1. Mɛni kɛ́ wɔfee lɛ no baatsɔɔ akɛ wɔná be wɔhã Yehowa ni wɔkɛ lɛ miigba sane?

 KƐ́ WƆNÁ be wɔhã mɛi ni wɔsumɔɔ amɛsane ni wɔkɛ amɛ gba sane lɛ, wɔnáa miishɛɛ waa. Akɛ nɔkwɛmɔnɔ lɛ, mɛi ni ebote gbalashihilɛ mli lɛ sumɔɔ waa ni amɛná be amɛhã amɛhefatalɔi lɛ ni amɛkɛ amɛ agba sane. Oblahii kɛ oblayei sumɔɔ ni amɛkɛ amɛnanemɛi agba sane be fɛɛ be. Ni wɔ fɛɛ wɔnáa miishɛɛ kɛ́ wɔkɛ wɔnyɛmimɛi Kristofoi lɛ bɔ. Nɔ ni fe fɛɛ lɛ, wɔnáa miishɛɛ waa kɛ́ wɔná be wɔhã Yehowa ni wɔkɛ lɛ gba sane. Shi mɛni kɛ́ wɔfee lɛ, no tsɔɔ akɛ wɔná be wɔhã Yehowa? Kɛ́ wɔsɔle, wɔkane Biblia lɛ, ni wɔjwɛŋ nibii ni ewo shi akɛ ebaafee kɛ esui ni nɔ bɛ lɛ ahe lɛ, no tsɔɔ akɛ wɔmiiná be wɔmiihã lɛ ni wɔkɛ lɛ miigba sane. Wɔshwɛɛɛ be ni wɔkɛfeɔ nibii nɛɛ he kwraa!​—Lala 139:17.

2. Bei komɛi lɛ, mɛɛ naagba wɔkɛkpeɔ?

² Eyɛ mli akɛ wɔsumɔɔ ni wɔsɔle ni wɔkase Biblia lɛ moŋ, shi bei komɛi lɛ, wɔnáaa dekã kɛfee nibii nɛɛ. Daa gbi lɛ, wɔyɛ nibii pii feemɔ, ni enɛ baanyɛ ahã ewa kɛhã wɔ akɛ wɔbaaná be kɛjá Yehowa. Wɔnitsumɔ, nibii ni wɔfeɔ yɛ shĩa, kɛ nibii krokomɛi ni he hiaa ni esa akɛ wɔtsu he nii lɛ baanyɛ ahe wɔbe  fɛɛ aahu akɛ, wɔnáŋ dekã kɛsɔle, wɔkase nii, loo wɔjwɛŋ nii anɔ.

3. Mɛni hu baanyɛ ahe wɔbe?

³ Yɛ enɛɛmɛi asɛɛ lɛ, nibii krokomɛi hu yɛ ni kɛ́ wɔkwɛɛɛ ni ahi lɛ, amɛbaanyɛ amɛhe wɔbe ni wɔnáŋ be wɔhãŋ Yehowa. Akɛ nɔkwɛmɔnɔ lɛ, naagba bɛ he akɛ wɔbaajie wɔhiɛtserɛ ni wɔjɔɔ wɔhe. Shi kɛ́ wɔkwɛɛɛ ni ahi lɛ, hiɛtserɛjiemɔ ni naagba bɛ he lɛ po baanyɛ ahe wɔbe aahu akɛ, wɔnáaa be ni fa ni wɔkɛjá Yehowa. Shi esa akɛ wɔkai akɛ, nibii krokomɛi yɛ ni he hiaa fe hiɛtserɛjiemɔ.​—Abɛi 25:27; 1 Tim. 4:8.

4. Mɛni he wɔbaasusu yɛ nikasemɔ nɛɛ mli?

⁴ Yɛ nikasemɔ nɛɛ mli lɛ, wɔbaakwɛ bɔ ni wɔbaafee wɔyɔse nibii ni he hiaa waa yɛ wɔshihilɛ mli. Agbɛnɛ hu, wɔbaakwɛ bɔ ni wɔbaafee wɔkɛ be ni wɔto akɛ wɔkɛbaafee nibii ni kɔɔ Yehowa jamɔ he lɛ atsu nii jogbaŋŋ, kɛ bɔ ni wɔbaaná he sɛɛ wɔhã kɛ́ wɔfee nakai.

5. Mɛɛ gbɛ nɔ ŋaa ni awo yɛ Efesobii 5:15-17 lɛ baanyɛ aye abua oblahii kɛ oblayei ni amɛkɔ gbɛ ni hi fe fɛɛ yɛ shihilɛ mli?

⁵ Kɔ gbɛ ni hi fe fɛɛ yɛ shihilɛ mli. Oblahii kɛ oblayei pii susuɔ nɔ ni amɛbaafee wɔsɛɛ lɛ he. Ekolɛ amɛtsɔɔlɔi kɛ amɛwekumɛi ni jeee Odasefoi lɛ baawo amɛ hewalɛ ni amɛya yunivɛsiti koni amɛná nitsumɔ kpakpa ko amɛtsu ni amɛná shika pii. Shi kɛ́ amɛtee yunivɛsiti lɛ, ebaahe amɛbe pii, ni ehãŋ amɛná dekã amɛhã Yehowa. No hewɔ lɛ, ekolɛ amɛfɔlɔi kɛ amɛnanemɛi ni yɔɔ asafo lɛ mli lɛ baawo amɛ hewalɛ ni amɛkɛ amɛbe atsu nii ahã Yehowa. Mɛni baaye abua oblahii kɛ oblayei ni sumɔɔ Yehowa lɛ ni amɛkpɛ yiŋ kpakpa yɛ sane nɛɛ he? Nɔ kome ni baaye abua amɛ ji, ni amɛbaakane Efesobii 5:15-17 lɛ ni amɛjwɛŋ nɔ. (Kanemɔ.) Kɛ́ oblanyo loo oblayoo ji bo ni okane ŋmalɛ nɛɛ, obaanyɛ obi ohe akɛ: ‘Mɛni ji “Yehowa suɔmɔnaa nii”? Mɛɛ yiŋ kɛ́ mikpɛ lɛ, Yehowa baaná miishɛɛ? Mɛɛ yiŋ kɛ́ mikpɛ lɛ, ebaahã mikɛ mibe atsu nii jogbaŋŋ?’ Kaimɔ akɛ, gbii ni wɔyɔɔ mli nɛɛ “gbii fɔji” ni, ni etsɛŋ Satan jeŋ fɔŋ nɛɛ baaba naagbee. No hewɔ lɛ, nilee yɛ mli akɛ wɔkɛ wɔbe baatsu nibii ni baahã Yehowa aná wɔhe miishɛɛ.

6. Mɛɛ yiŋ Maria kpɛ? Ni mɛni hewɔ eji yiŋkpɛɛ kpakpa lɛ?

⁶ Feemɔ nɔ ni he hiaa fe fɛɛ lɛ. Kɛ́ wɔmiitao wɔkɛ wɔbe atsu nii jogbaŋŋ lɛ, bei komɛi lɛ nɔ ni ebiɔ ni wɔfee ji, ni wɔfee nibii enyɔ ni naagba bɛ eko eko he lɛ ateŋ nɔ ni he hiaa fe fɛɛ. Sane ko ni yeɔ ebuaa wɔ ni wɔnu enɛ shishi jogbaŋŋ ji, nɔ ni tee nɔ be ni Yesu yasara Maria kɛ Marta lɛ. Marta mii shɛ ehe waa akɛ Yesu ebasara amɛ. No hewɔ lɛ, ebɔi nibii pii hoomɔ koni ekɛfee lɛ gbɔ. Shi Maria yata Nuŋtsɔ lɛ naji anaa ni ebo lɛ toi. Naagba ko bɛ nɔ ni Marta fee lɛ he, shi Yesu wie akɛ nɔ ni Maria fee lɛ ji “nɔ ni hi fe fɛɛ.” (Luka 10:38-42, shn.) Ekolɛ sɛɛ mli lɛ, Maria hiɛ kpa nɔ ni aye nakai gbi lɛ nɔ. Shi ekã shi faŋŋ akɛ, ehiɛ kpaaa nɔ ni ekase yɛ Yesu ŋɔɔ lɛ nɔ. Maria ná be ekɛbo Yesu toi, ni ená he sɛɛ waa. Nakai nɔŋŋ wɔ hu kɛ́ wɔná be wɔhã Yehowa lɛ, wɔbaaná he sɛɛ waa. Shi te wɔbaafee tɛŋŋ wɔkɛ be ni wɔto wɔhã Yehowa lɛ atsu nii jogbaŋŋ?

7. Mɛni hewɔ ehe hiaa waa ni wɔsɔle, wɔkase nii, ni wɔjwɛŋ nii anɔ lɛ?

⁷ Hã ehi ojwɛŋmɔ mli akɛ, sɔlemɔ, nikasemɔ, kɛ sanenɔjwɛŋmɔ fata wɔjamɔ lɛ he. Wɔkɛ Yehowa, wɔ-Tsɛ ni yɔɔ ŋwɛi ni sumɔɔ  wɔ lɛ, wieɔ kɛtsɔ sɔlemɔ nɔ. (Lala 5:7) ‘Wɔbaleɔ Nyɔŋmɔ,’ ni ji hiɛshikamɔ fɛɛ Jɛɛhe lɛ, kɛtsɔ Biblia lɛ kasemɔ nɔ. (Abɛi 2:1-5) Kɛ́ wɔsusu Yehowa sui ni nɔ bɛ kɛ nibii ni eto eyiŋ akɛ ebaafee ehã wɔ kɛ adesai fɛɛ lɛ ahe lɛ, belɛ wɔmiijwɛŋ nibii ni wɔkase yɛ ehe lɛ anɔ ji no. Enɛɛmɛi ji nibii ni he hiaa fe fɛɛ ni wɔbaanyɛ wɔkɛ wɔbe atsu. Shi te wɔbaafee tɛŋŋ wɔná be ni wɔkɛfeɔ nibii nɛɛ ahe sɛɛ jogbaŋŋ lɛ?

8. Mɛni hewɔ Yesu tee ŋa lɛ nɔ? Ni mɛni wɔkaseɔ yɛ enɛ mli kɛ́ wɔmiitao wɔkɛ wɔbe atsu nii jogbaŋŋ?

⁸ Kɛ́ ebaahi lɛ, taomɔ he ko ni yɔɔ diŋŋ. Yesu fee enɛ he nɔkwɛmɔnɔ. Dani ebaaje eshikpɔŋ lɛ nɔ sɔɔmɔ lɛ shishi lɛ, eyaye gbii 40 yɛ ŋa lɛ nɔ. (Luka 4:1, 2) Akɛni ŋa lɛ nɔ ejɔ diŋŋ hewɔ lɛ, Yesu ná hegbɛ esɔle ehã e-Tsɛ Yehowa ni esusu nitsumɔ ni Yehowa kɛwo edɛŋ lɛ he. Enɛ ye ebua Yesu ni enyɛ edamɔ kai kɛ shihilɛi ni mli wawai ni ekɛkpe sɛɛ mli lɛ anaa. Mɛni okaseɔ yɛ nɔ ni Yesu fee lɛ mli? Kɛ́ okɛ mɛi pii ni yɔɔ shĩa lɛ, ekolɛ jeee be fɛɛ be shĩa lɛ baajɔ. No hewɔ lɛ, obaanyɛ oje kpo oyatao he ko ni yɔɔ diŋŋ. Nakai nyɛmi yoo ko ni atsɛɔ lɛ Julie lɛ feɔ kɛ́ eetao esɔle ehã Yehowa ni nɔ ko gbalaaa ejwɛŋmɔ. Julie kɛ ewu lɛ yɛ shĩa bibioo ko mli yɛ France, ni ewa akɛ ebaaná he ko ni ekome too ekɛ Yehowa agba sane yɛ. No hewɔ lɛ, daa gbi lɛ ejeɔ kpo eyaa he ko ni yɔɔ diŋŋ. Ewie akɛ: “Kɛ́ mitee jɛmɛ lɛ, nɔ ko nɔ ko gbalaaa mijwɛŋmɔ ejaakɛ mikome too miyɔɔ jɛmɛ, ni minyɛɔ mikɛ Yehowa gbaa sane waa.”

9. Yɛ dekã ni Yesu bɛ lɛ fɛɛ sɛɛ lɛ, mɛni efee kɛtsɔɔ akɛ ehiɛ sɔɔ wekukpaa ni yɔɔ ekɛ Yehowa teŋ lɛ?

⁹ Yesu bɛ dekã kwraa yɛ eshihilɛ mli. Be ni eyɔɔ shikpɔŋ lɛ nɔ lɛ, daa nɛɛ mɛi nyiɛ esɛɛ ni amɛmiitao efee nɔ ko ehã amɛ. Be ko po lɛ, “maŋ muu lɛ fɛɛ babua amɛhe naa yɛ shinaa lɛ naa” ni amɛmiitao amɛna lɛ. Fɛɛ sɛɛ lɛ, Yesu to gbɛjianɔ koni ená be ekɛsɔle ehã Yehowa. Leebi maŋkpa be ni je tsɛreko tsɔ lɛ, “eshi kɛtee he ko banee” ni ekɛ e-Tsɛ lɛ yagba sane yɛ jɛmɛ.​—Mar. 1:32-35.

10-11. Yɛ nɔ ni awie yɛ Mateo 26:40, 41 lɛ naa lɛ, mɛɛ ŋaa Yesu wo ekaselɔi lɛ yɛ Getsemane abɔɔ lɛ mli? Shi mɛni ba?

¹⁰ Gbi gbɛkɛ ni enɔ jetsɛremɔ lɛ abaagbe Yesu lɛ, shi kome ekoŋŋ lɛ, etao he ko ni yɔɔ diŋŋ koni ejwɛŋ nii anɔ ni esɔle yɛ jɛmɛ. No hewɔ lɛ, etee Getsemane abɔɔ lɛ mli. (Mat. 26:36) Nakai gbɛkɛ lɛ, ewo ekaselɔi lɛ ŋaa ko ni he hiaa waa yɛ sɔlemɔ he.

¹¹ Naa nɔ hewɔ ni ewo amɛ ŋaa lɛ. Be ni amɛyashɛ Getsemane abɔɔ lɛ mli lɛ, no mli lɛ je ena waa; eeenyɛ efee akɛ, atswa fe nyɔɔŋteŋ ŋmɛlɛ 12. Yesu kɛɛ ebɔfoi lɛ ni ‘amɛya nɔ amɛbu,’ ni eshi amɛ etee eyasɔle. (Mat. 26:37-39) Shi be ni etee eesɔle lɛ, wɔ nyɔ amɛnɔ. Be ni eba ni ena akɛ amɛmiiwɔ  lɛ, ekɛɛ amɛ shi kome ekoŋŋ akɛ ‘amɛya nɔ amɛbu ni amɛsɔle daa.’ (Kanemɔ Mateo 26:40, 41.) Yesu na akɛ, amɛhao ni etɔ amɛ waa. Emusuŋ tsɔ lɛ yɛ amɛhe ni ewie akɛ: “Heloo lɛ egbede.” Shi Yesu tee eyasɔle shii enyɔ sɔŋŋ, ni eko fɛɛ eko ni eba lɛ, ena akɛ ekaselɔi lɛ miiwɔ, moŋ fe ni amɛbaasɔle.​—Mat. 26:42-45.

12. Kɛ́ bei komɛi lɛ onuɔ he akɛ etɔ bo loo ohao aahu akɛ onyɛɛɛ osɔle lɛ, mɛni obaanyɛ ofee?

¹² Kwɛmɔ be ni hi. Bei komɛi lɛ, etɔɔ wɔ loo wɔhaoɔ aahu akɛ, wɔnuuu he akɛ wɔsɔle. Ani onu he nakai pɛŋ? Belɛ jeee okome. Shi mɛni obaanyɛ ofee kɛ́ onu he nakai? Mɛi komɛi ni fɔɔ sɔlemɔ gbɛkɛ lɛ ena akɛ, ehi akɛ amɛbaasɔle mra mli fioo, ejaakɛ no mli lɛ etɔko amɛ tsɔ. Agbɛnɛ hu, kɛ́ wɔmiisɔle lɛ, wɔbaanyɛ wɔta shi, wɔdamɔ shi, wɔkula shi, loo wɔfee nɔ kroko ni tamɔ nakai. Shi esa akɛ wɔkwɛ emli nɔ ni baaye abua wɔ ni wɔjwɛŋmɔ ahi wɔsɔlemɔ lɛ nɔ. Shi kɛ́ ekolɛ ooye otsui waa yɛ nɔ ko he loo ohao aahu akɛ oleee nɔ ni obaawie yɛ sɔlemɔ mli hu? Mɛni hewɔ okɛɛɛ Yehowa bɔ ni onuɔ he ohãa lɛ? Yehowa naa mɔbɔ, no hewɔ lɛ ebaanu bo shishi.​—Lala 139:4.

13. Mɛɛ gbɛ nɔ wɔfoŋ, tablɛti, kɛ amɛhenɔi lɛ baanyɛ agbala wɔjwɛŋmɔ kɛ́ wɔmiisɔle, wɔmiikase nii, loo wɔtee asafoŋ kpeei?

¹³ Kɛ́ ookase nii lɛ, kaahã nɔ ko gbala ojwɛŋmɔ. Jeee sɔlemɔ pɛ hãa naanyobɔɔ ni yɔɔ wɔ kɛ Yehowa teŋ lɛ mli waa. Nyɔŋmɔ Wiemɔ lɛ ni wɔbaakase kɛ asafoŋ kpeei ni wɔbaaya lɛ hu baanyɛ ahã wɔ kɛ lɛ teŋ naanyobɔɔ lɛ mli awa. No hewɔ lɛ, mɛni obaanyɛ ofee koni kɛ́ ookase nii loo otee asafoŋ kpeei lɛ, oná he sɛɛ jogbaŋŋ? Bi ohe akɛ: ‘Mɛni gbalaa mijwɛŋmɔ kɛ́ mitee asafoŋ kpeei loo miikase nii?’ Ani mɛi tswaa bo loo amɛsɛndiɔ bo e-mail loo tɛs mɛseji? Ŋmɛnɛ lɛ, mɛi babaoo hiɛ foŋ, tablɛti, loo amɛhenɔi lɛ eko. Atao nii amli ana akɛ, kɛ́ wɔmiitao wɔkɛ wɔjwɛŋmɔ ama nɔ ko ni wɔfeɔ lɛ nɔ ni foŋ kã wɔmasɛi lɛ, ebaanyɛ egbala wɔjwɛŋmɔ. Mɔ ko ni ekase bɔ ni jwɛŋmɔ lɛ tsuɔ nii ehãa lɛ wie akɛ: “Ojwɛŋmɔ kpaa shi ni enyɛɛɛ ehi nɔ ni ofeɔ lɛ nɔ.” Bei pii lɛ, kɛ́ ayaaje kpokpaa nɔ kpee loo kpokpaa wulu nɔ kpee ko shishi lɛ, akɛɔ wɔ ni wɔto wɔfoŋ lɛ he gbɛjianɔ bɔ ni egbalaŋ mɛi ajwɛŋmɔ. Ani jeee nakai nɔŋŋ esa akɛ wɔfee kɛ́ wɔyaasɔle, wɔyaakase nii, loo wɔtee asafoŋ kpee shishi koni nɔ ko nɔ ko akagbala wɔjwɛŋmɔ?

14. Yɛ nɔ ni awie yɛ Filipibii 4:6, 7 lɛ naa lɛ, mɛɛ gbɛ nɔ Yehowa baanyɛ aye abua wɔ ni wɔjwɛŋmɔ akakpa shi?

 ¹⁴ Kpa Yehowa fai ni eye ebua bo ni ojwɛŋmɔ ahi nɔ ni ofeɔ lɛ nɔ. Kɛ́ ookase nii loo otee asafoŋ kpee ni ona akɛ ojwɛŋmɔ miikpa shi lɛ, kpa Yehowa fai ni eye ebua bo. Bei pii lɛ, kɛ́ sane ko wo bo jwɛŋmɔ loo ehã ohao lɛ, ewa akɛ obaajie kɛje ojwɛŋmɔ mli ni okɛ ojwɛŋmɔ ama nɔ ni okaseɔ yɛ Nyɔŋmɔ Wiemɔ lɛ mli lɛ nɔ. Shi ehe miihia ni ofee nakai. No hewɔ lɛ, sɔlemɔ ohã Yehowa ni ehã etoiŋjɔlɛ lɛ abu otsui kɛ ‘ojwɛŋmɔ’ he.​—Kanemɔ Filipibii 4:6, 7.

15. Tsɔɔmɔ gbɛ kome ni wɔnáa he sɛɛ kɛ́ wɔná be wɔhã Yehowa.

¹⁵ Kɛji ohe be okɛ Yehowa wie, obo lɛ toi, ni ojwɛŋ ehe lɛ, obaaná he sɛɛ waa. Yɛ mɛɛ gbɛ nɔ? Klɛŋklɛŋ lɛ, obaakpɛ yiŋ kpakpai. Biblia lɛ kɛɛ: “Mɔ ni kɛ hiɛshikalɔi nyiɛɔ lɛ, ebaatsɔ hiɛshikalɔ.” (Abɛi 13:20) No hewɔ lɛ, kɛ́ oná be ohã Yehowa, ni ji hiɛshikamɔ fɛɛ Jɛɛhe lɛ, bo hu obaatsɔ hiɛshikalɔ. Ebaaye ebua bo ni okpɛ yiŋ kpakpai ni baahã ená miishɛɛ, moŋ fe yiŋ gbohii ni baahã etsui akumɔ.

16. Kɛ́ wɔná be wɔhã Yehowa lɛ, mɛɛ gbɛ nɔ no yeɔ ebuaa wɔ ni wɔbatsɔmɔɔ tsɔɔlɔi ni he esa?

¹⁶ Nɔ ni ji enyɔ lɛ, obaatsɔ tsɔɔlɔ ni he esa. Kɛ́ wɔkɛ mɔ ko miikase Biblia lɛ, otii ni mamɔ wɔhiɛ lɛ ateŋ ekome ni he hiaa waa ji, ni wɔye wɔbua lɛ ni esumɔ Yehowa. Kɛ́ wɔfɔɔ sɔlemɔ, ni wɔkaseɔ Yehowa he nii daa lɛ, wɔbaasumɔ lɛ waa, ni no baaye abua wɔ ni wɔnyɛ wɔtsɔɔ wɔ-Biblia mli nikaselɔ lɛ nii jogbaŋŋ koni lɛ hu esumɔ lɛ. Nakai eba lɛ yɛ Yesu gbɛfaŋ. Ewie nibii ni hã ekaselɔi lɛ na akɛ esumɔɔ Yehowa waa, ni no ye ebua amɛ ni amɛ hu amɛbasumɔ Yehowa.​—Yoh. 17:25, 26.

17. Mɛɛ gbɛ nɔ sɔlemɔ kɛ Biblia lɛ ni wɔbaakase lɛ baahã wɔhemɔkɛyeli lɛ mli awa?

¹⁷ Nɔ ni ji etɛ lɛ, ohemɔkɛyeli lɛ mli baawa waa. Be fɛɛ be ni obaasɔle ni Yehowa atsɔɔ bo gbɛ, eshɛje omii, loo eye ebua bo ni Yehowa baahã nakai sɔlemɔ lɛ hetoo lɛ, mɛni baa? Ohemɔkɛyeli lɛ mli waa. (1 Yoh. 5:15) Mɛni ekoŋŋ baahã ohemɔkɛyeli lɛ mli awa? No ji, aŋkro nikasemɔ. Biblia lɛ kɛɛ: “Hemɔkɛyeli nyiɛɔ nɔ ni anuɔ lɛ sɛɛ kɛbaa.” (Rom. 10:17) Shi jeee nii lɛ kɛkɛ ni obaakase lɛ ni baahã ohemɔkɛyeli lɛ mli awa. Nɔ kroko yɛ ni esa akɛ ofee. Ani ole nɔ ni ji?

18. Okɛ nɔkwɛmɔnɔ ko atsɔɔ nɔ hewɔ ni ehe miihia ni wɔjwɛŋ sane nɔ.

¹⁸ Esa akɛ wɔjwɛŋ nɔ ni wɔkaseɔ lɛ nɔ. Nakai pɛpɛɛpɛ mɔ ni ŋma Lala 77 lɛ fee. Yehowa  tsulɔ nɛɛ hao waa ejaakɛ enu he akɛ Yehowa bɛ lɛ kɛ enyɛmimɛi Israelbii lɛ ahe miishɛɛ dɔŋŋ. Ehao aahu akɛ, gbɛkɛ kɛ́ eyakã shi lɛ, enyɛɛɛ ewɔ. (Kuku 2-8) No hewɔ lɛ, mɛni efee? Ekɛɛ Yehowa akɛ: “Majwɛŋ onitsumɔi lɛ fɛɛ anɔ ni masusu onifeemɔi lɛ ahe.” (Kuku 12) Lalatsɛ nɛɛ le nibii ni Yehowa efee ehã ewebii lɛ be ko ni eho, shi loloolo lɛ, eye etsui ni ebi ehe akɛ: “Ani Nyɔŋmɔ hiɛ ekpa edromɔ lɛ nɔ, ani emlifu lɛ ehã emɔbɔnalɛ lɛ sɛɛ efo?” (Kuku 9) Lalatsɛ lɛ jwɛŋ Yehowa nitsumɔi lɛ kɛ bɔ ni ena ewebii lɛ mɔbɔ ni emusuŋ tsɔ lɛ yɛ amɛhe be ko ni eho lɛ nɔ. (Kuku 11) Mɛni jɛ mli kɛba? Eyiŋ tsɔ akɛ Yehowa kwaŋ ewebii lɛ. (Kuku 15) Kɛ́ bo hu ojwɛŋ nibii ni Yehowa efee ehã ewebii lɛ kɛ nibii ni efee ehã bo lɛ ahe lɛ, ohemɔkɛyeli lɛ mli baawa waa.

19. Kɛ́ wɔná be wɔhã Yehowa lɛ, mɛɛ gbɛ kroko hu nɔ wɔnáa he sɛɛ?

¹⁹ Nɔ ni ji ejwɛ lɛ, obaasumɔ Yehowa waa, ni enɛ ji nɔ ni he hiaa fe fɛɛ. Kɛ́ wɔsumɔɔ Yehowa lɛ, no ji nɔ titri ni baatsirɛ wɔ ni wɔbo lɛ toi, wɔkɛ nibii ashã afɔle koni wɔnyɛ wɔfee esuɔmɔnaa nii, ni wɔfi shi yɛ kai fɛɛ ni wɔkɛbaakpe lɛ amli. (Mat. 22:37-39; 1 Kor. 13:4, 7; 1 Yoh. 5:3) Nɔ ko bɛ ni he hiaa fe ni obaasumɔ Yehowa ni okɛ lɛ abɔ naanyo!​—Lala 63:1-8.

20. Mɛni obaafee koni oná be okɛsɔle, okɛkase nii, ni okɛjwɛŋ sane nɔ?

²⁰ Kaahã ohiɛ kpa nɔ kɔkɔɔkɔ akɛ, sɔlemɔ, nikasemɔ, kɛ sanenɔjwɛŋmɔ fata wɔjamɔ lɛ he. Kasemɔ Yesu ni otao he ko ni yɔɔ diŋŋ ni okɛ Yehowa agba sane. Kaahã nibii komɛi gbala ojwɛŋmɔ. Kɛ́ oofee nibii ni kɔɔ Yehowa jamɔ he lɛ, kpa lɛ fai ni eye ebua bo ni ojwɛŋmɔ ahi nɔ. Kɛ́ okɛ obe tsu nii jogbaŋŋ bianɛ lɛ, Yehowa baahã ohi shi kɛya naanɔ yɛ jeŋ hee lɛ mli.​—Mar. 4:24.