1. Mɛɛ hegbɛ Yudafoi ni aŋɔ amɛ nom lɛ ná ni hã amɛná miishɛɛ waa?

 YUDAFOI lɛ ná miishɛɛ waa be ni Yehowa tsɔ Persia maŋtsɛ Koresh nɔ ehã amɛye amɛhe kɛjɛ nom ni aŋɔ amɛ kɛtee Babilon afii pii lɛ mli lɛ. Maŋtsɛ lɛ hã ashiɛ akɛ, Yudafoi lɛ baanyɛ aku amɛsɛɛ kɛya amɛmaŋ ‘ni amɛyatswa Yehowa, Israel Nyɔŋmɔ lɛ shĩa lɛ ekoŋŋ.’ (Ezr. 1:1, 3) Yudafoi lɛ ná miishɛɛ waa, ejaakɛ bianɛ lɛ amɛbaanyɛ amɛyato anɔkwa Nyɔŋmɔ lɛ jamɔ lɛ shishi ekoŋŋ yɛ shikpɔŋ ni ehã amɛ lɛ nɔ.

2. Be ni Yudafoi lɛ yashɛ Yerusalem lɛ sɛɛ etsɛɛɛ lɛ, mɛni amɛfee?

² Yɛ afi 537 D.Ŋ.B. lɛ, Yudafoi lɛ ateŋ mɛi ni shi Babilon klɛŋklɛŋ lɛ yashɛ Yerusalem ni tsutsu ko lɛ eji Yuda, ni ji wuoyigbɛ maŋtsɛyeli lɛ, maŋtiase lɛ. Be ni amɛyashɛ lɛ, etsɛɛɛ ni amɛje sɔlemɔ shĩa lɛ maa shishi, ni be ni shɛɔ afi 536 D.Ŋ.B. lɛ, amɛtswa efaneshi lɛ amɛgbe naa!

3. Namɛi te shi amɛwo Yudafoi lɛ? Ni mɛni shiteekɛwolɔi nɛɛ fee?

³ Shi be ni amɛbɔi sɔlemɔ shĩa lɛ maa lɛ, mɛi ni bɔle amɛ lɛ te shi amɛwo amɛ. “Amɛje Yudabii lɛ anijiaŋ wui ni amɛsu amɛtsui koni amɛkanyɛ amɛma shĩa lɛ.” (Ezr. 4:4) Shi jeee no pɛ. Nɔ kroko hu ba ni bafite sane lɛ kwraa kɛhã Yudafoi lɛ. Yɛ afi 522 D.Ŋ.B. lɛ, aná maŋtsɛ hee yɛ Persia ni atsɛɔ lɛ Artashasta. * Mɛi ni teɔ shi amɛwoɔ Yudafoi lɛ na enɛ akɛ hegbɛ ni amɛná ni amɛbaanyɛ ‘amɛtsɔ mla nɔ amɛye sane fɔŋ’ koni ahã Yudafoi lɛ akpa tsũ lɛ maa. (Lala 94:20) No hewɔ lɛ, amɛŋma wolo amɛyahã Maŋtsɛ Artashasta ni amɛkɛɛ lɛ akɛ Yudafoi  lɛ miitao amɛtse ehiɛ atua. (Ezr. 4:11-16) Maŋtsɛ lɛ he amɛ eye ni efã ni Yudafoi lɛ akpa sɔlemɔ shĩa lɛ maa. (Ezr. 4:17-23) Enɛ hewɔ lɛ, amɛkpa sɔlemɔ shĩa lɛ maa.​—Ezr. 4:24.

4. Be ni shiteekɛwolɔi lɛ hã akpa sɔlemɔ shĩa lɛ maa lɛ, mɛni Yehowa fee? (Yesaia 55:11)

⁴ Shikpɔŋ lɛ nɔ bii lɛ ni jáaa Yehowa lɛ kɛ Persia Nɔyeli lɛ tswa amɛfai shi akɛ amɛbaahã akpa sɔlemɔ shĩa lɛ maa. Shi Yehowa hu tswa efai shi akɛ, ebaahã ama sɔlemɔ shĩa lɛ agbe naa. Ni wɔle akɛ be fɛɛ be lɛ, nɔ ni Yehowa eto eyiŋ akɛ ebaafee lɛ yeɔ omanye. (Kanemɔ Yesaia 55:11.) No hewɔ lɛ, ewó gbalɔ ko ni yɔɔ ekãa waa ni atsɛɔ lɛ Zakaria ni ejie ninai kpaanyɔ komɛi ni sa kadimɔ waa kpo etsɔɔ lɛ ni ekɛɛ lɛ ni egba Yudafoi lɛ nakai ninai lɛ kɛwo amɛ hewalɛ. Ninai nɛɛ ye ebua amɛ ni amɛna akɛ esaaa akɛ amɛsheɔ mɛi ni teɔ shi amɛwoɔ amɛ lɛ gbeyei, ni ewo amɛ hewalɛ koni amɛya nɔ amɛtsu Yehowa nitsumɔ lɛ. Yɛ ninaa ni ji enumɔ lɛ mli lɛ, Zakaria na kanetso kɛ oliv tsei enyɔ.

5. Mɛni he wɔbaasusu yɛ nikasemɔ nɛɛ mli?

⁵ Bei komɛi lɛ, wɔ hu wɔnijiaŋ jeɔ wui. No hewɔ lɛ, yɛ nikasemɔ nɛɛ mli lɛ, wɔbaasusu ninaa ni ji enumɔ ni Yehowa jie etsɔɔ gbalɔ Zakaria koni ekɛwo Israelbii lɛ hewalɛ lɛ he. Agbɛnɛ hu, wɔbaakwɛ bɔ ni ninaa nɛɛ baanyɛ aye abua wɔ ni wɔya nɔ wɔsɔmɔ Yehowa kɛ́ ate shi awo wɔ, kɛ́ nibii tsake yɛ wɔshihilɛ mli, kɛ agbɛnɛ hu, kɛ́ akɛ gbɛtsɔɔmɔ ko hã wɔ ni wɔnuuu shishi.

6. Mɛɛ gbɛ nɔ ninaa ni kɔɔ kanetso lɛ kɛ oliv tsei enyɔ lɛ ahe ni awie he yɛ Zakaria 4:1-3 lɛ waje Yudafoi lɛ? (Kwɛmɔ mfoniri ni yɔɔ wolo lɛ hiɛ lɛ.)

⁶ Kanemɔ Zakaria 4:1-3. Ninaa ni kɔɔ kanetso lɛ kɛ oliv tsei enyɔ lɛ ahe lɛ waje Yudafoi lɛ koni amɛya nɔ amɛtsu amɛnitsumɔ lɛ yɛ shi ni ateɔ awoɔ amɛ lɛ fɛɛ sɛɛ. Yɛ mɛɛ gbɛ nɔ? Ani okadi akɛ mu etãaa yɛ kanetso lɛ mli? Mu jɛɔ oliv tsei enyɔ lɛ amli kɛboteɔ tsɛnsi ni ma kanetso lɛ nɔ lɛ mli, ni mu lɛ jɛɔ tsɛnsi lɛ mli kɛboteɔ kanei kpawo ni yɔɔ kanetso lɛ he lɛ amli. Enɛ hewɔ lɛ, kanei lɛ gbooo. Zakaria bi bɔfo lɛ akɛ: “Mɛni nibii nɛɛ damɔ shi kɛhã?” Bɔfo lɛ kɛ shɛɛ ni jɛ Yehowa ŋɔɔ nɛɛ hã Zakaria hetoo. Ekɛɛ lɛ akɛ: “‘Jeee asraafoi anyɛmɔ naa, ni jeee hewalɛ naa hu, shi moŋ, mimumɔ lɛ naa,’ Yehowa, taiatsɛ lɛ kɛɛ.” (Zak. 4:4, 6) Mu lɛ ni jɛ tsei lɛ amli lɛ damɔ shi kɛhã Yehowa mumɔ krɔŋkrɔŋ lɛ ni yɔɔ hewalɛ ni etãaa lɛ. Nyɔŋmɔ mumɔ lɛ yɛ hewalɛ kwraa fe Persia Nɔyeli lɛ mli asraafoi lɛ fɛɛ. Akɛni Yehowa miiye eebua Yudafoi ni miima sɔlemɔ shĩa nɛɛ hewɔ lɛ, bɔ fɛɛ bɔ ni fee lɛ amɛbaanyɛ amɛgbe naa yɛ shi ni ateɔ awoɔ amɛ lɛ fɛɛ sɛɛ. Sane nɛɛ wo amɛ hewalɛ waa! Nɔ ni shwɛɔ Yudafoi lɛ pɛ ji, ni amɛkɛ amɛhiɛ baafɔ̃ Yehowa nɔ ni amɛyatsa nitsumɔ lɛ nɔ. Ni nakai pɛpɛɛpɛ amɛfee, eyɛ mli akɛ no mli lɛ ajieko naatsĩi nɛɛ yɛ amɛnɔ.

7. Mɛni ba ni hã Yudafoi lɛ ahe jɔ amɛ kɛma sɔlemɔ shĩa lɛ agbɛnɛ?

⁷ Yɛ afi 520 D.Ŋ.B. lɛ, aná maŋtsɛ kroko yɛ Persia ni atsɛɔ lɛ Dario I lɛ, ni no hã nibii tsake kɛhã Yudafoi lɛ. Yɛ enɔyeli afi ni ji enyɔ lɛ nɔ lɛ, ena akɛ naatsĩi ni akɛfɔ̃ sɔlemɔ shĩa lɛ maa nɔ lɛ ejaaa. Dario fã akɛ, atsa nitsumɔ lɛ nɔ koni agbe naa. (Ezr. 6:1-3) Famɔ nɛɛ ni maŋtsɛ lɛ kɛhã lɛ hã mɔ fɛɛ mɔ naa kpɛ ehe. Shi jeee no pɛ maŋtsɛ lɛ fee. Maŋtsɛ lɛ fã maji ni bɔle Yudafoi lɛ hu akɛ, amɛkagba Yudafoi lɛ anaa, shi moŋ, amɛhã amɛ shika kɛ nɔ fɛɛ nɔ ni he hiaa amɛ koni amɛkɛma sɔlemɔ shĩa lɛ amɛgbe naa. (Ezr. 6:7-12) Enɛ hewɔ lɛ, yɛ nɔ ni shɛɛɛ afii enumɔ mli, ni ji yɛ afi 515 D.Ŋ.B. lɛ, Yudafoi lɛ ma sɔlemɔ shĩa lɛ amɛgbe naa.​—Ezr. 6:15.

8. Kɛ́ aate shi aawo bo lɛ, mɛni hewɔ esaaa akɛ ohãa onijiaŋ jeɔ wui lɛ?

 ⁸ Ŋmɛnɛ lɛ, aate shi aawo Yehowa tsuji babaoo. Akɛ nɔkwɛmɔnɔ lɛ, atsĩ wɔnitsumɔ lɛ naa yɛ maji komɛi anɔ. Yɛ maji ni tamɔ nɛkɛ anɔ lɛ, bei komɛi lɛ amɔmɔɔ wɔnyɛmimɛi lɛ ni akɛ ‘amɛ yaa amralofoi kɛ maŋtsɛmɛi ahiɛ’ ni enɛ hãa wɔnyɛmimɛi lɛ náa hegbɛ kɛyeɔ amɛ odase. (Mat. 10:17, 18) Bei komɛi lɛ, kɛ́ aná nɔyelɔ kroko lɛ, no hãa wɔnyɛmimɛi lɛ náa heyeli ni amɛnyɛɔ amɛjáa Nyɔŋmɔ jogbaŋŋ. Bei komɛi hu lɛ, kojolɔ ko ni kwɛɛɛ hiɛiaŋ baanyɛ abua sane lɛ yɛ gbɛ nɔ ni baahã wɔnyɛmimɛi lɛ aná heyeli kɛjá Yehowa. Nyɛmimɛi lɛ ekomɛi hu kɛ shiteekɛwoo kpeɔ yɛ gbɛ kroko nɔ. Ekolɛ amɛyɛ maŋ ko ni atsĩko wɔnitsumɔ lɛ naa yɛ mli lɛ nɔ. Shi amɛwekumɛi baate shi awo amɛ koni amɛkpa Yehowa sɔɔmɔ. (Mat. 10:32-36) Bei pii lɛ, kɛ́ wekumɛi nɛɛ na akɛ yɛ shi ni amɛteɔ amɛwoɔ wɔnyɛmimɛi nɛɛ fɛɛ sɛɛ lɛ, wɔnyɛmimɛi lɛ miiya nɔ amɛmiisɔmɔ Yehowa lolo lɛ, amɛkpaa amɛnaa gbamɔ. Mɛi komɛi po ni te shi amɛwo amɛwekumɛi waa lɛ ebatsɔmɔ Odasefoi ni yɔɔ ekãa. Kɛ́ aate shi aawo bo lɛ, kaahã onijiaŋ je wui ni okpa Yehowa sɔɔmɔ. Feemɔ ekãa. Yehowa kɛ emumɔ krɔŋkrɔŋ ni yɔɔ hewalɛ waa lɛ baaye abua bo. No hewɔ lɛ, kaashe gbeyei kwraa!

9. Mɛni hewɔ Yudafoi komɛi awerɛ ho amɛhe be ni amɛna sɔlemɔ shĩa hee lɛ faneshi lɛ?

⁹ Be ni atswa sɔlemɔ shĩa hee lɛ faneshi lɛ agbe naa lɛ, mɛi ni egbɔlɔ ni yɔɔ Yudafoi lɛ ateŋ lɛ ateŋ mɛi komɛi fó. (Ezr. 3:12) Amɛna sɔlemɔ shĩa fɛfɛo ni Maŋtsɛ Solomon ma lɛ, ni amɛnu he akɛ kɛ́ amɛkɛ sɔlemɔ shĩa ni amɛmaa nɛɛ to tsutsu nɔ lɛ he lɛ, amɛnɔ lɛ ‘jeee nɔ ko kwraa.’ (Hag. 2:2, 3) Edɔ amɛ waa akɛ ehee lɛ ni amɛmaa lɛ tamɔɔɔ tsutsu nɔ lɛ. Shi ekã shi faŋŋ akɛ, Zakaria ninaa lɛ shɛje amɛmii. Yɛ mɛɛ gbɛ nɔ?

10. Mɛɛ gbɛ nɔ ŋwɛibɔfo lɛ wiemɔi ni yɔɔ Zakaria 4:8-10 lɛ shɛje Yudafoi lɛ amii?

¹⁰ Kanemɔ Zakaria 4:8-10. Be ni ŋwɛibɔfo lɛ wie akɛ, Yudafoi lɛ ‘baanya ni amɛbaana plomo lɛ yɛ Yuda amralo Zerubabel dɛŋ’ lɛ, no mli lɛ te etsɔɔ tɛŋŋ? Plomo ji kpãa ko kɛ enaa dade ni akɛkwɛɔ akɛ nɔ ko ma shi jaŋŋ lo. No hewɔ lɛ, nɔ ni ŋwɛibɔfo lɛ taoɔ etsɔɔ Nyɔŋmɔ webii lɛ ji, eyɛ mli akɛ yɛ mɛi komɛi ahiɛ lɛ sɔlemɔ shĩa hee lɛ tamɔɔɔ tsutsu nɔ lɛ moŋ, shi abaama agbe naa ni akɛbaatsu Yehowa yiŋtoo he nii. Kɛ́ ama agbe naa lɛ, Yehowa baaná he miishɛɛ. No hewɔ lɛ, esa akɛ amɛ hu amɛná he miishɛɛ. Nɔ ni Yehowa taoɔ kɛkɛ ji, ni abaajá lɛ bɔ ni etaoɔ yɛ sɔlemɔ shĩa hee nɛɛ  mli. Kɛ́ Yudafoi lɛ kɛ amɛjwɛŋmɔ ma enɛ nɔ ni amɛfee nibii ni baahã Yehowa aná amɛhe miishɛɛ lɛ, amɛ hu amɛbaaná miishɛɛ.

11. Mɛɛ shihilɛ Yehowa tsuji komɛi kɛkpeɔ ni hãa amɛmiishɛɛ tãa?

¹¹ Wɔteŋ mɛi pii náaa lɛ mlɛo kɛ́ nibii tsake yɛ wɔshihilɛ mli. Mɛi komɛi ni kɛ afii pii etsu be fɛɛ sɔɔmɔ krɛdɛɛ nitsumɔ lɛ anitsumɔ etsake ni amɛbɛ be fɛɛ sɔɔmɔ krɛdɛɛ lɛ mli dɔŋŋ. Mɛi komɛi hu yɛ ni afii abɔ ni amɛye lɛ hewɔ lɛ, ahã mɛi krokomɛi miitsu nitsumɔ ko ni amɛsumɔɔ waa ni be ko ni eho lɛ amɛtsuɔ lɛ. Akɛni wɔyeee emuu hewɔ lɛ, tsakemɔi ni tamɔ nɛkɛ baanyɛ ahã wɔmiishɛɛ atã. Bei komɛi lɛ, kɛ́ eba lɛ nakai lɛ, wɔnuuu nɔ hewɔ ni akpɛ nakai yiŋ lɛ shishi loo wɔnyaaa he. Ekolɛ wɔbaanu he akɛ bɔ ni nibii yɔɔ tsutsu lɛ hi fe bianɛ. Ni enɛ baanyɛ aje wɔnijiaŋ wui ni ehã wɔnu he akɛ bianɛ lɛ, wɔnyɛɛɛ wɔtsu babaoo wɔhã Yehowa dɔŋŋ. (Abɛi 24:10) Mɛɛ gbɛ nɔ Zakaria ninaa lɛ baanyɛ aye abua wɔ ni wɔya nɔ wɔkɛ wɔnyɛmɔ fɛɛ asɔmɔ Yehowa?

12. Kɛ́ nibii tsake yɛ wɔshihilɛ mli lɛ, mɛɛ gbɛ nɔ Zakaria ninaa lɛ baanyɛ aye abua wɔ ni wɔmiishɛɛ akatã?

¹² Kɛ́ nibii tsake yɛ wɔshihilɛ mli ni wɔna tsakemɔ lɛ tamɔ bɔ ni Yehowa naa lɛ lɛ, ewaŋ tsɔ kɛhãŋ wɔ akɛ wɔbaadamɔ naa. Yehowa miitsu nibii wuji ŋmɛnɛ, ni wɔná hegbɛ akɛ wɔfata ehe kɛmiitsu. (1 Kor. 3:9) Nɔ ni wɔtsuɔ yɛ asafo lɛ mli lɛ baanyɛ atsake, shi suɔmɔ ni Yehowa yɔɔ kɛhã wɔ lɛ tsakeee. No hewɔ lɛ, kɛ́ tsakemɔ ko ni afee yɛ asafo lɛ mli lɛ sa ohe lɛ, kaafite be ni ooye otsui yɛ nɔ hewɔ ni afee nakai tsakemɔ lɛ he. Moŋ lɛ, sɔlemɔ obi Yehowa ni eye ebua bo ni ona nibii kpakpai ni baanyɛ ajɛ tsakemɔ lɛ mli kɛba. (Jaj. 7:10) Kaajwɛŋ nibii ni amrɔ nɛɛ onyɛŋ ofee dɔŋŋ lɛ ahe. Moŋ lɛ, jwɛŋmɔ nibii pii ni obaanyɛ ofee bianɛ lɛ ahe. Zakaria ninaa lɛ hãa wɔnaa akɛ, daa gbi lɛ ehe miihia ni wɔná jwɛŋmɔ kpakpa yɛ saji ahe. Kɛ́ wɔfee nakai lɛ, no baaye abua wɔ ni wɔná miishɛɛ ni wɔya nɔ wɔsɔmɔ Yehowa kɛ́ wɔshihilɛ tsake po.

13. Mɛni hewɔ eeenyɛ efee akɛ Yudafoi lɛ ekomɛi nu he akɛ nilee bɛ yiŋ ni akpɛ akɛ abɔi sɔlemɔ shĩa lɛ maa ekoŋŋ lɛ mli lɛ?

¹³ Be ni Osɔfonukpa Yeshua (ni ji, Yoshua) kɛ Amralo Zerubabel ‘bɔi Nyɔŋmɔ shĩa lɛ maa ekoŋŋ’ lɛ, no mli lɛ atsĩ nitsumɔ lɛ naa. (Ezr. 5:1, 2) Eeenyɛ efee akɛ, Yudafoi lɛ ateŋ mɛi komɛi nu he akɛ nɔ ni amɛfeɔ nɛɛ kɛ sane baaba. Ejaakɛ bɔ fɛɛ bɔ ni fee lɛ amɛhenyɛlɔi  lɛ baana akɛ aama tsũ lɛ, ni amɛbaatsɔ gbɛ fɛɛ gbɛ ni amɛbaanyɛ nɔ amɛtao sane amɛhã amɛ. Shi Yehowa fee nɔ ko ni hã Yoshua kɛ Zerubabel na akɛ efiɔ amɛsɛɛ. Mɛni efee?

14. Yɛ nɔ ni awie yɛ Zakaria 4:12, 14 lɛ naa lɛ, mɛɛ gbɛ nɔ Yehowa hã Osɔfonukpa Yoshua kɛ Amralo Zerubabel na akɛ efiɔ amɛsɛɛ?

¹⁴ Kanemɔ Zakaria 4:12, 14. Ŋwɛibɔfo lɛ hã Zakaria le akɛ, oliv tsei enyɔ lɛ damɔ shi kɛhã “mɛi enyɔ ni afɔ amɛ mu” lɛ, ni ji, Yoshua kɛ Zerubabel. Hii enyɔ nɛɛ “damɔ shikpɔŋ muu lɛ fɛɛ Nuŋtsɔ lɛ masɛi” yɛ mfonirifeemɔŋ gbɛ nɔ. Enɛ ji hegbɛ kpele diɛŋtsɛ, ni ehãa anaa hu akɛ Yehowa heɔ hii nɛɛ eyeɔ. No hewɔ lɛ, amɛnyɛmimɛi Israelbii lɛ hu baanyɛ ahe amɛ amɛye ni amɛna gbɛtsɔɔmɔ fɛɛ gbɛtsɔɔmɔ ni amɛkɛbaahã amɛ lɛ akɛ ejɛ Yehowa ŋɔɔ.

15. Mɛni wɔbaanyɛ wɔfee kɛtsɔɔ akɛ wɔmiisumɔ ni wɔkɛ nibii ni Yehowa ekɛɛ wɔ yɛ e-Wiemɔ lɛ mli lɛ atsu nii?

¹⁵ Ŋmɛnɛ lɛ, gbɛ kome ni Yehowa tsɔɔ nɔ ehãa ewebii lɛ leɔ nɔ ni esa akɛ amɛfee ji kɛtsɔ e-Wiemɔ ni ji, Biblia lɛ nɔ. Biblia lɛ hãa wɔleɔ bɔ ni Yehowa miisumɔ ni wɔjá lɛ wɔhã. Mɛni wɔbaanyɛ wɔfee kɛtsɔɔ akɛ wɔmiisumɔ ni wɔkɛ nibii ni yɔɔ Biblia lɛ mli lɛ atsu nii? No ji, ni wɔbaahe be wɔkane lɛ jogbaŋŋ ni wɔnu shishi. No hewɔ lɛ, bi ohe akɛ, ‘Kɛ́ mikane Biblia lɛ loo asafo lɛ wolo ko lɛ, ani miheɔ be mijwɛŋɔ nɔ ni mikane lɛ nɔ? Kɛ́ mikane nɔ ko yɛ Biblia lɛ mli ni minuuu shishi lɛ, ani mitaoɔ mli koni manu shishi? Aloo mitsaa nɔ mikaneɔ kɛkɛ ni migbaaa mihe naa yɛ he?’ (2 Pet. 3:16) Kɛ́ wɔhe be kɛjwɛŋ nibii ni Yehowa tsɔɔ wɔ lɛ anɔ lɛ, no baaye abua wɔ ni wɔkɛ egbɛtsɔɔmɔi atsu nii ni wɔtsu shiɛmɔ nitsumɔ lɛ jogbaŋŋ.​—1 Tim. 4:15, 16.

16. Kɛ́ “nyɔŋ anɔkwafo kɛ hiɛshikalɔ lɛ” kɛ gbɛtsɔɔmɔ ko hã wɔ shi wɔnuuu shishi lɛ, mɛni baanyɛ aye abua wɔ ni wɔkɛtsu nii?

¹⁶ Gbɛ kroko ni Yehowa tsɔɔ nɔ ehãa wɔleɔ nɔ ni esa akɛ wɔfee ji, kɛtsɔ “nyɔŋ anɔkwafo kɛ hiɛshikalɔ lɛ” nɔ. (Mat. 24:45) Bei komɛi lɛ, nyɔŋ lɛ kɛ gbɛtsɔɔmɔi komɛi hãa wɔ ni wɔnuuu shishi jogbaŋŋ. Akɛ nɔkwɛmɔnɔ lɛ, ekolɛ nyɔŋ lɛ baakɛɛ wɔ akɛ wɔsaa wɔhe wɔto oshãra ko ni wɔsusuɔ akɛ enyɛŋ eba he ni wɔyɔɔ lɛ kɔkɔɔkɔ. Aloo ekolɛ wɔbaanu he akɛ nyɔŋ lɛ miitsere nɔ ko tsɔ yɛ gbɛtsɔɔmɔi ni ekɛhã yɛ tsɛŋemɔ hela ko he lɛ hewɔ. Kɛ́ nyɔŋ lɛ kɛ gbɛtsɔɔmɔ ko hã ni wɔmiinu he akɛ nilee bɛ mli lɛ, mɛni wɔbaanyɛ wɔfee ni baaye abua wɔ ni wɔkɛtsu nii? Wɔbaanyɛ wɔsusu bɔ ni Israelbii lɛ ná gbɛtsɔɔmɔ ni Yoshua kɛ Zerubabel kɛhã amɛ lɛ he sɛɛ amɛhã lɛ he.  Agbɛnɛ hu, wɔbaanyɛ wɔsusu Biblia mli saji ni kɔɔ gbɛtsɔɔmɔi ni Yehowa kɛhã ewebii lɛ ni amɛnu he akɛ nilee bɛ mli shi sɛɛ mli lɛ ehere amɛyiwala lɛ ahe.​—Koj. 7:7; 8:10.

17. Mɛɛ gbɛ nɔ ninaa ni kɔɔ kanetso lɛ kɛ oliv tsei enyɔ lɛ ahe lɛ ye ebua Yudafoi lɛ?

¹⁷ Zakaria ninaa ni ji enumɔ lɛ sɛɛ kɛɛɛ. Shi eye ebua Yudafoi lɛ ni amɛkɛ ekãa sɔmɔ Yehowa ni amɛma Yehowa sɔlemɔ shĩa lɛ. Be ni amɛkɛ nibii ni amɛkase yɛ Zakaria ninaa lɛ mli lɛ tsu nii lɛ, Yehowa ye ebua amɛ ni etsɔɔ amɛ gbɛ. Ekɛ emumɔ krɔŋkrɔŋ lɛ ye ebua amɛ ni amɛtsa nitsumɔ lɛ nɔ ni amɛná miishɛɛ ekoŋŋ.​—Ezr. 6:16.

18. Mɛɛ gbɛ nɔ Zakaria ninaa lɛ baanyɛ aye abua bo?

¹⁸ Zakaria ninaa ni kɔɔ kanetso lɛ kɛ oliv tsei enyɔ lɛ ahe lɛ baanyɛ aye abua bo waa. Tamɔ bɔ ni wɔna lɛ, ebaanyɛ ewaje bo kɛ́ ate shi awo bo, ebaanyɛ ehã oná miishɛɛ kɛ́ nibii tsake yɛ oshihilɛ mli, ni ebaanyɛ eye ebua bo ni obo gbɛtsɔɔmɔ toi kɛ́ onuuu shishi po. No hewɔ lɛ, kɛ́ okɛ shihilɛi ni mli wawai kpe lɛ, mɛni esa akɛ ofee? Klɛŋklɛŋ lɛ, naa nɔ ni Zakaria na lɛ, ni ji, nibii ni tsɔɔ akɛ Yehowa susuɔ ewebii lɛ ahe lɛ, ni ohã nɔ ni obaana lɛ atsirɛ bo ni ohe Yehowa nɔ oye ni oya nɔ ojá lɛ kɛ otsui muu fɛɛ. (Mat. 22:37) Kɛ́ ofee nakai lɛ, Yehowa baaye ebua bo ni osɔmɔ lɛ kɛ miishɛɛ kɛya naanɔ.​—Kol. 1:10, 11.