1, 2. Mɛni Yehowa feɔ kɛtsɔɔ akɛ ehãa mɔ nɔ waa?

YEHOWA NYƆŊMƆ hãa mɔ nɔ waa. Nibii fɛɛ ni wɔyɔɔ lɛ, edɛŋ wɔná kɛjɛ. Shika tsuru, jwiɛtɛi, kɛ nibii krokomɛi fɛɛ ni yɔɔ shikpɔŋ lɛ nɔ lɛ ji enɔ, ni ekɛ nibii nɛɛ tsuɔ nii kɛbaa nibii fɛɛ ni yɔɔ wala mli lɛ ayi. (Lala 104:13-15; Hag. 2:8) Kɛ́ wɔkane Biblia lɛ, wɔnaa bɔ ni Yehowa kɛ nibii ni eyɔɔ lɛ tsu nii yɛ naakpɛɛ gbɛ nɔ kɛkwɛ ewebii lɛ yɛ shihilɛi komɛi amli.

² Yɛ afii 40 ni Israelbii lɛ ye yɛ ŋa lɛ nɔ lɛ fɛɛ mli lɛ, Yehowa hã amɛ mana amɛye kɛ nu ni amɛnu. (2 Mo. 16:35) Enɛ hewɔ lɛ, “nɔ ko nɔ ko ehiaaa amɛ.” (Neh. 9:20, 21) Afii pii asɛɛ lɛ, Yehowa tsɔ gbalɔ Elisha nɔ efee naakpɛɛ nii ehã yoo okulafo anɔkwafo ko; ehã mu fioo ni yoo lɛ yɔɔ lɛ fa babaoo. Nyɔŋmɔ fee yoo nɛɛ ejurɔ waa, ejaakɛ yoo lɛ yahɔ̃ɔ mu lɛ ni ekɛ shika ni ená lɛ eko wo ehe nyɔji fɛɛ, ni ekɛ nɔ ni shwɛ lɛ kwɛ lɛ kɛ ebii. (2 Maŋ. 4:1-7) Agbɛnɛ hu, Yehowa ye ebua Yesu ni etsɔ naakpɛɛ gbɛ nɔ elɛ mɛi babaoo, ni be ni ehe bahia ni ená shika kɛwo nɔ ko he nyɔmɔ lɛ, eye ebua lɛ ni ená eko.​—Mat. 15:35-38; 17:27.

3. Mɛni he wɔbaasusu yɛ nikasemɔ nɛɛ mli?

³ Nibii ni Yehowa yɔɔ ni ebaanyɛ ekɛtsu nii kɛbaa ebɔɔ nii ni  yɔɔ shikpɔŋ lɛ nɔ lɛ ayi lɛ fa babaoo diɛŋtsɛ. Fɛɛ sɛɛ lɛ, ekɛɔ etsuji lɛ akɛ, amɛkɛ heloonaa nibii ni amɛyɔɔ lɛ afi nitsumɔ ni esafo lɛ tsuɔ lɛ sɛɛ. (2 Mo. 36:3-7; kanemɔ Abɛi 3:9.) Mɛni hewɔ Yehowa miisumɔ ni wɔkɛ nibii kpakpai ni wɔná kɛjɛ edɛŋ lɛ aku sɛɛ ahã lɛ lɛ? Mɛɛ gbɛ nɔ hii kɛ yei anɔkwafoi ni hi shi yɛ blema lɛ fi Yehowa nitsumɔ lɛ sɛɛ? Te asafo lɛ kɛ onia ni atsuɔ ŋmɛnɛ lɛ tsuɔ nii ehãa tɛŋŋ? Wɔbaaná sanebimɔi nɛɛ ahetoo yɛ nikasemɔ nɛɛ mli.

4. Kɛ́ wɔfi Yehowa nitsumɔ lɛ sɛɛ lɛ, mɛni no hãa enaa yɛ wɔhe?

⁴ Wɔkɛ nibii ni wɔyɔɔ lɛ fiɔ Yehowa nitsumɔ lɛ sɛɛ, ejaakɛ wɔsumɔɔ lɛ ni wɔhiɛ sɔɔ nibii ni efeɔ ehãa wɔ lɛ. Kɛ́ wɔjwɛŋ nibii abɔ ni Yehowa efee ehã wɔ lɛ anɔ lɛ, etaa wɔtsuiŋ waa. Be ni Maŋtsɛ David tsɔɔ nibii ni ehe baahia ni aná kɛma sɔlemɔ shĩa lɛ, ewie akɛ nibii ni wɔyɔɔ lɛ fɛɛ lɛ, Yehowa dɛŋ wɔná kɛjɛ, ni akɛ, nɔ fɛɛ nɔ ni wɔkɛhãa lɛ lɛ, lɛ ekɛhã wɔ.​—Kanemɔ 1 Kronika 29:11-14.

5. Mɛɛ gbɛ nɔ Biblia lɛ hãa wɔnaa akɛ wɔtsuiŋ fɛɛ ni wɔbaajɛ wɔtsu onia lɛ ji gbɛi titrii ni wɔtsɔɔ nɔ wɔjáa Yehowa lɛ ateŋ ekome?

⁵ Wɔkɛ wɔheloonaa nibii fiɔ Yehowa nitsumɔ lɛ sɛɛ, ejaakɛ eji gbɛi ni wɔtsɔɔ nɔ wɔjáa Yehowa lɛ ateŋ ekome. Yɛ ninaa ko ni bɔfo Yohane na lɛ mli lɛ, enu ni Yehowa tsuji ni yɔɔ ŋwɛi lɛ mikɛɛ akɛ: “Yehowa wɔ-Nyɔŋmɔ, bo ji mɔ ni sa akɛ akɛ anunyam lɛ kɛ woo lɛ kɛ hewalɛ lɛ ahã, ejaakɛ bo obɔ nibii fɛɛ, ni osuɔmɔ naa hewɔ amɛba shihilɛ mli ni abɔ amɛ.” (Kpo. 4:11) Anɔkwa, Yehowa sa anunyam kɛ woo fɛɛ ni wɔbaanyɛ wɔkɛhã lɛ lɛ, ni no hewɔ lɛ, esa akɛ wɔkɛ nibii ni hi fe fɛɛ ni wɔyɔɔ lɛ ahã lɛ. Yehowa tsɔ Mose nɔ efã Israelbii lɛ akɛ amɛye gbii juji etɛ daa afi amɛhã lɛ. Nibii ni Israelbii lɛ fee kɛjá Yehowa yɛ gbii juji nɛɛ ashishi lɛ eko ji, amɛtsu onia kɛfi enitsumɔ lɛ sɛɛ. Afã amɛ akɛ “amɛteŋ mɔ ko mɔ ko akabapue yɛ Yehowa hiɛ kɛ edɛ̃ folo.” (5 Mo. 16:16) Ŋmɛnɛ hu lɛ, gbɛi titrii ni wɔtsɔɔ nɔ wɔjáa Yehowa lɛ ateŋ ekome ji, ni wɔbaajɛ wɔtsuiŋ fɛɛ wɔtsu onia kɛfi nitsumɔ ni Yehowa gbɛjianɔtoo lɛ fã ni yɔɔ shikpɔŋ lɛ nɔ lɛ tsuɔ lɛ sɛɛ kɛtsɔɔ akɛ wɔhiɛ sɔɔ esafo lɛ.

6. Mɛni hewɔ ehi akɛ wɔbaafee ejurɔ? (Kwɛmɔ mfoniri ni yɔɔ nikasemɔ lɛ shishijee lɛ.)

⁶ Kɛ́ wɔjɛ wɔtsuiŋ wɔfee mɛi ejurɔ lɛ, wɔ diɛŋtsɛ hu wɔnáa he sɛɛ. No hewɔ lɛ, kɛ́ daa nɛɛ mɛi miifee wɔ ejurɔ, shi wɔ lɛ wɔfeee mɛi ejurɔ lɛ, ebaaye wɔ awui. (Kanemɔ Abɛi 29:21.) Akɛ nɔkwɛmɔnɔ lɛ, kɛ́ gbekɛ ko kɛ shika ni efɔlɔi ehã lɛ eko he nɔ ko eke amɛ lɛ, te amɛbaanu he amɛhã tɛŋŋ? Aloo kɛ́ oblanyo loo oblayoo gbɛgbalɔ ko ni kɛ efɔlɔi yɔɔ shĩa lɛ hãa efɔlɔi lɛ shika fioo koni amɛkɛ wo shĩa lɛ he nyɔji lɛ, te amɛbaanu he amɛhã tɛŋŋ? Amɛmii baashɛ amɛhe waa! Eyɛ mli akɛ amɛkpaaa nɔ ko ni tamɔ nakai gbɛ kɛjɛɛɛ amɛbi lɛ dɛŋ moŋ, shi amɛbaanyɛ amɛmɔ nikeenii lɛ mli, ejaakɛ amɛle akɛ nakai gbɛ nɔ amɛbi lɛ miitsɔ etsɔɔ akɛ ehiɛ sɔɔ nibii fɛɛ ni amɛfeɔ amɛhãa lɛ lɛ. Nakai nɔŋŋ eji yɛ Yehowa gbɛfaŋ. Ele akɛ, kɛ́ wɔkɛ wɔnibii ni hi fe fɛɛ lɛ eko ke lɛ lɛ, ehi hã wɔ.

7, 8. Mɛɛ nɔkwɛmɔnɔ kpakpa Yehowa webii ni hi shi yɛ blema lɛ fee yɛ (a) bɔ ni atsuɔ onia kɛfiɔ nitsumɔi pɔtɛi asɛɛ lɛ mli? (b) bɔ ni atsuɔ onia kɛfiɔ Nyɔŋmɔ nitsumɔi fɛɛ ni atsuɔ lɛ asɛɛ lɛ mli?

⁷ Biblia lɛ hãa wɔleɔ akɛ, Nyɔŋmɔ tsuji ni hi shi yɛ blema lɛ tsu onia kɛfi enitsumɔ lɛ sɛɛ. Bei komɛi lɛ, amɛtsu onia kɛfi nitsumɔ pɔtɛɛ ko ni ataoɔ atsu lɛ sɛɛ. Akɛ nɔkwɛmɔnɔ lɛ, Mose wo Israelbii lɛ hewalɛ ni amɛkɛ nibii aba koni akɛfee kpee buu lɛ, ni Maŋtsɛ David hu wo maŋbii lɛ hewalɛ koni amɛtsu onia ni akɛma sɔlemɔ shĩa lɛ. (2 Mo. 35:5; 1 Kro. 29:5-9) Yɛ Maŋtsɛ Yehoash  beiaŋ lɛ, osɔfoi lɛ kɛ onia ni maŋbii lɛ tsu lɛ saa Yehowa shĩa lɛ. (2 Maŋ. 12:4, 5) Be ni Kristofoi ni hi shi yɛ blema lɛ nu akɛ amɛnyɛmimɛi ni yɔɔ Yudea lɛ ahe efi amɛ yɛ hɔmɔ ko ni eba lɛ hewɔ lɛ, ‘amɛkpɛ mli akɛ amɛteŋ mɔ fɛɛ mɔ ahã bɔ ni ebaanyɛ koni akɛmaje amɛ ni akɛyaye abua amɛ.’​—Bɔf. 11:27-30.

⁸ Yehowa webii lɛ kɛ amɛheloonaa nibii fi mɛi ni nyiɛ hiɛ yɛ enitsumɔ lɛ mli lɛ hu asɛɛ. Akɛ nɔkwɛmɔnɔ lɛ, yɛ Mose Mla lɛ shishi lɛ, ahãaa Levibii lɛ shikpɔŋ ko akɛ amɛgboshinii, tamɔ bɔ ni afee ahã Israel wekui krokomɛi lɛ. Moŋ lɛ, Israelbii lɛ kɛ amɛnibii lɛ amlijaa nyɔŋma mli ekome hã amɛ. Enɛ hewɔ lɛ, Levibii lɛ nyɛ amɛkɛ amɛjwɛŋmɔ fɛɛ ma nitsumɔ ni amɛtsuɔ yɛ kpee buu lɛ mli lɛ nɔ. (4 Mo. 18:21) Nakai nɔŋŋ yei komɛi ni dɛŋ kpɔɔ ‘kɛ amɛnibii sɔmɔ’ Yesu kɛ ebɔfoi lɛ.​—Luka 8:1-3.

9. Nɛgbɛ Nyɔŋmɔ webii ni hi shi yɛ blema lɛ ná nibii ni amɛkɛtsu onia lɛ kɛjɛ?

⁹ Nyɔŋmɔ webii lɛ ná nibii ni amɛkɛtsu onia lɛ kɛjɛ hei srɔtoi. Eeenyɛ efee akɛ, nibii ni Israelbii lɛ kɛjɛ Ejipt lɛ amli amɛjɛ amɛtsu onia ni akɛfee kpee buu lɛ yɛ ŋa lɛ nɔ lɛ. (2 Mo. 3:21, 22; 35:22-24) Blema Kristofoi lɛ ateŋ mɛi komɛi hɔ̃ɔ amɛshikpɔji loo amɛshĩai ni amɛkɛ shika ni amɛná lɛ bahã bɔfoi lɛ. Bɔfoi lɛ hu jara shika nɛɛ amɛhã mɛi ni ehia amɛ lɛ. (Bɔf. 4:34, 35) Blema Kristofoi lɛ ateŋ mɛi komɛi hu kɛ shika ni amɛnáa lɛ eko toɔ ni amɛkɛfiɔ nitsumɔ lɛ sɛɛ. (1 Kor. 16:2) No hewɔ lɛ, gbɔmɛi srɔtoi fɛɛ, niiatsɛmɛi jio, ohiafoi jio, tsu onia kɛfi nitsumɔ lɛ sɛɛ.​—Luka 21:1-4.

10, 11. (a) Te wɔɔfee tɛŋŋ wɔkase Yehowa tsuji ni hi shi yɛ blema ni jɛ amɛtsui mli fɛɛ amɛtsu onia kɛfi enitsumɔ lɛ sɛɛ lɛ? (b) Te onuɔ he ohãa tɛŋŋ yɛ onia ni otsuɔ kɛfiɔ Maŋtsɛyeli nitsumɔ lɛ sɛɛ lɛ he?

¹⁰ Ŋmɛnɛ lɛ, ehe baanyɛ ahia akɛ wɔ hu wɔtsu onia kɛhã nitsumɔ pɔtɛɛ ko. Akɛ nɔkwɛmɔnɔ lɛ, kɛ́ aato gbɛjianɔ ni ama Maŋtsɛyeli Asa hee ni nyɛsafo lɛ baakpe yɛ nɔ, loo aafee tsakemɔi wuji yɛ asa ni nyɛkpeɔ yɛ nɔ lɛ he lɛ, ehe baahia ni otsu onia kɛfi sɛɛ. Aloo kɛ́ aafee tsakemɔi wuji yɛ nyɛnitsumɔhe nine lɛ he, aaba abaya kpee wulu ko, loo adebɔɔ naa oshara ko enina nyɛmimɛi komɛi ni ehe baahia ni aye abua amɛ lɛ, wɔbaanyɛ wɔtsu onia kɛye wɔbua. Agbɛnɛ hu, wɔtsuɔ onia kɛyeɔ wɔbua mɛi ni tsuɔ nii yɛ nitsumɔhe yitso lɛ kɛ nitsumɔhe niji ni yɔɔ jeŋ koji ejwɛ lɛ fɛɛ lɛ. Akɛ onia ni wɔtsuɔ lɛ eko yeɔ abuaa maŋsɛɛ sɔɔlɔi, gbɛgbalɔi krɛdɛi, kɛ kpokpaa nɔkwɛlɔi kɛ amɛŋamɛi. Ekolɛ nyɛsafo lɛ ekpɛ mli akɛ nyɛkɛ shika pɔtɛɛ ko baamaje daa nyɔɔŋ nɔ koni nyɛkɛye nyɛbua ni amamɔ Maŋtsɛyeli Asai kɛ Kpee Asai koni nyɛmimɛi ni yɔɔ yɛ je lɛŋ hei krokomɛi lɛ aná he sɛɛ.

¹¹ Wɔteŋ mɔ fɛɛ mɔ baanyɛ atsu onia kɛfi Yehowa nitsumɔ ni atsuɔ yɛ naagbee gbii nɛɛ amli lɛ sɛɛ. Oniai ni atsuɔ lɛ ateŋ babaoo lɛ, aleee mɛi pɔtɛi ni tsuɔ. Kɛ́ wɔkɛ shika wo oniatsumɔ adekai ni yɔɔ Maŋtsɛyeli Asai lɛ anɔ lɛ amli loo wɔtsu onia kɛtsɔ jw.org lɛ nɔ yɛ Intanɛt lɛ nɔ lɛ, wɔhãaa mɛi krokomɛi ale shika abɔ ni wɔtsu. Ekolɛ wɔbaanu he akɛ onia fioo ni wɔtsuɔ lɛ nyɛɛɛ nɔ ko atsu. Oniai ni asafo lɛ nine shɛɔ nɔ lɛ ateŋ kpotoo ji oniai bibii ni mɛi babaoo tsuɔ shi jeee oniai wuji ni mɛi fio komɛi pɛ tsuɔ. Wɔnyɛmimɛi ni bɛ nɔ ko tsɔ lɛ po kaseɔ blema Kristofoi ni hi shi yɛ Makedonia lɛ. No mli lɛ, Makedonia Kristofoi lɛ ‘miiye ohia butuu’ shi amɛkpa fai ni ahã amɛ hegbɛ ni amɛhã nɔ ko kɛye amɛbua amɛnyɛmimɛi lɛ, ni amɛjɛ amɛtsui mli fɛɛ amɛfee nakai.​—2 Kor. 8:1-4.

12. Mɛɛ gbɛ nɔ Yehowa asafo lɛ kwɛɔ koni akɛ oniai ni atsuɔ lɛ atsu nii jogbaŋŋ?

¹² Gbɛtsɔɔmɔ Kuu lɛ kɛ hiɛshikamɔ tsuɔ nii yɛ bɔ ni amɛkɛ oniai ni atsuɔ lɛ tsuɔ nii amɛhãa lɛ he, ni amɛkwɛɔ koni akɛtsu  yiŋtoi ahewɔ ni atsuɔ lɛ ahe nii. (Mat. 24:45) Amɛsɔleɔ koni amɛkpɛ yiŋ kpakpai, ni amɛtoɔ gbɛjianɔ jogbaŋŋ yɛ bɔ ni akɛ shika lɛ baatsu nii ahã lɛ he. (Luka 14:28) Yɛ blema lɛ, hii anɔkwafoi ni kwɛ oniai ni atsu lɛ anɔ lɛ kwɛ koni akɛ oniai lɛ atsu yiŋtoi ahewɔ ni atsu lɛ pɛ ahe nii. Akɛ nɔkwɛmɔnɔ lɛ, Persia maŋtsɛ lɛ ke Yudafoi lɛ shika tsuru, jwiɛtɛi, kɛ nibii krokomɛi, ni kɛ́ abu naa ŋmɛnɛ lɛ, efa kwraa fe dɔlai akpekpei 100. Ehe bahia ni Ezra kɛ nibii nɛɛ aya Yerusalem. Ezra na nibii nɛɛ akɛ eji nii ni akɛke Yehowa. No hewɔ lɛ, ekɛ gbɛtsɔɔmɔi pɔtɛi komɛi hã bɔ ni afee ni awuiyelɔi akashɔ̃ nibii nɛɛ yɛ amɛdɛŋ be ni amɛkɛfãa gbɛ kɛtsɔɔ shikpɔji ni amɛnɔ yɔɔ oshara nɔ kɛyaa Yerusalem lɛ. (Ezra 8:24-34) Yɛ bɔfoi lɛ abeiaŋ lɛ, atsu onia ahã bɔfo Paulo koni akɛyaye abua nyɛmimɛi ni yɔɔ Yudea lɛ. Eto gbɛjianɔ koni mɛi ni kɛ shika lɛ baaya Yudea lɛ kɛ ‘anɔkwayeli atsu nɔ fɛɛ nɔ he nii, jeee yɛ Yehowa hiɛ kɛkɛ, shi moŋ yɛ gbɔmɛi ahiɛ hu.’ (Kanemɔ 2 Korintobii 8:18-21.) Ŋmɛnɛ lɛ, Yehowa asafo lɛ kaseɔ Ezra kɛ Paulo nɔkwɛmɔnɔ kpakpa lɛ, ni amɛtoɔ gbɛjianɔ koni akwɛ oniai ni atsuɔ lɛ anɔ jogbaŋŋ ni akɛtsu yiŋtoi ahewɔ ni atsu lɛ ahe nii.

13. Mɛni hewɔ nyɛsɛɛ nɛɛ Yehowa asafo lɛ efee tsakemɔi komɛi lɛ?

¹³ Weku ko baanyɛ afee tsakemɔi yɛ nibii ni amɛkɛ shika heɔ lɛ amli koni amɛkafite shika fe shika abɔ ni amɛnáa aloo amɛbaanyɛ amɛtao gbɛi anɔ ni amɛbaatsɔ amɛgbɔ nibii ni amɛfiteɔ be kɛ shika babaoo yɛ he lɛ anɔ koni amɛná be babaoo kɛsɔmɔ Yehowa. Yehowa asafo lɛ hu feɔ nɔ ko ni tamɔ nakai. Nyɛsɛɛ nɛɛ, asafo lɛ efee nibii hei babaoo ni sa kadimɔ, ni bei komɛi lɛ, shika ni akɛfeɔ nibii nɛɛ fa fe oniai ni atsuɔ lɛ. No hewɔ lɛ, tamɔ bɔ ni wekui feɔ bei komɛi lɛ, asafo lɛ hu taoɔ gbɛi ni abaanyɛ atsɔ nɔ atsu Yehowa nitsumɔ lɛ ni afiteee shika kɛ be babaoo, bɔ ni afee ni anyɛ akɛ oniai ni wɔtsuɔ lɛ atsu nibii babaoo ahe nii.

14-16. (a) Mɛni ji nibii komɛi ni akɛ oniai ni wɔtsuɔ lɛ tsuɔ? (b) Mɛɛ gbɛi anɔ oná nibii ni akɛ oniai lɛ tsuɔ lɛ ahe sɛɛ?

¹⁴ Mɛi ni esɔmɔ Yehowa afii babaoo lɛ ateŋ mɛi pii kɛɔ akɛ, ŋmɛnɛ lɛ, asafo lɛ edro wɔ nibii babaoo fe bei fɛɛ ni eho. Bo lɛ, susumɔ nibii nɛɛ ekomɛi ahe okwɛ. Amrɔ nɛɛ wɔyɛ jw.org kɛ JW Broadcasting, ni atsɔɔ Ŋmalɛ Krɔŋkrɔŋ Lɛ​—Jeŋ Hee Shishitsɔɔmɔ lɛ shishi kɛtee wiemɔi pii amli. Yɛ afi 2014 kɛmiimɔ afi 2015 lɛ, afee gbii etɛ majimaji ateŋ kpee ni yitso ji, “Yaa Nɔ Otao Nyɔŋmɔ Maŋtsɛyeli Lɛ Tsutsu!” lɛ yɛ stedium wuji komɛi amli yɛ maji 14 amli yɛ  jeŋ fɛɛ. Mɛi ni tee kpeei nɛɛ ashishi lɛ ná miishɛɛ waa.

¹⁵ Mɛi babaoo etsɔɔ bɔ ni amɛhiɛ sɔɔ nibii kpakpai ni amɛnine shɛɔ nɔ kɛjɛɔ asafo lɛ dɛŋ lɛ. Akɛ nɔkwɛmɔnɔ lɛ, nyɛmi nuu ko kɛ eŋa ni amɛmiisɔmɔ yɛ Asia maŋ ko nɔ lɛ wie yɛ JW Broadcasting lɛ he akɛ: “Wɔmiisɔmɔ yɛ maŋ bibioo ko mli. Enɛ hewɔ lɛ, bei komɛi lɛ wɔnuɔ he akɛ gbɛ agbo kã wɔ kɛ wɔnyɛmimɛi lɛ ateŋ, ni ehãa wɔhiɛ kpaa nɔ akɛ aatsu Yehowa nitsumɔ lɛ yɛ jeŋ fɛɛ. Shi kɛ́ wɔkwɛ JW Broadcasting lɛ nɔ nifeemɔi lɛ, wɔkaiɔ akɛ wɔfata nyɛmimɛi ni yɔɔ jeŋ fɛɛ lɛ ahe. Nyɛmimɛi hii kɛ yei ni wɔsumɔɔ amɛsane waa ni yɔɔ he ni wɔsɔmɔɔ yɛ lɛ sumɔɔ JW Broadcasting lɛ waa. Bei pii lɛ, wɔnuɔ ni amɛkɛɔ akɛ kɛ́ amɛkwɛ daa nyɔɔŋ nɔ nifeemɔi lɛ amɛnuɔ he akɛ Gbɛtsɔɔmɔ Kuu lɛ mli bii lɛ bɛŋkɛ amɛ kpaakpa. Amrɔ nɛɛ, amɛmii eshɛ amɛhe waa fe tsutsu lɛ akɛ amɛfata Yehowa asafo lɛ he.”

¹⁶ Amrɔ nɛɛ, yɛ jeŋ fɛɛ lɛ aamamɔ Maŋtsɛyeli Asai aaafee 2,500 loo aafee tsakemɔi wuji yɛ amɛhe. Be ni nyɛmimɛi ni yɔɔ asafo ko mli yɛ Honduras lɛ kɛ amɛ-Maŋtsɛyeli Asa hee lɛ bɔi nitsumɔ lɛ, amɛŋma akɛ: “Eŋɔɔ wɔnaa waa akɛ wɔfata Yehowa weku lɛ he, ni ekome ni wɔ kɛ nyɛmimɛi ni yɔɔ jeŋ fɛɛ lɛ efee lɛ hãa wɔnáa miishɛɛ waa. Anɔkwa, enɛ hewɔ ni amrɔ nɛɛ wɔnine eshɛ Maŋtsɛyeli Asa ni wɔshwe akɛ wɔná lɛ nɔ lɛ.” Mɛi babaoo jieɔ hiɛsɔɔ ni tamɔ nɛkɛ kpo kɛ́ amɛnine shɛ Biblia kɛ woji krokomɛi ni atsɔɔ shishi kɛtee amɛwiemɔ mli lɛ nɔ, loo aye abua amɛ be ni adebɔɔ naa oshara ko enina amɛ, loo amɛna yibii kpakpai ni jɛɔ maŋtiasei wuji amli odaseyeli kɛ maŋ odaseyeli ni atsuɔ yɛ amɛshikpɔŋkuku lɛ mli kɛbaa lɛ.

17. Te wɔfeɔ tɛŋŋ wɔleɔ akɛ Yehowa miifi enitsumɔ ni atsuɔ ŋmɛnɛ lɛ sɛɛ?

¹⁷ Mɛi ni jeee Yehowa Odasefoi lɛ ateŋ mɛi babaoo nyɛɛɛ anu shishi akɛ, oniai ni wɔtsuɔ lɛ pɛ akɛtsuɔ nitsumɔi ni wɔtsuɔ lɛ fɛɛ. Nitsumɔ wulu ko mli onukpa ko yasara wɔnitsumɔhe ko ni akalaa woji yɛ jɛmɛ. Efee lɛ naakpɛɛ akɛ mɛi ni tsuɔ nii yɛ jɛmɛ lɛ ji mɛi ni kɛ amɛhe ehã ni awooo amɛ nyɔmɔ, ni agbɛnɛ hu oniai ni wɔtsuɔ lɛ pɛ ni akɛtsuɔ wɔnitsumɔ lɛ ni abɛ gbɛjianɔ ko ni ato koni akɛtao shika kɛfi nitsumɔ lɛ sɛɛ. Nuu nɛɛ kɛɛ akɛ, kɛ́ nɛkɛ gbɛ nɔ atsɔɔ atsuɔ wɔnitsumɔ lɛ, kulɛ esaaa akɛ wɔnyɛɔ wɔtsuɔ kɔkɔɔkɔ. Esane ja! Wɔle akɛ akɛni Yehowa miifi nitsumɔ lɛ sɛɛ lɛ hewɔ ni wɔnyɛɔ wɔtsuɔ lɛ.​—Hiob 42:2.

18. (a) Kɛ́ wɔtsu onia kɛfi Maŋtsɛyeli nitsumɔ lɛ sɛɛ lɛ, mɛɛ jɔɔmɔi wɔnáa? (b) Te wɔɔfee tɛŋŋ wɔtsɔɔ wɔbii kɛ mɛi hei bɔ ni amɛbaafee amɛtsu onia kɛfi Yehowa nitsumɔ lɛ sɛɛ?

¹⁸ Yehowa ewo wɔhiɛ nyam waa ejaakɛ ehã wɔ hegbɛ koni wɔfi nitsumɔ ni fe fɛɛ ni aatsu ŋmɛnɛ lɛ sɛɛ. Ewo wɔ shi akɛ, kɛ́ wɔfi Maŋtsɛyeli nitsumɔ lɛ sɛɛ lɛ, bɔ fɛɛ bɔ ni fee lɛ, ebaajɔɔ wɔ. (Mal. 3:10) Ewo shi hu akɛ, mɔ ni hãa mɔ nɔ lɛ, ebaashwere. (Kanemɔ Abɛi 11:24, 25.) Agbɛnɛ hu, “nɔhãmɔ hãa mɔ náa miishɛɛ fe hemɔ,” no hewɔ lɛ, kɛ́ wɔfeɔ ejurɔ lɛ wɔbaaná miishɛɛ. (Bɔf. 20:35) Wɔbaanyɛ wɔtsɔ wɔwiemɔ kɛ wɔnifeemɔ nɔ wɔtsɔɔ wɔbii kɛ mɛi hei bɔ ni amɛbaafee amɛtsu onia kɛfi Yehowa nitsumɔ lɛ sɛɛ koni amɛná jɔɔmɔi babaoo.

19. Te oná nikasemɔ nɛɛ he sɛɛ ohã tɛŋŋ?

¹⁹ Nɔ fɛɛ nɔ ni wɔyɔɔ lɛ, Yehowa dɛŋ wɔná kɛjɛ. Kɛ́ wɔke Yehowa nii lɛ, no tsɔɔ akɛ wɔsumɔɔ lɛ ni wɔhiɛ sɔɔ nɔ fɛɛ nɔ ni efee ehã wɔ lɛ. (1 Kro. 29:17) Be ni Israelbii lɛ tsu onia koni akɛma sɔlemɔ shĩa lɛ, amɛná “miishɛɛ waa akɛ amɛjɛ amɛsuɔmɔ mli amɛhã, ejaakɛ amɛjɛ amɛtsui muu fɛɛ mli amɛke Yehowa nii.” (1 Kro. 29:9) Nyɛhãa wɔ hu wɔyaa nɔ wɔjɛa nibii ni Yehowa kɛdro wɔ lɛ amli wɔkea lɛ nii koni wɔná miishɛɛ ni wɔtsui anyɔ wɔmli.