1. Mɛni baaye abua wɔ ni wɔnyɛ wɔbo Nyɔŋmɔ toi, ni yɛ nakai beiaŋ nɔŋŋ lɛ, wɔbo adesai anɔyelii toi?

BIBLIA lɛ kɛɔ akɛ, esa akɛ wɔye mlai ni adesai anɔyelii woɔ lɛ anɔ. Shi yɛ nakai beiaŋ nɔŋŋ lɛ, ekɛɔ akɛ esa akɛ wɔbo Nyɔŋmɔ toi be fɛɛ be. (Bɔfoi 5:29; Tito 3:1) Mɛni baaye abua wɔ ni wɔnyɛ wɔbo gbɛtsɔɔmɔi enyɔ nɛɛ toi? Shishitoo mla ko ni Yesu kɛhã lɛ baaye abua wɔ. Yesu wie akɛ, ‘wɔŋɔ Kaisare nibii wɔhã Kaisare, shi wɔkɛ Nyɔŋmɔ nibii ahã Nyɔŋmɔ.’ ^[1] (Kwɛmɔ shishigbɛ niŋmaa ni yɔɔ sane lɛ naagbee lɛ.) (Mateo 22:21) Kɛ́ wɔye mlai ni amralofoi lɛ loo nɔyeli lɛ ewo lɛ anɔ, wɔbu amɛ, ni wɔwo toi fɛɛ ni esa akɛ wɔwo lɛ, belɛ wɔkɛ “Kaisare nibii” miihã Kaisare. (Romabii 13:7) Shi, kɛ́ nɔyeli lɛ kɛɛ wɔ akɛ wɔfee nɔ ko ni Nyɔŋmɔ sumɔɔɔ lɛ, esa akɛ wɔjɛ bulɛ mli wɔkpoo akɛ wɔbaafee.

2. Mɛni tsɔɔ akɛ wɔkɛ wɔhe wooo maŋkwramɔŋ saji amli?

² Gbɛ kome ni wɔtsɔɔ nɔ wɔkɛ ‘Nyɔŋmɔ nibii hãa Nyɔŋmɔ’ ji, ni wɔbaatsi wɔhe kwraa kɛje maŋkwramɔŋ saji ahe. (Yesaia 2:4) Yehowa ji mɔ ni eŋmɛ adesai nɔyelɔi gbɛ ni amɛye wɔnɔ, no hewɔ lɛ, esaaa akɛ wɔteɔ shi wɔwoɔ amɛ. Shi no etsɔɔɔ akɛ wɔbaanyɛ wɔkɛ wɔhe awo maŋkwramɔŋ loo maŋhedɔɔ nifeemɔi amli.  (Romabii 13:1, 2) Wɔbutuuu nɔyelii, wɔwooo mɛi ni kɛ amɛhe woɔ maŋkwramɔŋ saji amli lɛ ayiŋ, ni wɔfɔ̃ɔɔ oshiki hu. Asaŋ, wɔyadamɔɔɔ shi akɛ mɛi afɔ̃ oshiki amɛhã wɔ.

3. Mɛni hewɔ esaaa akɛ wɔkɛ wɔhe woɔ maŋkwramɔŋ saji kɛ tawuu mli?

³ Nibii pii ahewɔ Nyɔŋmɔ kɛɔ wɔ akɛ wɔkɛ wɔhe akawo maŋkwramɔŋ saji amli lɛ. Ekome ji akɛ, kɛ́ wɔkɛ wɔhe wooo maŋkwramɔŋ saji amli lɛ, belɛ wɔmiikase Yesu, ejaakɛ be ni eyɔɔ shikpɔŋ lɛ nɔ lɛ, ekɛ ehe wooo maŋkwramɔŋ saji loo tawuu mli. ‘Efataaa je lɛ he.’ (Yohane 6:15; 17:16) Agbɛnɛ hu, wɔfiɔ Nyɔŋmɔ Maŋtsɛyeli lɛ sɛɛ, ni no hewɔ lɛ, wɔnyɛŋ wɔfi adesa nɔyeli ko sɛɛ. Kɛ́ wɔyafi adesai anɔyelii asɛɛ lɛ, wɔnyɛŋ wɔkɛ henilee ni he tse akɛɛ mɛi akɛ Nyɔŋmɔ Maŋtsɛyeli lɛ pɛ baatsu adesai anaagbai fɛɛ he nii. Amale jamɔi kɛ amɛhe woɔ maŋkwramɔŋ saji amli, ni enɛ ehã mɛi amli egbala. Shi akɛni wɔkɛ wɔhe wooo maŋkwramɔŋ saji amli hewɔ lɛ, ekomefeemɔ yɛ wɔ kɛ wɔnyɛmimɛi ni yɔɔ jeŋ fɛɛ lɛ ateŋ.​—1 Petro 2:17.

4. (a) Mɛni hewɔ wɔbaanyɛ wɔkpa gbɛ akɛ, mɛi baanyɛ wɔnɔ akɛ wɔkɛ wɔhe awo maŋkwramɔŋ saji amli lɛ? (b) Mɛni hewɔ amrɔ nɛɛ ji be ni esa akɛ wɔhã wɔfai shi ni wɔtswa akɛ wɔkɛ wɔhe woŋ maŋkwramɔŋ saji amli lɛ mli awa lɛ?

⁴ Ekolɛ, yɛ maŋ nɔ he ni wɔyɔɔ lɛ, mɔ ko enyɛɛɛ wɔnɔ ni wɔkɛ wɔhe awo maŋkwramɔŋ saji amli. Shi, akɛni wɔmiibɛŋkɛ Satan jeŋ fɔŋ nɛɛ naagbee lɛ hewɔ lɛ, wɔle akɛ shihilɛ lɛ baatsake. Ni tsakemɔ nɛɛ baanyɛ aba trukaa. Wɔnyɛmimɛi lɛ ateŋ mɛi komɛi eyaje shihilɛ ni tamɔ nɛkɛ mli momo, ni amɛná nɔ ni wɔtsɔɔ nɛɛ mli niiashikpamɔ. Ŋmɛnɛ lɛ, “kuɛŋtilɔi” kɛ “mɛi ni anyɛɛɛ akɛ amɛ afee kpaŋmɔ” ehe shi yɛ je lɛ mli he fɛɛ he. Enɛ hewɔ lɛ, mɛi nyɛɛɛ amɛkɛ amɛhe ahi shi yɛ toiŋjɔlɛ mli. Ni wɔle akɛ, be ni naagbee lɛ bɛŋkɛɔ lɛ, emli baawo wu fe nɛkɛ po. (2 Timoteo 3:3, 4) Enɛɛmɛi fɛɛ hewɔ esa akɛ wɔsaa wɔhe wɔto bianɛ lɛ, koni wɔsɛɛ kɛ́ aanyɛ wɔnɔ ni wɔkɛ wɔhe awo maŋkwramɔŋ saji amli lɛ, wɔnyɛ wɔfi shi. Nyɛhãa wɔsusua nibii ejwɛ ni wɔbaanyɛ wɔfee kɛsaa wɔhe lɛ ahe.

5. Te Yehowa naa adesai anɔyelii ehãa tɛŋŋ?

⁵ Nɔ kome ni baaye abua wɔ ni wɔkɛ wɔhe akawo maŋkwramɔŋ saji amli ji, ni wɔbaana adesai anɔyelii taakɛ Yehowa naa amɛ lɛ. Be ni Yehowa bɔ adesai lɛ, ehãaa amɛ hegbɛ ni amɛye adesai krokomɛi anɔ. (Yeremia 10:23) Yɛ Yehowa hiɛ lɛ, wɔ fɛɛ lɛ, weku kome ji wɔ, ekɔɔɔ he eko shikpɔŋ lɛ nɔ he ni wɔyɔɔ. Shi adesai anɔyelii hãa mɛi náa jwɛŋmɔ lɛ akɛ, maŋ nɔ ni amɛjɛ lɛ hi fe maji krokomɛi fɛɛ, ni enɛ kɛ mligbalamɔi eba adesai aweku lɛ mli. Kɛ̃lɛ, adesa nɔyelɔ ni bɔɔ mɔdɛŋ fe fɛɛ lɛ po nyɛŋ atsu naagbai fɛɛ ni yɔɔ je lɛ mli lɛ he nii. Kɛfata he lɛ, kɛjɛ be ni Nyɔŋmɔ wó Yesu Maŋtsɛ yɛ afi 1914 lɛ, adesai anɔyelii fɛɛ ebatsɔmɔ Nyɔŋmɔ henyɛlɔi. Etsɛŋ kwraa, Maŋtsɛyeli lɛ baakpãtã adesai anɔyelii fɛɛ ahiɛ.​—Kanemɔ Lala 2:2, 7-9.

6. Te esa akɛ wɔkɛ mɛi ni yɔɔ gbɛhe yɛ je lɛŋ nɔyelii lɛ amli lɛ aye ahã tɛŋŋ?

⁶ Nyɔŋmɔ eŋmɛ adesai anɔyelii gbɛ ni amɛhi shi, ejaakɛ kɛ́ amɛbɛ lɛ, nibii baafite kwraa fe bɔ ni eji amrɔ nɛɛ po. Ni kɛ́ eba lɛ  nakai lɛ, ebaawa kɛhã wɔ akɛ wɔbaashiɛ Nyɔŋmɔ Maŋtsɛyeli lɛ he sane kpakpa lɛ. (Romabii 13:3, 4) Nyɔŋmɔ ekɛɛ wɔ akɛ, wɔsɔle wɔhã mɛi ni yɔɔ gbɛhei ni nɔ kwɔlɔ lɛ, bɔ ni afee ni wɔná toiŋjɔlɛ kɛsɔmɔ lɛ. (1 Timoteo 2:1, 2) Kɛ́ aye wɔ sane ni ejaaa lɛ, wɔbaanyɛ wɔkɛya amralofoi lɛ ahiɛ, koni amɛye amɛbua wɔ. Nakai Paulo fee. (Bɔfoi 25:11) Eyɛ mli akɛ Biblia lɛ kɛɔ akɛ adesai anɔyelii fɛɛ yɛ Satan hewalɛ shishi moŋ, shi ŋmalɛ ko bɛ ni tsɔɔ akɛ Satan ji mɔ ni kudɔɔ aŋkroaŋkroi fɛɛ ni yɔɔ hegbɛ loo gbɛhe yɛ je lɛŋ nɔyelii lɛ amli. (Luka 4:5, 6) No hewɔ lɛ, ekaba kɔkɔɔkɔ akɛ wɔbaawie nɔ ko loo wɔfee nɔ ko ni tsɔɔ akɛ Satan ji mɔ ni kudɔɔ maŋ onukpa pɔtɛɛ ko. Biblia lɛ kɛɛ ‘wɔkawie mɔ ko mɔ ko he efɔŋ.’​—Tito 3:1, 2.

7. Mɛni esaaa akɛ wɔfeɔ yɛ wɔtsui mli?

⁷ Wɔboɔ Nyɔŋmɔ toi. No hewɔ lɛ, kɛ́ wɔbaaná nɔ ni maŋkwramɔŋ kuu ko, loo mɔ ko ni kɛ ehe woɔ maŋkwramɔŋ saji amli lɛ wieɔ lɛ he sɛɛ jio, wɔnáŋ he sɛɛ jio lɛ, wɔfiŋ sɛɛ. Jeee be fɛɛ be enɛ feemɔ yɔɔ mlɛo. Akɛ nɔkwɛmɔnɔ lɛ, nɔyelii komɛi hãa etɔɔ maŋbii lɛ, ni amɛgbaa Yehowa Odasefoi hu anaa. Kɛ́ mɛi te shi amɛwo nɔyeli ko ni tamɔ nɛkɛ lɛ, te obaafee onii ohã tɛŋŋ? Eyɛ mli akɛ oyafiŋ shiteekɛwolɔi lɛ asɛɛ kpetekpelee moŋ, shi ani obaafi amɛsɛɛ yɛ otsui mli? (Efesobii 2:2) Kɛ́ wɔsumɔɔɔ ni wɔkɛ wɔhe woɔ maŋkwramɔŋ saji amli lɛ, belɛ esaaa akɛ wɔfiɔ afã ko sɛɛ yɛ wɔtsui mli po.

8. Kɛ́ wɔkɛ shihilɛ ko ni baanyɛ ahã ewa kɛhã wɔ akɛ wɔbaatsi wɔhe kɛje maŋkwramɔŋ saji ahe lɛ kpe lɛ, mɛni wɔbaanyɛ wɔfee kɛtsɔɔ akɛ ‘wɔhiɛ tɛ̃, ni kɛ̃lɛ wɔhe bɛ sane ko’?

⁸ Nɔ kroko ni baaye abua wɔ ni wɔkɛ wɔhe akawo maŋkwramɔŋ saji amli ji, ni ‘wɔhiɛ baatɛ̃ tamɔ onufui,’ ni yɛ nakai beiaŋ nɔŋŋ lɛ, ‘wɔfee mɛi ni he bɛ sane ko tamɔ okpoi.’ (Kanemɔ Mateo 10:16, 17.) Kɛ́ wɔtsɔ hiɛ wɔsusu nibii komɛi ni baanyɛ ahã wɔkɛ wɔhe awo maŋkwramɔŋ saji amli lɛ ahe lɛ, etsɔɔ akɛ ‘wɔhiɛ tɛ̃.’ Ni kɛ́ wɔkwɛ bɔ ni wɔbaatsu nibii nɛɛ ahi nii wɔhã, bɔ ni afee ni wɔnyɛ wɔfee nɔ ni ja lɛ, ‘wɔbaafee mɛi ni he bɛ sane ko.’ Nyɛhãa wɔsusua nibii nɛɛ ekomɛi ahe, ni wɔkwɛ nɔ ni wɔbaanyɛ wɔfee yɛ amɛhe.

9. Kɛ́ wɔkɛ mɛi miigba sane lɛ, mɛni ji nibii komɛi ni esaaa akɛ wɔfeɔ?

⁹ Saji ni wɔkɛ mɛi gbaa. Kɛ́ wɔkɛ mɛi miigba sane ni amɛyawo maŋkwramɔŋ saji anɔ lɛ, esa akɛ wɔkwɛ jogbaŋŋ. Akɛ nɔkwɛmɔnɔ lɛ, kɛ́ wɔkɛ mɛi miigba Nyɔŋmɔ Maŋtsɛyeli lɛ he sane lɛ, esaaa akɛ wɔtswaa maŋkwramɔŋ kuu ko sɛɛ aloo wɔjieɔ eyi. Yɛ nɔ najiaŋ ni wɔbaawie mɔdɛŋ ni adesai miibɔ ni amɛtsu naagbai ni yɔɔ je lɛ mli lɛ ahe nii lɛ, esa akɛ wɔjɛ Biblia lɛ mli wɔtsɔɔ mɛi akɛ, Nyɔŋmɔ Maŋtsɛyeli lɛ baatsu amɛnaagbai lɛ ahe nii shi kome nyɔŋlo. Kɛfata he lɛ, esa akɛ wɔkwɛ jogbaŋŋ yɛ saji tamɔ hii kɛ hii loo yei kɛ yei ni boteɔ gbalashihilɛ mli, hɔkpɔmɔ, kɛ ekrokomɛi ni tamɔ nakai lɛ ahe. Kɛ́ mɔ ko yawo saji nɛɛ eko nɔ lɛ, esa akɛ wɔtsɔɔ lɛ nɔ ni Nyɔŋmɔ Wiemɔ lɛ kɛɔ yɛ he, kɛ bɔ ni wɔmiibɔ mɔdɛŋ ni wɔhi shi yɛ nɔ ni ekɛɔ lɛ naa. Esaaa akɛ wɔwieɔ mlai ni awo yɛ saji nɛɛ ahe lɛ he ekpakpa aloo efɔŋ, ni asaŋ, esaaa akɛ wɔnyɛɔ mɛi anɔ ni amɛkpɛlɛ nɔ ni Biblia lɛ kɛɔ lɛ nɔ.

10. Mɛni esa akɛ wɔfee koni nibii ni wɔnuɔ yɛ redio lɛ kɛ TV lɛ nɔ lɛ akaná wɔjwɛŋmɔ nɔ hewalɛ?

¹⁰ Saji ni awieɔ yɛ redio kɛ TV nɔ. Saji ni awieɔ yɛ adafitswaa woji amli, kɛ agbɛnɛ hu yɛ TV, redio, kɛ Intanɛt lɛ nɔ lɛ ekomɛi yɛ ni awieɔ lɛ bɔ ni baahã mɛi afi afã ko sɛɛ yɛ maŋkwramɔŋ sane ko mli. Enɛ fɔɔ kaa kɛ́ amralofoi lɛ ji mɛi ni kudɔɔ adafitswaa  nitsumɔhei lɛ. Esa akɛ wɔkwɛ jogbaŋŋ koni adafitswaa nitsumɔhei loo mɛi ni tsuɔ nii yɛ jɛmɛ lɛ asusumɔi akaná wɔnɔ hewalɛ. No hewɔ lɛ, bi ohe akɛ, ‘Ani misumɔɔ ni mabo redio loo TV nɔ nifeelɔ ko toi akɛni mikɛ lɛ kpãa gbee yɛ maŋkwramɔŋ saji komɛi ni ewieɔ lɛ amli lɛ hewɔ?’ Kɛ́ wɔsumɔɔɔ ni wɔkɛ wɔhe woɔ maŋkwramɔŋ saji amli lɛ, esa akɛ wɔkwɛ wɔhe nɔ jogbaŋŋ yɛ adafitswaa woji, kɛ TV loo redio nɔ adafitswai ni hãa anáa jwɛŋmɔ lɛ akɛ maŋkwramɔŋ kuu ko hi fe ekroko lɛ ahe. Ebaahi akɛ wɔbaabo saji ni fiii afã ko sɛɛ yɛ maŋkwramɔŋ saji amli lɛ moŋ toi. Ni be fɛɛ be lɛ, esa akɛ wɔkwɛ kɛji sane ni wɔnuɔ lɛ kɛ “wiemɔi ní sɛɛnamɔ yɔɔ he” ni yɔɔ Biblia lɛ mli lɛ kpãa gbee.​—2 Timoteo 1:13, shishigbɛ niŋmaa.

11. Kɛ́ shika kɛ heloonaa nibii ji nibii ni he hiaa wɔ fe fɛɛ yɛ shihilɛ mli lɛ, mɛɛ gbɛ nɔ no baanyɛ aka wɔ ni wɔkɛ wɔhe awo maŋkwramɔŋ saji amli?

¹¹ Shika kɛ heloonaa nibii asɛɛtiumɔ. Kɛ́ shika kɛ heloonaa nibii ni wɔyɔɔ lɛ bafee nibii ni he hiaa wɔ fe fɛɛ yɛ shihilɛ mli lɛ, ebaawa kɛhã wɔ akɛ wɔbaatsi wɔhe kɛje maŋkwramɔŋ saji ahe. Kɛjɛ afi 1970 kɛbaa lɛ, Odasefoi ni yɔɔ Malawi lɛ ateŋ mɛi babaoo anibii fɛɛ je amɛdɛŋ yɛ amɛhe ni amɛkɛwooo maŋkwramɔŋ saji amli lɛ hewɔ. Shi dɔlɛ sane ji akɛ, nyɛmimɛi komɛi kɛ amɛhe yawo maŋkwramɔŋ saji amli, ejaakɛ amɛsumɔɔɔ ni amɛnibii ŋmɛɔ amɛ. Nyɛmi yoo ko ni atsɛɔ lɛ Ruth lɛ wie akɛ: “Amɛteŋ mɛi komɛi kɛ wɔ fɛɛ jo foi kɛshi maŋ lɛ mli. Shi sɛɛ mli lɛ, amɛku amɛsɛɛ ni amɛyafi maŋkwramɔŋ kuu lɛ sɛɛ, ejaakɛ nsara lɛ mli shihilɛ wa, ni amɛyanyɛɛɛ amɛfi shi.” Shi Nyɔŋmɔ webii babaoo bɛ nakai. Amɛyaa nɔ amɛtsiɔ amɛhe kɛjeɔ maŋkwramɔŋ saji ahe, kɛ́ no baabi ni amɛye ohia loo amɛnibii fɛɛ aŋmɛɛ amɛ po.​—Hebribii 10:34.

12, 13. (a) Te Yehowa naa adesai tɛŋŋ? (b) Mɛni baanyɛ aye abua wɔ ni wɔna kɛji wɔnuɔ he akɛ maŋ nɔ ni wɔjɛ lɛ hi fe maji krokomɛi fɛɛ?

¹² Henɔwomɔ. Mɛi komɛi shwãa yɛ amɛhewolonɔ su, weku mli ni amɛjɛ, bɔ ni amɛhiɔ shi amɛhãa, loo maŋ nɔ ni amɛjɛ lɛ he, ejaakɛ amɛsusuɔ akɛ no hi fe ekrokomɛi fɛɛ ni eshwɛ. Shi jeee nakai Yehowa naa sane lɛ. Yɛ ehiɛ lɛ, wɔ fɛɛ lɛ, gbɔmɛi kome ji wɔ. Eyɛ mli akɛ gbɔmɛi amli yɛ srɔto moŋ, shi Yehowa je gbɛ ebɔ lɛ nakai, koni wɔná miishɛɛ yɛ shihilɛ mli. Ekɛko akɛ wɔtsake bɔ ni wɔhiɔ shi wɔhãa lɛ, ni wɔyahi shi tamɔ mɛi krokomɛi. Kɛ̃lɛ, esumɔɔɔ ni wɔnuɔ he akɛ wɔhi fe mɛi krokomɛi.​—Romabii 10:12.

¹³ Kɛ́ wɔnuɔ he akɛ maŋ nɔ ni wɔjɛ lɛ hi fe maji krokomɛi lɛ, ebaawa kɛhã wɔ akɛ wɔkɛ mɛi ni jɛ maji krokomɛi anɔ lɛ baahi shi yɛ toiŋjɔlɛ mli. Nakai eba lɛ yɛ klɛŋklɛŋ afii 100 lɛ mli. Nyɛmimɛi Hebribii lɛ kɛ nyɛmimɛi yei okulafoi ni ji Helabii lɛ yeee jogbaŋŋ. (Bɔfoi 6:1) Mɛni baaye abua wɔ ni wɔna kɛji wɔbuɔ maŋ nɔ ni wɔjɛ lɛ akɛ ehi fe maji krokomɛi? Kɛ́ nyɛmi ko ni jɛ maŋ kroko nɔ lɛ tsɔɔ ejwɛŋmɔ yɛ nɔ ko he lɛ, ani wɔtswaa wɔshɛɔ wɔfɔ̃ɔ amrɔ nɔŋŋ? Ani wɔkɛɔ akɛ, ‘Wɔbiɛ lɛ, jeee nakai wɔfeɔ lɛ’? Esa akɛ wɔhã ŋaawoo ni he hiaa waa nɛɛ ahi wɔjwɛŋmɔ mli, akɛ: “Nyɛkɛ heshibaa abua mɛi krokomɛi akɛ amɛnɔ kwɔlɔ fe nyɛ.”​—Filipibii 2:3.

14. Mɛɛ gbɛ nɔ sɔlemɔ baanyɛ aye abua wɔ? Ni mɛɛ Biblia mli nɔkwɛmɔnɔ tsɔɔ nakai?

¹⁴ Nɔ ni ji etɛ ni wɔbaanyɛ wɔfee koni wɔkɛ wɔhe akayawo maŋkwramɔŋ saji amli ji, ni wɔkɛ wɔhiɛ baafɔ̃ Yehowa nɔ. Bi Yehowa ni ehã bo mumɔ krɔŋkrɔŋ lɛ, koni onyɛ oto otsui shi ni oye ohe nɔ. Sui nɛɛ baawa bo kɛ́ amralofoi lɛ fee nɔ ko ni ejaaa, loo amɛye bo sane fɔŋ ko. Bi Yehowa ni eduro bo hiɛshikamɔ, bɔ ni afee ni onyɛ oyɔse shihilɛi ni baanyɛ ahã ewa kɛhã bo akɛ obaatsi ohe kɛje maŋkwramɔŋ saji ahe. Kpa lɛ fai ni eye ebua bo ni onyɛ ofee nɔ ja kɛ́ okɛ shihilɛ ko ni tamɔ nakai kpe. (Yakobo 1:5) Onɔkwayeli lɛ hewɔ lɛ, ekolɛ abaawo bo tsuŋ, loo abaagbala otoi yɛ gbɛ kroko nɔ. Kɛ́ eba lɛ nakai lɛ, kpa Yehowa fai ni ehã oná ekãa, koni onyɛ ogbala nɔ hewɔ ni okɛ ohe wooo maŋkwramɔŋ saji amli lɛ mli jogbaŋŋ, kɛ́ abi bo he sane. Ná nɔmimaa akɛ, Yehowa baaye abua bo ni onyɛ ofi shi.​—Kanemɔ Bɔfoi 4:27-31.

15. Mɛɛ gbɛ nɔ Biblia lɛ baanyɛ aye abua wɔ ni wɔya nɔ wɔye Yehowa anɔkwa? (Kwɛmɔ akrabatsa ni yitso ji “ Biblia lɛ Ye Ebua Amɛ ni Amɛkɛ Amɛhe Wooo Tawuu Mli” lɛ hu.)

¹⁵ Yehowa ehã wɔ Biblia lɛ koni no awaje wɔ. Hemɔ be ni osusu ŋmalɛi ni baanyɛ aye abua bo ni otsi ohe kɛje maŋkwramɔŋ saji ahe lɛ ahe jogbaŋŋ. Kasemɔ ŋmalɛi nɛɛ owo oyitsoŋ, koni wɔsɛɛ ko kɛ́ obɛ Biblia lɛ, amɛnyɛ amɛye amɛbua bo. Hiɛnɔkamɔ ni wɔyɔɔ ni awie he yɛ Biblia lɛ mli lɛ hu baanyɛ awaje wɔ. Ebaanyɛ eye ebua wɔ ni wɔnyɛ wɔfi shi kɛ́ aawa wɔ yi. (Romabii 8:25) Ekã shi faŋŋ akɛ, nibii komɛi yɛ ni ekã otsui nɔ waa akɛ kɛ́ oshɛ jeŋ hee lɛ mli lɛ obaafee. Taomɔ ŋmalɛi ni wieɔ nibii nɛɛ ahe ni okane, ni ofee ohe mfoniri akɛ oyɛ Paradeiso lɛ mli.

16, 17. Mɛni wɔbaanyɛ wɔkase kɛjɛ Nyɔŋmɔ tsuji anɔkwafoi ni kɛ́ amɛhe wooo maŋkwramɔŋ saji kɛ tawuu mli lɛ adɛŋ? (Kwɛmɔ mfoniri ni yɔɔ nikasemɔ lɛ shishijee lɛ.)

¹⁶ Nɔ ni ji ejwɛ ni baaye abua wɔ ni wɔya nɔ wɔtsi wɔhe kɛje maŋkwramɔŋ saji ahe ji, ni wɔbaasusu Yehowa tsuji anɔkwafoi ni hi shi yɛ blema lɛ ahe. Anɔkwafoi nɛɛ fee ekãa, ni amɛkpɛ yiŋ ni ja yɛ saji ahe. Enɛ ye ebua amɛ ni amɛtee nɔ amɛye Yehowa anɔkwa. Akɛ nɔkwɛmɔnɔ lɛ, Shadrak, Meshak, kɛ Abednego kotooo amaga ni Babilon maŋtsɛ  lɛ fee lɛ. Nakai amaga lɛ damɔ shi kɛhã Babilon nɔyeli lɛ. (Kanemɔ Daniel 3:16-18.) Biblia mli sane nɛɛ yeɔ ebuaa Odasefoi babaoo koni amɛfee ekãa ni amɛkaŋa amɛmaŋ lɛ aflaŋaa lɛ. Yesu kɛ ehe wooo maŋkwramɔŋ saji kɛ naataamɔi amli, ni ele akɛ, enɔkwɛmɔnɔ kpakpa lɛ baaye abua ekaselɔi lɛ. Ekɛɛ amɛ akɛ: “Nyɛnáa ekãa! Miye je lɛ nɔ kunim.”​—Yohane 16:33.

¹⁷ Yɛ wɔbei nɛɛ amli hu lɛ, Odasefoi babaoo etee nɔ amɛye Yehowa anɔkwa. Awa amɛteŋ mɛi komɛi ayi, awo mɛi komɛi tsuŋ, ni agbe mɛi komɛi po, yɛ amɛhe ni amɛkɛwooo maŋkwramɔŋ saji loo tawuu mli lɛ hewɔ. Amɛnɔkwɛmɔnɔ lɛ baanyɛ aye abua wɔ ni wɔ hu wɔfee ekãa. Nyɛmi nuu ko ni jɛ Turkey lɛ wie akɛ: “Be ni agbe Nyɛminuu Franz Reiter yɛ fatamɔ ni eyafataaa Hitler asraafoi lɛ ahe lɛ hewɔ lɛ, no mli lɛ, edako. Wolo ni eŋma emami gbi gbɛkɛ ni abaagbe lɛ lɛ, tsɔɔ akɛ ehemɔkɛyeli mli wa ni ekɛ ehiɛ fɔ̃ Yehowa nɔ. Mikpɛ miyiŋ akɛ, kɛ́ mikɛ kaa ko ni tamɔ enɔ lɛ kpe lɛ, makase lɛ.” ^[2]​—Kwɛmɔ shishigbɛ niŋmaa ni yɔɔ sane lɛ naagbee lɛ.

18, 19. (a) Mɛɛ gbɛ nɔ osafo lɛ mli bii lɛ baanyɛ aye abua bo? (b) Mɛni otswa ofai shi akɛ obaafee?

¹⁸ Nyɛmimɛi ni yɔɔ osafo lɛ mli lɛ baanyɛ aye abua bo ni okɛ ohe akawo maŋkwramɔŋ saji kɛ tawuu mli. Kɛ́ okɛ shihilɛ ko ni wa miikpe lɛ, hã asafoŋ onukpai lɛ ale. Amɛbaajɛ Biblia lɛ mli amɛwo bo ŋaa. Kɛfata he lɛ, kɛ́ ohã nyɛmimɛi ni yɔɔ osafo lɛ mli lɛ le shihilɛ ni okɛkpeɔ lɛ, amɛ hu amɛbaawo bo hewalɛ. Kɛɛmɔ amɛ akɛ amɛkai bo yɛ sɔlemɔ mli. Ni bo hu okai ni osɔle ohã amɛ ni owo amɛ hewalɛ. (Mateo 7:12) Kɛ́ otee jw.org lɛ nɔ fã ni yitso ji, “Jehovah’s Witnesses Imprisoned for Their Faith​—By Location” lɛ, obaana nyɛmimɛi pii ni awo amɛ tsuŋ lɛ agbɛ́i yɛ jɛmɛ. Eyɛ NEWSROOM > LEGAL DEVELOPMENTS. Halamɔ nyɛmimɛi nɛɛ ateŋ mɛi komɛi, ni otsĩ amɛgbɛ́i tã yɛ osɔlemɔi amli. Kpa Yehowa fai ni eye ebua amɛ ni amɛfee ekãa ni amɛya nɔ amɛye lɛ anɔkwa.​—Efesobii 6:19, 20.

¹⁹ Naagbee lɛ miibɛŋkɛ, ni wɔle akɛ nɔyelii srɔtoi lɛ baaya nɔ anyɛ wɔnɔ waa fe bɔ ni amɛfeɔ bianɛ lɛ po, ni wɔkɛ wɔhe awo maŋkwramɔŋ saji kɛ tawuu mli. No hewɔ lɛ, amrɔ nɛɛ ji be ni esa akɛ wɔsaa wɔhe wɔto, koni wɔnyɛ wɔhi shi akɛ mɛi ni fiii afã ko sɛɛ yɛ jeŋ ni ekomefeemɔ bɛ mli nɛɛ mli!