SANEYITSO LƐ MLITSƆƆMƆ | MƐNI HEWƆ YESU NA AMANEHULU NI EGBO LƐ?
Ani Eba Lɛɛlɛŋ?
Yɛ April shishijee mli yɛ afi 33 Ŋ.B. lɛ, agbe Yesu, Nazarenyo lɛ. Afolɔ enaa akɛ eetse maŋ lɛ hiɛ atua, ayi lɛ musuŋshãa musuŋshãa, ni akala lɛ akpɛtɛ tso he. Epiŋ waa, ni egbo. Shi Nyɔŋmɔ tee lɛ shi kɛba wala mli ekoŋŋ, ni yɛ gbii 40 sɛɛ lɛ, Yesu tee ŋwɛi.
Wɔnaa sane nɛɛ yɛ Sanekpakpai ejwɛ ni yɔɔ Kristofoi a-Hela Ŋmalɛi, ni afɔɔ lɛ tsɛmɔ akɛ Kpaŋmɔ Hee lɛ mli. Ani nakai saji lɛ ba lɛɛlɛŋ? Enɛ ji sanebimɔ ni he hiaa waa ni yɔɔ hiɛdɔɔ hu. Kɛ́ saji nɛɛ jeee anɔkwale lɛ, belɛ sɛɛnamɔ ko bɛ Kristofoi ahemɔkɛyeli lɛ he, ni hiɛnɔkamɔ ni amɛyɔɔ akɛ amɛbaahi shi kɛya naanɔ yɛ Paradeiso mli lɛ ji lamɔ ko kɛkɛ. (1 Korintobii 15:14) Shi kɛ́ nakai saji lɛ ba lɛɛlɛŋ lɛ, no lɛ adesai baanyɛ akpa shihilɛ kpakpa gbɛ wɔsɛɛ, ni bo hu obaanyɛ oná mli gbɛfaŋnɔ. No hewɔ lɛ, ani saji ni yɔɔ Sanekpakpai lɛ amli lɛ ji anɔkwa saji aloo adesãi?
NƆ NI ANƆKWA SAJI LƐ TSƆƆ
Nɔ ni tamɔɔɔ adesãi ni aka yiŋ aŋmala lɛ, Sanekpakpai lɛ ja, ni amɛyɛ fitsofitso. Akɛ nɔkwɛmɔnɔ lɛ, atsĩ hei pɔtɛi atã yɛ mli, ni abaanyɛ aya hei nɛɛ babaoo ŋmɛnɛ. Amɛwieɔ mɛi pɔtɛi ahe, mɛi ni je lɛŋ yinɔsaneŋmalɔi hu ewie amɛhe.—Luka 3:1, 2, 23.
Woloŋmalɔi ni hi shi yɛ klɛŋklɛŋ afii 200 lɛ amli lɛ tsĩ Yesu diɛŋtsɛ tã. * Bɔ ni Sanekpakpai lɛ bɔ gbɛ nɔ ni atsɔ agbe lɛ lɛ he amaniɛ lɛ kɛ bɔ ni Romabii lɛ gbeɔ mɛi yɛ nakai beiaŋ lɛ kpãa gbee. Kɛfata he lɛ, saji ni abɔ he amaniɛ lɛ ja, ni ashiuuu nɔ ko nɔ—awie nibii komɛi ni Yesu kaselɔi lɛ fee ni esaaa lɛ po he yɛ mli. (Mateo 26:56; Luka 22:24-26; Yohane 18:10, 11) Saji nɛɛ fɛɛ maa nɔ mi akɛ mɛi ni ŋma Sanekpakpai lɛ ye anɔkwa, ni nibii ni amɛŋmala yɛ Yesu he lɛ ja.
NI YESU SHITEE LƐ HU?
Eyɛ mli akɛ mɛi babaoo heɔ yeɔ akɛ Yesu hi shi ni egbo moŋ, shi mɛi komɛi baanyɛ aje ŋwane akɛ atee lɛ shi. Be ni ayabɔ amaniɛ klɛŋklɛŋ kwraa akɛ atee lɛ shi lɛ, ekaselɔi lɛ po heee yeee. (Luka 24:11) Shi be ni amɛ kɛ mɛi krokomɛi na Yesu yɛ bei srɔtoi amli akɛ atee lɛ shi lɛ, amɛhe amɛye agbɛnɛ. Anɔkwa sane ji akɛ, yɛ be ko po mli lɛ, mɛi ni fa fe 500 na lɛ.—1 Korintobii 15:6.
Kaselɔi lɛ jaje Yesu shitee lɛ amɛtsɔɔ mɛi fɛɛ—ní mɛi ni gbe Yesu lɛ hu po fata he—eyɛ mli akɛ no baanyɛ ahã amɔmɔ amɛ ni agbe amɛ. (Bɔfoi 4:1-3, 10, 19, 20; 5:27-32) Eji kaselɔi babaoo nɛɛ bɛ nɔmimaa akɛ atee Yesu shi lɛɛlɛŋ kulɛ, ani amɛbaafee ekãa kɛjaje eshitee lɛ? Anɔkwa sane ni eji akɛ atee Yesu shi lɛ ji nɔ ni hã Kristojamɔ ná mɛi anɔ hewalɛ yɛ nakai beiaŋ kɛ ŋmɛnɛ fɛɛ.
Yesu gbele kɛ eshitee lɛ he amaniɛbɔɔ ni yɔɔ Sanekpakpai lɛ amli lɛ ji yinɔsane ni ja jogbaŋŋ. Kɛ́ okane saji nɛɛ jogbaŋŋ lɛ, obaana faŋŋ akɛ amɛji saji ni ba lɛɛlɛŋ. Kɛ́ onu nɔ hewɔ ni saji nɛɛ ba lɛ shishi lɛ, hemɔkɛyeli ni oyɔɔ akɛ saji nɛɛ ba lɛɛlɛŋ lɛ mli baawa waa. Sane ni nyiɛ sɛɛ lɛ baatsɔɔ mli.
^ kk. 7 Tacitus, ní afɔ lɛ aaafee afii 55 Ŋ.B. lɛ ŋma akɛ, “Kristus, mɔ mli ni aná gbɛ́i [Kristofoi] lɛ kɛjɛ lɛ na amanehulu ni naa wa fe fɛɛ yɛ Tiberio nɔyeli beiaŋ, yɛ wɔ amralofoi lɛ ateŋ mɔ kome, ni ji Pontio Pilato dɛŋ.” Mɛi krokomɛi hu ni tsĩ Yesu tã ji Suetonius (afɔ lɛ afi 69 Ŋ.B.); Yudanyo yinɔsaneŋmalɔ Josephus (afɔ lɛ afi 37 loo 38 Ŋ.B.); kɛ Pliny the Younger, ni ji Bitinia amralo lɛ (afɔ lɛ afi 61 loo 62 Ŋ.B.).
