1. Mɛni ji yiŋ ni hi fe fɛɛ ni mɔ baanyɛ akpɛ yɛ eshihilɛ mli?

FƆLƆI, bei pii lɛ, nibii ni nyɛfeɔ lɛ saa nyɛbii lɛ ahe bei kplaŋŋ. Kɛ́ nyɛkpɛɛɛ nyɛyiŋ yɛ nilee mli ni nyɛfee nibii gbohii lɛ, no baanyɛ ahã nyɛbii lɛ aná naagbai. Shi kɛ́ nyɛkpɛ nyɛyiŋ yɛ nilee mli lɛ, no baanyɛ aye abua nyɛbii lɛ waa ni amɛná miishɛɛ ni amɛtsui anyɔ amɛmli. Shi bii, nyɛ hu ehe baahia ni nyɛkpɛ nyɛyiŋ yɛ nilee mli ni nyɛfee nibii kpakpai. Yiŋ ni hi fe fɛɛ ni mɔ ko baanyɛ ekpɛ yɛ eshihilɛ mli ji, ni ebaasɔmɔ Yehowa, wɔ-Tsɛ ni yɔɔ ŋwɛi ni sumɔɔ wɔ lɛ.​—Lala 73:28.

2. Mɛɛ yiŋ kpakpai Yesu kɛ efɔlɔi kpɛ?

² Yesu fɔlɔi tswa amɛfai shi akɛ amɛbaaye amɛbua amɛbii lɛ koni amɛsɔmɔ Yehowa, ni yiŋ srɔtoi ni amɛkpɛ yɛ shihilɛ mli lɛ hãa wɔnaa akɛ, amɛkɛ Yehowa sɔɔmɔ shwɛɛɛ kwraa. (Luka 2:40, 41, 52) Yesu hu kpɛ eyiŋ yɛ nilee mli, ni no ye ebua lɛ ni efee nibii ni Yehowa miisumɔ ni efee lɛ. (Mat. 4:1-10) Be ni eda lɛ, abale lɛ akɛ mɔ ko ni mli hi, ni yeɔ anɔkwa, ni yɔɔ ekãa. Mɛɛ fɔlɔ ni sumɔɔ Yehowa náŋ miishɛɛ kɛ́ ená bi ni tamɔ nakai?

3. Mɛɛ sanebimɔi wɔbaahã hetoo yɛ nikasemɔ nɛɛ mli?

³ Yɛ nikasemɔ nɛɛ mli lɛ, wɔbaahã sanebimɔi ni nyiɛ sɛɛ nɛɛ hetoo: Mɛɛ yiŋ kpakpai Yehowa kpɛ ni ye ebua Yesu? Mɛɛ gbɛ nɔ fɔlɔi baanyɛ akase Yesu mami kɛ epapa? Ni mɛɛ gbɛ nɔ bii baanyɛ akase Yesu?

4. Mɛɛ nɔ ko ni he hiaa waa Yehowa fee ehã e-Bi lɛ?

⁴ Yehowa dro Yesu fɔlɔi kpakpai. (Mat. 1:18-23; Luka 1:26-38) Nibii ni Maria wie ni abɔ he amaniɛ yɛ Biblia lɛ  mli lɛ hãa wɔnaa akɛ, esumɔɔ Yehowa kɛ e-Wiemɔ lɛ waa. (Luka 1:46-55) Bɔ ni Yosef hu fee enii ehã be ni Yehowa kɛ gbɛtsɔɔmɔi hã lɛ lɛ hãa wɔnaa akɛ, esheɔ Nyɔŋmɔ gbeyei, ni eesumɔ ni efee nɔ ni sa ehiɛ.​—Mat. 1:24.

5-6. Mɛɛ naagbai Yehowa ŋmɛ gbɛ ni e-Bi lɛ kɛkpe?

⁵ Esa kadimɔ waa akɛ, Yehowa halaaa niiatsɛmɛi akɛ Yesu fɔlɔi. Be ni Maria fɔ Yesu lɛ, kooloo ni amɛkɛyashã afɔle lɛ hãa wɔnaa akɛ ohiafoi ji amɛ. (Luka 2:24) Eeenyɛ efee akɛ, no mli lɛ Yosef yɛ he ko fioo yɛ amɛshĩa lɛ masɛi yɛ Nazaret ni etsuɔ ekapinta nitsumɔ lɛ yɛ. Ŋwanejee ko bɛ he akɛ, Yosef kɛ eweku lɛ bɛ heloonaa nibii pii, titri lɛ, akɛni no mli lɛ eyɛ kɛ́ hooo kwraa lɛ bii kpawo ni esa akɛ ekwɛ lɛ hewɔ.​—Mat. 13:55, 56.

⁶ Eyɛ mli akɛ Yehowa bu Yesu he kɛje oshãrai komɛi ahe moŋ, shi eŋmɛ gbɛ ni ekɛ naagbai kpe. (Mat. 2:13-15) Akɛ nɔkwɛmɔnɔ lɛ, be ni Yesu yɔɔ shikpɔŋ lɛ nɔ lɛ, lɛ diɛŋtsɛ eweku lɛ mli bii lɛ ateŋ mɛi komɛi heee amɛyeee akɛ lɛ ji Mesia lɛ, ni ekã shi faŋŋ akɛ, enɛ dɔ lɛ waa. (Mar. 3:21; Yoh. 7:5) Agbɛnɛ hu, etamɔ nɔ ni Yosef, mɔ ni ŋɔ Yesu efee ebi lɛ, gbo be ni Yesu ji oblanyo, ni ekã shi faŋŋ akɛ, enɛ hu dɔ lɛ waa. Yesu ji binukpa. No hewɔ lɛ, be ni epapa gbo lɛ, eeenyɛ efee akɛ kapinta nitsumɔ lɛ baje edɛŋ. (Mar. 6:3) Be ni Yesu da lɛ, ehe bahia ni ekwɛ weku lɛ. Ŋwanejee ko bɛ he akɛ, enɛ bi ni etsu nii waa koni ená shika ni ekɛhé amɛhiamɔ nii ehã amɛ, ni no hã etɔ lɛ waa.

7. (a) Mɛɛ saji esa akɛ mɛi ni ebote gbalashihilɛ mli lɛ abi amɛhe yɛ biiakwɛmɔ he? (b) Mɛɛ gbɛ nɔ Abɛi 2:1-6 lɛ baanyɛ aye abua fɔlɔi ni amɛtsɔse amɛbii?

⁷ Ani obote gbalashihilɛ mli ni obaasumɔ ni ofɔ? Bii ajara wa. No hewɔ lɛ, bi ohe akɛ: ‘Ani Yehowa naa mi kɛ mihefatalɔ lɛ akɛ mɛi ni baa amɛhe shi ni hiɛ dɔɔ mumɔŋ nibii ahe bɔ ni abaanyɛ atu bi awo amɛdɛŋ?’ (Lala 127:3, 4) Kɛ́ fɔlɔ ji bo momo lɛ, bi ohe akɛ: ‘Ani miiye miibua mibii lɛ koni amɛhiɛ awa kɛ nitsumɔ?’ (Jaj. 3:12, 13) ‘Ani miifee nɔ fɛɛ nɔ ni manyɛ kɛmiibu amɛhe koni Satan je lɛ akaye amɛ awui loo efite amɛ?’ (Abɛi 22:3) Onyɛŋ obu obii lɛ ahe kɛje naagbai fɛɛ ni amɛkɛbaakpe lɛ ahe kɔkɔɔkɔ. Shi obaanyɛ ojɛ suɔmɔ mli otsɔɔ amɛ nii, koni fiofio lɛ, amɛle bɔ ni akɛ Nyɔŋmɔ Wiemɔ lɛ tsuɔ naagbai ahe nii. (Kanemɔ Abɛi 2:1-6.)  Akɛ nɔkwɛmɔnɔ lɛ, kɛ́ nyɛwekunyo ko kpa Yehowa sɔɔmɔ lɛ, okɛ Nyɔŋmɔ Wiemɔ lɛ aye abua obii lɛ ni amɛna nɔ hewɔ ni ehe miihia ni amɛye Yehowa anɔkwa daa. (Lala 31:23) Aloo kɛ́ nyɛwekunyo loo nyɛnaanyo ko gbo lɛ, tsɔɔmɔ amɛ ŋmalɛi ni baanyɛ ashɛje amɛmii.​—2 Kor. 1:3, 4; 2 Tim. 3:16.

8. Yɛ nɔ ni awie yɛ 5 Mose 6:6, 7 lɛ naa lɛ, mɛni ehe bahia ni Yosef kɛ Maria afee?

⁸ Yosef kɛ Maria kɛ gbɛtsɔɔmɔi ni Yehowa kɛhã fɔlɔi lɛ tsu nii, ni no hewɔ lɛ, amɛnyɛ amɛye amɛbua Yesu ni be ni eda lɛ, enyɛ efee Yehowa suɔmɔnaa nii. (Kanemɔ 5 Mose 6:6, 7.) Yosef kɛ Maria sumɔɔ Yehowa waa, ni amɛtswa amɛfai shi akɛ amɛbaaye amɛbua amɛbii lɛ koni amɛ hu amɛsumɔ Yehowa waa.

9. Mɛɛ nɔ ko ni he hiaa waa Yosef kɛ Maria fee? Okɛ enɛ he nɔkwɛmɔnii ahã.

⁹ Yosef kɛ Maria kɛ amɛbii lɛ fee ekome kɛjá Yehowa be fɛɛ be. Ŋwanejee ko bɛ he akɛ, amɛtee kpeei daa otsi yɛ kpeehe ni yɔɔ Nazaret lɛ, ni daa afi lɛ, amɛyaa Yerusalem kɛhã Hehoo lɛ. (Luka 2:41; 4:16) Eeenyɛ efee akɛ, kɛ́ weku lɛ miifã gbɛ kɛmiiya Yerusalem lɛ, Yosef kɛ Maria gbaa Yesu kɛ enyɛmimɛi lɛ Yehowa webii lɛ ayinɔsane, ni ekolɛ amɛyasharaa shi yɛ hei komɛi ni atsĩ tã yɛ Ŋmalɛ lɛ mli lɛ. Ekã shi faŋŋ akɛ, be ni gbekɛbii lɛ ayi bafa lɛ, Yosef kɛ Maria náaa lɛ mlɛo akɛ amɛbaaya nɔ amɛkɛ amɛ afee ekome ni amɛjá Yehowa daa gbi. Shi amɛmia amɛhiɛ amɛfee nakai, ni amɛná he sɛɛ waa! Akɛni amɛhã Yehowa jamɔ lɛ he hia amɛ fe nɔ fɛɛ nɔ hewɔ lɛ, wekukpaa ni yɔɔ amɛweku lɛ kɛ Yehowa teŋ lɛ mli bawa.

10. Mɛɛ gbɛ nɔ fɔlɔi baanyɛ akase Yosef kɛ Maria?

¹⁰ Fɔlɔi ni sheɔ Nyɔŋmɔ gbeyei, mɛɛ gbɛ nɔ nyɛbaanyɛ nyɛkase Yosef kɛ Maria? Nyɛtsɔa nyɛwiemɔ kɛ nyɛnifeemɔ nɔ nyɛhãa nyɛbii lɛ anaa akɛ nyɛsumɔɔ Yehowa kɛ nyɛtsui muu fɛɛ. Enɛ he miihia waa. Nyɛhãa ehia nyɛjwɛŋmɔ mli akɛ, kɛ́ nyɛye nyɛbua nyɛbii lɛ koni amɛsumɔ Yehowa lɛ, nyɛhã amɛ nikeenii ko ni nɔ bɛ. Nibii ni he hiaa waa ni nyɛbaanyɛ nyɛtsɔɔ amɛ lɛ ateŋ ekome ji, ni nyɛbaaye nyɛbua amɛ ni amɛkase nii, amɛsɔle, amɛya asafoŋ kpeei, ni amɛya shiɛmɔ daa. (1 Tim. 6:6) Ehe miihia ni nyɛhã nyɛbii lɛ  amɛheloŋ hiamɔ nii. (1 Tim. 5:8) Shi nyɛkahãa nyɛhiɛ kpaa nɔ akɛ, wekukpaa kpakpa ni yɔɔ nyɛbii lɛ kɛ Yehowa teŋ lɛ ji nɔ ni baaye abua amɛ ni amɛfo jeŋ momo nɛɛ ni amɛyabote Nyɔŋmɔ jeŋ hee lɛ mli, jeee heloonaa nibii. *​—Eze. 7:19; 1 Tim. 4:8.

11. (a) Mɛɛ gbɛ nɔ ŋaa ni awo yɛ 1 Timoteo 6:17-19 lɛ baaye abua fɔlɔi ni amɛfee nibii ni baahã wekukpaa ni yɔɔ amɛbii lɛ kɛ Yehowa teŋ lɛ mli awa? (b) Mɛɛ otii nyɛweku lɛ baasumɔ ni nyɛkɛmamɔ nyɛhiɛ? Ni mɛɛ gbɛ nɔ nyɛbaaná he sɛɛ? (Kwɛmɔ akrabatsa ni yitso ji, “ Otii Komɛi Ni Nyɛbaanyɛ Nyɛkɛmamɔ Nyɛhiɛ.”)

¹¹ Eŋɔɔ wɔnaa waa akɛ, fɔlɔi pii ni yɔɔ Yehowa asafo lɛ mli lɛ miifee nibii ni baahã wekukpaa ni yɔɔ amɛbii lɛ kɛ Yehowa teŋ lɛ mli awa. Amɛkɛ amɛbii lɛ feɔ ekome kɛjáa Yehowa daa. Amɛyaa asafoŋ kpeei, kpeei bibii, kɛ kpeei wuji, ni amɛyaa shiɛmɔ hu. Wekui komɛi po yashiɛɔ yɛ shikpɔŋkukuji ni afɔɔɔ mli nitsumɔ, amɛyasaraa Betel, loo amɛyayeɔ amɛbuaa yɛ hei ni aamamɔ Maŋtsɛyeli Asai, Kpee Asai, loo tsũi krokomɛi ni tamɔ nakai lɛ yɛ. Wekui ni feɔ nibii nɛɛ kɛ amɛshika kɛ heloonaa nibii shãa afɔle, ni bei komɛi lɛ, amɛkɛ naagbai kpeɔ. Shi Yehowa jɔɔ amɛ waa. (Kanemɔ 1 Timoteo 6:17-19.) Bei pii lɛ, gbekɛbii ni atsɔse amɛ yɛ wekui ni tamɔ nɛkɛ amli lɛ kɛ sui kpakpai ni amɛkase lɛ daa, ni amɛdaa Yehowa shi akɛ amɛfɔlɔi tsɔse amɛ nakai. *​—Abɛi 10:22.

12. Be ni Yesu da lɛ, mɛni ehe bahia ni ekpɛ eyiŋ yɛ he?

¹² Yiŋ fɛɛ yiŋ ni Yehowa, ni ji Yesu Tsɛ ni yɔɔ ŋwɛi lɛ kpɛɔ lɛ hi. Yesu mami kɛ epapa hu fee nibii ni baahã Yesu asumɔ Yehowa waa. Shi be ni Yesu da lɛ, ehe bahia ni ekpɛ eyiŋ kɛji ebaafee Yehowa suɔmɔnaa nii aloo efeŋ. (Gal. 6:5) Kulɛ, Yesu baanyɛ akpɛ eyiŋ akɛ ebaafee nɔ ni lɛ diɛŋtsɛ esumɔɔ, ejaakɛ eyɛ heyeli, tamɔ bɔ ni wɔ hu wɔyɔɔ lɛ nɔŋŋ. Shi efeee nakai. Moŋ lɛ, efee nibii ni baahã wekukpaa kpakpa ahi ekɛ Yehowa teŋ be fɛɛ be. (Yoh. 8:29) Oblahii kɛ oblayei, mɛɛ gbɛ nɔ nyɛbaanyɛ nyɛkase lɛ?

13. Mɛni Yesu fee yɛ egbekɛbiiashi?

¹³ Yesu gbekɛbiiashi lɛ, ebo efɔlɔi toi, ni ekɛ gbɛtsɔɔmɔi fɛɛ ni amɛkɛhã lɛ lɛ tsu nii. Enuuu he akɛ ele nii fe amɛ. Moŋ lɛ, “etee nɔ eba ehe shi ewo amɛshishi.” (Luka 2:51) Agbɛnɛ hu, Yesu tsu sɔ̃i ni jwere enɔ akɛ binukpa lɛ ahe nii jogbaŋŋ. Ŋwanejee ko bɛ he akɛ, be ni epapa Yosef tsɔɔ lɛ kapinta nitsumɔ lɛ, etse ehe ekase lɛ jogbaŋŋ, ni no hewɔ lɛ, enyɛ eye ebua kɛ weku lɛ kwɛmɔ.

14. Mɛni hãa wɔnaa akɛ Yesu kase Nyɔŋmɔ Wiemɔ lɛ jogbaŋŋ?

¹⁴ Ekã shi faŋŋ akɛ, Yesu fɔlɔi gba lɛ bɔ ni  fee ni afɔ lɛ, kɛ nibii ni ŋwɛibɔfoi lɛ wie yɛ ehe. (Luka 2:8-19, 25-38) Shi Yesu diɛŋtsɛ hu he be ekase Ŋmalɛ lɛ. Enɛ hewɔ be ni eta tsɔɔlɔi lɛ ateŋ yɛ Yerusalem lɛ ‘amɛnaa kpɛ amɛhe waa yɛ eniiashishinumɔ kɛ hetoi ni ehãa lɛ hewɔ’ lɛ. (Luka 2:46, 47) Nakai beiaŋ lɛ, ekase ni ebanu shishi akɛ Yehowa ji e-Tsɛ, tsɛ afii 12 pɛ eye.​—Luka 2:42, 43, 49.

15. Mɛɛ gbɛ nɔ Yesu tsɔɔ akɛ eesumɔ ni efee e-Tsɛ lɛ suɔmɔnaa nii?

¹⁵ Be ni Yesu bale nitsumɔ ni Yehowa kɛwo edɛŋ lɛ, ejɛ esuɔmɔ mli emɔ mli ni etsu. (Yoh. 6:38) Yesu le akɛ mɛi pii baanyɛ lɛ, ni ená kulɛ ebaŋ lɛ nakai. Shi ehãaa no awo enajiaŋ. Eba ehe shi ni ebo Yehowa toi. Be ni abaptisi lɛ yɛ afi 29 Ŋ.B. lɛ, oti titri ni ekɛma ehiɛ ji ni ebaafee Yehowa suɔmɔnaa nii. (Heb. 10:5-7) Yesu fee e-Tsɛ lɛ suɔmɔnaa nii kɛtee gbele mli tɔ̃ɔ yɛ piŋmɔ tso lɛ nɔ.​—Yoh. 19:30.

16. Mɛni ji nɔ kome ni kɛ́ gbekɛbii fee lɛ, no baatsɔɔ akɛ amɛmiikase Yesu?

¹⁶ Bo ofɔlɔi toi. Bɔ ni Yosef kɛ Maria yeee emuu lɛ, nakai nɔŋŋ ofɔlɔi hu yeee emuu. Kɛ̃lɛ, Yehowa kɛ nitsumɔ ewo amɛdɛŋ akɛ amɛbu ohe, amɛtsɔse bo, ni amɛtsɔɔ bo nii. Kɛ́ okase Yesu, ni obo amɛŋaawoo toi ni obu amɛ lɛ, ‘ebaahi ehã bo.’​—Efe. 6:1-4.

17. Yɛ nɔ ni awie yɛ Yoshua 24:15 lɛ naa lɛ, mɛni esa akɛ oblahii kɛ oblayei akpɛ amɛyiŋ yɛ he?

¹⁷ Tswaa ofai shi akɛ obaasɔmɔ Yehowa. Kɛ́ okase Yehowa he nii lɛ, obaale lɛ jogbaŋŋ, ni obaale nibii ni eto eyiŋ akɛ ebaafee lɛ hu. Agbɛnɛ hu, obaale bɔ ni eesumɔ ni ohi shi ohã, kɛ bɔ ni obaafee ohi shi nakai. (Rom. 12:2) Kɛ́ obale Yehowa jogbaŋŋ lɛ, no baatsirɛ bo ni okpɛ oyiŋ akɛ obaasɔmɔ lɛ, ni nɔ ko bɛ ni he hiaa fe enɛ. (Kanemɔ Yoshua 24:15; Jaj. 12:1) Kɛ́ okane Biblia lɛ daa lɛ, obaasumɔ Yehowa waa, ni ohemɔkɛyeli lɛ mli baawa.

18. Mɛɛ nɔ kroko ehe baahia ni oblahii kɛ oblayei ajɛ amɛsuɔmɔ mli amɛfee? Ni kɛ́ amɛfee nakai lɛ, mɛɛ gbɛ nɔ amɛbaaná he sɛɛ?

¹⁸ Tswaa ofai shi akɛ obaahã Yehowa sɔɔmɔ he ahia bo fe nibii krokomɛi fɛɛ yɛ oshihilɛ mli. Satan je lɛ hãa mɛi nuɔ he akɛ, kɛ́ amɛkɛ nyɛmɔi kɛ hesai ni amɛyɔɔ lɛ tiu ninámɔ kɛ gbɛ́ihemɔ sɛɛ lɛ, amɛbaaná miishɛɛ. Shi yɛ anɔkwale mli lɛ, mɛi ni tiuɔ nibii ni tamɔ nakai lɛ asɛɛ lɛ kɛ ‘piŋmɔi babaoo  gbulɔɔ amɛhe fɛɛ.’ (1 Tim. 6:9, 10) Kɛ́ obo Yehowa toi ni ohã esɔɔmɔ lɛ he hia bo fe nibii krokomɛi fɛɛ yɛ oshihilɛ mli lɛ, obaaná miishɛɛ, ni “obaafee onii yɛ hiɛshikamɔ mli.”​—Yos. 1:8.

19. Mɛni esa akɛ fɔlɔi akai be fɛɛ be?

¹⁹ Fɔlɔi, nyɛfea nɔ fɛɛ nɔ ni nyɛbaanyɛ kɛyea nyɛbuaa nyɛbii lɛ koni amɛsɔmɔ Yehowa. Nyɛkɛ nyɛhiɛ afɔ̃a enɔ, ni ebaaye ebua nyɛ ni nyɛkpɛ nyɛyiŋ yɛ nilee mli. (Abɛi 3:5, 6) Nyɛkaia akɛ, nibii ni nyɛfeɔ lɛ náa nyɛbii lɛ anɔ hewalɛ waa fe nibii ni nyɛkɛɔ amɛ. No hewɔ lɛ, nyɛfea nibii ni baaye abua amɛ ni amɛhi Yehowa suɔmɔ lɛ mli.

20. Mɛɛ jɔɔmɔi oblahii kɛ oblayei baaná kɛ́ amɛsɔmɔ Yehowa?

²⁰ Oblahii kɛ oblayei, nyɛfɔlɔi baanyɛ aye abua nyɛ ni nyɛkpɛ nyɛyiŋ yɛ nilee mli, ni nyɛfee nibii ni baahã Yehowa tsui anyɔ emli. Shi kɛ́ nyɛbaafee nakai jio, nyɛfeŋ nakai jio lɛ, edamɔ nyɛnɔ. No hewɔ lɛ, nyɛkasea Yesu, ni nyɛtswaa nyɛfai shi akɛ nyɛbaasɔmɔ nyɛ-Tsɛ ni yɔɔ ŋwɛi ni sumɔɔ nyɛsane lɛ. Kɛ́ nyɛfee nakai lɛ, nyɛkɛ nyɛwala baatsu nibii kpakpai pii, ni nyɛbaaná miishɛɛ amrɔ nɛɛ po. (1 Tim. 4:16) Wɔsɛɛ hu lɛ, nyɛtsui baanyɔ nyɛmli waa!