Namɔ Esa Akɛ Ashwa?
Kɛjeee Nyɔŋmɔ ji mɔ ni hãa wɔnaa nɔ lɛ, belɛ nɛgbɛ hɔmɔ ni yeɔ mɛi pii, ohia ni sɛɛ efooo, tai ni yɔɔ gbeyei, helai ni naa wala, kɛ adebɔɔ naa oshãrai lɛ jɛ mɔ? Biblia lɛ, ni ji Nyɔŋmɔ Wiemɔ lɛ, tsɔɔ nibii titrii etɛ ni hãa adesai naa nɔ lɛ:
Mɛi Fóɔ Amɛ Pɛ Amɛnɔ Mli, Amɛhiɛ Kɔ̃ɔ Nii Anɔ, Ni Amɛhe Tsɛ̃ɔ Mɛi. “Gbɔmɔ yeɔ gbɔmɔ nɔ kɛyeɔ lɛ awui.” (Jajelɔ 8:9) Bei pii lɛ, mɛi naa nɔ ejaakɛ mɛi ni yeee emuu, ni fóɔ amɛ pɛ amɛnɔ mli, ni yitseiaŋ wala lɛ, kɛ amɛ yeee jogbaŋŋ.
Nibii Ni Baa Yɛ Be Ni Akpaaa Gbɛ Mli. Bei pii lɛ, mɛi naa nɔ “ejaakɛ nibii ni baa yɛ be ni akpaaa gbɛ mli lɛ baa amɛ fɛɛ amɛnɔ.” (Jajelɔ 9:11) Ni tsɔɔ akɛ, mɛi baanyɛ ayaje he ko ni esaaa yɛ be ni esaaa mli, oshãra baanyɛ aba, mɔ ko baanyɛ afee anyagba, loo mɔ ko baatɔ̃.
Je Nɛɛ Nɔyelɔ Fɔŋ Lɛ. Biblia lɛ hãa wɔnaa nɔ titri ni hãa adesai naa nɔ lɛ. Ekɛɔ akɛ: “Jeŋ muu lɛ fɛɛ kã mɔ fɔŋ lɛ hewalɛ mli.” (1 Yohane 5:19) Satan Abonsam ji nakai “mɔ fɔŋ” lɛ. Kulɛ eji Nyɔŋmɔ bɔfo, shi “edamɔɔɔ shi shiŋŋ yɛ anɔkwale lɛ mli.” (Yohane 8:44) Bɔfoi krokomɛi hu yafata Satan he ni amɛtse Nyɔŋmɔ hiɛ atua bɔ ni afee ni amɛtiu amɛkɔnɔi asɛɛ, ni no hã amɛtsɔmɔ daimonioi. (1 Mose 6:1-5) Kɛjɛ be ni Satan kɛ edaimonioi lɛ tse atua lɛ kɛbaa nɛɛ, amɛná nibii ni yaa nɔ yɛ je nɛɛ mli lɛ anɔ hewalɛ waa yɛ gbɛ gbonyo nɔ. Ni enɛ miiya nɔ waa yɛ wɔbei nɛɛ amli. Amrɔ nɛɛ, Abonsam mli efu waa, ni ‘eelaka shikpɔŋ muu lɛ fɛɛ,’ ni enɛ kɛ nɔnaa eba “shikpɔŋ lɛ” nɔ. (Kpojiemɔ 12:9, 12) Anɔkwa, Satan ji nɔyelɔ ni yitsoŋ wa waa diɛŋtsɛ. Kɛ́ adesai miina nɔ lɛ, emii shɛɔ ehe waa. No hewɔ lɛ, Satan ji mɔ ni hãa adesai naa nɔ lɛ—jeee Nyɔŋmɔ.
SUSUMƆ ENƐ HE OKWƐ: Efɔŋfeelɔ ni bɛ musuŋtsɔlɛ, ní yitsoŋ wa pɛ baahã mɛi ni efeko nɔ ko ana nɔ. Shi Biblia lɛ kɛɔ akɛ: “Nyɔŋmɔ lɛ, suɔmɔ ji lɛ.” (1 Yohane 4:8) Enɛ hewɔ lɛ, “ebaŋ lɛ kɔkɔɔkɔ akɛ anɔkwa Nyɔŋmɔ lɛ baafee nɔ fɔŋ, aloo akɛ, Ofe lɛ baafee nɔ ni ejaaa!”—Hiob 34:10.
Shi ekolɛ, obaabi ohe akɛ, ‘Mɛɛ beyinɔ nɔŋŋ Nyɔŋmɔ Ofe lɛ baaŋmɛ Satan gbɛ ni eye wɔnɔ dɛŋdɛŋ kɛyashi?’ Wɔna akɛ Nyɔŋmɔ miihi nɔfɔŋfeemɔ, ni kɛ́ wɔmiina nɔ lɛ, epiŋɔ waa. Agbɛnɛ hu, e-Wiemɔ lɛ kɛɔ akɛ: ‘Nyɛshɛrɛa nibii ni hãa nyɛyeɔ nyɛtsui lɛ fɛɛ nyɛshwiea enɔ, ejaakɛ ejwɛŋɔ nyɛhe.’ (1 Petro 5:7) Nyɔŋmɔ sumɔɔ wɔ, ní eyɛ hewalɛ hu ni ekɛbaajie nɔnaa kɛ jalɛsane ni ayeee lɛ fɛɛ kɛya. Wɔbaasusu enɛ he yɛ sane ni nyiɛ sɛɛ lɛ mli. *
^ kk. 7 Kɛ́ ootao ole nɔ hewɔ ni mɛi naa nɔ waa lɛ he saji krokomɛi lɛ, kwɛmɔ wolo ni ji, Oyi Aná Wala Kɛya Naanɔ! ni Yehowa Odasefoi fee lɛ nikasemɔ 26 lɛ, ni obaanyɛ odaunloodi eko yɛ www.jw.org/gaa lɛ nɔ ni owooo he nyɔmɔ ko.
Ekolɛ Obaasumɔ Enɛ Hu
BUU-MƆƆ
Etsɛŋ, Nyɔŋmɔ Baafo Nɔnai Fɛɛ Asɛɛ
Mɛni tsɔɔ akɛ etsɛŋ, Nyɔŋmɔ baafo nɔnaa kɛ jalɛsane ni ayeee lɛ fɛɛ sɛɛ?
SANEBIMƆI NI BIBLIA LƐ EHÃ HETOO
Ani Abonsam Hɔ Nɔnai Fɛɛ Asɛɛ?
Biblia lɛ hãa anaa he ni adesai anɔnai lɛ jɛɔ kɛbaa.
