KƐ́ ADEBƆƆ naa oshãra eba onɔ pɛŋ lɛ, ekolɛ obaanu mɛi ni eko enina amɛ lɛ shishi: amɛhiɛ feɔ amɛyaa, amɛyiŋ futuɔ amɛ, amɛtsui yeɔ, ni amɛlaa lamɔi gbohii. Mɛi pii ni jeɔ adebɔɔ naa oshãra mli lɛ anijiaŋ jeɔ wui, ni amɛgbedeɔ aahu akɛ, jeŋ shihilɛ jeɔ amɛtsine.

Kɛ́ adebɔɔ naa oshãra ehã onibii fɛɛ ahiɛ ekpãtã lɛ, ekolɛ bo hu obaanu he akɛ, onyɛɛɛ dɔŋŋ. Ekolɛ jeŋ shihilɛ baaje otsine po. Shi Biblia lɛ tsɔɔ akɛ, kɛ́ eba lɛ nakai lɛ, ogbeko ojeŋ naa, obaanyɛ oná hiɛnɔkamɔ akɛ wɔsɛɛ lɛ, nibii baahi.

Jajelɔ 7:8 lɛ kɛɔ akɛ: “Sane naagbee hi fe eshishijee.” Kɛ́ adebɔɔ naa oshãra ba lɛ, no sɛɛ lɛ, ekolɛ shihilɛ lɛ baafee tamɔ nɔ ni hiɛnɔkamɔ ko bɛ. Shi kɛ́ oto otsui shi otsu saji ahe nii lɛ, nibii baanyɛ ahi.

Biblia lɛ egba akɛ, be ko baaba ni “anuŋ yaafo gbee loo yarawoo ko . . . dɔŋŋ.” (Yesaia 65:19) Enɛ baaba mli kɛ́ Nyɔŋmɔ Maŋtsɛyeli lɛ hã shikpɔŋ lɛ tsɔ paradeiso lɛ. (Lala 37:11, 29) Adebɔɔ naa oshãra ko baŋ dɔŋŋ. Dɔlɛ kɛ piŋmɔ ni mɛi ni adebɔɔ naa oshãra enina amɛ lɛ nuɔ he be kplaŋŋ lɛ sɛɛ baafo kɛya naanɔ, ejaakɛ Nyɔŋmɔ Ofe lɛ ewo shi akɛ: “Akaiŋ tsutsu nii lɛ dɔŋŋ, ni amɛbaŋ tsui mli hu dɔŋŋ.”​—Yesaia 65:17.

Bo lɛ susumɔ he okwɛ. Bɔlɔ lɛ baahã ‘ahi ahã bo wɔsɛɛ ni oná hiɛnɔkamɔ’​—hɛɛ, ebaahã otoiŋ ajɔ bo yɛ enɔyeli ni nɔ bɛ lɛ shishi. (Yeremia 29:11) Kɛ́ oná ole anɔkwa sane nɛɛ, ani ebaanyɛ ehã bo hiɛnɔkamɔ lɛɛlɛŋ? Sally ni atsĩ etã yɛ sane ni tsɔ hiɛ lɛ mli lɛ wie akɛ, “Kɛ́ ohã nibii kpakpai ni Nyɔŋmɔ Maŋtsɛyeli lɛ baafee ehã wɔ wɔsɛɛ lɛ hi ojwɛŋmɔ mli lɛ, ebaanyɛ ewa bo ni ojie ojwɛŋmɔ yɛ nɔ ni eho lɛ nɔ, ni okpee shihilɛ ni okɛkpeɔ amrɔ nɛɛ naa.”

Kɛ́ okase nɔ ni etsɛŋ Nyɔŋmɔ Maŋtsɛyeli lɛ baafee ehã adesai lɛ he nii lɛ, obaaná he sɛɛ waa. Kɛ́ ofee nakai lɛ, obaaná nɔmimaa akɛ, yɛ nɔ ni ba lɛ fɛɛ sɛɛ lɛ, ogbeko ojeŋ naa, ejaakɛ ole akɛ, etsɛŋ adebɔɔ naa oshãrai fɛɛ asɛɛ baafo. Shi dani nakai be lɛ baashɛ lɛ, Biblia lɛ etsɔɔ nibii ni baawa bo ni okpee naagbai ni adebɔɔ naa oshãrai kɛbaa lɛ anaa bianɛ. Naa nɔkwɛmɔnii fioo ko.