Ani Jamɔ kɛ Jeŋ Toiŋjɔlɛ Baaba?

KƐJƐ August 28 kɛyashi August 31, 2000 mli lɛ, gbɔmɛi ni fa fe 500 ni jɛ maji 73 mli lɛ yakpe yɛ New York City. Amɛyakpe yɛ Jeŋmaji Ekomefeemɔ lɛ kɛha “The Millennium World Peace Summit of Religious and Spiritual Leaders.” (Afii Akpe Je Lɛŋ Jamɔi kɛ Mumɔŋ Hiɛnyiɛlɔi a-Toiŋjɔlɛ Kpee Lɛ) Hiɛnyiɛlɔi lɛ—ní amɛteŋ mɛi pii kɛ nibii srɔtoi ehàhàa amɛyiteŋ, ni wowoo atadei wuji fɛfɛji, aloo atade diji kakadaji—ba yɛ jamɔi srɔtoi anajiaŋ. Mɛi ni fata mɛnɛɛmɛi ahe ji Baha’i, Buddhabii, Hindubii, Islambii, Jainbii, Yudabii, Shintobii, Sikhbii, Taobii, Zoroasterbii, kɛ Kristendom jamɔi lɛ hu.

Kpeeiyalɔi nɛɛ kpe yɛ Jeŋmaji Ekomefeemɔ lɛ kɛha gbii ejwɛ kpee lɛ mli klɛŋklɛŋ gbii enyɔ nɔ lɛ. Shi jeee Jeŋmaji Ekomefeemɔ lɛ to he gbɛjianɔ aloo lɛ ekɛ shika to he gbɛjianɔ, gbɛjianɔtoo ko ni yɔɔ ni yeɔ ebua yɛ shika gbɛfaŋ lɛ ji mɛi ni to he gbɛjianɔ. Shi kɛlɛ, UN (Jeŋmaji Ekomefeemɔ) lɛ kɛ jamɔŋ hiɛnyiɛlɔi lɛ fɛɛ wie sane ni he hiaa ni esa akɛ atsu he nii yɛ ekomefeemɔ mli koni akɛ ohia, hewolonɔ su mlijiemɔ, shihilɛ mli naagbai, ta, kɛ okplɛmii ni fiteɔ nibii babaoo feemɔ aba naagbee.

Mɛi ni tee kpee lɛ kɛ amɛwaonaa gbɛi wo wolo ko ni hiɛ yitso akɛ “Commitment to Global Peace” (Wɔhe ni Wɔkɛmiiwo Jeŋ Fɛɛ Toiŋjɔlɛ Mli) lɛ shishi. Yɛ be mli ni amɛkpɛlɛɔ nɔ akɛ, basabasafeemɔ kɛ tawuu ji nɔ ni “bei komɛi lɛ, afeɔ yɛ jamɔ gbɛi amli lɛ,” wolo lɛ tsɔɔ akɛ mɛi ni kɛ amɛnine woɔ shishi lɛ “kɛ Jeŋmaji Ekomefeemɔ lɛ baafee ekome . . . yɛ toiŋjɔlɛ sɛɛtiumɔ lɛ mli.” Shi kɛlɛ, abaaa gbeekpamɔ ko ni tsɔɔ gbɛ ni aaatsɔ nɔ atsu enɛ he nii.

Yɛ gbi ni ji enyɔ lɛ nɔ lɛ, Bawa Jain, ni ji kpee lɛ woloŋmalɔ nukpa lɛ mu ewiemɔ ni ekɛje kpee lɛ shishi lɛ naa kɛtsɔ nibii komɛi ni atɛŋ yɛ Jeŋmaji Ekomefeemɔ tsũ lɛ mli afii komɛi ni eho nɛɛ mlitsɔɔmɔ nɔ. Nitɛŋmɔ lɛ miitsɔɔ nuu ko ni kɛ fe Jeŋmaji Ekomefeemɔ Woloŋmalɔi anitsumɔhe tsũ lɛ. Eeshi tsũ lɛ tamɔ ashiɔ agbo. Nɔ ni aŋma yɛ mfoniri lɛ shishi ji: “Toiŋjɔlɛ Lumɔ.” Owula Jain kɛɛ akɛ: “[Mfoniri lɛ] ná minɔ hewalɛ waa amrɔ nɔŋŋ beni mina lɛ. Míbi mɛi srɔtoi nɔ ni etsɔɔ. Ŋmɛnɛ lɛ, efeɔ mi akɛ miná hetoo lɛ. Nyɛ je lɛŋ mumɔŋ kɛ jamɔŋ hiɛnyiɛlɔi fɛɛ ni nyɛnaa ebakpe shi yɛ biɛ lɛ tsɔɔ mi akɛ, [enɛ] ji toiŋjɔlɛ lumɔ lɛ ni miishi Jeŋmaji Ekomefeemɔ agbo lɛ.”

Biblia lɛ kɛ jwɛŋmɔ ni yɔɔ srɔto haa. Etsɔɔ akɛ Yesu Kristo ji Toiŋjɔlɛ Lumɔ lɛ. Lɛ ekɛ jeŋ muu fɛɛ toiŋjɔlɛ baaba, jeee kɛtsɔ je nɛŋ maŋkwramɔŋ aloo jamɔŋ hiɛnyiɛlɔi anɔ shi moŋ kɛtsɔ Nyɔŋmɔ Maŋtsɛyeli lɛ nɔ. Nɛkɛ Maŋtsɛyeli nɛɛ—ni ji Nyɔŋmɔ ŋwɛi nɔyeli—lɛ nɔ abaatsɔ ni abaafee adesai ekome yɛ omanyeyeli mli, koni afee Nyɔŋmɔ suɔmɔnaa nii yɛ shikpɔŋ lɛ nɔ.—Yesaia 9:5; Mateo 6:9, 10.