1. Mɛni ahã wɔle yɛ afi 2023 daa afi kpee lɛ shishi?

 YƐ AFI 2023 daa afi kpee lɛ shishi lɛ, ahã wɔle shishinumɔi hei komɛi ni wɔná, ni atswa adafii komɛi ni sa kadimɔ waa yɛ shiɛmɔ nitsumɔ lɛ he. a Akɛ nɔkwɛmɔnɔ lɛ, ahã wɔle akɛ, ekolɛ mɛi komɛi baaná hegbɛ amɛbafata Yehowa webii lɛ ahe yɛ Babilon Kpeteŋkpele lɛ hiɛkpatamɔ lɛ sɛɛ po. Agbɛnɛ hu, ahã wɔle akɛ kɛjɛ November 2023 lɛ, jeee nɔ fɛɛ nɔ ni wɔtsuɔ yɛ shiɛmɔ nitsumɔ lɛ mli lɛ wɔbaabɔ he amaniɛ. Ani tsakemɔi nɛɛ tsɔɔ akɛ, agbɛnɛ lɛ, shiɛmɔ nitsumɔ lɛ he ehiaaa tsɔ? Dabi kwraa!

2. Mɛni hewɔ ŋmɛnɛ lɛ, ehe miihia waa ni wɔshiɛ sane kpakpa lɛ fe bei fɛɛ ni eho? (Marko 13:10)

² Ŋmɛnɛ lɛ, ehe miihia waa ni wɔshiɛ sane kpakpa lɛ fe bei fɛɛ ni eho. Mɛni hewɔ? Ejaakɛ be ni je tsɛreɔ ni je naa lɛ, be ni eshwɛ ni naagbee lɛ baaba lɛ nɔ miigbɔ. Susumɔ nɔ ni Yesu gba yɛ shiɛmɔ nitsumɔ ni abaatsu yɛ naagbee gbii lɛ amli lɛ he lɛ he okwɛ. (Kanemɔ Marko 13:10.) Be ni Mateo bɔɔ sane nɛɛ nɔŋŋ he amaniɛ lɛ, ewie akɛ, Yesu kɛɛ abaashiɛ sane kpakpa lɛ yɛ shikpɔŋ lɛ nɔ fɛɛ dani “naagbee lɛ” aba. (Mat. 24:14) Naagbee lɛ ni Yesu wie he lɛ ji be ni abaakpãtã Satan jeŋ fɔŋ nɛɛ hiɛ kwraa lɛ. Yehowa eto ‘gbi kɛ ŋmɛlɛtswaa’ ni naagbee lɛ baaba, ni wɔle akɛ etsɛŋ. (Mat. 24:36; 25:13; Bɔf. 1:7) Anɔkwa, be ni je tsɛreɔ ni je naa lɛ, nakai gbi lɛ miibɛŋkɛ.  (Rom. 13:11) Shi kɛyashi ebaaba lɛ, esa akɛ wɔya nɔ wɔshiɛ.

3. Mɛni hewɔ wɔshiɛɔ sane kpakpa lɛ?

³ Naa sanebimɔ ko ni he hiaa waa ni esa akɛ wɔteŋ mɔ fɛɛ mɔ asusu he. No ji: Mɛni hewɔ wɔshiɛɔ sane kpakpa lɛ? Suɔmɔ hewɔ. Kɛ́ wɔshiɛ lɛ, no hãa anaa akɛ, wɔsumɔɔ sane kpakpa ni wɔshiɛɔ lɛ, wɔsumɔɔ mɛi, ni nɔ ni fe fɛɛ lɛ, wɔsumɔɔ Yehowa ni wɔmiisumɔ ni wɔtse egbɛ́i lɛ he. Nyɛhãa wɔkɔlɔa nibii nɛɛ ekomekomei ni wɔsusu he.

WƆSUMƆƆ SANE KPAKPA NI WƆSHIƐƆ LƐ

4. Kɛ́ wɔnu sane kpakpa ko lɛ, te wɔfeɔ wɔnii wɔhãa tɛŋŋ?

⁴ Ani okaiɔ bɔ ni onu he ohã be ni akɛɛ bo akɛ owekunyo ko efɔ loo onine eshɛ nitsumɔ ko ni otaoɔ lɛ nɔ loo akɛɛ bo sane kpakpa kroko ni tamɔ nakai lɛ? Ŋwanejee ko bɛ he akɛ, omii shɛ ohe aahu akɛ obɔi owekumɛi kɛ onanemɛi kɛɛmɔ. Ani jeee nakai nɔŋŋ onu he be ni onu sane kpakpa ni fe fɛɛ, ni ji Nyɔŋmɔ Maŋtsɛyeli lɛ he sane kpakpa lɛ?

5. Klɛŋklɛŋ be ni ajɛ Nyɔŋmɔ Wiemɔ lɛ mli atsɔɔ bo anɔkwale lɛ, te onu he ohã tɛŋŋ? (Kwɛmɔ mfonirii lɛ hu.)

⁵ Kaimɔ bɔ ni onu he ohã klɛŋklɛŋ be ni ajɛ Nyɔŋmɔ Wiemɔ lɛ mli atsɔɔ bo anɔkwale lɛ. Obana akɛ, o-Tsɛ ni yɔɔ ŋwɛi lɛ sumɔɔ bo, ni eesumɔ ni obafata ewebii ni efee ekome akɛ weku kɛmiijá lɛ lɛ ahe. Obana hu akɛ, ewo shi akɛ ebaafo piŋmɔ kɛ nɔnaa fɛɛ sɛɛ, ni akɛ hiɛnɔkamɔ yɛ akɛ obaana osuɔlɔi ni egboi lɛ ekoŋŋ yɛ jeŋ hee lɛ mli. Jeee nibii nɛɛ pɛ okase, okase nibii pii krokomɛi hu. (Mar. 10:​29, 30; Yoh. 5:​28, 29; Rom. 8:​38, 39; Kpo. 21:​3, 4) Nibii nɛɛ ni okase lɛ hã oná miishɛɛ waa. (Luka 24:32) Obasumɔ nibii ni okase lɛ aahu akɛ, onyɛɛɛ omua onaa, oosumɔ ni okɛɛ mɛi krokomɛi hu!—Okɛto Yeremia 20:9 lɛ he.

6. Mɛni okaseɔ yɛ Ernest kɛ Rose niiashikpamɔ lɛ mli?

⁶ Naa nyɛmi nuu ko ni atsɛɔ lɛ Ernest lɛ  niiashikpamɔ. b Be ni epapa gbo lɛ, no mli lɛ eye aaafee afii nyɔŋma pɛ. Ewie akɛ: “Mibi mihe akɛ: ‘Ani etee ŋwɛi? Aloo ebɛ shihilɛ mli dɔŋŋ?’ Kɛ́ mina gbekɛbii krokomɛi ni amɛtsɛmɛi yɛ wala mli lolo lɛ, miyeɔ amɛhe awuŋa.” Ernest yaa gɔɔ lɛ mli daa ni eyakulaa epapa saŋ lɛ hiɛ ni esɔleɔ akɛ: “Nyɔŋmɔ, ofainɛ miitao male he ni mipapa yɔɔ.” Ernest papa gbele lɛ sɛɛ aaafee afii 17 lɛ, Yehowa Odasefonyo ko kɛɛ lɛ akɛ ebaasumɔ ni ekɛ lɛ akase Biblia lɛ, ni ekpɛlɛ. Be ni ekase akɛ gbohii lɛ leee nɔ ko nɔ ko, ni etamɔ nɔ ni amɛwɔ vii, ni akɛ Nyɔŋmɔ ewo shi yɛ Biblia lɛ mli akɛ wɔsɛɛ lɛ ebaatee gbohii ashi lɛ, ená miishɛɛ waa. (Jaj. 9:​5, 10; Bɔf. 24:15) Etsui nyɔ emli, ejaakɛ agbɛnɛ lɛ, ená sanebimɔi ni ehao lɛ afii pii lɛ ahetoo. Ernest ná nibii ni ekaseɔ yɛ Biblia lɛ mli lɛ ahe miishɛɛ waa. Eŋa Rose bafata ehe ni amɛ fɛɛ amɛkase nii lɛ, ni lɛ hu ená nɔ ni ekaseɔ lɛ he miishɛɛ waa. Yɛ afi 1978 lɛ, abaptisi amɛ. Amɛkɛ ekãa shiɛ nibii ni amɛkase ni eta amɛtsuiŋ waa lɛ amɛhã amɛwekumɛi, amɛnanemɛi, kɛ mɛi fɛɛ ni baabo toi. Mɛni ejɛ enɛ mli kɛba? Ernest kɛ Rose enyɛ amɛye amɛbua mɛi 70 kɛ sɛɛ ni amɛtee amɛhiɛ ni abaptisi amɛ.

7. Kɛ́ wɔsumɔɔ nibii ni wɔkase yɛ Biblia lɛ mli lɛ waa lɛ, mɛni wɔbaafee? (Luka 6:45)

⁷ No hewɔ lɛ, eyɛ faŋŋ akɛ, kɛ́ wɔsumɔɔ nibii ni wɔkase yɛ Biblia lɛ mli lɛ waa lɛ, wɔnyɛŋ wɔmua wɔnaa; wɔbaashiɛ wɔhã mɔ fɛɛ mɔ. (Kanemɔ Luka 6:45.) Wɔnuɔ he tamɔ bɔ ni Yesu kaselɔi ni hi shi yɛ blema lɛ nu he lɛ. Amɛwie akɛ: “Wɔnyɛŋ wɔkpa nibii ni wɔna kɛ nibii ni wɔnu lɛ ahe wiemɔ.” (Bɔf. 4:20) Wɔsumɔɔ anɔkwale lɛ waa, no hewɔ lɛ, wɔmiisumɔ ni wɔgba mɔ fɛɛ mɔ.

WƆSUMƆƆ MƐI

8. Mɛni tsirɛɔ wɔ ni wɔshiɛ sane kpakpa lɛ wɔhã mɛi? (Kwɛmɔ akrabatsa ni ji, “ Suɔmɔ Mɛi—Feemɔ Amɛ Kaselɔi.”) (Kwɛmɔ mfoniri lɛ hu.)

⁸ Yehowa kɛ e-Bi lɛ sumɔɔ adesai asane, ni wɔ hu nakai nɔŋŋ. (Abɛi 8:31; Yoh. 3:16) Mɛi ni ‘bɛ Nyɔŋmɔ’ ni ‘amɛbɛ hiɛnɔkamɔ’ lɛ anii feɔ wɔ mɔbɔ waa ni wɔmiisumɔ ni wɔye wɔbua amɛ. (Efe. 2:12) Naagbai pii ni amɛkɛkpeɔ yɛ shihilɛ mli lɛ miisu amɛ, shi wɔhiɛ nɔ ni baanyɛ aye abua amɛ lɛ, ni ji Nyɔŋmɔ Maŋtsɛyeli lɛ he sane kpakpa lɛ. No hewɔ lɛ, suɔmɔ ni wɔyɔɔ kɛhã amɛ kɛ bɔ ni wɔmusuŋ tsɔɔ wɔ yɛ amɛhe lɛ, tsirɛɔ wɔ ni wɔfee bɔ fɛɛ bɔ ni wɔbaanyɛ ni wɔshiɛ sane kpakpa lɛ wɔhã amɛ. Sane kpakpa nɛɛ baanyɛ ahã amɛná hiɛnɔkamɔ, eye ebua amɛ ni amɛná miishɛɛ amrɔ nɛɛ po, ni egbele hegbɛ ehã amɛ koni wɔsɛɛ lɛ, amɛná “wala diɛŋtsɛ lɛ,”  ni tsɔɔ akɛ amɛhi shi kɛya naanɔ yɛ jeŋ hee ni baa lɛ mli.—1 Tim. 6:19.

9. Mɛni wɔbɔɔ mɛi kɔkɔ akɛ ebaaba wɔsɛɛ? Ni mɛni hewɔ? (Ezekiel 33:​7, 8)

⁹ Nɔ kroko ni suɔmɔ ni wɔyɔɔ kɛhã mɛi lɛ tsirɛɔ wɔ ni wɔfee ji, ni wɔbɔ amɛ kɔkɔ akɛ etsɛŋ, abaakpãtã jeŋ fɔŋ nɛɛ hiɛ. (Kanemɔ Ezekiel 33:​7, 8.) Wɔmusuŋ tsɔɔ wɔ waa yɛ wɔwekumɛi kɛ mɛi krokomɛi fɛɛ ni ebaleko Yehowa lɛ ahe. Mɛi pii nyiɛ ni amɛleee akɛ “amanehulu kpeteŋkpele ni anako enɔ dã kɛjɛ je lɛ shishijee aahu kɛbashi amrɔ nɛɛ, dabi, ni eko hu baŋ dɔŋŋ lɛ” miiba. (Mat. 24:21) Esa akɛ wɔhã amɛle nibii ni baaya nɔ yɛ nakai kojomɔ be lɛ mli. Klɛŋklɛŋ lɛ, abaakpãtã amale jamɔi fɛɛ ni yɔɔ je lɛ mli lɛ ahiɛ, kɛkɛ lɛ no sɛɛ lɛ, akpãtã jeŋ fɔŋ muu lɛ fɛɛ hiɛ yɛ Harmagedon. (Kpo. 16:​14, 16; 17:​16, 17; 19:​11, 19, 20) Wɔsɔlemɔ ji, mɛi pii baabo kɔkɔbɔɔ lɛ toi ni amɛbafata wɔhe kɛsɔmɔ Yehowa bianɛ. Shi kɛ́ wɔwekumɛi ni wɔsumɔɔ amɛsane waa lɛ kɛ mɛi krokomɛi ni wɔshiɛɔ wɔhãa lɛ booo kɔkɔbɔɔ lɛ toi bianɛ hu? Mɛni baaba amɛnɔ?

10. Mɛni hewɔ ehe miihia ni wɔya nɔ wɔbɔ mɛi kɔkɔ yɛ nibii ni etsɛŋ ebaaba lɛ ahe?

¹⁰ Tamɔ bɔ ni atsɔɔ mli yɛ nikasemɔ ni tsɔ hiɛ lɛ mli lɛ, ekolɛ Yehowa baahere mɛi ni baatsake amɛtsui kɛ́ amɛna Babilon Kpeteŋkpele lɛ hiɛkpatamɔ lɛ ayiwala. Kɛ́ nakai ni lɛ, esa akɛ wɔkɛ ekãa ashiɛ waa bianɛ fe bei fɛɛ ni eho. Nɔ hewɔ lɛ ji, ekolɛ nɔ ni wɔbaakɛɛ mɛi bianɛ lɛ baaka amɛjwɛŋmɔ mli, ni amɛbaakai yɛ nakai be lɛ mli. (Okɛto Ezekiel 33:33 lɛ he.) Ekolɛ amɛbaakai kɔkɔ ni wɔbɔ amɛ lɛ, ni no baatsirɛ amɛ ni amɛbafata wɔhe ni wɔsɔmɔ Yehowa dani akpãtã jeŋ fɔŋ nɛɛ hiɛ kwraa. Bɔ ni tsuŋwoohe nɔkwɛlɔ lɛ ni yɔɔ Filipi lɛ tsake etsui be ni “shikpɔŋhosomɔ kpele ko ba” lɛ sɛɛ lɛ, nakai nɔŋŋ ekolɛ mɛi komɛi ni booo kɔkɔbɔɔ lɛ toi bianɛ lɛ baatsake amɛtsui kɛ́ akpãtã Babilon Kpeteŋkpele lɛ hiɛ trukaa.—Bɔf. 16:​25-34.

WƆSUMƆƆ YEHOWA NI WƆMIISUMƆ NI WƆTSE EGBƐ́I LƐ HE

11. Mɛɛ gbɛ nɔ wɔkɛ anunyam lɛ kɛ woo lɛ kɛ hewalɛ lɛ hãa Yehowa? (Kpojiemɔ 4:11) (Kwɛmɔ mfonirii lɛ hu.)

¹¹ Yiŋtoo titri hewɔ ni wɔshiɛɔ sane kpakpa lɛ ji, wɔsumɔɔ Yehowa Nyɔŋmɔ ni wɔmiisumɔ ni wɔtse egbɛ́i krɔŋkrɔŋ lɛ he. Shiɛmɔ nitsumɔ lɛ ji gbɛ kome ni wɔtsɔɔ nɔ wɔjieɔ wɔ-Nyɔŋmɔ ni wɔsumɔɔ waa lɛ yi. (Kanemɔ Kpojiemɔ 4:11.) Wɔheɔ wɔyeɔ kɛ wɔtsui muu fɛɛ akɛ, Yehowa Nyɔŋmɔ ji mɔ ni sa akɛ akɛ anunyam lɛ kɛ woo lɛ kɛ hewalɛ lɛ ahã. Kɛ́ wɔhã mɛi le nibii ni tsɔɔ faŋŋ akɛ Yehowa ni ‘bɔ nibii fɛɛ,’ ni lɛ ji wɔ-Walahãlɔ lɛ, belɛ wɔkɛ anunyam kɛ woo miihã lɛ ji no. Agbɛnɛ hu, kɛ́  wɔkɛ wɔbe, wɔhewalɛ, kɛ wɔnibii shã afɔle kɛshiɛ sane kpakpa lɛ kɛ ekãa bɔ ni wɔshihilɛ baaŋmɛ wɔ gbɛ lɛ, belɛ wɔkɛ hewalɛ lɛ, ni ji wɔhewalɛ lɛ miihã lɛ ji no. (Mat. 6:33; Luka 13:24; Kol. 3:23) Sane lɛ kɛkɛ ji, wɔsumɔɔ Nyɔŋmɔ, ni wɔmiisumɔ ni wɔgba mɛi ehe sane. Agbɛnɛ hu, wɔmiisumɔ ni wɔwie egbɛ́i lɛ he wɔtsɔɔ mɛi, ni wɔhã amɛle mɔ ni eji. Mɛni hewɔ?

12. Kɛ́ wɔtee shiɛmɔ lɛ, mɛɛ gbɛ nɔ wɔtseɔ Yehowa gbɛ́i lɛ he?

¹² Suɔmɔ ni wɔyɔɔ kɛhã Yehowa lɛ tsirɛɔ wɔ ni wɔtse egbɛ́i lɛ he. (Mat. 6:9) Nɔ ni enɛ tsɔɔ ji, wɔhãa mɛi leɔ akɛ, nibii gbohii ni Satan ewie yɛ Yehowa he lɛ ji amale. (1 Mo. 3:​1-5; Hiob 2:4; Yoh. 8:44) Kɛ́ wɔtee shiɛmɔ lɛ, wɔtsui tsirɛɔ wɔ ni wɔtsɔɔ mɛi mɔ ni Yehowa ji, kɛ sui ni eyɔɔ. Wɔmiisumɔ ni mɛi fɛɛ ale akɛ, esui lɛ ateŋ nɔ ni fe fɛɛ ji suɔmɔ, ni akɛ eyeɔ jalɛsane ni enɔyeli lɛ ja. Wɔmiisumɔ ni amɛle hu akɛ, etsɛŋ e-Maŋtsɛyeli lɛ baahã nɔnaa fɛɛ sɛɛ afo koni adesai ahi shi yɛ miishɛɛ kɛ toiŋjɔlɛ mli. (Lala 37:​10, 11, 29; 1 Yoh. 4:8) Kɛ́ wɔtsɔɔ mɛi nibii ni tamɔ nɛkɛ lɛ, belɛ wɔmiitse Yehowa gbɛ́i lɛ he. Agbɛnɛ hu, etsɔɔ akɛ wɔmiihi shi yɛ wɔgbɛ́i lɛ naa, ni enɛ hãa wɔnáa miishɛɛ waa. Mɛni hewɔ wɔkɛɔ nakai?

13. Mɛni hewɔ eŋɔɔ wɔnaa waa akɛ Yehowa Odasefoi ji wɔ? (Yesaia 43:​10-12)

¹³ Yehowa ehala wɔ akɛ ‘edasefoi.’ (Kanemɔ Yesaia 43:​10-12.) Afii komɛi ni eho nɛ lɛ, awie yɛ wolo ko ni jɛ Gbɛtsɔɔmɔ Kuu lɛ dɛŋ lɛ mli akɛ: “Woo ni fe fɛɛ ni wɔteŋ mɔ ko baanyɛ aná ji ni atsɛ lɛ akɛ Yehowa Odasefonyo.” c Mɛni hewɔ eja akɛ abaawie nakai? Hã wɔkɛ nɔkwɛmɔnɔ nɛɛ atsɔɔ mli. Ŋɔɔ lɛ akɛ, afolɔ onaa akɛ oyafee nɔ ko gbonyo, ni no hewɔ lɛ, ootao mɔ ko abafã ohe ni ehã ale akɛ  nɔ ni awie yɛ ohe lɛ ji amale, ni akɛ gbɔmɔ kpakpa ji bo ni onyɛŋ ofee nɔ ko ni tamɔ nakai kɔkɔɔkɔ. Namɔ obaahala? Ekã shi faŋŋ akɛ, obaahala mɔ ko ni ole ni omuɔ ofɔ̃ɔ enɔ ni mɛi buɔ lɛ ni kɛ́ ewie lɛ, mɛi baahe lɛ amɛye. Nakai nɔŋŋ halamɔ ni Yehowa ehala wɔ akɛ e-Dasefoi lɛ tsɔɔ akɛ, ele wɔ jogbaŋŋ, ni eheɔ eyeɔ waa akɛ, wɔbaahã mɛi ale akɛ lɛ pɛ ji anɔkwa Nyɔŋmɔ koome lɛ. Wɔbuɔ hegbɛ ni wɔná akɛ wɔji e-Dasefoi lɛ akɛ eji hegbɛ kpele, ni wɔŋɔɔ hegbɛ fɛɛ hegbɛ ni wɔbaaná lɛ kɛtsɔɔ mɛi egbɛ́i lɛ ni wɔhãa aleɔ akɛ, nibii gbohii pii ni awie yɛ ehe lɛ bɛ mli. Enɛ ni wɔfeɔ lɛ tsɔɔ akɛ wɔmiihi shi yɛ wɔgbɛ́i lɛ naa; wɔmiitsɔɔ akɛ, Yehowa Odasefoi ji wɔ lɛɛlɛŋ!—Lala 83:18; Rom. 10:​13-15.

WƆBAAYA NƆ WƆSHIƐ KƐYASHI NAAGBEE LƐ BAABA

14. Mɛɛ nibii wɔkpaa gbɛ akɛ etsɛŋ ebaaya nɔ ni baahã wɔná miishɛɛ waa?

¹⁴ Kɛ́ wɔsusu nibii ni wɔmiikpa gbɛ akɛ etsɛŋ ebaaya nɔ lɛ ahe lɛ, wɔnáa miishɛɛ waa! Akɛ nɔkwɛmɔnɔ lɛ, wɔmiikpa gbɛ akɛ Yehowa yelikɛbuamɔ naa lɛ, mɛi pii baaba anɔkwale lɛ mli dani amanehulu kpeteŋkpele lɛ aje shishi. Agbɛnɛ hu, eŋɔɔ wɔnaa akɛ yɛ amanehulu kpeteŋkpele lɛ, ni ji be ni mli shihilɛ wa fe fɛɛ ni adesai kɛbaakpe lɛ mli po lɛ, ekolɛ mɛi baaná hegbɛ amɛshi Satan je lɛ mli ni amɛbafata wɔhe ni wɔjie Yehowa yi!—Bɔf. 13:48.

15-16. Mɛni wɔbaaya nɔ wɔfee? Ni mɛɛ be wɔbaafee nakai kɛyashi?

¹⁵ Shi kɛyashi nakai be lɛ baashɛ lɛ, nitsumɔ ma shi. Esa akɛ wɔshiɛ Nyɔŋmɔ Maŋtsɛyeli lɛ he sane kpakpa lɛ yɛ shikpɔŋ muu lɛ fɛɛ nɔ. Eji hegbɛ kpele ni wɔná akɛ wɔbaatsu nitsumɔ nɛɛ eko, ejaakɛ kɛ́ atsu agbe naa lɛ, atsuŋ dɔŋŋ. Shi yɛ nakai beiaŋ nɔŋŋ lɛ, esa akɛ wɔbɔ mɛi kɔkɔ. Esa akɛ wɔhã mɛi ale akɛ, jeŋ fɔŋ nɛɛ naagbee lɛ miibɛŋkɛ oyayaayai. Kɛkɛ lɛ, wɔsɛɛ kɛ́ nakai kojomɔ be lɛ shɛ lɛ, amɛbaana faŋŋ akɛ sane ni wɔshiɛ lɛ jɛ Yehowa Nyɔŋmɔ ŋɔɔ lɛɛlɛŋ.—Eze. 38:23.

¹⁶ No hewɔ lɛ, mɛni esa akɛ wɔ fɛɛ wɔtswa wɔfai shi akɛ wɔbaafee? Esa akɛ wɔtswa wɔfai shi akɛ, wɔbaaya nɔ wɔsumɔ sane kpakpa ni wɔshiɛɔ lɛ, wɔsumɔ mɛi, ni nɔ ni fe fɛɛ lɛ, wɔsumɔ Yehowa Nyɔŋmɔ ni wɔtse egbɛ́i lɛ he, ni wɔhã nakai suɔmɔ lɛ atsirɛ wɔ ni wɔya nɔ wɔshiɛ kɛ hiɛdɔɔ kɛ ekãa kɛyashi Yehowa baakɛɛ, “Ehi!”