Yɛ wolo ni bɔfo Paulo ŋma eyahã Kristofoi ni yɔɔ Tesalonika lɛ mli lɛ, ewie akɛ: “Kɛ́ mɔ ko booo wɔwiemɔ ni yɔɔ wolo nɛɛ mli lɛ toi lɛ, nyɛyaa nɔ nyɛkadia mɔ nɛɛ.” (2 Tes. 3:14) Be ko ni eho lɛ, wɔwie akɛ, akɛ gbɛtsɔɔmɔ nɛɛ hã asafoŋ onukpai lɛ. Kɛ́ asafoŋ onukpai lɛ na akɛ nyɛmi ko ehiii shi yɛ Biblia mli shishitoo mlai anaa, ni amɛwo lɛ ŋaa yɛ he shii abɔ shi etsakeee lɛ, asafoŋ onukpai lɛ hãa wiemɔ ko kɛbɔɔ asafoŋbii lɛ kɔkɔ. No sɛɛ lɛ, asafoŋbii lɛ kɛ mɔ ni akadi lɛ lɛ efeee nɔ ko, ja ekolɛ amɛkɛ lɛ nyiɛ shiɛmɔ nɔ loo atee asafoŋ kpee.

Shi ehe miihia ni wɔtsake susumɔ nɛɛ. Bianɛ lɛ, wɔbana akɛ aŋkroaŋkroi ni yɔɔ asafo lɛ mli lɛ ni baadamɔ nibii pɔtɛi komɛi anɔ amɛkpɛ amɛyiŋ kɛ́ amɛbaakadi mɔ ko loo amɛkadiŋ lɛ. No hewɔ lɛ, ehe ehiaaa ni asafoŋ onukpai lɛ hãa wiemɔ kɛbɔɔ asafoŋbii lɛ kɔkɔ. Mɛni hewɔ wɔfee tsakemɔ nɛɛ? Nyɛhãa wɔkwɛa nɔ ni no mli lɛ Paulo wieɔ he dani ewo ŋaa nɛɛ.

Paulo yɔse akɛ, mɛi komɛi ni yɔɔ Tesalonika asafo lɛ mli lɛ “enyiɛɛɛ yɛ gbɛjianɔtoo naa.” Amɛbooo ŋaa ni ejɛ Biblia lɛ mli ewo amɛ lɛ toi. Be ko be ni eyasara amɛ lɛ, efã amɛ akɛ: “Kɛ́ mɔ ko sumɔɔɔ akɛ etsuɔ nii lɛ, ekaye nii hu.” Shi amɛteŋ mɛi komɛi kpoo akɛ amɛbaatsu nii kɛkwɛ amɛhe, tsɛbelɛ amɛbaanyɛ amɛtsu nii. Agbɛnɛ hu, amɛteŋ mɛi komɛi kɛ amɛhe woɔ saji ni kɔɔɔ amɛhe eko lɛ amli. Te esa akɛ Kristofoi kɛ mɛi ni tamɔ nɛkɛ lɛ aye ahã tɛŋŋ?—2 Tes. 3:​6, 10-12.

Paulo kɛɛ: “Nyɛyaa nɔ nyɛkadia mɔ nɛɛ.” Greek wiemɔ ni akɛtsu nii lɛ tsɔɔ akɛ, esa akɛ akwɛ he nɔ jogbaŋŋ yɛ mɔ nɛɛ he. Paulo kɛ asafo muu lɛ fɛɛ ni wieɔ lɛ, jeee asafoŋ onukpai lɛ pɛ. (2 Tes. 1:1; 3:6) No hewɔ lɛ, kɛ́ nyɛmi ko na akɛ nyɛmi ko kɛ ŋaawoo ni jɛ Biblia lɛ mli lɛ tsuuu nii lɛ, lɛ ebaakpɛ eyiŋ akɛ ekɛ mɔ ni enyiɛɛɛ yɛ gbɛjianɔtoo naa nɛɛ ‘baakpa bɔɔ.’

Ani enɛ tsɔɔ akɛ akɛ mɔ lɛ baaye oookɛɛ ajie lɛ kɛje asafo lɛ mli? Dabi, ejaakɛ Paulo wie kɛfata he akɛ: “Nyɛyaa nɔ nyɛwiea nyɛtsɔa lɛ akɛ nyɛmi.” No hewɔ lɛ, nyɛmimɛi lɛ baaya nɔ amɛkɛ mɔ ni akadi lɛ lɛ ashãra yɛ Kristofoi akpeei ashishi ni amɛkɛ lɛ baafee ekome kɛtsu shiɛmɔ nitsumɔ lɛ. Shi kɛ́ amɛmiito hiɛtserɛjiemɔ loo henaabuamɔ ko he gbɛjianɔ lɛ, amɛkɛ lɛ fataŋ he, ni kɛ́ lɛ hu eto eko he gbɛjianɔ lɛ, amɛbaanyɛ amɛkpɛ amɛyiŋ akɛ amɛyaŋ. Mɛni hewɔ? Paulo kɛɛ “koni ehiɛ agbo.” Kɛ́ nyɛmimɛi lɛ tse amɛhe kɛje mɔ ni enyiɛɛɛ yɛ gbɛjianɔtoo naa lɛ he lɛ, ekolɛ no baahã ehiɛ agbo yɛ gbɛ fɔŋ ni ekɔ lɛ hewɔ ni etsake egbɛi.—2 Tes. 3:​14, 15.

Te Kristofonyo ko baafee tɛŋŋ ena kɛji esa akɛ ekadi mɔ ko? Klɛŋklɛŋ lɛ, ebaanyɛ ebi ehe akɛ, ani abaanyɛ awie akɛ jeŋba ni mɔ lɛ hiɛ lɛ hewɔ lɛ, lɛɛlɛŋ enyiɛɛɛ yɛ gbɛjianɔtoo naa tamɔ bɔ ni bɔfo Paulo wie lɛ? Kɛ́ mɔ ko fee nɔ ko ni wɔhenilee eŋmɛɛɛ wɔgbɛ ni wɔfee shi eteee shi ewooo mlai loo shishitoo mlai ni yɔɔ Biblia lɛ mli lɛ, wɔnyɛŋ wɔwie akɛ enyiɛɛɛ yɛ gbɛjianɔtoo naa. Nakai nɔŋŋ kɛ́ mɔ ko fee nɔ ko loo ewie nɔ ko ni dɔ wɔ lɛ, wɔnyɛŋ wɔdamɔ no nɔ wɔwie akɛ enyiɛɛɛ yɛ gbɛjianɔtoo naa. Be ni Paulo wie akɛ mɛi komɛi enyiɛɛɛ yɛ gbɛjianɔtoo naa lɛ, no mli lɛ, mɛi ni yɔɔ ejwɛŋmɔ mli ji, mɛi ni miifee nibii ni teɔ shi ewoɔ Yehowa mlai kɛ eshishitoo mlai ni awo amɛ ŋaa yɛ he, shi loloolo lɛ, amɛmiifee lɛ.

Ŋmɛnɛ lɛ, kɛ́ wɔyɔse akɛ wɔnyɛmi Kristofonyo ko booo ŋaawoi kpakpai ni ajɛɔ Nyɔŋmɔ Wiemɔ lɛ mli awoɔ wɔ lɛ toi lɛ, a wɔbaanyɛ wɔkpɛ wɔyiŋ akɛ, kɛ́ wɔmiito henaabuamɔ loo hiɛtserɛjiemɔ ko he gbɛjianɔ lɛ, wɔkɛ lɛ fataŋ he, ni kɛ́ lɛ hu eto eko he gbɛjianɔ lɛ, wɔyaŋ. Akɛni enɛ ji yiŋ ni wɔ diɛŋtsɛ wɔkpɛ hewɔ lɛ, ŋwanejee ko bɛ he akɛ, wɔkɛ mɔ ko egbaŋ he sane, ja ekolɛ wɔwekumɛi ni wɔkɛyɔɔ shĩa kome mli lɛ pɛ. Agbɛnɛ hu, wɔbaaya nɔ wɔkɛ mɔ lɛ abɔ yɛ Kristofoi akpeei ashishi ni wɔkɛ lɛ baafee ekome kɛya shiɛmɔ. Kɛ́ mɔ lɛ tsake egbɛi lɛ, wɔkɛ lɛ baabɔi bɔɔ ekoŋŋ yɛ nɔ fɛɛ nɔ mli, tamɔ bɔ ni wɔkɛ lɛ feɔ be ko ni eho lɛ.