Nakai ji bɔ ni gbekɛ yoo ko ni eye afii 13 lɛ nu he be ni ake lɛ gbee bi ko lɛ. Yoo ko ni amrɔ nɛɛ etsuɔ nii lɛ wie akɛ, kɔmpiuta ko ni epapa hã lɛ be ni eyɔɔ sɛkɛndre skul lɛ ji nikeenii ko ni ná hewalɛ kpele yɛ eshihilɛ nɔ. Nuu ko hu ni bote gbalashihilɛ mli etsɛko lɛ wie akɛ, kaadi ko ni eŋa diɛŋtsɛ fee ni ekɛke lɛ be ni amɛná afi yɛ gbalashihilɛ lɛ mli lɛ ji nikeenii ni fe fɛɛ ni enine shɛ nɔ.

Daa afi lɛ, mɛi pii gboɔ deŋme kɛtaoɔ nibii ni kɛ́ amɛkɛke amɛnaanyo loo amɛwekunyo ko yɛ be krɛdɛɛ ko mli lɛ, ebaana lɛ akɛ eji nikeenii ni “fe fɛɛ.” Amɛteŋ mɛi babaoo baasumɔ ni mɔ ni amɛke lɛ nii lɛ anu he tamɔ bɔ ni mɛi ni awie amɛhe yɛ sane nɛɛ shishijee lɛ nu he lɛ. Ni bo hu? Ani obaasumɔ ni kɛ́ oke mɔ ko nɔ ko lɛ, mɔ lɛ hiɛ asɔ nakai nii lɛ waa, loo obaasumɔ ni mɔ ko ake bo nɔ ko ni obaanya he waa?

Nakai henumɔ lɛ baanyɛ afee nɔ ko ni yɔɔ miishɛɛ waa, jeee yɛ bɔ ni nikeenii lɛ he ba sɛɛnamɔ kɛhã mɔ ni akɛke lɛ pɛ kɛkɛ hewɔ, shi moŋ yɛ bɔ ni ehã mɔ ni kɛke lɛ nu he ehã lɛ hu hewɔ. Biblia lɛ kɛɔ akɛ: “Nɔhãmɔ hãa mɔ náa miishɛɛ fe nɔhemɔ.” (Bɔfoi 20:35) Anɔkwa, miishɛɛ ni anáa kɛ́ ake mɔ ko nɔ ko lɛ daa waa kɛji mɔ ni ake lɛ nii lɛ nya nikeenii lɛ he.

No hewɔ lɛ, mɛni obaanyɛ ofee koni kɛ́ oke mɛi nii lɛ, bo kɛ amɛ fɛɛ aná miishɛɛ? Ni kɛji onikeenii lɛ jeee nɔ ni osusuɔ akɛ ehi “fe fɛɛ” lɛ, mɛni obaanyɛ ofee koni mɛi ahiɛ asɔ?