NIKASEMƆ 30
LALA 36 Wɔbuɔ Wɔtsuii Ahe
Nɔ Ni Wɔbaanyɛ Wɔkase Kɛjɛ Israel Maŋtsɛmɛi Lɛ Ashihilɛ Mli
“Nyɛbaasaa nyɛna srɔto ni yɔɔ jalɔ kɛ mɔ fɔŋ teŋ, kɛ mɔ ni sɔmɔɔ Nyɔŋmɔ kɛ mɔ ni sɔmɔɔɔ lɛ lɛ teŋ.”—MAL. 3:18.
NƆ NI WƆBAAKASE
Wɔbaana bɔ ni Yehowa na Israel maŋtsɛmɛi lɛ ehã, ni no baaye abua wɔ koni wɔna nɔ ni kɛ́ wɔfee lɛ ebaaná wɔhe miishɛɛ.
1-2. Mɛni Biblia lɛ wieɔ yɛ maŋtsɛmɛi komɛi ni ye Israel nɔ lɛ ahe?
AWIE hii 40 kɛ sɛɛ ni ye maŋtsɛ yɛ Israel lɛ ahe yɛ Biblia lɛ mli. a Biblia lɛ hãa wɔleɔ nibii komɛi ni amɛteŋ mɛi komɛi fee lɛ ahe sane fitsofitso. Akɛ nɔkwɛmɔnɔ lɛ, maŋtsɛmɛi kpakpai lɛ po fee nibii gbohii komɛi. Amɛteŋ mɔ kome ji Maŋtsɛ David. Yehowa wie yɛ etsulɔ David he akɛ: “Ekɛ etsui fɛɛ nyiɛ misɛɛ, ni efee nɔ ni ja pɛ yɛ mihiɛ.” (1 Maŋ. 14:8) Shi ekɛ yoo ko ni ebote gbalashihilɛ mli lɛ bɔ ajwamaŋ, ni etsɔ ŋaa ni ehã agbe yoo lɛ wu lɛ yɛ ta mli.—2 Sam. 11:4, 14, 15.
2 Agbɛnɛ hu, maŋtsɛmɛi ni yeee anɔkwa lɛ ateŋ mɛi babaoo fee nibii kpakpai komɛi. Amɛteŋ mɔ kome ji Rehoboam. ‘Efee efɔŋ’ yɛ Yehowa hiɛ. (2 Kro. 12:14) Shi efee nibii kpakpai komɛi hu. Akɛ nɔkwɛmɔnɔ lɛ, be ni Yehowa fã lɛ akɛ eŋmɛ akutsei nyɔŋma lɛ gbɛ ni amɛ diɛŋtsɛ amɛhala amɛmaŋtsɛ lɛ, ebo Yehowa toi. Agbɛnɛ hu, efee nibii kɛbu maji ni eyeɔ nɔ lɛ ahe koni Nyɔŋmɔ webii lɛ ahenyɛlɔi lɛ anine akashɛ amɛnɔ.—1 Maŋ. 12:21-24; 2 Kro. 11:5-12.
3. Mɛɛ sanebimɔ ni he hiaa esa akɛ wɔná hetoo? Ni mɛni he wɔbaasusu yɛ nikasemɔ nɛɛ mli?
3 Nibii ni wɔwie he nɛɛ teɔ sanebimɔ ko ni he hiaa waa shi. Kɛ́ Israel maŋtsɛmɛi lɛ fee nibii kpakpai kɛ nibii gbohii fɛɛ lɛ, belɛ mɛni nɔ Yehowa damɔ ebu maŋtsɛ ko akɛ eye anɔkwa yɛ ehiɛ lɛ? Sanebimɔ nɛɛ hetoo baaye abua wɔ ni wɔna nɔ ni Yehowa sumɔɔ ni wɔfee koni ená wɔhe miishɛɛ. Yɛ nikasemɔ nɛɛ mli lɛ, wɔbaasusu nibii etɛ ni Yehowa damɔ nɔ ebu maŋtsɛ ko akɛ eji maŋtsɛ kpakpa loo maŋtsɛ gbonyo lɛ he. Klɛŋklɛŋ lɛ, ani maŋtsɛ lɛ sumɔɔ Yehowa kɛ etsui fɛɛ? Nɔ ni ji enyɔ lɛ, kɛ́ etɔ̃ lɛ ani etsakeɔ etsui? Ni nɔ ni ji etɛ lɛ, ani maŋtsɛ lɛ jáa Yehowa yɛ gbɛ ni etsɔɔ akɛ ajá lɛ lɛ nɔ?
AMƐSƆMƆ YEHOWA KƐ AMƐTSUI MUU FƐƐ
4. Mɛni ji nɔ kome ni hã esoro maŋtsɛmɛi ni ye Yehowa anɔkwa lɛ yɛ maŋtsɛmɛi ni yeee lɛ anɔkwa lɛ ahe?
4 Maŋtsɛmɛi ni Yehowa ná amɛhe miishɛɛ lɛ kɛ amɛtsui muu fɛɛ sɔmɔ lɛ. b Maŋtsɛmɛi kpakpai lɛ ateŋ mɔ kome ji Maŋtsɛ Yehoshafat. Biblia lɛ wie akɛ, ‘etao Yehowa sɛɛ gbɛ kɛ etsui fɛɛ.’ (2 Kro. 22:9) Mɔ kroko hu ji, Maŋtsɛ Yosia. Biblia lɛ kɛɛ: “Maŋtsɛmɛi ni tsɔ ehiɛ lɛ eko eko bɛ ni tamɔ lɛ, ni ku esɛɛ kɛba Yehowa ŋɔɔ kɛ etsui fɛɛ.” (2 Maŋ. 23:25) Ni Solomon, mɔ ni sɛɛ mli lɛ efee nibii gbohii lɛ hu? Biblia lɛ kɛɛ, “ekɛ etsui muu fɛɛ hãaa Yehowa.” (1 Maŋ. 11:4) Agbɛnɛ hu, Biblia lɛ wie Maŋtsɛ Abiyam ni yeee anɔkwa lɛ hu he akɛ: “Ekɛ etsui muu fɛɛ hãaa Yehowa.”—1 Maŋ. 15:3.
5. Kɛ́ akɛɛ mɔ ko kɛ etsui muu fɛɛ sɔmɔɔ Yehowa lɛ, te atsɔɔ tɛŋŋ?
5 No hewɔ lɛ, kɛ́ akɛɛ mɔ ko kɛ etsui muu fɛɛ sɔmɔɔ Yehowa lɛ, te atsɔɔ tɛŋŋ? Etsɔɔ akɛ mɔ lɛ sumɔɔ Yehowa ni ebuɔ lɛ waa ni no hewɔ ejáa lɛ lɛ, shi jeee ni aafee ni lɛ hu eefee eko. Agbɛnɛ hu, eyaa nɔ esumɔɔ lɛ ni ebuɔ lɛ ewala gbii abɔ fɛɛ.
6. Mɛni kɛ́ wɔfee lɛ ebaahã wɔya nɔ wɔkɛ wɔtsui muu fɛɛ asɔmɔ Yehowa? (Abɛi 4:23; Mateo 5:29, 30)
6 Te wɔbaafee tɛŋŋ wɔkase maŋtsɛmɛi ni ye anɔkwa lɛ, ni wɔkɛ wɔtsui muu fɛɛ asɔmɔ Yehowa? Nɔ kome ni wɔbaanyɛ wɔfee ji, ni wɔbaatsi wɔhe kɛje nibii ni hãŋ wɔsumɔ Yehowa waa lɛ ahe. Nibii nɛɛ ekomɛi ji hiɛtserɛjiemɔ ni esaaa, nanemɛi gbohii ni akɛbɔɔ, kɛ shika sɛɛtiumɔ. Kɛ́ wɔyɔse akɛ nɔ ko ehã suɔmɔ ni wɔyɔɔ kɛhã Yehowa lɛ he miijɔ lɛ, esa akɛ wɔfee nɔ ko yɛ he oya nɔŋŋ.—Kanemɔ Abɛi 4:23; Mateo 5:29, 30.
7. Mɛni hewɔ ehe hiaa waa ni wɔtsi wɔhe kɛje nibii ni baanyɛ ahã suɔmɔ ni wɔyɔɔ kɛhã Yehowa lɛ mli agbɔjɔ lɛ ahe lɛ?
7 Esaaa akɛ wɔhãa nɔ ko fiteɔ suɔmɔ ni wɔyɔɔ kɛhã Yehowa lɛ. Kɛ́ wɔkwɛɛɛ ni ahi lɛ, wɔbaanu he akɛ, akɛni wɔmiitsu nibii babaoo yɛ Yehowa sɔɔmɔ lɛ mli hewɔ lɛ, kɛ́ wɔkɛ wɔhe wo nibii ni esaaa amli po lɛ enáŋ wɔnɔ hewalɛ. Hã wɔkɛ nɔkwɛmɔnɔ ko atsɔɔ mli. Ŋɔɔ lɛ akɛ otsũ mli ewo muji ni osaa mli fɛɛ keŋkeŋ. Ani obaagbele shinaa lɛ kɛ samfɛji lɛ ofɔ koni kɔɔyɔɔ lɛ aloo mulu kɛ jwɛi kɛbawo otsũ lɛ mli ekoŋŋ? Ekã shi faŋŋ akɛ ofeŋ nakai. Mɛni enɛ tsɔɔ wɔ? Enɛ tsɔɔ wɔ akɛ, kɛ́ wɔfee nibii ni baahã wekukpaa ni yɔɔ wɔ kɛ Yehowa teŋ lɛ mli awa lɛ, esaaa akɛ wɔŋmɛɔ gbɛ ni nibii ni baanyɛ afite wɔ kɛ lɛ teŋ lɛ baa wɔtsui mli.—Efe. 2:2.
AMƐTSAKE AMƐTSUI YƐ AMƐHE ESHAI LƐ AHE
8-9. Be ni ajaje Maŋtsɛ David kɛ Maŋtsɛ Hezekia lɛ, te amɛfee amɛnii amɛhã tɛŋŋ? (Kwɛmɔ mfoniri ni yɔɔ wolo lɛ hiɛ lɛ.)
8 Tamɔ bɔ ni wɔna kɛtsɔ hiɛ lɛ, Maŋtsɛ David fee esha ni yɔɔ hiɛdɔɔ. Be ni gbalɔ Natan kɛ lɛ bawie esha lɛ ni efee lɛ he lɛ, ejɛ heshibaa mli etsake etsui. (2 Sam. 12:13) David ekwaaa efeee enii tamɔ nɔ ni eyafee lɛ edɔ lɛ aahu koni Natan anu he akɛ etsake etsui loo koni akagbala etoi. Nibii ni ewie ni aŋma yɛ Lala 51 lɛ hãa wɔnaa akɛ yɛ anɔkwale mli lɛ, edɔ lɛ waa akɛ efee nakai esha lɛ.—Lala 51:3, 4, 17, yiteŋgbɛ niŋmaa.
9 Maŋtsɛ Hezekia hu fee esha eshi Yehowa. Biblia lɛ kɛɛ: “Ewó ehe nɔ yɛ etsui mli, no hewɔ lɛ, Nyɔŋmɔ mli fu lɛ kɛ Yuda kɛ Yerusalem.” (2 Kro. 32:25) Mɛni hã Hezekia wó ehe nɔ lɛ? Eeenyɛ efee akɛ nii ni ená, Asiriabii lɛ anɔ kunim ni eye, loo naakpɛɛ gbɛ nɔ ni atsɔ atsa ehela lɛ hã enu he akɛ enɔ kwɔ fe mɛi krokomɛi. Ekolɛ henɔwomɔ nɛɛ nɔŋŋ hã ekɛ nii ni eyɔɔ lɛ tsɔɔ Babilonbii lɛ, ni gbalɔ Yesaia bajaje lɛ lɛ. (2 Maŋ. 20:12-18) Shi Hezekia hu jɛ heshibaa mli etsake etsui tamɔ David fee lɛ. (2 Kro. 32:26) Enɛ hewɔ lɛ, Yehowa bu lɛ akɛ eji maŋtsɛ anɔkwafo ni ‘fee nɔ ni ja.’—2 Maŋ. 18:3.
Be ni agbala Maŋtsɛ David jwɛŋmɔ kɛtee esha ni efee lɛ nɔ lɛ, eba ehe shi ni etsake etsui, ni nakai nɔŋŋ Maŋtsɛ Hezekia hu fee (Kwɛmɔ kuku 8-9)
10. Be ni ajaje Maŋtsɛ Amazia lɛ, te efee enii ehã tɛŋŋ?
10 Shi esoro bɔ ni Yuda maŋtsɛ Amazia fee enii yɛ bɔ ni Maŋtsɛ David kɛ Maŋtsɛ Hezekia fee amɛnii amɛhã lɛ he kwraa. Biblia lɛ kɛɛ efee nɔ ni ja, “shi jeee kɛ etsui fɛɛ.” (2 Kro. 25:2) Mɛni hewɔ awie nakai? Be ni Yehowa ye ebua Amazia ni eye Edombii lɛ anɔ kunim sɛɛ lɛ, ebɔi Edombii lɛ anyɔŋmɔi lɛ kotomɔ. c Be ni Yehowa gbalɔ ko kɛ maŋtsɛ lɛ yawie lɛ, eshwie gbalɔ yɛ ehiɛ.—2 Kro. 25:14-16.
11. Yɛ nɔ ni aŋma yɛ 2 Korintobii 7:9, 11 lɛ naa lɛ, mɛni kɛ́ wɔfee lɛ no baahã Yehowa kɛ wɔhe eshai ake wɔ? (Kwɛmɔ mfonirii lɛ hu.)
11 Mɛni wɔkaseɔ kɛjɛɔ saji nɛɛ amli? Kɛ́ wɔfee esha ko lɛ, esa akɛ wɔtsake wɔtsui ni wɔfee bɔ fɛɛ bɔ ni wɔbaanyɛ ni wɔkayafee nakai esha lɛ dɔŋŋ. Ni kɛ́ asafoŋ onukpai lɛ wo wɔ ŋaa yɛ sane ko he, ekolɛ sane ko ni wɔnaaa lɛ nɔ ko tsɔ po lɛ he lɛ, te esa akɛ wɔfee wɔnii yɛ he wɔhã tɛŋŋ? Esaaa akɛ wɔnuɔ he akɛ Yehowa loo asafoŋ onukpai lɛ sumɔɔɔ wɔsane. Anɔkwa, awo Israel maŋtsɛmɛi kpakpai lɛ po ŋaa ni ajaje amɛ. (Heb. 12:6) Kɛ́ ajaje wɔ lɛ, esa akɛ (1) wɔjɛ heshibaa mli wɔkpɛlɛ nɔ, (2) wɔfee tsakemɔi ni sa lɛ, kɛ (3) wɔya nɔ wɔsɔmɔ Yehowa kɛ wɔtsui muu fɛɛ. Kɛ́ wɔtsake wɔtsui lɛ, Yehowa kɛ wɔhe eshai lɛ baake wɔ.—Kanemɔ 2 Korintobii 7:9, 11.
Kɛ́ ajaje wɔ lɛ, esa akɛ (1) wɔjɛ heshibaa mli wɔkpɛlɛ nɔ, (2) wɔfee tsakemɔi ni sa lɛ, kɛ (3) wɔya nɔ wɔsɔmɔ Yehowa kɛ wɔtsui muu fɛɛ. Kɛ́ wɔtsake wɔtsui lɛ, Yehowa kɛ wɔhe eshai lɛ baake wɔ (Kwɛmɔ kuku 11) f
AMƐJÁ YEHOWA YƐ GBƐ NI ETSƆƆ AKƐ AJÁ LƐ LƐ NƆ
12. Mɛni ji nɔ titri ni hã esoro maŋtsɛmɛi ni ye anɔkwa lɛ yɛ maŋtsɛmɛi ni yeee anɔkwa lɛ ahe?
12 Maŋtsɛmɛi ni Yehowa bu amɛ akɛ anɔkwafoi lɛ ji mɛi ni já lɛ yɛ gbɛ ni etsɔɔ akɛ ajá lɛ lɛ nɔ ni amɛwo amɛshishibii lɛ hewalɛ ni amɛfee nakai nɔŋŋ lɛ. Eyɛ mli akɛ maŋtsɛmɛi nɛɛ tɔ̃ tɔmɔi komɛi tamɔ wɔwie he kɛtsɔ hiɛ lɛ moŋ, shi amɛjá Yehowa pɛ, ni amɛfee nɔ fɛɛ nɔ ni amɛbaanyɛ koni amɛjie amagai ni yɔɔ amɛshikpɔŋ lɛ nɔ lɛ. d
13. Mɛni hewɔ Yehowa bu Maŋtsɛ Ahab akɛ mɔ ko ni yeee anɔkwa lɛ?
13 Ni maŋtsɛmɛi ni Yehowa bu amɛ akɛ amɛyeee anɔkwa lɛ hu? Ekã shi faŋŋ akɛ, jeee nɔ fɛɛ nɔ ni amɛfee lɛ ni ehiii. Akɛ nɔkwɛmɔnɔ lɛ, be ni Maŋtsɛ Ahab nu akɛ lɛ ehewɔ lɛ agbe Nabot lɛ, lɛ po ni eji maŋtsɛ fɔŋ lɛ ba ehe shi ni edɔ lɛ. (1 Maŋ. 21:27-29) Agbɛnɛ hu, etotoo maji, ni eye ebua Israelbii lɛ ni amɛye amɛhenyɛlɔi anɔ kunim. (1 Maŋ. 20:21, 29; 22:39) Shi Ahab fee nɔ ko ni ehiii kwraa. Eŋa lɛ wo eyiŋ ni ehã amagajamɔ bahe shi waa yɛ Israel. Ahab tsakeee etsui yɛ efɔŋ nɛɛ ni efee lɛ he.—1 Maŋ. 21:25, 26.
14. (a) Mɛni hewɔ Yehowa bu Maŋtsɛ Rehoboam akɛ mɔ ko ni yeee anɔkwa lɛ? (b) Mɛni ji nɔ kome ni maŋtsɛmɛi ni Yehowa bu amɛ akɛ maŋtsɛmɛi fɔji lɛ ateŋ tsiimɔ fee?
14 Maŋtsɛ kroko ni yeee anɔkwa ji, Maŋtsɛ Rehoboam. Tamɔ bɔ ni wɔwie kɛtsɔ hiɛ lɛ, be ni eyeɔ maŋtsɛ lɛ, efee nibii kpakpai komɛi. Shi be ni emaŋtsɛyeli lɛ damɔ shi shiŋŋ lɛ, eje Yehowa Mla lɛ sɛɛ ni ebɔi amale nyɔŋmɔi jamɔ. (2 Kro. 12:1) Kɛjɛ no sɛɛ lɛ, kɛ́ ejá Yehowa fioo lɛ, kɛkɛ lɛ, eyajá amale nyɔŋmɔi lɛ hu fioo. (1 Maŋ. 14:21-24) Jeee Rehoboam kɛ Ahab pɛ ji maŋtsɛmɛi ni gba afã kɛje anɔkwa jamɔ he. Maŋtsɛmɛi ni yeee anɔkwa lɛ ateŋ tsiimɔ ji mɛi ni já amale nyɔŋmɔi ni amɛwo mɛi krokomɛi hewalɛ ni amɛ hu amɛfee nakai. No hewɔ lɛ, eyɛ faŋŋ akɛ, nɔ kome ni he hiaa waa ni Yehowa damɔ nɔ ebu maŋtsɛ ko akɛ maŋtsɛ kpakpa loo maŋtsɛ fɔŋ ji, kɛji maŋtsɛ lɛ já lɛ yɛ gbɛ ni etsɔɔ akɛ ajá lɛ lɛ nɔ.
15. Mɛni hewɔ Yehowa buɔ jamɔ ni wɔbaajá lɛ yɛ gbɛ ni etsɔɔ akɛ ajá lɛ lɛ nɔ lɛ akɛ nɔ ko ni he hiaa waa?
15 Mɛni hewɔ Yehowa bu jamɔ ni maŋtsɛmɛi nɛɛ yajá amale nyɔŋmɔi lɛ akɛ nɔ ko ni yɔɔ hiɛdɔɔ waa lɛ? Yiŋtoo kome ji akɛ, Yehowa kpa gbɛ akɛ maŋtsɛmɛi lɛ baaye amɛbua amɛshishibii lɛ koni amɛjá lɛ yɛ gbɛ ni etsɔɔ akɛ ajá lɛ lɛ nɔ. Agbɛnɛ hu, kɛ́ mɛi bɔi amale nyɔŋmɔi jamɔ lɛ, amɛfeɔ eshai ni yɔɔ hiɛdɔɔ, ni amɛkɛ mɛi yeee jogbaŋŋ. (Hos. 4:1, 2) Nɔ kroko hu ji akɛ, no mli lɛ maŋtsɛmɛi lɛ kɛ amɛshishibii lɛ fɛɛ ejɔɔ amɛhe nɔ amɛhã Yehowa. Enɛ hewɔ lɛ, Biblia lɛ kɛ Yehowa sɛɛ ni amɛje ni amɛyajá amale nyɔŋmɔi lɛ to gbalafitemɔ he. (Yer. 3:8, 9) Kɛ́ mɔ ko fite gbãla lɛ, ekumɔɔ ehefatalɔ lɛ tsui. Nakai nɔŋŋ kɛ́ Yehowa tsulɔ ko ni ejɔɔ ehe nɔ ehã lɛ lɛ yajá amale nyɔŋmɔi lɛ, ekumɔɔ Yehowa tsui. e—5 Mo. 4:23, 24.
16. Mɛni ji nɔ titri ni Yehowa damɔɔ nɔ ebuɔ mɔ ko akɛ jalɔ loo mɔ fɔŋ?
16 Mɛni wɔkaseɔ yɛ sane nɛɛ mli? Wɔna akɛ, esa akɛ wɔtsi wɔhe kɛje nɔ fɛɛ nɔ ni kɛ amale jamɔ yɔɔ tsakpaa lɛ he. Shi kɛfata he lɛ, esa akɛ wɔjá Yehowa yɛ gbɛ ni etsɔɔ akɛ wɔjá lɛ lɛ nɔ, ni wɔkɛ wɔbe kɛ wɔhewalɛ fɛɛ asɔmɔ lɛ. Gbalɔ Maleaki hã wɔna nɔ ni hãa Yehowa buɔ mɔ ko akɛ gbɔmɔ kpakpa kɛ nɔ ni hãa ebua mɔ ko akɛ gbɔmɔ fɔŋ lɛ faŋŋ. Ewie akɛ: “Nyɛbaasaa nyɛna srɔto ni yɔɔ jalɔ kɛ mɔ fɔŋ teŋ, kɛ mɔ ni sɔmɔɔ Nyɔŋmɔ kɛ mɔ ni sɔmɔɔɔ lɛ lɛ teŋ.” (Mal. 3:18) No hewɔ lɛ, kɛ́ wɔmiitao ni Yehowa abu wɔ jalɔi lɛ, belɛ esa akɛ wɔkwɛ jogbaŋŋ ni wɔtɔmɔi jio, emuu ni wɔyeee lɛ jio, nɔ kroko jio, akaje wɔnijiaŋ wui ni wɔkpa Yehowa sɔɔmɔ kɔkɔɔkɔ. Kɛ́ wɔkpa Yehowa sɔɔmɔ lɛ, wɔfee esha ni yɔɔ hiɛdɔɔ waa.
17. Kɛ́ wɔmiikpɛ wɔyiŋ yɛ mɔ ni wɔbaasumɔ ni wɔkɛbote gbalashihilɛ mli lɛ he lɛ, mɛni hewɔ esa akɛ wɔsusu nii ahe jogbaŋŋ?
17 Kɛ́ oshijafo ji bo ni ootao obote gbalashihilɛ mli lɛ, mɛɛ gbɛ nɔ Maleaki wiemɔi lɛ baanyɛ aye abua bo ni okpɛ yiŋ kpakpa yɛ mɔ ni obaasumɔ ni okɛbote gbalashihilɛ mli lɛ he? Kɛ́ mɔ ko buɔ mɔ ni ebɛ basabasa, shi ejáaa Yehowa lɛ, ani Yehowa baabu lɛ akɛ jalɔ? (2 Kor. 6:14) Kɛ́ okɛ mɔ ko ni tamɔ nakai bote gbalashihilɛ mli lɛ, ani ebaaye ebua bo ni oya nɔ oye Yehowa anɔkwa? Susumɔ Maŋtsɛ Solomon sane lɛ he okwɛ. Eeenyɛ efee akɛ, maŋsɛɛ yei ni ekɛbote gbalashihilɛ mli lɛ yɛ sui kpakpai komɛi. Shi amɛjáaa Yehowa, ni fiofio lɛ amɛdɔ etsui ni lɛ hu ebɔi amale nyɔŋmɔi jamɔ.—1 Maŋ. 11:1, 4.
18. Mɛni esa akɛ fɔlɔi atsɔɔ amɛbii?
18 Fɔlɔi, nyɛbaanyɛ nyɛkɛ maŋtsɛmɛi lɛ ahe saji ni aŋma yɛ Biblia lɛ mli lɛ aye abua nyɛbii lɛ ni amɛná he miishɛɛ waa akɛ amɛbaasɔmɔ Yehowa. Nyɛyea nyɛbuaa amɛ ni amɛna akɛ, maŋtsɛmɛi ni já Yehowa jogbaŋŋ ni amɛwo amɛmaŋbii lɛ hewalɛ ni amɛ hu amɛjá Yehowa lɛ, amɛ ni ebu amɛ akɛ maŋtsɛmɛi kpakpai. Nyɛhãa nyɛbii lɛ anaa yɛ nyɛwiemɔ kɛ nyɛnifeemɔ mli akɛ, Biblia lɛ kasemɔ, asafoŋ kpeeiyaa, shiɛmɔyaa, kɛ nibii krokomɛi ni hãa wɔbɛŋkɛɔ Yehowa kpaakpa lɛ ahe miihia nyɛ waa fe nibii krokomɛi fɛɛ yɛ nyɛshihilɛ mli. (Mat. 6:33) Kɛjeee nakai lɛ, nyɛbii lɛ nuŋ nɔ ni Yehowa jamɔ tsɔɔ lɛ shishi jogbaŋŋ, ni amɛbaanyiɛ nyɛsɛɛ kɛkɛ. Kɛ́ eba lɛ nakai lɛ, amɛnaŋ Yehowa jamɔ akɛ nɔ ko ni he hiaa waa yɛ amɛshihilɛ mli, ni ekolɛ amɛbaashi anɔkwale kwraa po.
19. Kɛ́ mɔ ko ekpa Yehowa jamɔ lɛ, ani no tsɔɔ akɛ enyɛŋ ebajá lɛ dɔŋŋ? Mɛni hewɔ okɛɔ nakai? (Kwɛmɔ akrabatsa ni ji “ Obaanyɛ Oku Osɛɛ Kɛba Yehowa Ŋɔɔ!” lɛ hu.)
19 Kɛ́ bianɛ lɛ, mɔ ko ekpa Yehowa jamɔ lɛ, ani no tsɔɔ akɛ enyɛŋ ebajá lɛ dɔŋŋ? Dabi. Mɔ lɛ baanyɛ atsake etsui ni ebɔi Yehowa jamɔ ekoŋŋ. Nɔ ni baaye abua lɛ ni efee nakai ji, ni ebaaba ehe shi ni ehã asafoŋ onukpai lɛ aye abua lɛ. (Yak. 5:14) Esa akɛ efee bɔ fɛɛ bɔ ni ebaanyɛ ni eku esɛɛ kɛba Yehowa ŋɔɔ, ejaakɛ nɔ ko bɛ ni hi fe ni mɔ ko baatsɔ Yehowa naanyo ekoŋŋ!
20. Kɛ́ wɔkase maŋtsɛmɛi ni ye Yehowa anɔkwa lɛ, te Yehowa baana wɔ ehã tɛŋŋ?
20 No hewɔ lɛ, mɛni wɔkase yɛ Israel maŋtsɛmɛi lɛ ahe sane ni wɔbasusu he lɛ mli? Wɔbana akɛ, kɛ́ wɔkɛ wɔtsui muu fɛɛ já Yehowa lɛ, belɛ wɔmiikase maŋtsɛmɛi anɔkwafoi lɛ. Agbɛnɛ hu, wɔbana akɛ kɛ́ wɔtɔ̃ lɛ, esa akɛ wɔkase nii yɛ mli, wɔtsake wɔtsui, ni wɔjaje wɔgbɛi. Nyɛhãa wɔkaia be fɛɛ be hu akɛ, ehe miihia ni wɔjá anɔkwa Nyɔŋmɔ koome lɛ pɛ. Kɛ́ oye Yehowa anɔkwa lɛ, ebaana bo hu akɛ mɔ ko ni feɔ nɔ ni ja yɛ ehiɛ.
LALA 45 Saji Ni Mijwɛŋɔ Nɔ Yɛ Mitsui Mli
a Yɛ nikasemɔ nɛɛ mli lɛ, kɛ́ akɛ wiemɔ ni ji “Israel maŋtsɛmɛi” tsu nii lɛ, ekɔɔ maŋtsɛmɛi fɛɛ ni ye Yehowa webii lɛ anɔ lɛ ahe, kɛ́ Yuda wekui enyɔ maŋtsɛyeli lɛ nɔ amɛye jio, Israel wekui nyɔŋma maŋtsɛyeli lɛ nɔ amɛye jio, Israel wekui 12 lɛ fɛɛ anɔ amɛye jio.
b WIEMƆ NI ATSƆƆ MLI: Kɛ́ Biblia lɛ kɛ wiemɔ ni ji “tsui” lɛ tsu nii lɛ, bei pii lɛ edamɔ shi kɛhã mɛi ni wɔji yɛ wɔmligbɛ. Nibii ni hãa anaa mɛi ni wɔji yɛ mligbɛ lɛ ekomɛi ji, nibii ni wɔshweɔ, nibii ni wɔsusuɔ he, bɔ ni wɔfeɔ wɔnii wɔhãa, wɔsubaŋ, wɔnyɛmɔi, nɔ ni kanyaa wɔ ni wɔfeɔ nibii ni wɔfeɔ lɛ, kɛ otii ni wɔkɛmamɔ wɔhiɛ.
c Etamɔ nɔ ni nakai beiaŋ lɛ, nɔ kome ni jeŋmaji lɛ amaŋtsɛmɛi lɛ fɔɔ feemɔ ji, kɛ́ amɛyaye maŋ ko nɔ lɛ, amɛjáa nakai maŋ lɛ nyɔŋmɔi lɛ.
d Maŋtsɛ Asa tɔ̃ tɔmɔi ni yɔɔ hiɛdɔɔ. (2 Kro. 16:7, 10) Fɛɛ sɛɛ lɛ, Biblia lɛ wieɔ ehe ekpakpa. Be ni Yehowa tsɔ gbalɔ ko nɔ ejaje lɛ lɛ, amrɔmrɔ lɛ, ebooo toi, shi etamɔ nɔ ni sɛɛ mli lɛ, ebo toi ni etsake etsui. Sui kpakpai ni Asa yɔɔ lɛ ahewɔ lɛ, Yehowa kɛ lɛ yeee yɛ etɔmɔi lɛ anaa. Nɔ kome ni sa kadimɔ waa yɛ Asa he ji akɛ, ejá Yehowa kome too pɛ, ni ebɔ mɔdɛŋ waa akɛ ebaajie amagai fɛɛ kɛje emaŋtsɛyeli lɛ mli.—1 Maŋ. 15:11-13; 2 Kro. 14:2-5.
e Nɔ kome ni sa kadimɔ ji akɛ, klɛŋklɛŋ kitãi enyɔ yɛ Mose Mla lɛ mli lɛ kɛɛ, akajá mɔ ko mɔ ko loo nɔ ko nɔ ko akɛ ja Yehowa kome too pɛ.—2 Mo. 20:1-6.
f NƆ NI WƆNAA YƐ MFONIRI LƐ MLI: Nyɛmi nuu ko yɛ naagba yɛ dãanumɔ he, ni asafoŋ onukpa ko ni edako tsɔ lɛ miiwo lɛ ŋaa yɛ he. Nyɛmi nuu lɛ ba ehe shi ni ebo ŋaawoo lɛ toi, efee tsakemɔi ni he hiaa lɛ, ni etee nɔ esɔmɔ Yehowa.
