Mɛi Pii Miiná Jwɛŋmɔŋ Naagbai Yɛ Jeŋ Fɛɛ
“Be fɛɛ be lɛ miyeɔ mitsui, kɛ́ mikome too mita shi yɛ tsũ mli po.”
“Kɛ́ minu he akɛ miyɛ jogbaŋŋ lɛ, miyeɔ mitsui. Ejaakɛ mikpa shi mina akɛ, kɛ́ miná miishɛɛ waa lɛ, etsɛŋ ni mafee basaa.”
“Gbi fɛɛ gbi lɛ, mibɔɔ mɔdɛŋ ni mikɛ mijwɛŋmɔ ama nɔ ni yaa nɔ yɛ nakai gbi lɛ mli lɛ nɔ, shi oona kɛ onaaa nɔŋŋ lɛ, miiye mitsui yɛ nibii pii ahe.”
Mɛi ni wie wiemɔi nɛɛ fɛɛ kɛ jwɛŋmɔŋ naagba ko miikpe. Ani bo loo mɔ ko ni osumɔɔ esane nuɔ he nakai bei komɛi?
Tsɛ otsui oŋmɛ omli, jeee okome pɛ okɛ shihilɛ ni tamɔ nɛkɛ kpeɔ. Ŋmɛnɛ lɛ, yɛ mɛi pii agbɛfaŋ lɛ, kɛ́ jeee amɛ amɛkɛ jwɛŋmɔŋ naagba miikpe lɛ, belɛ, amɛsuɔlɔ ko kɛ eko miikpe.
Eyɛ faŋŋ akɛ, wɔyɛ “bei krɛdɛi ni mli shihilɛ wa” mli, ni no hewɔ lɛ, mɛi kɛ haomɔi srɔtoi miikpe. (2 Timoteo 3:1) Niiamlitaolɔi komɛi bɔ amaniɛ akɛ, yɛ jeŋ fɛɛ lɛ, kɛ́ abua mɛi kpaanyɔ naa lɛ, amɛteŋ mɔ kome kɛ jwɛŋmɔŋ naagba ko miikpe. COVID-19 tsɛŋemɔ hela lɛ hewɔ lɛ, yɛ afi 2020 mli lɛ, mɛi ni jwɛŋmɔŋ naagbai hãa amɛyeɔ amɛtsui waa kɛ mɛi ni jwɛŋmɔŋ naagbai hãa amɛfeɔ basaa lɛ ayibɔ lɛ tee hiɛ waa. Yɛ jwɛŋmɔŋ naagbai enyɔ nɛɛ eko fɛɛ eko gbɛfaŋ lɛ, kɛ́ akɛ amɛyibɔ lɛ to afi 2019 nɔ lɛ he lɛ, mɛi aaafee 78,000,000 sɔŋŋ bafata he.
Ehi akɛ wɔbaale mɛi abɔ ni ŋmɛnɛ lɛ, jwɛŋmɔŋ naagbai hãa amɛyeɔ amɛtsui waa loo ehãa amɛfeɔ basaa. Shi nɔ ni he hiaa waa ji, ni wɔ kɛ wɔsuɔlɔi baale bɔ ni wɔbaafee koni wɔkaná jwɛŋmɔŋ naagba ko loo kɛ́ wɔná eko lɛ, wɔnyɛ wɔkpee naa.
Mɛni tsɔɔ akɛ mɔ ko bɛ jwɛŋmɔŋ naagba ko?
Kɛ́ ohaooo tsɔ ni onyɛɔ otsuɔ saji ahe nii jogbaŋŋ lɛ, belɛ, obɛ jwɛŋmɔŋ naagba. Mɔ ni bɛ jwɛŋmɔŋ naagba lɛ nyɛɔ etsuɔ shihilɛi ni ekɛkpeɔ daa gbi lɛ ahe nii, etsuɔ enitsumɔ jogbaŋŋ, ni eyeee etsui tsɔ yɛ eshihilɛ he.
Jwɛŋmɔŋ naagba . . .
-
JEEE nɔ ko ni mɔ ko náa yɛ efatɔɔ ko hewɔ.
-
JI hela ni hãa mɔ haoɔ waa, ni esaa bɔ ni mɔ lɛ susuɔ nii ahe ehãa, bɔ ni enuɔ he ehãa, kɛ bɔ ni efeɔ enii ehãa lɛ he.
-
Baanyɛ ehã ewa kɛhã mɔ ko akɛ ekɛ mɛi baashãra jogbaŋŋ, ni etsu edaa gbi shihilɛ mli nibii ahe nii jogbaŋŋ.
-
Baanyɛ ahao mɔ fɛɛ mɔ—gbekɛbii kɛ onukpai, niiatsɛmɛi kɛ ohiafoi, mɛi ni le woloŋ kɛ mɛi ni leee woloŋ, kɛ mɛi ni jɛ jamɔi srɔtoi amli.
He ni obaaná yelikɛbuamɔ yɛ
Mɔ ko baanyɛ enu he akɛ enifeemɔ etsake, ewɔ etsake, eniyeli etsake, loo eyeɔ etsui loo ewerɛ hoɔ ehe fe nine. Kɛ́ eba lɛ nakai lɛ, ekolɛ, ehe baahia ni mɔ lɛ ayana mɔ ko ni atsɔse lɛ jogbaŋŋ yɛ jwɛŋmɔŋ naagbai ahe, koni ewa lɛ ni ena nɔ hewɔ ni ebaa lɛ nakai, kɛ bɔ ni ebaafee etsu he nii.
Yesu Kristo, nuu ni hiɛ kã shi fe mɛi fɛɛ ni ehi shi pɛŋ lɛ wie akɛ: “Mɛi ni yɔɔ hewalɛ lɛ, datrɛfonyo he ehiaaa amɛ, shi mɛi ni bɛ hewalɛ lɛ moŋ ehe hiaa.” (Mateo 9:12) Kɛ́ mɔ ko bɛ hewalɛ ni etee helatsamɔhe ni sa ni akwɛ lɛ ni ahã lɛ tsofai lɛ, no baanyɛ ahã ehe awa lɛ bɔ ni sa, etsu eshihilɛ mli nibii ahe nii jogbaŋŋ, ni ená miishɛɛ hu. Kɛ́ okadii ni onaa ni tsɔɔ akɛ obɛ hewalɛ lɛ yɛ hiɛdɔɔ, loo amɛsɛɛ etsɛ lɛ, nilee yɛ mli akɛ obaaya oya nɔŋŋ ni akwɛ bo. a
Eyɛ mli akɛ Biblia lɛ jeee wolo ni woɔ ŋaa yɛ helatsamɔ saji ahe moŋ, shi saji komɛi yɛ mli ni baanyɛ awa wɔ ni wɔhi shi jogbaŋŋ. Wɔkɛ miishɛɛ miifɔ̃ bo nine koni okane saji ni nyiɛ sɛɛ lɛ ni ona bɔ ni Biblia lɛ baanyɛ awa wɔ kɛdamɔ jwɛŋmɔŋ naagbai anaa.
a Buu-Mɔɔ nɛɛ wooo mɛi hewalɛ ni amɛkɛ helatsamɔ gbɛ pɔtɛɛ ko atsu nii. Esa akɛ mɔ fɛɛ mɔ asusu helatsamɔ gbɛi ni abaanyɛ akɛtsu nii ahã lɛ ahe jogbaŋŋ, ni lɛ diɛŋtsɛ ehala emli nɔ ni esumɔɔ.
Ekolɛ Obaasumɔ Enɛ Hu
SANEBIMƆI NI BIBLIA LƐ EHÃ HETOO
Kɛ́ Miná Jwɛŋmɔŋ Naagba Lɛ, Ani Biblia Lɛ Baanyɛ Aye Abua Mi?
Nibii etɛ komɛi ni Nyɔŋmɔ kɛhãa wɔ koni ekɛye ebua wɔ kɛkpee jwɛŋmɔŋ naagbai anaa.
ESSENTIAL BIBLE TEACHINGS
Mɛni Hewɔ Nyɔŋmɔ Ŋmɛɔ Piŋmɔ Gbɛ?
Biblia lɛ kɛ hetoo ni shɛjeɔ mɔmii ni hãa mɔ tsui nyɔɔ emli hãa.
NYƐYAA NƆ NYƐBUA!
Oblahii Kɛ Oblayei Ni Náa Jwɛŋmɔ Mli Naagba Lɛ Ayi Miifa Waa—Mɛni Biblia Lɛ Kɛɔ Yɛ He?
Biblia lɛ kɛ ŋaawoi ni baanyɛ aye abua oblahii kɛ oblayei lɛ hãa.
