BE KO lɛ, Yesu wie akɛ: “Nɔhãmɔ hãa mɔ náa miishɛɛ fe hemɔ.” (Bɔf. 20:35) Anɔkwa sane nɛɛ kɔɔ wekukpaa ni yɔɔ wɔ kɛ Yehowa teŋ lɛ hu he. Yɛ mɛɛ gbɛ nɔ? Yehowa eke wɔ nibii pii ni hãa wɔmii shɛɔ wɔhe, shi kɛ́ wɔke Yehowa nii lɛ, wɔmii baashɛ wɔhe waa fe bɔ ni wɔmii shɛɔ wɔhe kɛ́ eke wɔ nii lɛ po. Mɛni wɔbaanyɛ wɔkɛke Yehowa? Abɛi 3:9 lɛ kɛɔ akɛ: “Okɛ onibii ni jara wa lɛ awo Yehowa hiɛ nyam.” ‘Wɔnibii ni jara wa’ lɛ ekomɛi ji, wɔbe, wɔhesai, wɔhewalɛ, kɛ wɔheloonaa nibii. Kɛ́ wɔkɛ wɔnibii shã afɔle kɛfi anɔkwa jamɔ sɛɛ lɛ, wɔmiike Yehowa nii, ni no baahã wɔná miishɛɛ waa diɛŋtsɛ.

Ŋaa ko ni bɔfo Paulo wo Kristofoi ni yɔɔ Korinto lɛ baanyɛ aye abua wɔ ni wɔkai ni wɔkɛ wɔheloonaa nibii ake Yehowa. Ewo amɛ ŋaa akɛ ‘amɛteŋ mɔ fɛɛ mɔ kɛ nɔ ko ato’ koni ekɛtsu onia. (1 Kor. 16:2) Kɛ́ ootao ole gbɛi srɔtoi ni obaanyɛ otsɔ nɔ otsu onia yɛ maŋ nɔ he ni oyɔɔ lɛ he saji babaoo lɛ, ofainɛ kwɛmɔ akrabatsa ni yɔɔ shishigbɛ lɛ.

Yɛ maji komɛi anɔ lɛ, onyɛŋ otsɔ Intanɛt lɛ nɔ otsu onia. Shi atsɔɔ gbɛi krokomɛi ni obaanyɛ otsɔ nɔ otsu onia lɛ yɛ jw.org lɛ nɔ. Eyɛ fã ni kɔɔ oniatsumɔ he lɛ. Yɛ maji komɛi anɔ lɛ, kɛ́ otee fã nɛɛ lɛ, obaana saji ni mɛi fɔɔ bimɔ yɛ oniatsumɔ he kɛ amɛhetoi.