NIKASEMƆ 29
LALA 121 Henɔyeli He Miihia Wɔ
Hã Ohiɛ Ahi Ohe Nɔ Be Fɛɛ Be Koni Okagbee Kaa Mli
“Nyɛyaa nɔ nyɛbua ni nyɛsɔlea daa, koni nyɛkabote kaa mli.” —MAT. 26:41.
NƆ NI WƆBAAKASE
Nikasemɔ nɛɛ baahã wɔna akɛ ehe miihia waa ni wɔfee bɔ fɛɛ bɔ ni wɔbaanyɛ koni wɔkafee esha. Agbɛnɛ hu, ebaahã wɔna akɛ ehe miihia waa ni wɔkwɛ jogbaŋŋ koni wɔkafee nɔ ko ni naagbee lɛ, ebaahã wɔyafee esha.
1-2. (a) Mɛɛ kɔkɔ Yesu bɔ ekaselɔi lɛ? (b) Mɛni hewɔ kaselɔi lɛ jo foi amɛshi Yesu lɛ? (Kwɛmɔ mfonirii lɛ hu.)
BE KO LƐ, Yesu wie akɛ: “Anɔkwa, mumɔ lɛ miisumɔ waa, shi heloo lɛ egbede.” a (Mat. 26:41b) Wiemɔi nɛɛ hãa wɔnaa akɛ, Yesu le akɛ wɔyeee emuu ni no hewɔ lɛ wɔbaanyɛ wɔtɔ̃. Shi amɛhãa wɔnaa hu akɛ, esa akɛ wɔkwɛ wɔhe nɔ jogbaŋŋ koni wɔkahe wɔhe wɔye fe nine. Gbi gbɛkɛ ni Yesu wie sane nɛɛ lɛ, no mli lɛ ekaselɔi lɛ etsɔ hiɛ amɛkɛɛ lɛ akɛ amɛjeŋ esɛɛ kɔkɔɔkɔ. (Mat. 26:35) Nɔ ni kaselɔi lɛ wie lɛ hãa wɔnaa akɛ, yɛ amɛtsui mli tɔ̃ɔ lɛ amɛmiisumɔ ni amɛfee nɔ ni ja. Shi amɛyayɔseee akɛ kɛ́ amɛyaje shihilɛ ko ni mli wa waa mli lɛ, ewaaa akɛ amɛbaafee nɔ ni amɛle akɛ ejaaa lɛ moŋ fe ni amɛbaafee nɔ ni ja. No hewɔ lɛ, Yesu bɔ amɛ kɔkɔ akɛ: “Nyɛyaa nɔ nyɛbua ni nyɛsɔlea daa, koni nyɛkabote kaa mli.”—Mat. 26:41a.
2 Dɔlɛ sane ji akɛ, kaselɔi lɛ eyaaa nɔ amɛbuuu. No hewɔ lɛ, be ni amɔ Yesu lɛ, ani ole nɔ ni ba? Nɔ najiaŋ ni amɛbaahi emasɛi lɛ, amɛshe gbeyei ni amɛjo foi. Amɛ nɔŋŋ amɛwo amɛ-Nuŋtsɔ lɛ shi akɛ amɛkwaŋ lɛ kɔkɔɔkɔ, shi akɛni amɛyaaa nɔ amɛbuuu hewɔ lɛ, amɛje esɛɛ.—Mat. 26:56.
Yesu kɛɛ ekaselɔi lɛ ni amɛya nɔ amɛbu koni amɛkagbee kaa mli, shi akɛni amɛfeee nakai hewɔ lɛ, amɛjo foi amɛshi lɛ (Kwɛmɔ kuku 1-2)
3. (a) Kɛ́ wɔmiitao ni wɔya nɔ wɔye Yehowa anɔkwa lɛ, mɛni hewɔ esa akɛ wɔkwɛ jogbaŋŋ ni wɔkahe wɔhe wɔye fe nine? (b) Mɛni he wɔbaasusu yɛ nikasemɔ nɛɛ mli?
3 Esa akɛ wɔkwɛ jogbaŋŋ ni wɔkahe wɔhe wɔye fe nine. Eyɛ mli akɛ wɔtswa wɔfai shi akɛ wɔhãŋ nɔ ko nɔ ko atse wɔ kɛje Yehowa he moŋ, shi esa akɛ wɔkai akɛ wɔyeee emuu ni no hewɔ lɛ, wɔbaanyɛ wɔtɔ̃. (Rom. 5:12; 7:21-23) Wɔbaanyɛ wɔkɛ shihilɛ ko akpe trukaa ni baahã wɔnu he waa akɛ wɔfee nɔ ko ni wɔle akɛ Yehowa sumɔɔɔ. Kɛ́ wɔmiitao wɔye Yehowa kɛ e-Bi lɛ anɔkwa be fɛɛ be lɛ, esa akɛ wɔbo ŋaa ni Yesu wo lɛ toi ni wɔhã wɔhiɛ ahi wɔhe nɔ waa koni wɔkayagbee kaa mli. Nikasemɔ nɛɛ baaye abua wɔ ni wɔfee nakai. Klɛŋklɛŋ lɛ, wɔbaakwɛ nibii pɔtɛi komɛi ni esa akɛ wɔkwɛ wɔhe nɔ jogbaŋŋ yɛ he koni wɔkagbee kaa mli. No sɛɛ lɛ, wɔbaasusu bɔ ni wɔbaafee wɔhã wɔhiɛ ahi wɔhe nɔ koni wɔkagbee kaa mli lɛ he. Naagbee kwraa lɛ, wɔbaakwɛ nɔ ni wɔbaafee koni wɔhiɛ akaje wɔhe nɔ, shi moŋ wɔhiɛ ahi wɔhe nɔ be fɛɛ be.
MƐƐ NIBII NƐKƐ ESA AKƐ WƆKWƐ WƆHE NƆ JOGBAŊŊ YƐ HE?
4-5. Mɛni hewɔ esa akɛ wɔkwɛ wɔhe nɔ jogbaŋŋ koni wɔkatɔ̃ tɔmɔi bibii po?
4 Eshai komɛi yɛ hiɛdɔɔ fe eshai komɛi, shi eshai ni bɛ hiɛdɔɔ tsɔ lɛ po baanyɛ ahã wekukpaa ni yɔɔ wɔ kɛ Yehowa teŋ lɛ mli agbɔjɔ. Agbɛnɛ hu, amɛbaanyɛ amɛhã wɔyafee eshai ni yɔɔ hiɛdɔɔ.
5 Wɔ fɛɛ wɔkɛ kai kpeɔ. Shi wɔteŋ mɔ fɛɛ mɔ yɛ kaa ni kɛ́ ekɛkpe lɛ, ewaaa akɛ ebaagbee mli. Mɛi komɛi yɛ ni nɔ ni amɛnuɔ he akɛ amɛyafee lɛ ji esha ni yɔɔ hiɛdɔɔ. Yɛ mɛi komɛi hu agbɛfaŋ lɛ, nɔ ni amɛnuɔ he akɛ amɛyafee lɛ fata nibii ni Biblia lɛ tsɛɔ lɛ muji nii lɛ ahe. Dani mɛi komɛi hu yɛ ni susumɔi ni ehe shi yɛ je lɛ mli lɛ ni duɔ amɛ. Akɛ nɔkwɛmɔnɔ lɛ, ekolɛ mɔ ko yɛ ni eenu he waa akɛ eyabɔ ajwamaŋ. Mɔ ko hu yɛ ni ekolɛ enuɔ he waa akɛ ekɛ eyoohe loo enuutso ashwɛ loo ekwɛ ponografi loo efee nɔ kroko ni tamɔ nakai ni fata nibii ni Biblia lɛ tsɛɔ lɛ muji nii lɛ ahe. Dani mɛi komɛi hu yɛ ni amɛsheɔ gbɔmɔ gbeyei, loo amɛwóɔ amɛhe nɔ, loo amɛtsui shaa amɛ, loo amɛyɛ su kroko ni tamɔ nakai. Tamɔ bɔ ni Yakobo wie lɛ, “mɔ fɛɛ mɔ lɛ, nɔ ni lɛ diɛŋtsɛ eshweɔ lɛ, no gbalaa lɛ ni elakaa lɛ.”—Yak. 1:14.
6. Mɛni esa akɛ wɔteŋ mɔ fɛɛ mɔ akpɛlɛ nɔ?
6 Ani ole kaa ni kɛ́ okɛkpe lɛ, ewaaa akɛ obaagbee shi? Kɛ́ onuɔ he akɛ bo lɛ obɛ eko nakai loo akɛ bo lɛ kaa ko kaa ko nyɛŋ etsi bo egbee shi lɛ, belɛ oolaka ohe. (1 Yoh. 1:8) Kɛ́ obaakai lɛ, Paulo wie akɛ, esa akɛ ‘mɛi ni mumɔ lɛ tsɔɔ amɛ gbɛ lɛ’ po ahã amɛhiɛ ahi amɛhe nɔ koni amɛkagbee kaa mli. (Gal. 6:1) Esa akɛ wɔye wɔhe anɔkwa ni wɔkpɛlɛ nɔ akɛ, kai komɛi yɛ ni ewa kɛhã wɔ akɛ wɔbaadamɔ naa.—2 Kor. 13:5.
7. Mɛni esa akɛ wɔhã wɔhiɛ ahi wɔhe nɔ waa yɛ he? Okɛ nɔkwɛmɔnɔ ko atsɔɔ mli.
7 Kɛ́ wɔna kaa ni ewaaa akɛ ebaatsi wɔ egbee shi lɛ, mɛni esa akɛ wɔfee? Esa akɛ wɔmia wɔhiɛ waa ni wɔfee nibii ni baahã wɔnyɛ wɔdamɔ naa! Yɛ blema lɛ, he ni ewaaa kwraa akɛ abaatsɔ kɛtutua maŋ ko ji, kɛtsɔ egbói lɛ anaa. No hewɔ lɛ, akɛ asraafoi pii damɔɔ agbói lɛ anaa koni amɛbu maŋ lɛ he. Nakai nɔŋŋ esa akɛ wɔhã wɔhiɛ ahi wɔhe nɔ waa yɛ kai ni wɔle akɛ ewaaa akɛ ebaatsi wɔ egbee shi lɛ ahe, ni wɔfee nibii ni baaye abua wɔ koni wɔnyɛ wɔdamɔ naa.—1 Kor. 9:27.
BƆ NI WƆBAAFEE WƆHÃ WƆHIƐ AHI WƆHE NƆ
8-9. Mɛni oblanyo ni awie ehe yɛ Abɛi yitso 7 lɛ fee ni hã eyagbee esha ni yɔɔ hiɛdɔɔ mli? (Abɛi 7:8, 9, 13, 14, 21)
8 Te wɔbaafee tɛŋŋ wɔhã wɔhiɛ ahi wɔhe nɔ? Nɔ kome ni baaye abua wɔ ji, ni wɔbaakase nii kɛjɛ oblanyo ni awie ehe yɛ Abɛi yitso 7 lɛ he sane lɛ mli. Oblanyo nɛɛ kɛ yoo ko ni bɛ jeŋba lɛ yabɔ ajwamaŋ. Kuku 22 lɛ kɛɛ eyi yoo lɛ sɛɛ “oya nɔŋŋ,” shi no etsɔɔɔ akɛ nɔ ni nina lɛ lɛ ba trukaa kɛkɛ. Kukuji ni tsɔ hiɛ lɛ hãa wɔnaa akɛ, efee nibii pii ni gbala lɛ fiofio kɛyabote esha lɛ mli.
9 Mɛni hã oblanyo lɛ yabɔ ajwamaŋ lɛ? Klɛŋklɛŋ kwraa lɛ, Biblia lɛ kɛɛ, “eyi gbɛjegbɛ ni kɛ gbɛ ni yaa yoo lɛ shĩa lɛ kpeɔ lɛ nɔ” be ni je ena. Kɛkɛ ni ekɛ ehiɛ tsɔɔ yoo lɛ shĩa lɛ gbɛ. (Kanemɔ Abɛi 7:8, 9.) Be ni ena yoo lɛ, etsɔɔɔ ehe ni ebaaya shĩa, moŋ lɛ eho edamɔ shi ni yoo lɛ shɔ enaa. No sɛɛ lɛ, eŋmɛ gbɛ ni yoo lɛ kɛ lɛ bɔi sanegbaa. Yoo lɛ kɛɛ lɛ akɛ, eyashã naanyobɔɔ afɔlei, ekolɛ koni no ahã oblanyo lɛ asusu akɛ jeee gbɔmɔ fɔŋ ji lɛ. (Kanemɔ Abɛi 7:13, 14, 21.) Nibii nɛɛ ni oblanyo lɛ fee lɛ ji nɔ ni hã eyagbee kaa mli ni efee esha lɛ.
10. Mɛɛ gbɛ nɔ nɔ ni nina oblanyo lɛ baanyɛ anina Kristofonyo ko ŋmɛnɛ?
10 Nɔ ni nina oblanyo lɛ ni awie ehe yɛ Abɛi awolo lɛ mli lɛ baanyɛ anina wɔteŋ mɔ fɛɛ mɔ. Bei pii lɛ, kɛ́ mɔ ko yafee esha ko ni yɔɔ hiɛdɔɔ ni abi lɛ bɔ ni eba lɛ lɛ, ewieɔ nii lɛ tamɔ nɔ ni ekɛ kaa lɛ kpe trukaa ni ehiɛ bɛ ehe nɔ ni egbee mli. Ekolɛ ebaawie po akɛ, “Mileee bɔ ni fee kwraa ni eba lɛ nakai.” Shi ekolɛ kɛ́ mɔ lɛ ta shi diŋŋ ni esusu nɔ ni tee nɔ lɛ he jogbaŋŋ lɛ, ebaana akɛ ekpɛ yiŋ gbohii komɛi ni no hã eyafee esha lɛ. Ekolɛ ekɛ nanemɛi gbohii bɔi bɔɔ, ekɛ nibii ni esaaa bɔi ehiɛtserɛjiemɔ, etee wɛbsaiti komɛi ni esaaa lɛ anɔ, loo etee hei komɛi ni esaaa akɛ Kristofonyo yaa. Kɛfata he lɛ, eeenyɛ efee akɛ ekpa sɔlemɔ, ekpa Biblia lɛ kanemɔ, ekpa asafoŋ kpeeiyaa, loo ekpa shiɛmɔyaa. No hewɔ lɛ, kɛ́ abote mli aahu lɛ, esane lɛ tamɔ oblanyo lɛ sane lɛ nɔŋŋ. Eshigbeemɔ lɛ baaa lɛ trukaa.
11. Kɛ́ wɔsumɔɔɔ ni wɔyafeɔ esha lɛ, mɛni esa akɛ wɔfee?
11 Mɛni wɔkaseɔ yɛ sane nɛɛ mli? Kɛ́ wɔsumɔɔɔ ni wɔfeɔ esha lɛ, esa akɛ wɔtsi wɔhe kɛje nibii ni baanyɛ ahã wɔyafee esha lɛ ahe. Enɛ pɛpɛɛpɛ Solomon wie be ni egba oblanyo lɛ kɛ yoo ni bɛ jeŋba lɛ he sane lɛ egbe naa lɛ. Ewie akɛ: “Kaadu gbɛ kɛyaje egbɛi lɛ anɔ.” (Abɛi 7:25) Ewie hu akɛ: “Kaaya yoo nɛɛ masɛi kwraa; kaabɛŋkɛ eshĩa lɛ shinaa lɛ naa.” (Abɛi 5:3, 8) Enɛ maa nɔ mi ehãa wɔ akɛ, kɛ́ wɔsumɔɔɔ ni wɔyafeɔ esha lɛ, esa akɛ wɔtsi wɔhe kɛje nibii fɛɛ kɛ shihilɛi fɛɛ ni baanyɛ ahã wɔyafee esha lɛ ahe. b Nibii komɛi yɛ ni ejeee tɔmɔ akɛ Kristofonyo ko baafee, shi kɛ́ wɔna akɛ ebaanyɛ ehã wɔyafee esha lɛ, esa akɛ wɔtsi wɔhe kɛje he.—Mat. 5:29, 30.
12. Mɛni Hiob tswa efai shi akɛ ebaafee? Ni mɛɛ gbɛ nɔ no ye ebua lɛ koni ekayagbee kaa mli? (Hiob 31:1)
12 Kɛ́ wɔsumɔɔɔ ni wɔfeɔ nibii ni baahã wɔyafee esha lɛ, esa akɛ wɔtswa wɔfai shi waa akɛ wɔbaakwɛ wɔhe nɔ jogbaŋŋ. Nakai pɛpɛɛpɛ Hiob fee. Ekɛ ‘ehiŋmɛii kpaŋ’ akɛ ekɛ ejwɛŋmɔ emaŋ yoo ko ni jeee eŋa lɛ nɔ bɔ ni esaaa. (Kanemɔ Hiob 31:1.) Ŋwanejee ko bɛ he akɛ, Hiob ye kpaŋmɔ nɛɛ nɔ, ni no ye ebua lɛ ni etsi ehe kwraa kɛje nɔ fɛɛ nɔ ni baanyɛ ahã eyafite gbãla lɛ he. Wɔ hu wɔbaanyɛ wɔtswa wɔfai shi akɛ, wɔbaatsi wɔhe kwraa kɛje nɔ fɛɛ nɔ ni baanyɛ ahã wɔyagbee kaa mli lɛ he.
13. Mɛni hewɔ esa akɛ wɔkwɛ jogbaŋŋ ni wɔkasusu nibii gbohii ahe lɛ? (Kwɛmɔ mfonirii lɛ hu.)
13 Agbɛnɛ hu, esa akɛ wɔkwɛ jogbaŋŋ ni wɔkasusu nibii gbohii ahe. (2 Mo. 20:17) Mɛi komɛi susuɔ akɛ kɛ́ mɔ ko susu nibii gbohii ahe shi eyafeee lɛ, naagba ko kwraa bɛ he. Shi nakai susumɔ lɛ ejaaa. Kɛ́ mɔ ko susuɔ nibii gbohii ahe daa nɛɛ, no baahã enu he waa akɛ eyafee nakai nibii gbohii lɛ. Kɛ́ mɔ ko fee nakai lɛ, eewo ehe nitsumɔ, ejaakɛ yɛ gbɛ ko nɔ lɛ, eetsa bu eehã lɛ diɛŋtsɛ ehe, ni kɛ́ egbe naa lɛ, ekwɛ ehe nɔ jogbaŋŋ ni ekagbee mli. Susumɔi gbohii baanyɛ aba wɔjwɛŋmɔ mli yɛ be kɛ beiaŋ. Shi kɛ́ amɛba lɛ, esa akɛ wɔjie kɛje wɔjwɛŋmɔ mli oya nɔŋŋ ni wɔkɛ susumɔi kpakpai aye najiaŋ. Kɛ́ wɔfee nakai lɛ, susumɔi gbohii heŋ shi yɛ wɔtsui mli, ni no baaye abua wɔ ni wɔkayafee esha ko ni yɔɔ hiɛdɔɔ.—Fip. 4:8; Kol. 3:2; Yak. 1:13-15.
Esa akɛ wɔtsi wɔhe kɛje nɔ fɛɛ nɔ ni baanyɛ ahã wɔyafee esha lɛ he (Kwɛmɔ kuku 13)
14. Mɛni ekoŋŋ baanyɛ aye abua wɔ ni wɔkayagbee kaa mli?
14 Mɛni ekoŋŋ baanyɛ aye abua wɔ ni wɔkayagbee kaa mli? No ji ni wɔbaahe wɔye kɛ wɔtsui muu fɛɛ akɛ, kɛ́ wɔbo Yehowa mlai lɛ toi lɛ, bɔ fɛɛ bɔ ni fee lɛ, wɔbaaná he sɛɛ. Jeee be fɛɛ be wɔbaaná lɛ mlɛo akɛ wɔbaahã wɔsusumɔi kɛ nibii ni wɔshweɔ lɛ afee nɔ ni sa Nyɔŋmɔ hiɛ. Shi kɛ́ wɔmia wɔhiɛ waa wɔfee nakai lɛ, wɔbaaná miishɛɛ ni wɔtsui baanyɔ wɔmli.
15. Kɛ́ wɔfee nibii ni baahã wɔshwe waa akɛ wɔfee nɔ ni ja lɛ, mɛɛ gbɛ nɔ no baaye abua wɔ ni wɔkagbee kaa mli?
15 Kɛ́ wɔfee nibii ni baahã wɔshwe waa akɛ wɔfee nɔ ni ja lɛ, no hu baaye abua wɔ. Kɛ́ ‘wɔnyɛ nɔ fɔŋ, ní wɔsumɔ nɔ kpakpa’ lɛ, no baahã wɔfai shi ni wɔtswa akɛ wɔbaafee nɔ ni ja, ni wɔtsi wɔhe kɛje nibii ni baanyɛ ahã wɔyafee esha lɛ ahe lɛ mli awa. (Amos 5:15) Kɛ́ be fɛɛ be lɛ, wɔmiishwe ni wɔfee nɔ ni ja lɛ, no lɛ kɛ́ wɔkɛ kaa ko kpe trukaa lɛ, ewaŋ tsɔ kɛhãŋ wɔ akɛ wɔbaafee nɔ ni ja.
16. Kɛ́ wɔfee nibii ni baahã wɔsumɔ Yehowa waa lɛ, mɛɛ gbɛ nɔ no baaye abua wɔ ni wɔkagbee kaa mli? (Kwɛmɔ mfonirii lɛ hu.)
16 Mɛni baaye abua wɔ ni wɔshwe waa akɛ wɔfee nɔ ni ja? Nɔ kome ni baaye abua wɔ ji, ni wɔkɛ wɔhe baawo nibii ni baahã wɔsumɔ Yehowa waa lɛ amli vii. Kɛ́ wɔtee asafoŋ kpeei loo wɔtee shiɛmɔ lɛ, no hãa wɔshweɔ waa akɛ wɔfee nɔ ni sa Yehowa hiɛ, ni wɔnuuu he akɛ wɔyafee efɔŋ. (Mat. 28:19, 20; Heb. 10:24, 25) Kɛ́ wɔkase Nyɔŋmɔ Wiemɔ lɛ ni wɔjwɛŋ nɔ lɛ, wɔbaasumɔ nɔ kpakpa waa ni wɔbaanyɛ nɔ fɔŋ hu waa. (Yos. 1:8; Lala 1:2, 3; 119:97, 101) Kɛ́ obaakai lɛ, Yesu kɛɛ ekaselɔi lɛ akɛ: “Nyɛsɔlea daa, koni nyɛkabote kaa mli.” (Mat. 26:41) Kɛ́ wɔsɔle wɔhã wɔ-Tsɛ ni yɔɔ ŋwɛi lɛ, ebaaye ebua wɔ, ni no baahã wɔfai shi ni wɔtswa akɛ wɔbaafee nɔ ni sa ehiɛ lɛ mli awa.—Yak. 4:8.
Kɛ́ wɔkɛ wɔhe woɔ Nyɔŋmɔjamɔ nifeemɔi amli daa lɛ, no baaye abua wɔ ni wɔkagbee kaa mli (Kwɛmɔ kuku 16) c
HÃ OHIƐ AHI OHE NƆ BE FƐƐ BE
17. Mɛɛ gbɔjɔmɔ no mli lɛ ewa kɛhã Petro akɛ ebaaye nɔ?
17 Gbɔjɔmɔi ni wɔyɔɔ lɛ ekomɛi yɛ ni wɔbaanyɛ wɔye nɔ kwraa ni eje wɔshihilɛ mli. Shi ekomɛi hu yɛ ni wɔbaafee he eko aahu dani kɛ́ amɛbaaya po lɛ, amɛbaaya. Enɛ eko bɔfo Petro kɛkpe lɛ. Gbɔmɔ gbeyeishemɔ hewɔ lɛ, Petro tso shii etɛ akɛ eleee Yesu. (Mat. 26:69-75) Sɛɛ mli lɛ, etamɔ nɔ ni Petro ye gbɔjɔmɔ nɛɛ nɔ, ejaakɛ ekɛ ekãa ye Yesu he odase yɛ Sanhedrin lɛ hiɛ. (Bɔf. 5:27-29) Shi afii komɛi asɛɛ lɛ, ‘eyashe mɛi ni fiɔ ketiafoo sɛɛ lɛ gbeyei,’ ni no hewɔ lɛ ekɛ jeŋmajiaŋbii ni ebatsɔmɔ Kristofoi lɛ kpa niyeli. (Gal. 2:11, 12) Enɛ hãa wɔnaa akɛ, Petro gbɔjɔmɔ lɛ jie ehiɛ kpo ekoŋŋ. Ni ekolɛ gbɔjɔmɔ nɛɛ gba enaa ewala gbii fɛɛ.
18. Kɛ́ wɔsusuɔ akɛ wɔye su gbonyo ko nɔ po lɛ, mɛni baanyɛ aba? Ni mɛni esa akɛ wɔfee?
18 Wɔ hu wɔbaanyɛ wɔyaje shihilɛ ni Petro yaje mli lɛ eko mli. Su ko ni ekolɛ wɔsusuɔ akɛ wɔjie yɛ wɔhe kwraa lɛ baanyɛ ajie ehiɛ kpo ekoŋŋ. Akɛ nɔkwɛmɔnɔ lɛ, nyɛmi nuu ko wie akɛ: “Mikpa ponografikwɛmɔ afii nyɔŋma, ni mimu sane naa akɛ miye naagba lɛ nɔ. Shi asomoaŋ, su gbonyo nɛɛ eyako; ehɔ shi diŋŋ tamɔ kooloo ko ni miigbɔbi; eemɛ koni kɛ́ hegbɛ lɛ ba nɔŋŋ lɛ, ejie ehiɛ kpo.” Shi nyɛmi nuu lɛ bɔ mɔdɛŋ waa; ehãaa enijiaŋ aje wui. Ena akɛ esa akɛ ewu eshi ponografikwɛmɔ daa gbi, ni ekolɛ ehe baahia ni efee nakai ewala gbii fɛɛ. No hewɔ lɛ, ekwɛɔ ehe nɔ jogbaŋŋ fe tsutsu lɛ po koni ekabɛŋkɛ ponografi kwraa, ni eŋa kɛ esafoŋ onukpai lɛ hu yeɔ amɛbuaa lɛ waa.
19. Kɛ́ wɔmiiwu wɔmiishi su fɔŋ ko shi kɛ́ etee aahu lɛ kɛkɛ ejie ehiɛ kpo ekoŋŋ lɛ, mɛni wɔbaanyɛ wɔfee koni ekɛ wɔ akayabote kaa mli?
19 Kɛ́ wɔmiiwu wɔmiishi su fɔŋ ko, shi kɛ́ etee aahu lɛ kɛkɛ ejie ehiɛ kpo ekoŋŋ lɛ, mɛni wɔbaanyɛ wɔfee koni ekɛ wɔ akayabote kaa mli? Nɔ ni wɔbaanyɛ wɔfee ji ni wɔbaabo ŋaa ni Yesu wo lɛ toi. Ewie akɛ: “Nyɛyaa nɔ nyɛbua.” Kɛ́ onuɔ he akɛ oye ogbɔjɔmɔ lɛ nɔ po lɛ, yaa nɔ otsi ohe kɛje nibii ni baanyɛ ekɛ bo aya kaa mli lɛ ahe. (1 Kor. 10:12) Kaakpa nibii ni yeɔ ebuaa bo ni owuɔ oshiɔ gbɔjɔmɔ nɛɛ feemɔ kɔkɔɔkɔ. Abɛi 28:14 lɛ kɛɔ akɛ: “Mɔ ni hãa ehiɛ hiɔ ehe nɔ be fɛɛ be lɛ, eyɛ miishɛɛ.”—2 Pet. 3:14.
JƆƆMƆI NI WƆBAANÁ KƐ́ WƆHÃ WƆHIƐ HI WƆHE NƆ BE FƐƐ BE
20-21. (a) Kɛ́ wɔhã wɔhiɛ hi wɔhe nɔ be fɛɛ be koni wɔkabote kaa mli lɛ, mɛɛ gbɛ nɔ wɔbaaná he sɛɛ? (b) Kɛ́ wɔtsu wɔgbɛfaŋ nɔ lɛ, mɛni Yehowa baafee kɛye ebua wɔ? (2 Korintobii 4:7)
20 Kɛ́ wɔhã wɔhiɛ hi wɔhe nɔ be fɛɛ be koni wɔkabote kaa mli lɛ, wɔbaaná he sɛɛ waa. Kɛ́ wɔfee esha lɛ, ekolɛ wɔbaaye “ŋɔɔmɔ be fioo ko,” shi kɛ́ wɔhi shi yɛ Yehowa mlai kɛ eshishitoo mlai lɛ anaa lɛ, wɔbaaná miishɛɛ ni da kwraa fe no. (Heb. 11:25; Lala 19:8) Nɔ hewɔ lɛ ji akɛ, Yehowa bɔ wɔ ni wɔhi shi yɛ egbɛtsɔɔmɔi anaa. (1 Mo. 1:27) No hewɔ lɛ, kɛ́ wɔhi shi yɛ Yehowa gbɛtsɔɔmɔi anaa lɛ, wɔhe baajɔ wɔ ejaakɛ wɔbaaná henilee ni he tse, ni wɔsɛɛ lɛ wɔbaahi shi kɛya naanɔ.—1 Tim. 6:12; 2 Tim. 1:3; Yuda 20, 21.
21 Lɛɛlɛŋ, “heloo lɛ egbede.” Shi no etsɔɔɔ akɛ wɔnyɛŋ wɔfee nɔ ko yɛ wɔgbɔjɔmɔi lɛ ahe. Yehowa efee klalo akɛ ebaahã wɔ hewalɛ ni he hiaa wɔ lɛ. (Kanemɔ 2 Korintobii 4:7.) Kadimɔ akɛ hewalɛ ni Nyɔŋmɔ hãa wɔ lɛ ji hewalɛ ni fa kɛteke nɔ lɛ. Shi ja wɔkɛ wɔ diɛŋtsɛ wɔhewalɛ lɛ eje nɔ ko shishi, ni tsɔɔ akɛ, ja wɔtsi wɔhe kɛje nibii ni baanyɛ ekɛ wɔ aya kaa mli lɛ ahe dani Yehowa baaye ebua wɔ. Kɛ́ wɔtsu wɔgbɛfaŋ nɔ lɛ, wɔbaanyɛ wɔná hemɔkɛyeli ni mli wa akɛ, kɛ́ wɔsɔle wɔbi Yehowa ni edro wɔ hewalɛ lɛ, ebaabo wɔ toi aahu. (1 Kor. 10:13) Yehowa yelikɛbuamɔ naa lɛ, wɔbaanyɛ wɔhã wɔhiɛ ahi wɔhe nɔ daa koni wɔkabote kaa mli.
LALA 47 Sɔlemɔ Ohã Yehowa Daa Gbi
a WIEMƆI NI ATSƆƆ MLI: Be ni Yesu tsĩ “mumɔ lɛ” tã yɛ Mateo 26:41 lɛ, no mli lɛ eewie bɔ ni wɔsumɔɔ waa akɛ wɔfee nɔ ni ja lɛ he. Ni be ni ekɛ wiemɔ ni ji “heloo lɛ” hu tsu nii lɛ, no mli lɛ eetsɔɔ akɛ akɛni wɔyeee emuu ni wɔfeɔ esha hewɔ lɛ, bei pii lɛ wɔwieɔ loo wɔfeɔ nibii ni esaaa. No hewɔ lɛ, eyɛ mli akɛ bei pii lɛ, wɔmiisumɔ ni wɔfee nɔ ni ja moŋ, shi kɛ́ wɔkwɛɛɛ ni ahi lɛ, emuu ni wɔyeee lɛ hewɔ lɛ, wɔbaafee nɔ ni esaaa Yehowa hiɛ.
b Oyi Aná Wala Kɛya Naanɔ! wolo lɛ, nikasemɔ 57 kk. 1-3 lɛ, kɛ sane ni yitso ji, “Hã Ohiŋmɛii Akwɛ Ohiɛ Tɛ̃ɛ” ni je kpo yɛ November 2020 Buu-Mɔɔ lɛ, bf. 27-29, kk. 12-17 lɛ baaye abua mɔ ko ni eyafee esha ko ni yɔɔ hiɛdɔɔ lɛ.
c NƆ NI WƆNAA YƐ MFONIRI LƐ MLI: Nyɛmi nuu ko miifee daa gbi ŋmalɛ lɛ leebi, shwane be ni eba hejɔɔmɔ lɛ, eekane Biblia lɛ, ni gbɛkɛ lɛ, etee otsi teŋ kpee.
