Yei yɛ ni eŋɔ hɔ, ni gbalashihilɛ mli hefatalɔi ni darako hiɛ bii bibii ni amɛkwɛɔ amɛnɔ. Abobalɔi ji amɛ fɛɛ—hii, yei, kɛ gbekɛbii—ni maŋ ta, adebɔɔ mli osharai, loo shihilɛi krokomɛi enyɛ amɛnɔ koni amɛshĩ amɛshiai ni amɛyaba abo yɛ maŋ ni bɛŋkɛ amɛ lɛ mli. Ányɛ mɛi komɛi hu anɔ shii abɔ koni amɛshĩ amɛshihilɛhei. Kɛ amɛnu maŋ basabasafeemɔ loo adebɔɔ mli oshara ko he nɔŋŋ pɛ lɛ, amɛlóoɔ shia nibii fioo komɛi, ni amɛbuaa amɛbii anaa, ni amɛyaa he ko ni yɔɔ shweshweeshwe fe jɛmɛ. Kɛkɛ lɛ, kɛ́ shihilɛi hi ekoŋŋ lɛ, abobalɔi lɛ ateŋ mɛi babaoo kuɔ amɛsɛɛ koni amɛyasaa amɛshiai ni amɛje nɔ fɛɛ nɔ shishi ekoŋŋ.

Yɛ afii ni eho lɛ amli lɛ, Central African Republic lɛ egbele eshinaai anaa eha abobalɔi ni jɛ maji babaoo amli. Nyɛsɛɛ nɛɛ, ehe bahia waa diɛŋtsɛ ni gbɔmɛi akpei abɔ, ní Yehowa Odasefoi babaoo fata he lɛ ajo foi kɛshi Democratic Republic of Congo ni ta efite jɛmɛ lɛ koni amɛya Central African Republic ni jɛmɛ yɔɔ shweshweeshwe fioo lɛ.

Nyɛmimɛi Baye Amɛbua

Odasefoi ni yɔɔ Central African Republic lɛ bu enɛ akɛ eji hegbɛ ni amɛná akɛ amɛaabua nibii anaa amɛkɛfee ejurɔ. Aná wɔɔhei aha nyɛmimɛi Kristofoi ni baa lɛ. Klɛŋklɛŋ lɛ, aná tsũi yɛ mɛi ashiai amli, shi yɛ be mli ní abobalɔi lɛ ayi fáa lɛ, ebafee faŋŋ akɛ ehe miihia ni ato gbɛjianɔ babaoo. Atsake Maŋtsɛyeli Asai komɛi afee wɔɔhei. Nyɛmimɛi ni yɔɔ jɛmɛ lɛ kɛ amɛhe ha koni akɛ kanei lɛ ekomɛi afata he, koni afee paipi, ni awo shikpɔŋ nɔ sɛmɛnti koni mɛi ni baahi jɛmɛ lɛ ahe ajɔ amɛ. Abobalɔi lɛ fata nyɛmimɛi ni yɔɔ jɛmɛ lɛ ahe koni ama be kukuoo mli wɔɔhei nɛɛ. Ato Kristofoi akpeei muu he gbɛjianɔ yɛ Lingala wiemɔ mli bɔni afee ni aha mɛi ni baaba yɛ sɛɛ mli lɛ mumɔŋ niyenii ni hereɔ mɔ yiwala. Ekomefeemɔ ni mli wa ni kã Odasefoi ni yɔɔ jɛmɛ kɛ amɛgbɔi lɛ ateŋ lɛ tsɔɔ akɛ jeŋmaji fɛɛ nyɛmifeemɔ ko yɛ diɛŋtsɛ.

Jeee be fɛɛ be abobaa wekui lɛ bashɛɔ shi kutuu. Bei komɛi lɛ, weku mli bii ni mli egbala lɛ bafeɔ ekome ekoŋŋ yɛ he ni amɛbashɛ lɛ. Aŋmala mɛi ni bashɛɔ shi shweshweeshwe lɛ agbɛi yɛ Maŋtsɛyeli Asai lɛ eko fɛɛ eko mli. Atoɔ gbɛjianɔ koni ana mɛi ni anako amɛ lolo  lɛ. Nitsumɔhe nine ni kwɛɔ Yehowa Odasefoi anitsumɔ lɛ nɔ yɛ maŋ lɛ mli lɛ woɔ tsɔnei etɛ gbɛ daa gbi koni amɛye amɛbua Odasefoi ni yaa yɛ gbɛ lɛ nɔ lolo lɛ koni amɛyatao amɛteŋ mɛi ni aaanyɛ alaaje lɛ. Aŋmalaa niŋmaai wuji kɛkadiɔ tsɔnei nɛɛ akɛ “BUU-MƆƆ—Yehowa Odasefoi.”

Feemɔ miishɛɛ ni anáa beni kuu ni ji gbekɛbii abobalɔi kpawo ni atse amɛ kɛjɛ amɛfɔlɔi ahe lɛ naa tsɔne ko ni Yehowa Odasefoi hiɛ lɛ he mfoniri yɛ ojwɛŋmɔ mli okwɛ. Amɛjo foi kɛtee tsɔne lɛ he amrɔ nɔŋŋ ni amɛkɛɛ akɛ Odasefoi ji amɛ. Nyɛmimɛi lɛ ha amɛbote tsɔne lɛ mli, ni amɛkɛ amɛ tee Maŋtsɛyeli Asa ko mli, he ni amɛkɛ amɛwekui fee ekome ekoŋŋ yɛ naagbee mli yɛ lɛ.

Mɛni eye ebua nɛkɛ Kristofoi anɔkwafoi nɛɛ koni amɛdamɔ shihilɛi ni tamɔ nɛkɛ naa, ni jeee shi kome pɛ, shi moŋ shii abɔ lɛ? Amɛná nɔmimaa waa diɛŋtsɛ akɛ naagbee gbii lɛ amli wɔyɔɔ lɛ, taakɛ agba yɛ Ŋmalɛi Krɔŋkrɔŋi lɛ amli lɛ.—2 Timoteo 3:1-5; Kpojiemɔ 6:3-8.

No hewɔ lɛ, amɛle akɛ etsɛŋ ni Yehowa Nyɔŋmɔ kɛ tai, nyɛ̃ɛ, awuiyeli, kɛ béi baaba naagbee. Abobaa mli naagbai lɛ baatsɔ tsutsu nii. Shi amrɔ nɛɛ, yɛ bɔfo Paulo ŋaawoo ni yɔɔ 1 Korintobii 12:14-26 kɛ gbeekpamɔ naa lɛ, Yehowa Odasefoi bɔɔ mɔdɛŋ koni amɛsusu amɛteŋ mɔ fɛɛ mɔ he. Eyɛ mli akɛ faai, husui, wiemɔi, kɛ gbɛ jɛkɛmɔ egbála amɛmli moŋ, shi amɛsusuɔ amɛteŋ mɔ fɛɛ mɔ he jogbaŋŋ, bɔni afee ni amɛkɛ oyaiyeli afee nii kɛ́ amɛteŋ mɔ ko he bafĩ lɛ lɛ.—Yakobo 1:22-27.

[Shikpɔŋ he mfoniri ni yɔɔ baafa 30]

(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)

AFRIKA

Central African Republic

Democratic Republic of Congo

[He ni Sane lɛ Jɛ]

Mountain High Maps® Copyright © 1997 Digital Wisdom, Inc.

[Mfonirii ni yɔɔ baafa 30]

Atsake Maŋtsɛyeli Asai etɛ afee lɛ hei ni ahereɔ gbɔi yɛ

[Mfoniri ni yɔɔ baafa 31]

Ato nibii ahe gbɛjianɔ amrɔ nɔŋŋ kɛha kpatashi

[Mfoniri ni yɔɔ baafa 31]

Mɛi ni fá babaoo ba kɛtsara nɔ

[Mfonirii ni yɔɔ baafa 31]

Beni afɔ́ amɛ nɔŋŋ pɛ lɛ, no mli lɛ amɛtsɔmɔ abobalɔi momo