1. Be ni eshwɛ fioo ni Petro baagbo lɛ, mɛni Yehowa mumɔ lɛ tsirɛ lɛ koni efee?

 BƆFO PETRO sɔmɔ Yehowa afii pii, ni eye lɛ anɔkwa. Efata Yesu he kɛshiɛ, lɛ ji mɔ klɛŋklɛŋ ni shiɛ ehã mɛi ni jeee Yudafoi lɛ, ni sɛɛ mli lɛ, ebatsɔ gbɛtsɔɔmɔ kuu lɛ mli nyo. Yɛ aaafee afi 62 kɛmiimɔ afi 64 Ŋ.B. be ni egbɔ ni lɛ diɛŋtsɛ ele akɛ etsɛŋ ebaagbo lɛ, Yehowa hã lɛ nitsumɔ kroko akɛ etsu. Ekɛ emumɔ lɛ tsirɛ lɛ ni eŋmala woji enyɔ. Nomɛi ji Biblia mli woji ni wɔle ŋmɛnɛ akɛ 1 Petro kɛ 2 Petro lɛ. Petro le akɛ, woji nɛɛ baaye abua enyɛmimɛi Kristofoi lɛ yɛ egbele sɛɛ.—2 Pet. 1:​12-15.

2. Mɛni hewɔ wɔbaanyɛ wɔkɛɛ akɛ woji ni Petro ŋmala lɛ ba yɛ amɛbe naa lɛ?

² Be ni Petro ŋmala ewoji lɛ, no mli lɛ enyɛmimɛi Kristofoi lɛ kɛ “shihilɛi ni mli wawai srɔtoi” miikpe. (1 Pet. 1:6) Akɛ nɔkwɛmɔnɔ lɛ, no mli lɛ mɛi fɔji komɛi miitao amɛkɛ amale tsɔɔmɔi kɛ jeŋbai gbohii abule Kristofoi asafo lɛ. (2 Pet. 2:​1, 2, 14) Agbɛnɛ hu, etsɛŋ, Kristofoi ni yɔɔ Yerusalem lɛ baana “nibii fɛɛ anaagbee” lɛ, ni tsɔɔ akɛ, etsɛŋ Romabii lɛ baakpãtã Yerusalem kɛ sɔlemɔ shĩa lɛ hiɛ. (1 Pet. 4:7) Ŋwanejee ko bɛ he akɛ, woji ni Petro ŋmala lɛ ye ebua Kristofoi lɛ ni amɛna nibii ni baaye abua amɛ ni amɛkpee shihilɛi ni mli wawai ni amɛkɛkpeɔ lɛ kɛ nɔ ni amɛkɛbaakpe wɔsɛɛ lɛ anaa. b

3. Mɛni hewɔ ehi waa akɛ wɔbaasusu woji enyɔ ni Petro ŋmala lɛ ahe lɛ?

³ Eyɛ mli akɛ Petro ŋmala ewoji lɛ ehã blema Kristofoi lɛ moŋ, shi Yehowa hã akɛwo Biblia lɛ mli koni wɔ mɛi ni wɔyɔɔ  ŋmɛnɛ lɛ hu aná he sɛɛ. (Rom. 15:4) Ŋmɛnɛ lɛ, mɛi pii ni yɔɔ je lɛ mli lɛ ajeŋba ekpɔtɔ. No hewɔ lɛ, wɔ hu wɔkɛ naagbai ni baanyɛ ahã ewa kɛhã wɔ akɛ wɔbaasɔmɔ Yehowa lɛ baakpe. Agbɛnɛ hu, etsɛŋ, wɔkɛ amanehulu ni da kwraa fe amanehulu ni Yudafoi lɛ kɛkpe be ni akpãtã Yerusalem kɛ sɔlemɔ shĩa lɛ hiɛ lɛ baakpe. Woji enyɔ ni Petro ŋmala lɛ baanyɛ akai wɔ nibii komɛi ni he hiaa waa. Kaimɔi nɛɛ baaye abua wɔ ni wɔhã Yehowa gbi lɛ baa lɛ ahi wɔjwɛŋmɔ mli, wɔkashe gbɔmɔ gbeyei, ni wɔsumɔ wɔnyɛmimɛi Kristofoi lɛ waa. Agbɛnɛ hu, kaimɔi nɛɛ baaye abua asafoŋ onukpai lɛ ni amɛna bɔ ni amɛbaafee amɛye amɛbua nyɛmimɛi ni yɔɔ amɛsafoi lɛ amli lɛ koni amɛkaŋmɛɛ amɛhemɔkɛyeli lɛ he.

4. Tamɔ bɔ ni awie yɛ 2 Petro 3:​3, 4 lɛ, mɛni baanyɛ ahã wɔhemɔkɛyeli lɛ mli agbɔjɔ?

⁴ Mɛi pii heee amɛyeee akɛ gbalɛi ni yɔɔ Biblia lɛ mli lɛ baaba mli. Mɛi komɛi po yeɔ wɔhe fɛo akɛ wɔbɔi wiemɔ akɛ naagbee lɛ miiba lɛ, jeee ŋmɛnɛ. Mɛi komɛi hu kɛɛ naagbee lɛ ni wɔwieɔ lɛ he lɛ baŋ kɔkɔɔkɔ. (Kanemɔ 2 Petro 3:​3, 4.) Kɛ́ mɔ ko ni wɔkɛkpe yɛ shiɛmɔ mli, mɔ ko ni wɔkɛtsuɔ nii, loo wɔwekunyo ko wie nɔ ko tamɔ nakai lɛ, ebaanyɛ ehã wɔhemɔkɛyeli lɛ mli agbɔjɔ. Shi nɔ ko ni Petro wie lɛ baanyɛ aye abua wɔ.

5. Mɛni baaye abua wɔ koni wɔkanu he akɛ jeŋ fɔŋ nɛɛ naagbee lɛ etsɛ tsɔ? (2 Petro 3:​8, 9)

⁵ Ekolɛ, mɛi komɛi baawie akɛ Yehowa etsɛ tsɔ kɛ jeŋ fɔŋ nɛɛ hiɛkpatamɔ. Shi nɔ ko ni Petro wie lɛ baaye abua wɔ ni wɔkasusu nakai. Ewie akɛ, esoro bɔ ni Yehowa buɔ be ehãa lɛ kwraa yɛ bɔ ni adesai buɔ lɛ amɛhãa lɛ he. (Kanemɔ 2 Petro 3:​8, 9.) Yɛ Yehowa hiɛ lɛ, afii akpe tamɔ gbi kome. Agbɛnɛ hu, Yehowa eto etsui shi, ejaakɛ esumɔɔɔ ni mɔ ko mɔ ko hiɛ kpãtãa. Shi kɛ́ etsuishitoo lɛ ba naagbee lɛ, ebaakpãtã jeŋ fɔŋ nɛɛ hiɛ. Kɛyashi nakai be lɛ baashɛ lɛ, wɔná hegbɛ kpele akɛ wɔbaashiɛ wɔhã mɛi yɛ je lɛŋ he fɛɛ he.

6. Mɛni kɛ́ wɔfee lɛ, ebaahã Yehowa gbi lɛ baa lɛ ‘ahi wɔjwɛŋmɔ mli jogbaŋŋ’? (2 Petro 3:​11, 12)

⁶ Petro wo wɔ hewalɛ ni wɔhã Yehowa gbi lɛ baa lɛ ‘ahi wɔjwɛŋmɔ mli jogbaŋŋ.’ (Kanemɔ 2 Petro 3:​11, 12.) Shi te wɔbaafee tɛŋŋ wɔfee nakai? Nɔ kome ni wɔbaanyɛ wɔfee ji, ni daa gbi lɛ, wɔbaabɔ mɔdɛŋ wɔsusu jɔɔmɔi ni wɔbaaná yɛ jeŋ hee lɛ mli lɛ ahe. Feemɔ ohe mfoniri ni kɔɔyɔɔ kpakpa ko miishwie ohe, ni ooye niyenii kpakpai ni hewalɛ yɔɔ mli, ni atee osuɔlɔi kɛ onanemɛi ni egboi lɛ ashi, ni ootsɔɔ mɛi ni hi shi yɛ blema lɛ bɔ ni Biblia mli gbalɛi eba mli amɛhã. Kɛ́ osusu nibii ni tamɔ nɛkɛ ahe lɛ, ebaaye ebua bo ni okɛ miishɛɛ amɛ jeŋ hee lɛ, ni hemɔkɛyeli ni oyɔɔ akɛ naagbee gbii lɛ amli wɔyɔɔ lɛ mli baawa. Tamɔ bɔ ni Petro wie lɛ, wɔle bɔ ni wɔshihilɛ baaji ehã wɔsɛɛ momo, ni no hewɔ lɛ, wɔhãŋ mɛi ni heee amɛyeee akɛ Yehowa gbi lɛ ebɛŋkɛ lɛ ahã ‘wɔdũ gbɛ.’—2 Pet. 3:17.

7. Kɛ́ wɔsheɔ gbɔmɔ gbeyei lɛ, mɛni ekolɛ wɔfeŋ?

⁷ Akɛni wɔle akɛ etsɛŋ Yehowa gbi lɛ baaba hewɔ lɛ, wɔkɛ wɔbe kɛ wɔhewalɛ fɛɛ shiɛɔ sane kpakpa lɛ. Shi bei komɛi lɛ, gbɔmɔ gbeyeishemɔ hewɔ lɛ, wɔnáaa ekãa ni wɔkɛshiɛ. Nɔ ko nakai ba Petro nɔ. Be ni amɔ Yesu ni ayeɔ esane lɛ, Petro she gbeyei akɛ ebaahã ale akɛ Yesu kaselɔ ji lɛ, ni etso shii abɔ po akɛ eleee lɛ. (Mat. 26:​69-75) Shi sɛɛ mli lɛ, Petro fee ekãa ni esheee gbeyei dɔŋŋ, ni no hewɔ lɛ ewie akɛ: “Nyɛkashea nɔ ni woɔ amɛhe gbeyei lɛ gbeyei, ni nyɛkahaoa hu.” (1 Pet. 3:14) Ewiemɔi nɛɛ hãa wɔnaa akɛ, wɔbaanyɛ wɔfee ekãa ni wɔsheŋ gbɔmɔ gbeyei.

8. Mɛni baaye abua wɔ ni wɔkashe gbɔmɔ gbeyei? (1 Petro 3:15)

 ⁸ Mɛni baaye abua wɔ ni wɔkashe gbɔmɔ gbeyei? Petro tsɔɔ wɔ nɔ kome ni baanyɛ eye ebua wɔ. Ewie akɛ: “Nyɛbua Kristo lɛ yɛ nyɛtsuiiaŋ akɛ Nuŋtsɔ ni yɔɔ krɔŋkrɔŋ.” (Kanemɔ 1 Petro 3:15.) Nɔ kome ni enɛ biɔ ni wɔfee ji, ni wɔhã ehi wɔjwɛŋmɔ mli be fɛɛ be akɛ, Yesu Kristo ji wɔ-Maŋtsɛ, ni eyɛ hewalɛ kpele. No hewɔ lɛ, kɛ́ oná hegbɛ ko ni okɛbaashiɛ, ni otsui fã loo ooshe gbeyei lɛ, kaimɔ Yesu Kristo, wɔ-Maŋtsɛ lɛ. Feemɔ ehe mfoniri ni eta emaŋtsɛ sɛi lɛ nɔ yɛ ŋwɛi ni ŋwɛibɔfoi babaoo damɔ emasɛi. Kaahã ohiɛ kpa nɔ kɔkɔɔkɔ akɛ, ‘akɛ hegbɛ fɛɛ ehã lɛ yɛ ŋwɛi kɛ shikpɔŋ lɛ nɔ, ni ekɛ bo yɛ gbii lɛ fɛɛ kɛyashi je lɛ naagbee gbii lɛ amli.’ (Mat. 28:​18-20) Petro wo wɔ hewalɛ ni ‘be fɛɛ be lɛ, wɔsaa wɔhe wɔto’ koni wɔnyɛ wɔgbála wɔhemɔkɛyeli lɛ mli wɔtsɔɔ mɛi. Ani obaasumɔ ni oshiɛ ohã mɔ ko yɛ onitsumɔ he lɛ, yɛ skul, loo yɛ he kroko? Belɛ, tsɔ hiɛ osusu be pɔtɛɛ ni obaanyɛ ofee nakai kɛ nɔ ni obaanyɛ owie lɛ he. Sɔlemɔ ni Yehowa ahã ofee ekãa, ni ohe oye akɛ ebaaye ebua bo ni okashe gbɔmɔ gbeyei.—Bɔf. 4:29.

9. Be ko lɛ, mɛɛ gbɛ nɔ Petro eyajieee suɔmɔ kpo? (Kwɛmɔ mfoniri lɛ hu.)

⁹ Ehe bahia ni Petro aya nɔ akase bɔ ni ajieɔ suɔmɔ kpo. Eyɛ jɛmɛ be ni Yesu wie akɛ, “Miihã  nyɛ kitã hee akɛ nyɛsumɔsumɔa nyɛhe; bɔ ni misumɔ nyɛ lɛ, nyɛ hu nyɛsumɔsumɔa nyɛhe nakai nɔŋŋ” lɛ. (Yoh. 13:34) Fɛɛ sɛɛ lɛ, sɛɛ mli lɛ, Petro kɛ Jeŋmajiaŋbii ni ebatsɔmɔ Kristofoi lɛ kpa niyeli, ejaakɛ eeshe Kristofoi ni ji Yudafoi lɛ gbeyei. Bɔfo Paulo na akɛ nɔ ni Petro feɔ lɛ “osato” ni, ni ejaje lɛ. (Gal. 2:​11-14) Petro kase nii kɛjɛ jajemɔ ni Paulo jaje lɛ lɛ mli. Yɛ woji enyɔ ni Petro ŋmala lɛ amli lɛ, ehã wɔna akɛ, kɛ́ wɔkɛɛ wɔsumɔɔ wɔnyɛmimɛi lɛ, esa akɛ wɔkɛ wɔnifeemɔ atsɔɔ nakai.

10. Mɛni hãa wɔjieɔ “nyɛmimɛi ateŋ suɔmɔ ni osato bɛ mli” kpo? (1 Petro 1:22)

¹⁰ Petro kɛɛ, esa akɛ wɔjie “nyɛmimɛi ateŋ suɔmɔ ni osato bɛ mli” kpo wɔtsɔɔ wɔnyɛmimɛi Kristofoi lɛ. (Kanemɔ 1 Petro 1:22.) Ewie akɛ, “anɔkwale lɛ toiboo” ji nɔ ni baahã wɔná suɔmɔ ni tamɔ nɛkɛ. Anɔkwale nɛɛ eko ji akɛ, “Nyɔŋmɔ kwɛɛɛ mɛi ahiɛiaŋ.” (Bɔf. 10:​34, 35) Kɛ́ wɔsumɔɔ wɔsafoŋbii lɛ ateŋ mɛi komɛi asane, shi wɔsumɔɔɔ mɛi komɛi asane lɛ, wɔnyɛŋ wɔkɛɛ akɛ wɔmiiye Yesu famɔ akɛ wɔsumɔ wɔnyɛmimɛi Kristofoi lɛ nɔ. Eyɛ mli akɛ naanyobɔɔ ni yɔɔ wɔ kɛ amɛteŋ mɛi komɛi ateŋ lɛ mli baanyɛ awa fe mɛi krokomɛi anɔ, tamɔ eba lɛ yɛ Yesu gbɛfaŋ lɛ moŋ, shi tamɔ Petro wie lɛ, esa akɛ wɔsumɔ wɔnyɛmimɛi lɛ fɛɛ, ejaakɛ weku kome mli bii ji wɔ.—Yoh. 13:23; 20:2; 1 Pet. 2:17.

11. Kɛ́ akɛɛ ‘wɔjɛ wɔtsuiŋ wɔsumɔ wɔnyɛmimɛi lɛ waa’ lɛ, te atsɔɔ tɛŋŋ?

¹¹ Petro wo wɔ hewalɛ ni ‘wɔjɛ wɔtsuiŋ wɔsumɔsumɔɔ wɔhe waa.’ Kɛ́ akɛɛ wɔsumɔ wɔnyɛmimɛi lɛ “waa” lɛ, yɛ ŋmalɛ nɛɛ mli lɛ nɔ ni etsɔɔ ji, ni wɔbaamia wɔhiɛ wɔsumɔ amɛ kɛji wɔnuuu he akɛ wɔfee nakai po. Akɛ nɔkwɛmɔnɔ lɛ, ŋɔɔ lɛ akɛ nyɛmi ko efee bo nɔ ko ni edɔ bo waa. Ekolɛ nɔ ni baaba ojwɛŋmɔ mli nɔŋŋ ji, ni ofee lɛ eko kɛtse, moŋ fe ni obaajie suɔmɔ kpo otsɔɔ lɛ. Shi Yesu hã Petro le akɛ, kɛ́ mɔ ko fee wɔ nɔ ko ni wɔfee lɛ eko kɛtse lɛ, esaaa Nyɔŋmɔ hiɛ. (Yoh. 18:​10, 11) Petro wie akɛ: “Nyɛkɛ efɔŋ akatoa efɔŋ najiaŋ, loo jɛmɔ yɛ jɛmɔ najiaŋ. Shi moŋ, nyɛjɔa kɛtoa najiaŋ.” (1 Pet. 3:9) Kɛ́ wɔsumɔɔ wɔnyɛmimɛi lɛ waa lɛ, wɔbaajie mlihilɛ kpo wɔtsɔɔ amɛ ni wɔkɛ amɛ aye jogbaŋŋ kɛ́ amɛfee wɔ nɔ ko ni edɔ wɔ po.

12. (a) Kɛ́ wɔsumɔɔ wɔnyɛmimɛi lɛ waa lɛ, mɛni ekoŋŋ no baatsirɛ wɔ ni wɔfee? (b) Be ni okwɛ vidio lɛ, mɛni otswa ofai shi akɛ obaafee? (Kwɛmɔ vidio ni ji, Baamɔ Ekomefeemɔ Ni Yɔɔ Wɔteŋ Lɛ Yi—Eji Nikeenii Ni Nɔ Bɛ ni yɔɔ jw.org lɛ nɔ lɛ.)

¹² Yɛ 1 Petro lɛ mli lɛ, ewie akɛ ‘wɔsumɔsumɔɔ wɔhe kɛ suɔmɔ ni mli wa.’ Kɛ́ wɔyɛ suɔmɔ ni tamɔ nɛkɛ lɛ, ebaahã wɔkɛ “eshai babaoo” ake, jeee eshai fioo ko pɛ. (1 Pet. 4:8) Eeenyɛ efee akɛ, be ni Petro wie enɛ lɛ, no mli lɛ nɔ ni yɔɔ ejwɛŋmɔ mli ji, nɔ ko ni Yesu tsɔɔ lɛ yɛ eshaifaa he afii komɛi ni eho lɛ. Ekolɛ, nakai beiaŋ lɛ, Petro yanu he akɛ kɛ́ ekɛ eshai ke shii kpawo lɛ, belɛ ebɔ mɔdɛŋ waa. Shi Yesu tsɔɔ lɛ kɛ wɔ fɛɛ akɛ, esa akɛ wɔkɛke “kɛyashi shii 77,” ni tsɔɔ akɛ, wɔkɛke be fɛɛ be. (Mat. 18:​21, 22) Kɛ́ ewa kɛhã bo akɛ okɛ Yesu ŋaawoo nɛɛ baatsu nii lɛ, onijiaŋ akaje wui. Jeee be fɛɛ be Yehowa tsuji náa lɛ mlɛo akɛ amɛkɛ eshai baake, ejaakɛ wɔ fɛɛ wɔyeee emuu. Nɔ ni he hiaa moŋ ji, ni obaafee nɔ fɛɛ nɔ ni obaanyɛ koni okɛ onyɛmi lɛ he ake lɛ ni osaa okɛ lɛ teŋ.

13. Mɛni baanyɛ ahã ewa kɛhã asafoŋ onukpai lɛ akɛ amɛbaasara nyɛmimɛi lɛ ni amɛwo amɛ hewalɛ?

¹³ Be ni atee Yesu shi lɛ, ekɛɛ Petro akɛ: “Kwɛmɔ migwantɛŋi bibii lɛ tamɔ tookwɛlɔ”; ni ekã shi faŋŋ akɛ, Petro hiɛ kpaaa sane nɛɛ nɔ kɔkɔɔkɔ. (Yoh. 21:16) Kɛ́ asafoŋ onukpa ji bo lɛ, nɔ ni Yesu kɛɛ Petro lɛ kɔɔ bo hu ohe. Shi jeee be fɛɛ be eyɔɔ mlɛo kɛhã asafoŋ onukpai lɛ akɛ amɛbaaná be kɛtsu nitsumɔ ni he  hiaa nɛɛ. Klɛŋklɛŋ lɛ, esa akɛ asafoŋ onukpai lɛ akwɛ amɛ diɛŋtsɛ amɛwekui lɛ ni amɛhã amɛ amɛheloonaa hiamɔ nii, amɛhã amɛná miishɛɛ, ni amɛye amɛbua amɛ koni amɛ kɛ Yehowa teŋ naanyobɔɔ lɛ mli awa. Agbɛnɛ hu, esa akɛ amɛtsu shiɛmɔ nitsumɔ lɛ kɛ ekãa ni amɛkɛfee nɔkwɛmɔnɔ amɛhã wɔ, ni amɛsaa amɛhe kɛhã nifeemɔi srɔtoi ni ahãa amɛ yɛ asafoŋ kpeei, kpeei bibii, kɛ kpeei wuji ashishi lɛ. Asafoŋ onukpai komɛi sɔmɔɔ akɛ Ajinafoi Akui Ni Kɛ Helatsamɔhei Shãraa lɛ amli bii, loo amɛkɛ LDC lɛ (Local Design/Construction Department) tsuɔ nii. Anɔkwa, asafoŋ onukpai lɛ bɛ dekã kwraa!

14. Mɛni kɛ́ asafoŋ onukpai fee lɛ, no baaye abua amɛ ni amɛnyɛ amɛkwɛ asafo lɛ nɔ jogbaŋŋ? (1 Petro 5:​1-4)

¹⁴ Petro wo enyɛmimɛi asafoŋ onukpai lɛ ŋaa akɛ: “Nyɛkwɛa Nyɔŋmɔ tooku . . . lɛ nɔ tamɔ tookwɛlɔi feɔ lɛ.” (Kanemɔ 1 Petro 5:​1-4.) Kɛ́ asafoŋ onukpa ji bo lɛ, wɔle akɛ osumɔɔ onyɛmimɛi lɛ asane waa, ni oosumɔ ni oyasara amɛ ni owo amɛ hewalɛ. Shi bei komɛi lɛ, dekã ni onáaa loo bɔ ni etɔɔ bo sɔŋŋ hewɔ lɛ, ekolɛ onyɛɛɛ ofee enɛ. Kɛ́ nakai lɛ, mɛni obaanyɛ ofee yɛ naagba nɛɛ he? Gbaa Yehowa onaagbai lɛ fɛɛ, ni ohã ele akɛ oosumɔ waa ni oye obua nyɛmimɛi lɛ. Petro wie akɛ: “Kɛ́ sɔɔmɔ mɔ ko sɔmɔɔ lɛ, esɔmɔ akɛ hewalɛ ni Nyɔŋmɔ hãa lɛ mli ejɛɔ esɔmɔɔ.” (1 Pet. 4:11) Ekolɛ naagbai ni nyɛmimɛi lɛ kɛkpeɔ lɛ, ja jeŋ hee lɛ mli dani abaanyɛ atsu he nii. Shi kaimɔ akɛ, Yesu Kristo, “tookwɛlɔnukpa lɛ,” baanyɛ eye ebua amɛ fe bɔ ni obaanyɛ, ni ebaanyɛ efee nakai bianɛ, kɛ agbɛnɛ hu, yɛ jeŋ hee lɛ mli. Asafoŋ onukpai, nɔ ni Yehowa taoɔ ni nyɛfee kɛkɛ ji, ni nyɛsumɔ nyɛnyɛmimɛi lɛ, nyɛsara amɛ ni nyɛwo amɛ hewalɛ, ni ‘nyɛfee nɔkwɛmɔnɔ kpakpa nyɛhã tooku lɛ.’

15. Mɛni asafoŋ onukpa ko feɔ kɛyeɔ ebuaa esafo lɛ mli bii lɛ? (Kwɛmɔ mfoniri lɛ hu.)

¹⁵ Nyɛmi nuu ko ni atsɛɔ lɛ William ni kɛ afii babaoo esɔmɔ akɛ asafoŋ onukpa lɛ le akɛ, ehe miihia waa ni asara nyɛmimɛi lɛ ni awo amɛ hewalɛ. Be ni COVID-19 lɛ je shi lɛ, lɛ kɛ asafoŋ onukpai krokomɛi ni yɔɔ esafo lɛ mli lɛ kpɛ amɛyiŋ akɛ, daa otsi lɛ, amɛbaabi nyɛmimɛi ni yɔɔ amɛshiɛmɔyaa kuu lɛ mli lɛ ateŋ mɔ fɛɛ mɔ shi ni amɛwo lɛ hewalɛ. Etsɔɔ nɔ hewɔ ni amɛfee nakai. Ewie akɛ: “Nyɛmimɛi lɛ babaoo yɛ ni amɛ kome too amɛyɔɔ shĩa, ni ewaaa akɛ amɛbaasusu nibii ni baanyɛ  ahã amɛhemɔkɛyeli lɛ mli agbɔjɔ lɛ ahe.” Kɛ́ William yɔse akɛ nyɛmi ko yɛ naagba lɛ, eboɔ lɛ toi jogbaŋŋ koni ena nɔ tuuntu ni haoɔ lɛ lɛ kɛ nɔ ni ebaanyɛ efee kɛye ebua lɛ. No sɛɛ lɛ, etaoɔ nɔ ko, ekolɛ vidio ko yɛ wɔwɛbsaiti lɛ nɔ, ni ekɛyeɔ ebuaa lɛ. Ewie akɛ: “Bianɛ lɛ, ehe miihia ni asara nyɛmimɛi lɛ ni awo amɛ hewalɛ fe bei fɛɛ ni eho. Wɔfeɔ nɔ fɛɛ nɔ ni wɔbaanyɛ kɛyeɔ wɔbuaa mɛi koni amɛbale Yehowa; nakai nɔŋŋ esa akɛ wɔfee bɔ fɛɛ bɔ ni wɔbaanyɛ kɛsara nyɛmimɛi lɛ ni wɔwo amɛ hewalɛ ni wɔye wɔbua amɛ koni amɛhi anɔkwale lɛ mli.”

16. Mɛɛ nibii kɛ́ wɔfee lɛ, no baatsɔɔ akɛ wɔkɛ nibii ni wɔkase yɛ Petro woji lɛ amli lɛ miitsu nii?

¹⁶ Wɔkase nibii fioo kɛjɛ woji enyɔ ni Petro ŋmala lɛ amli. Ekolɛ ona nibii komɛi ni esa akɛ oya ohiɛ yɛ mli. Akɛ nɔkwɛmɔnɔ lɛ, ani obaasumɔ ni ofɔ jɔɔmɔi ni wɔbaaná yɛ jeŋ hee lɛ mli lɛ ahe susumɔ fe bɔ ni ofeɔ bianɛ lɛ? Ani okɛma ohiɛ akɛ obaashiɛ ohã mɛi yɛ onitsumɔ he lɛ, yɛ skul, loo yɛ he kroko? Ani ona nibii komɛi ni obaanyɛ ofee kɛtsɔɔ akɛ osumɔɔ onyɛmimɛi Kristofoi lɛ waa? Asafoŋ onukpai, ani nyɛtswa nyɛfai shi akɛ nyɛbaajɛ nyɛsuɔmɔ mli nyɛkwɛ Yehowa webii lɛ anɔ ni nyɛbaafee nakai kɛ tsui jurɔ? Kɛ́ wɔpɛi wɔmli jogbaŋŋ lɛ, ekolɛ wɔbaana akɛ eshwɛɔ wɔ fioo yɛ hei komɛi. Shi esaaa akɛ wɔhãa no jeɔ wɔnijiaŋ wui. “Nuŋtsɔ lɛ mli hi,” ni ebaaye ebua wɔ ni wɔya wɔhiɛ. (1 Pet. 2:3) Petro kɛɛ: ‘Nyɔŋmɔ diɛŋtsɛ baagbe wɔtsɔsemɔ lɛ naa. Ebaahã wɔhe awa, ebaawaje wɔ, ebaahã wɔnaji amɔmɔ shi jogbaŋŋ.’—1 Pet. 5:10.

17. Kɛ́ otee nɔ osɔmɔ Yehowa, ni ohã etsɔse bo lɛ, mɛni obaaná?

¹⁷ Petro nu he akɛ esaaa mɔ ni bɛŋkɛɔ Nyɔŋmɔ Bi lɛ. (Luka 5:8) Shi Yehowa kɛ Yesu yelikɛbuamɔ naa lɛ, ebatsɔ Kristo sɛɛnyiɛlɔ, ni enyiɛ esɛɛ ewala gbii fɛɛ. Enɛ hewɔ lɛ, Yehowa hã Petro hegbɛ ni ebote “wɔ-Nuŋtsɔ kɛ Yiwalaherelɔ Yesu Kristo naanɔ Maŋtsɛyeli lɛ mli.” (2 Pet. 1:11) Enɛ ji jɔɔmɔ ni nɔ bɛ! Kɛ́ bo hu otee nɔ osɔmɔ Yehowa tamɔ Petro fee lɛ, ni ohã Yehowa tsɔse bo lɛ, bo hu obaaná naanɔ wala, ni ‘onine baashɛ oyiwalaheremɔ lɛ, ni ji ohemɔkɛyeli lɛ he oti lɛ nɔ.’—1 Pet. 1:9.