Maŋtsɛyeli Jajelɔi Bɔ Amaniɛ

Awo Amɛhemɔkɛyeli lɛ He Nyɔmɔ

BƆFO Paulo ji nuu ko ni yɔɔ hemɔkɛyeli ni sa kadimɔ waa, ni ewo nanemɛi heyelilɔi lɛ hewalɛ koni amɛná hemɔkɛyeli nakai nɔŋŋ. Ekɛɛ akɛ: “Mɔ ni baa Nyɔŋmɔ ŋɔɔ lɛ, ja ehe eye akɛ eyɛ ni eji mɛi ni taoɔ esɛɛgbɛ lɛ anyɔmɔwolɔ hu.” (Hebribii 11:6) Niiashikpamɔi ni nyiɛ sɛɛ nɛɛ ni jɛ Mozambique lɛ tsɔɔ bɔ ni Yehowa woɔ hemɔkɛyeli ni mli wa waa lɛ he nyɔmɔ hã, kɛ bɔ ni ehaa sɔlemɔi ni ekãa yɔɔ mli lɛ ahetoo lɛ mli.

• Nyɛmiyoo okulafo ko ni jɛ Niassa kooyigbɛ kpokpaa lɛ nɔ lɛ miisusu bɔ ni lɛ kɛ ebii ekpaa lɛ aaafee aya “Nyɔŋmɔ Shihilɛ Gbɛ” Kpokpaa Wulu Nɔ Kpee lɛ he. He ni enáa shika kɛjɛɔ pɛ ji kɛtsɔ nii ni ehɔɔ yɛ maŋ jarayelihe lɛ nɔ, shi beni kpee be lɛ shɛ lɛ, ená shika ni baanyɛ awo oketeke lɛ kɛyaa pɛ lɛ he nyɔmɔ kɛha lɛ kɛ eweku lɛ. Ni kɛlɛ, etswa efai shi akɛ, ekɛ ehe baafɔ̃ Yehowa gbɛjianɔtoi lɛ anɔ, ni etee nɔ yɛ gbɛjianɔ ni eto ni ekɛhi kpee lɛ shishi lɛ mli.

Ekɛ ebii ekpaa lɛ yakwɔ oketeke lɛ. Yɛ gbɛfaa lɛ mli lɛ, shikahelɔ lɛ tsi ebɛŋkɛ lɛ kɛha etikiti lɛ. Beni eyɔse etsitsinaa-tsɛɛ nii lɛ, ebi lɛ nɔ̃ kadimɔ nɔ̃ ni etsɛ lɛ. Nyɛmiyoo lɛ kɛɛ lɛ akɛ enɛ kadiɔ lɛ akɛ najiaŋdamɔlɔ ko ni miiya Yehowa Odasefoi akpokpaa wulu nɔ kpee. Shikahelɔ lɛ bi akɛ: “Nɛgbɛ abaafee kpee nɛɛ yɛ?” Sɛɛ mli beni ená ele akɛ abaafee kpee lɛ yɛ Nampula kpokpaa ni bɛŋkɛ amɛ, aaafee kilomitai 300 jɛkɛmɔ lɛ, ehe lɛ tikiti lɛ he nyɔmɔ fã pɛ yɛ bɔ ni eheɔ lɛ najiaŋ ni akpaaa gbɛ! Kɛkɛ ni agbɛnɛ eha lɛ kɛ eweku lɛ tikiti kroko kɛha amɛsɛɛkuu yɛ nyɔmɔwoo fã kroko naa. Mɛɛ miishɛɛ ená nɛkɛ akɛ ekɛ ehe fɔ̃ Yehowa nɔ!—Lala 121:1, 2.

• Yoo ko ni jáa Nyɔŋmɔ waa lɛ kɛ aaafee afii 25 sɔŋŋ sɔle kɛha Nyɔŋmɔ ni etsɔɔ lɛ gbɛ ni ja ni esa akɛ atsɔ nɔ ajá lɛ. Sɔlemɔ ni eyaa lɛ kɛ jamɔŋ nifeemɔi futuɔ blema kusum nifeemɔi, ni eyiŋ feɔ lɛ kɔshikɔshi kɛji jamɔ ni tamɔ nɛkɛ saa Nyɔŋmɔ hiɛ.

Etsɔɔ mli akɛ: “Mikaiɔ Yesu wiemɔi ni aŋma yɛ Mateo 7:7 akɛ: ‘Nyɛbia ni aaaha nyɛ; nyɛtaoa, ni nyɛaana; nyɛshia, ni aaagbele nyɛ lɛ daa.’ Akɛni ŋmalɛ nɛɛ yɛ mijwɛŋmɔ mli hewɔ lɛ, misɔleɔ be fɛɛ be mibiɔ Nyɔŋmɔ ní eha mana anɔkwale lɛ. Gbi ko lɛ, wɔsɔlemɔ lɛ mli osɔfo lɛ bi ni mɛi fɛɛ ni hɔɔ nii yɛ maŋ lɛ jarayelihe lɛ kɛ shika yibɔ ko kɛ nibii ni amɛhɔɔ lɛ eko abaha lɛ bɔni afee ni eba jɔɔmɔ eshwie nɔ. Misusu nibimɔ nɛɛ he akɛ ekɛ ŋmalɛ kpãaa gbee, no hewɔ lɛ mikɛ nɔ ko nɔ ko eyaaa. Beni osɔfo lɛ na akɛ mikɛ ‘afɔleshaa’ ko baaa lɛ, eje shishi ebɔi mi jɛmɔ yɛ sɔlemɔŋ bii lɛ fɛɛ ahiɛ. Nakai gbi lɛ miyɔse akɛ jeee nɛkɛ ji bɔ ni Nyɔŋmɔ taoɔ ni ajá lɛ, no hewɔ lɛ mishi sɔlemɔ lɛ. Yɛ nakai beaŋ nɔŋŋ lɛ, mikã he mitee nɔ misɔle koni mana anɔkwale lɛ.

“Yɛ naagbee lɛ, miná ekãa ni mitee wekunyo ko ni ji Yehowa Odasefoi lɛ ateŋ mɔ kome lɛ ŋɔɔ. Eha mi dɛhiɛmɔ wolo ko, ni beni mikane lɛ miyɔse amrɔ nɔŋŋ akɛ Nyɔŋmɔ miiha misɔlemɔi lɛ ahetoo. Yɛ be ko sɛɛ lɛ, mihefatalɔ hu je shishi ebɔi Biblia mli anɔkwalei lɛ ahe miishɛɛ namɔ, kɛkɛ ni wɔkɛ wɔgbalashihilɛ lɛ yawo mla shishi. Shi, sɛɛ mli lɛ, mihefatalɔ lɛ he baye waa. Kɛyashi be mli ni egbo lɛ, etee nɔ ewo mi hewalɛ akɛ mimia mihiɛ yɛ anɔkwale gbɛ lɛ nɔ bɔni afee ni wɔnyɛ wɔkpe ekoŋŋ yɛ Paradeiso.

“Midaa Yehowa shi be fɛɛ be akɛ eha misɔlemɔi lɛ ahetoo ni etsɔɔ mi gbɛ ni sa akɛ majá lɛ yɛ nɔ. Aha misɔlemɔi lɛ ahetoo hu, ni ji akɛ mibii kpaanyɔ lɛ fɛɛ batsɔ Yehowa tsuji ni ejɔɔ amɛhe nɔ.”