Sanebimɔi ni Jɛ Kanelɔi Adɛŋ

Kristofonyo ŋa anɔkwafo baanyɛ atsĩ gbalamlitsemɔ ni ehefatalɔ kɛbaa lɛ naa kɛyashi nɛgbɛ?

Beni adesai agbalashihilɛ je shishi lɛ, Nyɔŋmɔ kɛɛ akɛ esa akɛ wu ‘akpɛtɛ’ eŋa he ni amɛfee ekome. (1 Mose 2:18-24) Adesai bafee mɛi ni yeee emuu, ni nɔ ni jɛ mli ba ji naagbai yɛ gbalashihilɛi amli, shi nɔ ni Nyɔŋmɔ shweɔ ji akɛ, esa akɛ hefatalɔi akã he amɛhi shi lolo. Bɔfo Paulo ŋma akɛ: “Shi mɛi ni ebote gbalashihilɛ mli lɛ, mi, ni jeee mi tete, shi Nuntsɔ lɛ moŋ woɔ amɛ kita akɛ, ŋa akatse ewu gbala; ni kɛji etse gbala lɛ tete lɛ, ehi shi nakai, ni ekagbã, aloo ekɛ ewu lɛ ayakpata, ni wu hu akaŋmɛɛ eŋa he.”—1 Korintobii 7:10, 11.

Nakai wiemɔi lɛ haa anaa akɛ, bei komɛi lɛ, yɛ adesai ni yeee emuu ateŋ lɛ, hefatalɔ ko baakpɛ eyiŋ akɛ ebaatse gbala. Ákɛ nɔkwɛmɔnɔ lɛ, Paulo kɛɛ akɛ kɛji hefatalɔi lɛ ateŋ mɔ kome tse gbala lɛ, mɛi enyɔ lɛ fɛɛ ‘ahi shi nakai.’ Mɛni hewɔ? Ojogbaŋŋ, hefatalɔ lɛ eshi etee moŋ, shi yɛ Nyɔŋmɔ hiɛ lɛ mɛi enyɔ lɛ yɛ lolo. Paulo baanyɛ akɛɛ nakai, ejaakɛ Yesu kɛ Kristofoi agbalashihilɛ mla lɛ ma shi akɛ: “Mɔ fɛɛ mɔ ni jeee ajwamaŋbɔɔ [Hela por·neiʹa], hewɔ jɛ ni eshwie eŋa ni eyawɛ̃ yoo kroko lɛ, efite gbala.” (Mateo 19:9) Hɛɛ, nɔ̃ pɛ ni adamɔɔ nɔ atseɔ gbala ni Ŋmalɛ fiɔ sɛɛ ni kɛ gbalashihilɛ baa naagbee ji “ajwamaŋbɔɔ,” ni ji bɔlɛnamɔ mli jeŋba shara. Eyɛ faŋŋ akɛ, yɛ sane ni Paulo wieɔ he lɛ mli lɛ, hefatalɔi lɛ ateŋ mɔ ko mɔ ko kɛ ehe woko jeŋba shara mli, no hewɔ lɛ, kɛ wu lɛ aloo ŋa lɛ shi po lɛ, yɛ Nyɔŋmɔ hiɛ lɛ gbalashihilɛ lɛ bako naagbee.

Kɛkɛ ni Paulo wie shihilɛ ko ni kɔɔ Kristofonyo anɔkwafo ko ni yɔɔ hefatalɔ ko ni heee yeee lɛ he. Susumɔ gbɛtsɔɔmɔ ni Paulo kɛha lɛ he: “Kɛ́ mɔ ni heee yeee lɛ miigbala ehe shi kɛmiiya lɛ, ha ni eya; ayeee nyɛmi nuu loo nyɛmi yoo nyɔŋ yɛ nɛkɛ saji nɛɛ amli. Shi hejɔlɛ mli Nyɔŋmɔ tsɛ wɔ yɛ.” (1 Korintobii 7:12-16) Mɛni ŋa anɔkwafo lɛ baafee, kɛji akɛ ewu ni heee yeee lɛ shi lɛ, ni eetao ni etse yoo lɛ gbala yɛ mla naa po?

Ekolɛ ebaasumɔ ni ekɛ lɛ ahi shi. Ekolɛ yoo lɛ miisumɔ lɛ lolo, ni ebaanu amɛyi enyɔ lɛ fɛɛ henumɔŋ kɛ bɔlɛnamɔŋ hiamɔ nii ahe, ni ebaayɔse akɛ heloonaa nibii ni akɛbaaye abua lɛ kɛ bii ni amɛyɔɔ lɛ ahe baahia amɛ. Ekolɛ ebaaná hiɛnɔkamɔ akɛ, be ko lɛ ewu baatsɔ heyelilɔ ni abaahere eyiwala. Shi kɛlɛ, kɛ etee nɔ efee nii ni ekɛ gbalashihilɛ lɛ ba naagbee (yɛ gbɛ nɔ ni damɔɔɔ ŋmalɛ nɔ) lɛ, no lɛ, taakɛ Paulo ŋma lɛ, “ha ni eya.” Abaanyɛ afee nakai nɔŋŋ yɛ wu ni yɔɔ hemɔkɛyeli lɛ mli shi ebuuu bɔ ni Nyɔŋmɔ kwɛɔ gbalashihilɛ ehaa, ni eema nɔ mi doo akɛ eetse gbala lɛ hu gbɛfaŋ.

Yɛ shihilɛ ni tamɔ nɛkɛ mli lɛ, ekolɛ ebaana akɛ ehe baahia ni ebu lɛ diɛŋtsɛ kɛ gbekɛbii lɛ ahe. Yɛ mɛɛ gbɛ nɔ? Ebaasumɔ ni eŋɔ ebii ni esumɔɔ amɛ lɛ eha ehe koni eya nɔ ejie awo suɔmɔ kpo etsɔɔ amɛ, ni etsɔse amɛ jogbaŋŋ, ni edu hemɔkɛyeli ni damɔ Biblia tsɔɔmɔi kpakpai anɔ ewo amɛ mli. (2 Timoteo 3:15) Ekolɛ gbalamlitsemɔ lɛ kɛ hegbɛ ni eyɔɔ lɛ baawo oshara mli. Enɛ hewɔ lɛ, ebaanyɛ ekɔ gbɛ ni baaha nɔyeli lɛ ana hegbɛ ni eyɔɔ akɛ efeɔ nakai lɛ jogbaŋŋ, bɔni afee ni ebu nakai hegbɛ lɛ he ni enyɛ ekɛtsɔse ebii lɛ, ni ená nɔmimaa akɛ esa akɛ ewu akwɛ weku ni eshiɔ amɛ lɛ. Yɛ hei komɛi lɛ, yoo ni teɔ shi ewoɔ gbalamlitsemɔ baanyɛ ekɛ enine awo mla woji ni hiɛ gbɛjianɔtoo kɛha gbekɛ lɛ ni aaaŋɔ lɛ ni akɛ shika aye abua lɛ lɛ shishi, ni ekpɛlɛɛɛ gbala ni ewu taoɔ ekɛ lɛ atse lɛ nɔ. Yɛ hei krokomɛi hu lɛ, wiemɔi ni yɔɔ woji lɛ amli lɛ tsɔɔ akɛ ekpɛlɛɔ gbalamlitsemɔ lɛ nɔ; enɛ hewɔ lɛ, kɛ ewu lɛ yeɔ fɔ́ yɛ gbalafitemɔ mli lɛ, no lɛ, ŋa lɛ nine ni ekɛaawo enɛɛmɛi ashishi lɛ baatsɔɔ akɛ ekpoo nuu lɛ.

Akutsoŋbii kɛ mɛi ni yɔɔ asafo lɛ mli lɛ ateŋ mɛi babaoo leŋ sane lɛ mli jogbaŋŋ kɛji akɛ atse gbala lɛ mli yɛ Ŋmalɛ naa. No hewɔ lɛ, dani saji lɛ aaashɛ shɔŋŋ nakai lɛ, ebaafee nɔ ni nilee yɔɔ mli akɛ, ŋa lɛ aaaha onukpai lɛ asɛinɔtalɔ lɛ kɛ onukpa kroko ni yɔɔ asafo lɛ mli lɛ ale anɔkwalei ni yɔɔ mli (ekolɛ kɛtsɔ woloŋmaa nɔ). Yɛ nɛkɛ gbɛ nɔ lɛ, nakai anɔkwa saji lɛ baahi shi kɛha saji krokomɛi ni baanyɛ ate shi—yɛ nakai beaŋ aloo yɛ sɛɛ mli. Asafo lɛ najiaŋdamɔlɔi ni eeekɛɛ amɛ akɛ ‘eeha ni eya’ kɛkɛ, tsɛbelɛ eesumɔ ni ekɛ lɛ ahi shi lolo lɛ baama nɔ mi akɛ jeee kpoomɔ ekpoɔ lɛ. Miishɛɛ sane ji akɛ, wumɛi lɛ ekomɛi ni heee yeee lɛ eku amɛsɛɛ ni amɛkɛ weku lɛ ebahi shi ekoŋŋ, ni amɛsaa amɛkɛ amɛtsutsu ŋamɛi lɛ ebote gbalashihilɛ mli ekoŋŋ yɛ mla naa ni amɛbɔi Yehowa jamɔ po.

Nyɛhaa wɔkua wɔsɛɛ kɛyaa nɔ ni Yesu wie lɛ he ekoŋŋ: “Mɔ fɛɛ mɔ ni jeee ajwamaŋbɔɔ hewɔ jɛ ni eeeshwie eŋa ni eyawɛ̃ yoo kroko lɛ, efite gbala.” Kɛ́ wu ko ye fɔ́ yɛ bɔlɛnamɔ jeŋba shara mli lɛɛlɛŋ, shi  eesumɔ ni ekɛ eŋa lɛ ahi shi lolo lɛ, no lɛ esa akɛ yoo lɛ (ni ji mɔ ni yeɔ bem yɛ Yesu nɔkwɛmɔnɔ lɛ mli lɛ) ahala kɛji akɛ ekɛ ehe baake lɛ ni amɛya nɔ amɛhi shi akɛ wu kɛ ŋa aloo ebaakpoo nuu lɛ. Kɛ́ eesumɔ ni ekɛ sane lɛ ake ni eya nɔ ekɛ ewu ni ekɛ lɛ ebote gbalashihilɛ mli yɛ mla naa lɛ atsa gbala lɛ nɔ lɛ, no etsɔɔɔ akɛ yoo lɛ etsɔ jeŋba fɔŋ nɔ ewo ehe muji.—Hoshea 1:1-3; 3:1-3.

Yɛ sane ni wu ni eyabaaa ejeŋ jogbaŋŋ lɛ miitao ni atse gbala lɛ mli lɛ, ŋa lɛ baanyɛ aya nɔ lolo etsɔɔ akɛ eesumɔ ni ekɛ sane lɛ ake, kɛ hiɛnɔkamɔ akɛ enine baashɛ enɔ ekoŋŋ. Eji hegbɛ ni yoo lɛ yɔɔ akɛ ekpɛɔ eyiŋ yɛ ehenilee kɛ shihilɛ mli ni eyɔɔ lɛ naa, akɛ esumɔɔɔ ni atseɔ gbala lɛ. Yɛ maji komɛi anɔ lɛ, yoo ni sumɔɔɔ ni atseɔ gbala lɛ baanyɛ ekɛ enine awo woji ashishi, woji ni maa nibii anɔ mi jogbaŋŋ kɛhaa bii lɛ ni ebaanyɛ eŋɔ eha ehe, kɛ shika ni akɛbaaye abua amɛ yɛ nakai beaŋ nɔŋŋ; shi no etsɔɔɔ akɛ nakai woji lɛ ni ekɛ enine woɔ shishi lɛ miitsɔɔ akɛ eekpoo nuu lɛ. Shi kɛlɛ, yɛ maji komɛi anɔ hu lɛ, ekolɛ abaaha ŋa ni ekpɛlɛɛɛ gbalamlitsemɔ nɔ lɛ kɛ enine awo woji ashishi kɛ wiemɔi komɛi ni aŋmala ni tsɔɔ akɛ ekpɛlɛɔ gbalamlitsemɔ lɛ nɔ; nakai woji lɛ ni ekɛ enine baawo shishi lɛ baatsɔɔ akɛ eekpoo ewu ni yeɔ fɔ́ lɛ.

Bɔni afee ni atsi he kɛjɛ saneshishinumɔ ni ekolɛ eyabaŋ lɛ he lɛ, ebaahi akɛ ŋa lɛ baaha onukpai ni yɔɔ asafo lɛ mli lɛ wolo ni aŋmala gbɛ̀i ni atsɔɔ nɔ ayeɔ sane lɛ kɛ sui ni ajieɔ kpo atsɔɔ yɛ amɛkɛ nitsumɔ mli lɛ nɔ. Ebaanyɛ etsɔɔ akɛ, ekɛɛ ewu lɛ akɛ eesumɔ ni ekɛ ehe ake lɛ, ni etsɔ eŋa. No baatsɔɔ akɛ, gbalamlitsemɔ lɛ jeee nɔ ni esumɔɔ; yɛ nɔ najiaŋ ni eeekpoo ewu lɛ, efee klalo lolo akɛ ekɛ ehe baake lɛ. No hewɔ lɛ, beni eha efee faŋŋ akɛ eesumɔ ni ekɛ ehe ake lɛ, ni ekɛ lɛ ahi shi lolo lɛ sɛɛ lɛ, no lɛ enine ni ekɛaawo woji ashishi koni akɛtsu shika he naagbai ahe nii lɛ etsɔŋ akɛ eekpoo ewu lɛ. *

Yɛ be mli ni efee lɛ faŋŋ akɛ eesumɔ ni ekɛ ehe ake lɛ yɛ gbalamlitsemɔ lɛ sɛɛ po lɛ, yoo lɛ aloo nuu lɛ nyɛŋ ekɛ mɔ kroko abote gbalashihilɛ mli. Kɛji akɛ akpɛlɛɛɛ hefatalɔ ni efeko efɔŋ lɛ wiemɔ akɛ ekɛ sane lɛ eke lɛ nɔ, ni sɛɛ mli lɛ, ekpɛ eyiŋ akɛ ebaakpoo nuu lɛ yɛ jeŋba gbonyo lɛ hewɔ lɛ, no baaha amɛyi enyɔ lɛ fɛɛ hegbɛ ni amɛkɛ mɔ kroko abote gbalashihilɛ mli ekoŋŋ. Yesu tsɔɔ akɛ, hefatalɔ ni efeko efɔŋ lɛ yɛ hegbɛ ni ekpɛɔ eyiŋ yɛ nɛkɛ gbɛ nɔ.—Mateo 5:32; 19:9; Luka 16:18.

[Shishigbɛ niŋmaa]