YƐ AAAFEE afi 1910 mli lɛ, mifɔlɔi fã kɛjɛ Tbilisi, yɛ Georgia, kɛba Canada. Amɛbahi tsũ bibioo ko mli yɛ ŋmɔ ko nɔ yɛ he ko ni bɛŋkɛ maŋ ko ni atsɛɔ lɛ Pelly, ni yɔɔ Saskatchewan, yɛ Canada anaigbɛ lɛ. Afɔ mi yɛ afi 1928, ni miji amɛbii ekpaa lɛ naagbee mɔ. Mipapa gbo nyɔji ekpaa dani afɔ mi, ni mimami gbo be ni mikã he miji abifao. No sɛɛ etsɛɛɛ lɛ, minyɛmi yoo onukpa fe fɛɛ, ni atsɛɔ lɛ Lucy lɛ hu gbo. No mli lɛ, eye afii 17. No hewɔ lɛ, mimami nyɛmi nuu Nick ji mɔ ni kwɛ mi kɛ minyɛmimɛi lɛ.

Gbi ko yɛ migbekɛbiiashi lɛ, shĩa lɛ mli bii lɛ na mi ni miigbala wɔkpɔŋɔi lɛ ekome lei. Amɛtsui fã akɛ okpɔŋɔ lɛ baashi mi ntia, no hewɔ lɛ, amɛbolɔ amɛwo mi akɛ mikpa nɔ ni mifeɔ lɛ. Shi mikpaaa, ejaakɛ minuuu amɛbolɔmɔ lɛ, ni asaŋ minaaa amɛ, ejaakɛ mitsɔ misɛɛ mihã amɛ. Miishɛɛ sane ji akɛ, okpɔŋɔ lɛ efeee mi nɔ ko. Shi nakai gbi lɛ amɛna akɛ toimulɔ ji mi.

Wɔweku lɛ naanyo ko wo ŋaa akɛ, akɛ mi aya mumuii askul. No hewɔ lɛ, mitsɛkwɛ̃ lɛ kɛ mi tee mumuii askul ko ni yɔɔ Saskatoon, yɛ Saskatchewan lɛ. Skul lɛ kɛ wɔshĩa lɛ teŋ jekɛ waa, ni akɛni no mli lɛ miye afii enumɔ pɛ hewɔ lɛ, mishe gbeyei. Ja wɔhã gbɛ loo aaye hejɔɔmɔ gbi ko dani minyɛɔ mibaa shĩa. Fiofio lɛ, mibale mumuii awiemɔ, ni minyɛ mikɛ gbekɛbii krokomɛi lɛ shwɛ.

Yɛ afi 1939 lɛ, minyɛmimɛi yei enyɔ ni eshwɛ lɛ ateŋ onukpa tsɛ lɛ, ni atsɛɔ lɛ Marion lɛ, kɛ Bill Danylchuck bote gbalashihilɛ mli. Amɛhã mi kɛ minyɛmi yoo Frances bahi amɛŋɔɔ. Amɛji mɛi klɛŋklɛŋ yɛ miweku lɛ mli ni Yehowa Odasefoi kɛbɔi nikasemɔ. Kɛ́ mihã gbɛ ni miba shĩa lɛ, amɛbɔɔ mɔdɛŋ waa akɛ amɛbaatsɔɔ mi nibii ni amɛkaseɔ yɛ Biblia lɛ mli lɛ. Shi akɛni amɛnuuu mumuii awiemɔ hewɔ lɛ, mináaa lɛ mlɛo akɛ mikɛ amɛ baagba sane.  Kɛ̃lɛ, amɛna akɛ misumɔɔ nibii ni mikaseɔ yɛ Yehowa he lɛ. Miyɔse akɛ nɔ ni amɛfeɔ lɛ kɛ nɔ ni Biblia lɛ kɛɔ lɛ yɛ tsakpaa, no hewɔ lɛ, minyiɛ amɛsɛɛ kɛtee shiɛmɔ. No sɛɛ etsɛɛɛ lɛ, mishwe akɛ abaptisi mi. No hewɔ lɛ, yɛ September 5, 1941 lɛ, Bill baptisi mi yɛ gbudugbaŋ ko ni akɛ nubu mli nu ewo lɛ obɔ lɛ mli. Nu lɛ mli ejɔ waa diɛŋtsɛ!

Yɛ afi 1946 be ni wɔhã gbɛ ni miba shĩa lɛ, wɔtee kpokpaa wulu nɔ kpee ko yɛ Cleveland, Ohio, yɛ U.S.A. Kpee lɛ gbi klɛŋklɛŋ lɛ nɔ lɛ, minyɛmimɛi yei lɛ ŋmala saji ni awieɔ lɛ amli otii amɛhã mi bɔ ni afee ni kpee lɛ fɛɛ akabɔ mi. Shi gbi ni ji enyɔ lɛ nɔ lɛ, miyana mumuii akuu ko ni mɔ ko miitsɔɔ wiemɔi ni ahãa lɛ ashishi kɛmiiya mumuii awiemɔ mli eehã amɛ. Mitsui nyɔ mimli akɛ agbɛnɛ lɛ, maná kpee lɛ shishi nifeemɔi lɛ ahe sɛɛ kɛmɔ shi, ni manu nibii ni atsɔɔ mi kɛjɛɔ Biblia lɛ mli lɛ ashishi jogbaŋŋ!

Nakai beiaŋ lɛ, Jeŋ Ta II lɛ eba naagbee etsɛko, ni maŋhedɔɔ nifeemɔi ehe shi yɛ he fɛɛ he. Shi mitswa mifai shi akɛ maye Nyɔŋmɔ anɔkwa. No hewɔ lɛ, be ni miku misɛɛ kɛtee skul lɛ, miŋaaa aflaŋaa lɛ dɔŋŋ, ni miláaa jakumaŋ lala lɛ hu. Kɛfata he lɛ, mifataaa amɛhe kɛyeee amɛgbii juji lɛ, ni miyaaa sɔlemɔ ni afeɔ yɛ skul lɛ hu, eyɛ mli akɛ aakpa gbɛ akɛ skulbii lɛ fɛɛ baaya. Miskul tsɔɔlɔi lɛ náaa enɛ he miishɛɛ ni amɛka akɛ amɛbaawo mihe gbeyei ni amɛlaka mi koni matsake mijwɛŋmɔ. Skulbii lɛ na nɔ ni yaa nɔ lɛ, ni amɛshwe akɛ amɛle nɔ hewɔ. Enɛ hã miná hegbɛi pii kɛye amɛ odase. Amɛteŋ mɛi komɛi tamɔ Larry Androsoff, Norman Dittrick, kɛ Emil Schneider bamɔ anɔkwale lɛ mli, ni amɛmiisɔmɔ Yehowa kɛbashi ŋmɛnɛ.

Be fɛɛ be ni maya maji krokomɛi anɔ lɛ, mibɔɔ mɔdɛŋ akɛ maye mumuii ni yɔɔ jɛmɛ lɛ odase. Akɛ nɔkwɛmɔnɔ lɛ, be ko be ni mitee he ko ni mumuii buaa amɛhe naa yɛ, yɛ Montreal lɛ, miye oblanyo ko ni fata mumuii akuu ko he lɛ odase. Atsɛɔ lɛ Eddie Tager, ni ekɛ mumuii awiemɔ asafo ni yɔɔ Laval, yɛ Quebec lɛ sɔmɔ kɛyashi egbo nyɛsɛɛ afi lɛ. Mikɛ oblanyo kroko hu ni atsɛɔ lɛ Juan Ardanez lɛ kpe. Tamɔ bɔ ni Beroiabii lɛ fee lɛ, Juan tao nibii amli koni ekwɛ kɛji nibii ni wɔtsɔɔ lɛ lɛ jɛ Biblia lɛ mli lo. (Bɔf. 17:10, 11) Lɛ hu eba anɔkwale lɛ mli, ni esɔmɔ akɛ asafoŋ onukpa yɛ Ottawa, yɛ Ontario, kɛyashi egbo.

Yɛ afi 1950 lɛ, mifã kɛtee Vancouver. Eyɛ mli akɛ misumɔɔ ni maye mumuii odase moŋ, shi gbi ko lɛ, miye yoo ko ni jeee mumui lɛ odase yɛ gbɛjegbɛ ko he, ni mihiɛ kpaŋ nɔ ni jɛ mli kɛba lɛ nɔ kɔkɔɔkɔ. Atsɛɔ yoo nɛɛ Chris Spicer. Mihã lɛ wolo bibioo ni akɛshɛɔ wɔmagazin lɛ eko ni ehe. Ekɛɛ mi akɛ ebaasumɔ ni ekɛ mi ayaŋa ewu Gary. No hewɔ lɛ, mitee amɛshĩa lɛ, ni wɔgba sane be kplaŋŋ. Miŋmaa nɔ ni  mitaoɔ mawie lɛ, kɛkɛ lɛ amɛ hu amɛŋma nɔ ni amɛtaoɔ amɛkɛɛ mi lɛ. Kɛjɛ no sɛɛ lɛ, minuuu amɛhe dɔŋŋ aahu kɛyashi afii komɛi asɛɛ be ni amɛbaŋa mi yɛ kpee ko shishi yɛ Toronto, yɛ Ontario lɛ. Minaa kpɛ mihe waa. Abaptisi Gary nakai gbi lɛ. Niiashikpamɔ nɛɛ kai mi akɛ ehe miihia ni wɔya nɔ wɔshiɛ, ejaakɛ wɔnyɛŋ wɔle mɛi ni wɔshiɛɔ wɔhãa lɛ ateŋ mɔ ni baamɔ anɔkwale lɛ mli.

Sɛɛ mli lɛ, miku misɛɛ kɛtee Saskatoon. Yoo ko ni mikɛkpe yɛ jɛmɛ lɛ kɛɛ ebaasumɔ ni mikɛ ebiyei haaji ni amɛ fɛɛ amɛji mumuii lɛ akase Biblia lɛ. Atsɛɔ mɔ kome Jean, ni atsɛɔ mɔ kroko lɛ Joan, ni amɛweku gbɛ́i ji Rothenberger. No mli lɛ, amɛmiiya skul yɛ mumuii askul ni mitee lɛ. Etsɛɛɛ ni amɛkɛ amɛnanemɛi skulbii lɛ bɔi nibii ni amɛkaseɔ lɛ he sane gbaa. Sɛɛ mli lɛ, amɛklasbii lɛ ateŋ mɛi enumɔ batsɔmɔ Yehowa Odasefoi. Amɛteŋ mɔ kome ji Eunice Colin. Mikɛ Eunice kpe klɛŋklɛŋ kwraa be ni eshwɛ fioo ni magbe skul naa. Ehã mi siklitɛ ni ebi mi kɛji masumɔ ni wɔtsɔmɔ nanemɛi. Sɛɛ mli lɛ, ebatsɔ mɔ ko ni he hiaa waa yɛ mishihilɛ mli. No ji, ebatsɔ miŋa!

Be ni Eunice mami ná ele akɛ akɛ lɛ miikase Biblia lɛ, eyakɛɛ mɔ ni kwɛɔ amɛskul lɛ nɔ lɛ ni ekɔne eyiŋ koni ekpa nikasemɔ lɛ. Nuu nɛɛ he woji ni Eunice kɛkaseɔ nii lɛ fɛɛ yɛ edɛŋ. Shi Eunice tswa efai shi akɛ ebaaya nɔ eye Yehowa anɔkwa. Be ni ekɛɛ efɔlɔi akɛ ebaasumɔ ni abaptisi lɛ lɛ, amɛkɛɛ lɛ akɛ, “Kɛ́ otsɔ Yehowa Odasefonyo lɛ, obaashi shĩa nɛɛ!” Be ni eye afii 17 lɛ, eshi shĩa lɛ. Shi nyɛmimɛi komɛi hã ekɛ amɛweku lɛ bahi shi ni amɛkwɛ lɛ. Etee nɔ ekase nii lɛ, ni sɛɛ mli lɛ abaptisi lɛ. Be ni wɔboteɔ gbalashihilɛ mli yɛ afi 1960 lɛ, efɔlɔi lɛ baaa wɔyookpeemɔ lɛ shishi. Kɛ̃lɛ, be ni be shwieɔ mli lɛ, amɛhiɛ basɔ wɔ waa yɛ nibii ni wɔheɔ wɔyeɔ kɛ bɔ ni wɔtsɔseɔ wɔbii lɛ wɔhãa lɛ hewɔ.

Bihii kpawo ni wɔfɔ lɛ ateŋ mɔ ko mɔ ko jeee mumui. Wɔnáaa amɛtsɔsemɔ mlɛo, shi wɔmia wɔhiɛ wɔtsɔɔ amɛ mumuii awiemɔ koni wɔnyɛ wɔkɛ amɛ agba sane jogbaŋŋ ni wɔtsɔɔ amɛ anɔkwale lɛ. Nyɛmimɛi lɛ hu ye amɛbua wɔ waa. Akɛ nɔkwɛmɔnɔ lɛ, be ko lɛ nyɛmi ko ni lɛ hu eji fɔlɔ lɛ hã wɔle akɛ wɔbii lɛ ateŋ mɔ kome miiwie wiemɔ sha yɛ Maŋtsɛyeli Asa lɛ nɔ. Eŋma yɛ wolo fioo ko nɔ ni ekɛhã wɔ. Wɔtsu sane lɛ he nii amrɔ nɔŋŋ yɛ jɛmɛ. Wɔbihii lɛ ateŋ mɛi ejwɛ kɛ amɛŋamɛi kɛ amɛwekui miisɔmɔ Yehowa yɛ anɔkwayeli mli. Amɛji James, Jerry, Nicholas, kɛ Steven. Amɛ fɛɛ amɛmiisɔmɔ akɛ asafoŋ onukpai. Kɛfata he lɛ, Nicholas kɛ eŋa, Deborah, miisɔmɔ yɛ Britain nitsumɔhe nine lɛ, ni amɛyeɔ amɛbuaa ni atsɔɔ wɔwoji kɛ nibii lɛ ashishi kɛyaa mumuii awiemɔ mli. Steven kɛ eŋa, Shannan, hu miisɔmɔ yɛ United States nitsumɔhe nine lɛ, ni amɛfata mɛi ni tsɔɔ wɔwoji kɛ nibii lɛ ashishi kɛyaa mumuii awiemɔ mli yɛ jɛmɛ lɛ ahe.

Eunice gbo be ni eshwɛ nyɔɔŋ kome ni wɔbaaná afii 40 yɛ wɔgbalashihilɛ lɛ mli. Kansa ji nɔ ni gbe lɛ. Be ni ebɛ hewalɛ lɛ po lɛ, ehãaa ehemɔkɛyeli lɛ mli agbɔjɔ. Etee nɔ ená nɔmimaa akɛ, kɛ́ egbo po lɛ, Yehowa baatee lɛ shi. Mikɛ miishɛɛ miikpa be ni mana lɛ ekoŋŋ lɛ gbɛ.

Yɛ February 2012 lɛ, migbee shi ni mipila migboŋ. Mina faŋŋ akɛ, yelikɛbuamɔ he baahia mi. No hewɔ lɛ, mifã miyahi mibihii lɛ ateŋ mɔ kome kɛ eŋa masɛi. Wɔ fɛɛ wɔyɛ Calgary Mumuii Awiemɔ Asafo lɛ mli, ni mikã he miisɔmɔ akɛ asafoŋ onukpa. Mihi Blɔfo asafo mli afii abɔ, ni enɛ ji be klɛŋklɛŋ ni mikɛ mumuii awiemɔ asafo ko miisɔmɔ! Ekolɛ obaabi akɛ, be ni miyɔɔ Blɔfo asafo mli lɛ, no mli lɛ te mifeɔ tɛŋŋ? Yehowa ye ebua mi. Ewo shi akɛ ebaakwɛ awusai, ni nakai pɛpɛɛpɛ efee yɛ migbɛfaŋ. (Lala 10:14) Miida mɛi fɛɛ ni kase mumuii awiemɔ loo amɛŋmala nibii amɛhã mi bɔ ni afee ni maná kpeei lɛ ahe sɛɛ lɛ ashi waa.

Anɔkwa, jeee be fɛɛ be minu nibii ni awieɔ lɛ ashishi, ni bei komɛi lɛ, minu he tamɔ nɔ ni anuuu naagbai ni mumuii kɛkpeɔ lɛ ashishi. Enɛ je minijiaŋ wui. Shi be fɛɛ be ni manu he nakai lɛ, misusuɔ nɔ ni Petro kɛɛ Yesu lɛ he. Ekɛɛ lɛ akɛ: “Nuŋtsɔ, namɔ ŋɔɔ wɔbaaya? Bo oyɔɔ naanɔ wala wiemɔi lɛ.” (Yoh. 6:66-68) Nɔ kome ni mikase ji tsuishitoo, ni mile akɛ nyɛmimɛi mumuii ni ba asafo lɛ mli etsɛ lɛ ateŋ mɛi babaoo kɛ mi baakpã gbee. Miniiashikpamɔ lɛ ehã mina akɛ esa akɛ mato mitsui shi mamɛ Yehowa kɛ esafo lɛ. Ni enɛ ni mifee lɛ ehã miná jɔɔmɔi babaoo! Amrɔ nɛɛ, ayɛ woji kɛ nibii babaoo yɛ mi diɛŋtsɛ miwiemɔ, ni ji Amerika Mumuii Awiemɔ lɛ mli, ni bɔ ni mikɛ nyɛmimɛi lɛ sharaa kɛ́ mitee asafoŋ kpeei kɛ kpeei wuji ni afeɔ yɛ wiemɔ nɛɛ mli lɛ ashishi lɛ hãa mináa miishɛɛ waa. Lɛɛlɛŋ, miná miishɛɛ ni mitsui enyɔ mimli waa akɛ miisɔmɔ Yehowa, wɔ-Nyɔŋmɔ kpeteŋkpele lɛ.