Yesaia 30:1-33
30 “Kpoo hã bii* toigbolɔi lɛ,”+ Yehowa kɛɛ,“Mɛi ni tsuɔ yiŋtoi ni jeee minɔ lɛ ahe nii,+Mɛi ni feɔ kpaŋmɔ,* shi jeee yɛ mimumɔ lɛ naa,Koni amɛkɛ esha afata esha he lɛ.
2 Amɛkpelekeɔ shi kɛyaa Ejipt+ ni amɛbiii mi nii,*+Koni amɛyatao hebuu yɛ Farao shishi*Koni amɛyaba abo yɛ Ejipt hɔɔŋ lɛ mli!
3 Shi Farao hebuu lɛ baahã nyɛhiɛ agboi,Ni abo ni nyɛbaayaba yɛ Ejipt hɔɔŋ lɛ mli lɛ baahã nyɛhiɛ ashwie shi.+
4 Ejaakɛ elumɛi lɛ yɛ Zoan,+Ni etsuji lɛ eshɛ Hanes.
5 Maŋ ni he bɛ sɛɛnamɔ ko kwraa kɛhã amɛ,Ni nyɛŋ aye abua amɛ, ni amɛnáŋ amɛhe sɛɛ koShi moŋ, hiɛgbele kɛ hiɛshishwiemɔ ji nɔ ni amɛbaanyɛ amɛkɛhã lɛBaahã amɛ fɛɛ amɛhiɛ agboi.”+
6 Sane ni awie ashi wuoyigbɛ kooloi lɛ nɛ:
Amɛkɛ amɛjwetrii lɛ shwieɔ tejii anɔNi amɛkɛ amɛnibii lɛ shwieɔ afukpɔŋɔi asɛɛ afui lɛ anɔKɛtsɔɔ shikpɔŋ ni haomɔ kɛ jaramɔ shihilɛ yɔɔ nɔ lɛ nɔShikpɔŋ ni jata, jata ni hũɔ yɔɔ nɔ lɛ nɔShikpɔŋ ni onufu kɛ onufu ni filikiɔ kɛ enaa la* yɔɔ nɔ lɛ nɔ kɛhoɔ.
Shi nibii nɛɛ ahe baŋ sɛɛnamɔ kɛhãŋ maŋ lɛ.
7 Ejaakɛ sɛɛnamɔ ko kwraa baŋ Ejipt yelikɛbuamɔ lɛ he.+
No hewɔ ni mitsɛɔ lɛ akɛ: “Rahab+ ni ta shi ni enyɛɛɛ efee nɔ ko” lɛ.
8 “Agbɛnɛ, yaa ni oyaŋma yɛ tao nɔ yɛ amɛhiɛ,Ni oŋma owo wolo mli,+Koni ekã shi kɛhã wɔsɛɛ gbi koAkɛ odase ni yɔɔ daa.+
9 Ejaakɛ amɛji maŋ ni tseɔ atua,+ bii* ni maleɔ,+Bii* ni sumɔɔɔ ni amɛboɔ Yehowa mla* lɛ toi.+
10 Amɛkɛɔ ninalɔi lɛ akɛ, ‘Nyɛkanaa nii,’
Ni amɛkɛɔ gbalɔi lɛ akɛ, ‘Nyɛkagbaa wɔ anɔkwale ninai.+
Nyɛwoa wɔyiteŋ mulu;* nyɛnaa amale ninai.+
11 Nyɛjea gbɛ lɛ nɔ; nyɛgbaa kɛjea nanegbɛ lɛ nɔ.
Nyɛkɛ Israel Mɔ Krɔŋkrɔŋ lɛ akabaa wɔhiɛ dɔŋŋ.’”+
12 No hewɔ lɛ, nɔ ni Israel Mɔ Krɔŋkrɔŋ lɛ kɛɛ nɛ:
“Akɛni nyɛbooo wiemɔ nɛɛ toi+Ni nyɛkɛ nyɛhiɛ efɔ̃ shishiumɔ kɛ lakamɔ nɔNi nyɛkpasa nibii nɛɛ hewɔ lɛ,+
13 Nyɛtɔmɔ nɛɛ baatsɔ tamɔ gbogbo ni ekumɔ ehã nyɛ,Tamɔ gbogbo ni kwɔ ni ekpa ni miihe agbee shi.
Ebaakumɔ eshwie shi trukaa ni akpaaa gbɛ.
14 Ebaakumɔ tamɔ bɔ ni sũ* kɔɔpoo agbo jwaraa lɛ,Ejwaraa dukuduku aahu akɛ ekukuji lɛ eko eshwɛɛɛ ni abaanyɛ akɔNi akɛje la yɛ latɛ mliLoo akɛloo nu ni ta he ko.”*
15 Ejaakɛ nɔ ni Nuŋtsɔ Ofe Yehowa, Israel Mɔ Krɔŋkrɔŋ lɛ kɛɛ nɛ:
“Kɛji nyɛku nyɛsɛɛ kɛba miŋɔɔ ni nyɛbajɔɔ nyɛhe lɛ, abaahere nyɛyiwala;Kɛji nyɛhi shi kpoo ni nyɛkɛ nyɛhiɛ fɔ̃ minɔ lɛ, nyɛbaaná hewalɛ.”+
Shi nyɛkpɛlɛɛɛ.+
16 Moŋ lɛ, nyɛkɛɛ akɛ: “Dabi, wɔbaatara okpɔŋɔi anɔ kɛjo foi!”
No hewɔ lɛ, nyɛbaajo foi kɛ̃.
Nyɛkɛɛ hu akɛ: “Wɔbaatara okpɔŋɔi ni he yɔɔ oya anɔ!”+
No hewɔ lɛ, mɛi ni tiuɔ nyɛ lɛ hu ahe baafee oya.+
17 Kɛ́ mɔ kome bo ewo mɛi akpe yi lɛ, amɛhe baakpokpo;+Kɛ́ mɛi enumɔ bo amɛwo nyɛyi lɛ, nyɛbaajo foiKɛyashi nyɛteŋ mɛi ni baashwɛ lɛ baafee tamɔ aflaŋaa tso* ni ma gɔŋ ko nɔ,Tamɔ tso jaŋŋ ni ma gɔŋkpɔ ko nɔ.+
18 Shi Yehowa eto etsui shi eemɛ* koni edro nyɛ,+Ni ebaate shi ni ena nyɛ mɔbɔ.+
Ejaakɛ Yehowa lɛ, Nyɔŋmɔ ni yeɔ jalɛ sane ji lɛ.+
Mɛi fɛɛ ni mɛɔ lɛ waa lɛ* yɛ miishɛɛ.+
19 Kɛ́ maŋ lɛ bahi Zion yɛ Yerusalem+ lɛ, ofóŋ dɔŋŋ.+ Kɛ́ enu obolɔmɔ kɛhã yelikɛbuamɔ nɔŋŋ lɛ, bɔ fɛɛ bɔ ni fee lɛ, ebaana bo mɔbɔ; kɛ́ enu ohe nɔŋŋ lɛ, ebaahere bo nɔ.+
20 Eyɛ mli akɛ Yehowa baahã nyɛ haomɔ blodo kɛ yiwaa nu moŋ,+ shi nyɛ-Tsɔɔlɔ Kpele lɛ kɛ ehe eteŋ dɔŋŋ, ni nyɛteŋ mɔ fɛɛ mɔ kɛ lɛ diɛŋtsɛ ehiŋmɛii baana nyɛ-Tsɔɔlɔ Kpele lɛ.+
21 Ni kɛ́ nyɛdu gbɛ kɛtsɔ ninejurɔgbɛ jio, nyɛdu gbɛ kɛtsɔ abɛkugbɛ jio lɛ,+ nyɛteŋ mɔ fɛɛ mɔ kɛ lɛ diɛŋtsɛ etoii baanu wiemɔ ko yɛ esɛɛ akɛ, “Gbɛ lɛ nɛ.+ Nyɛnyiɛa nɔ.”
22 Ni nyɛbaabule jwiɛtɛi ni akɛha nyɛmagai lɛ ahe lɛ, kɛ shika tsuru ni akɛha nyɛdade amagai lɛ ahe lɛ.+ Nyɛbaashɛrɛ amɛ nyɛshwie tamɔ mama ni yoo kɛwoɔ eshishi kɛ́ eefee yei anii lɛ, ni nyɛbaakɛɛ amɛ akɛ, “Nyɛjea biɛ kɛyaa!”*+
23 Ni ebaahã nugbɔ anɛ ashwie odumɔwui ni odu yɛ shikpɔŋ lɛ nɔ lɛ anɔ,+ ni shikpɔŋ lɛ baaba niyenii* kpakpai babaoo.*+ Nakai gbi lɛ nɔ lɛ, kooloi ni nyɛlɛɔ lɛ baaye nii yɛ lɛɛhei ni dara.+
24 Ni tsinai lɛ kɛ tejii lɛ ni tsuɔ nii yɛ shikpɔŋ lɛ nɔ lɛ baaye niyenii kpakpa ni afutu ni akɛ sofi kɛ ŋmɔshi faka esha mli.
25 Ni yɛ gbi ni mɔji lɛ baagbee shi, ni abaagbe mɛi babaoo lɛ nɔ lɛ, fai kɛ nui baaho yɛ gɔji ni kwɔlɔ lɛ fɛɛ anɔ,+ kɛ gɔŋkpɔi ni kwɔlɔ lɛ fɛɛ anɔ.
26 Ni yɛ gbi nɔ ni Yehowa baafi emaŋ ni ekumɔ lɛ,+ ni ebaatsa faji ni amɛná yɛ yi ni eyi amɛ lɛ hewɔ lɛ,+ nyɔɔŋtsere ni eye emuu lɛ baakpɛ tamɔ hulu; ni hulu lɛ hu baakpɛ fe bɔ ni ekpɛɔ bianɛ lɛ toi kpawo,+ tamɔ gbii kpawo hulu kpɛmɔ.
27 Naa! Yehowa gbɛ́i lɛ miiba kɛmiijɛ shɔŋŋ,Kɛ mlifu ni naa wa kɛ atatu kpii.
Enaabu eyi obɔ kɛ mlifu,Ni elilɛi tamɔ la ni kpãtãa nii ahiɛ.+
28 Emumɔ lɛ* tamɔ faa ni eyi aahu kɛbata kuɛ he,Koni ekɛsha jeŋmaji lɛ amli yɛ hiɛkpatamɔ shaanii mli;Ni manyoflɛ ni baahã majimaji lɛ adu gbɛ baahi amɛdaaŋ.+
29 Shi nyɛbaalá lala tamɔ lala ni nyɛláa gbɛkɛKɛ́ nyɛmiisaa nyɛhe kɛmiihã* gbi jurɔ lɛ,+Ni nyɛtsui baanya tamɔ mɔ koNi miikpã obɛnta kɛmiinyiɛ gbɛ*Kɛmiiya Yehowa gɔŋ lɛ nɔ, kɛmiiya Israel Tɛsaa lɛ he.+
30 Yehowa baahã anu enunyam gbee+ lɛNi ebaahã ana enine+ be ni enine baa shi yɛ emlifu ni naa wa+ lɛ mli,Kɛ la ni kpãtãa nii ahiɛ ni miitso grigri lɛ,+Kɛ nugbɔnɛmɔ,+ kɛ kɔɔyɔɔ ni naa wa, kɛ nyɔŋmɔŋtɛi.+
31 Ejaakɛ Yehowa gbee lɛ hewɔ lɛ, Asiria baashe gbeyei;+Ekɛ tso baayi lɛ.+
32 Ni toigbalamɔ tso lɛ eko fɛɛ ekoNi Yehowa baatswa AsiriaBe ni ewóɔ enine nɔ eshiɔ amɛ yɛ ta mli lɛ,+Akashaa kɛ saŋku gbɛɛmɔ baafata he.+
33 Ejaakɛ asaa e-Tofet*+ lɛ ato momo;Asaa ato maŋtsɛ lɛ hu momo.+
Laiku lɛ mli kwɔ ni elɛɛNi la kɛ lai babaoo yɛ mli.
Yehowa mumɔ ni emuɔ ni tamɔ sɔlfa faa lɛBaawo mli la.
Shishigbɛ Niŋmaa
^ Hebri sht. ŋm., “Mɛi ni kɛ dãa shwieɔ shi,” eeenyɛ efee akɛ, aawie kpaŋmɔ ni akpaŋɔ lɛ he.
^ Hebri sht. ŋm., “bihii.”
^ Loo “ni amɛbiii midaaŋ gbee.”
^ Hebri sht. ŋm., “Koni amɛyabote Farao teemɔhe.”
^ Loo “onufu ni pɔizin yɔɔ emli ni tsɛ̃ɔ kɛbaa mɔ nɔ.”
^ Loo “gbɛtsɔɔmɔ.”
^ Hebri sht. ŋm., “Bihii.”
^ Hebri sht. ŋm., “bihii.”
^ Hebri sht. ŋm., “Nyɛkɛa wɔ nibii ni yɔɔ trotro.”
^ Shishitsɔɔmɔi komɛi kɛɔ akɛ, “akɛloo nu yɛ bu ni akɛtoɔ nu mli.”
^ Loo “gbɛshɔ̃lɔ.”
^ Loo “lɛlɛ mli shimaatso.”
^ Loo “Mɛi fɛɛ ni yaa nɔ amɛkwɛɔ lɛ gbɛ lɛ.”
^ Loo “Yehowa miiya nɔ eekwɛ gbɛ.”
^ Shishitsɔɔmɔi komɛi kɛɔ akɛ, “ni nyɛbaatsɛ amɛ muji nii.”
^ Hebri sht. ŋm., “blodo.” Kwɛmɔ Wiemɔi Titrii Amligbalamɔ lɛ.
^ Hebri sht. ŋm., “ni eshwi ni ewo fɔ.”
^ Loo “Emumɔ ni emuɔ lɛ.”
^ Loo “Kɛ́ nyɛmiifee nyɛhe krɔŋkrɔŋ kɛmiihã.”
^ Loo “Ni kɛ obɛnta gbɛɛmɔ nyiɛɔ be ni enyiɛ gbɛ.”
^ Akɛ “Tofet” tsu nii yɛ biɛ akɛ okadifeemɔŋ he ko ni ashãa nii yɛ, ni edamɔ shi kɛhã hiɛkpatamɔ.
