Nɔ Ni Gbalɔi Lɛ Tsɔɔ Wɔ Yɛ Nyɔŋmɔ He
Yɛ blema lɛ, Nyɔŋmɔ tsɔ egbalɔi lɛ anɔ ehã adesai le saji komɛi ni he hiaa. Ani saji nɛɛ baanyɛ ahã wɔna nɔ ni esa akɛ wɔfee koni Nyɔŋmɔ ajɔɔ wɔ? Hɛɛ. Hã wɔkwɛ nibii ni wɔbaanyɛ wɔkase kɛjɛ gbalɔi anɔkwafoi etɛ komɛi adɛŋ.
ABRAHAM
Nyɔŋmɔ kwɛɛɛ hiɛiaŋ, ni eesumɔ ni ejɔɔ adesai fɛɛ.
Nyɔŋmɔ wo gbalɔ Abraham shi akɛ, “bo onɔ abaatsɔ ajɔɔ shikpɔŋ lɛ nɔ wekui fɛɛ.”—1 Mose 12:3.
Mɛni enɛ tsɔɔ wɔ? Nyɔŋmɔ sumɔɔ wɔ waa, ni eesumɔ ni ejɔɔ wekui fɛɛ—hii, yei, kɛ gbekɛbii—ni boɔ lɛ toi lɛ.
MOSE
Nyɔŋmɔ naa mɔbɔ, ni ejɔɔ mɛi ni bɔɔ mɔdɛŋ ni amɛle lɛ lɛ.
Nyɔŋmɔ Ofe lɛ hã gbalɔ Mose hewalɛ koni ekɛfee naakpɛɛ nii wuji. Kɛ̃lɛ, Mose sɔle akɛ: “Hã male ogbɛi lɛ, koni male bo ní mihiɛ aya nɔ aba nyam yɛ ohiɛ.” (2 Mose 33:13) Nyɔŋmɔ ná Mose nibimɔ lɛ he miishɛɛ, ni ehã ele ni enu egbɛi lɛ kɛ esui lɛ ashishi jogbaŋŋ. Akɛ nɔkwɛmɔnɔ lɛ, Mose ná ele akɛ, Bɔlɔ lɛ ji “Nyɔŋmɔ mɔbɔnalɔ kɛ musuŋtsɔlɔ.”—2 Mose 34:6, 7.
Mɛni enɛ tsɔɔ wɔ? Nyɔŋmɔ miisumɔ ni ejɔɔ wɔ fɛɛ—hii, yei, kɛ gbekɛbii—kɛ́ wɔbɔ mɔdɛŋ koni wɔle lɛ jogbaŋŋ. Yɛ Ŋmalɛ Krɔŋkrɔŋ lɛ mli lɛ, etsɔɔ wɔ gbɛ ni esa akɛ wɔtsɔ nɔ wɔjá lɛ, ni eesumɔ waa ni wɔhiɛ aba nyam yɛ ehiɛ ni ejɔɔ wɔ hu.
YESU
Yesu musuŋ tsɔ lɛ ni etsa helai srɔtoi fɛɛ
Kɛ́ wɔkase Yesu, nɔ ni efee, kɛ nɔ ni etsɔɔ lɛ he nii lɛ, Nyɔŋmɔ baanyɛ ajɔɔ wɔ kɛya naanɔ.
Wɔbaanyɛ wɔkase Yesu kɛ etsɔɔmɔi lɛ ahe nii babaoo yɛ Nyɔŋmɔ Wiemɔ lɛ mli. Nyɔŋmɔ hã Yesu hewalɛ koni ekɛfee naakpɛɛ nii wuji; etsa shwilafoi, toimulɔi, kɛ obubuafoi. Etee gbohii po shi. Naakpɛɛ nii ni Yesu fee lɛ hãa wɔnaa jɔɔmɔi ni wɔsɛɛ lɛ, Nyɔŋmɔ baahã adesai fɛɛ aná. Etsɔɔ nɔ ni wɔteŋ mɔ fɛɛ mɔ baanyɛ afee koni enine ashɛ jɔɔmɔi nɛɛ anɔ, ekɛɛ akɛ: “Enɛ ji naanɔ wala lɛ, akɛ amɛbaale bo, anɔkwa Nyɔŋmɔ kome lɛ, kɛ Yesu Kristo, mɔ ni otsu lɛ lɛ.”—Yohane 17:3.
Yesu musuŋ tsɔ lɛ, ejie suɔmɔ kpo, ni emli hi. Yesu jɛ suɔmɔ mli efɔ̃ hii kɛ yei, gbekɛbii kɛ onukpai fɛɛ nine akɛ: “Nyɛkasea mi, ejaakɛ mihe jɔ, ni mibaa mihe shi yɛ mitsuiŋ, ni nyɛhe baajɔ nyɛ,” ni amɛhere nɔ. (Mateo 11:29) Ebeiaŋ bii lɛ kɛ yei yeee jogbaŋŋ, shi Yesu mli hi yɛ yei anɔ, ewo amɛhiɛ nyam, ni ejie bulɛ kpo etsɔɔ amɛ.
Mɛni enɛ tsɔɔ wɔ? Yesu jie suɔmɔ kpele kpo etsɔɔ mɛi, ni ekɛ enifeemɔi tsɔɔ wɔ bɔ ni esa akɛ wɔkɛ wɔhe aye ahã.
YESU JEEE NYƆŊMƆ
Ŋmalɛ Krɔŋkrɔŋ lɛ tsɔɔ akɛ, “Nyɔŋmɔ kome pɛ yɔɔ,” ni akɛ, Yesu Kristo ji Nyɔŋmɔ tsulɔ ni baa ehe shi. (1 Korintobii 8:6) Yesu wie faŋŋ akɛ, Nyɔŋmɔ nɔ kwɔ fe lɛ, ni akɛ, Nyɔŋmɔ tsu lɛ kɛba shikpɔŋ lɛ nɔ.—Yohane 11:41, 42; 14:28. *
Ekolɛ Obaasumɔ Enɛ Hu
SANEBIMƆI NI BIBLIA LƐ EHÃ HETOO
Ani Yesu Ji Nyɔŋmɔ Ofe?
Mɛni Yesu wie yɛ hegbɛ ni eyɔɔ kɛ́ akɛ lɛ to Nyɔŋmɔ he lɛ he?
