Yeremia 9:1-26
9 Ao, miná ni miyitso lɛ nui ni,Ni mihiŋmɛii hu lɛ yaafonui nuhiŋmɛi ni!+
Kulɛ mafó jetsɛremɔ kɛ jenamɔYɛ mimaŋbii lɛ ateŋ mɛi ni agbe lɛ ahewɔ.
2 Ao, miná ni miyɛ gbɛfalɔi ashitoohe ko yɛ ŋa lɛ nɔ!
Kulɛ mashi mimaŋbii lɛ ni maje amɛteŋ maya,Ejaakɛ amɛ fɛɛ lɛ, gbalafitelɔi ji amɛ,+Maŋ ni atuatselɔi eyi mli obɔ.
3 Amɛdɔ amɛlilɛi mli tamɔ gãi;Amale eyi shikpɔŋ lɛ nɔ obɔ, shi jeee anɔkwayeli.+
“Amɛjɛɔ efɔŋ mli kɛyaa efɔŋ mli,Ni amɛkɛ amɛjwɛŋmɔ baaa minɔ,”+ Yehowa kɛɛ.
4 “Nyɛteŋ mɔ fɛɛ mɔ akwɛ jogbaŋŋ yɛ ehe gbɔmɔ he,Ni nyɛteŋ mɔ ko mɔ ko akahe enyɛmi po eye.
Ejaakɛ nyɛmi fɛɛ nyɛmi nyiɛɔ mɔ shishi,+Ni mɔ he gbɔmɔ fɛɛ mɔ he gbɔmɔ wieɔ mɔ he efɔŋ.+
5 Amɛteŋ mɔ fɛɛ mɔ tswaa ehe gbɔmɔ ojo,Ni mɔ ko mɔ ko ewieee anɔkwale.
Amɛtsɔse amɛlilɛi koni emale.+
Amɛfeɔ efɔŋ, ni amɛleee kpa.
6 Oyɛ amalelɔi ateŋ.
Amɛmalemɔ lɛ hewɔ lɛ, amɛsumɔɔɔ ni amɛleɔ mi,” Yehowa kɛɛ.
7 No hewɔ lɛ, nɔ ni Yehowa, taiatsɛ lɛ kɛɛ nɛ:
“Masere amɛ ni maka amɛ makwɛ,+Ejaakɛ mɛni ekoŋŋ manyɛ mafee mimaŋ lɛ biyoo lɛ fe enɛ?
8 Amɛlilɛi lɛ, gãimlibi ni gbeɔ mɔ, ni maleɔ ni.
Mɔ kɛ enaabu wieɔ toiŋjɔlɛ he etsɔɔ ehe gbɔmɔ,Shi ewoɔ lɛ ka yɛ etsui mli.”
9 “Ani esaaa akɛ mihãa amɛbuɔ nibii nɛɛ ahe akɔntaa?” Yehowa kɛɛ.
“Ani esaaa akɛ mitɔɔ mihe* owele yɛ jeŋmaŋ ni tamɔ nɛkɛ lɛ nɔ?”+
10 Mawo yara ni mafó yɛ gɔji lɛ ahewɔ
Ni mawo yaafo lala* yɛ kooloi alɛɛhei ni yɔɔ ŋa lɛ nɔ lɛ ahewɔ,Ejaakɛ ashã jɛmɛ bɔ ni mɔ ko mɔ ko tsɔɔɔ jɛmɛ dɔŋŋ,Ni anuuu kooloi akuu ko he dɔŋŋ.Ŋwɛi loofɔji lɛ kɛ kooloi lɛ fɛɛ ejo foi; amɛ fɛɛ amɛtee.+
11 Mahã Yerusalem atsɔ maŋ koikoi,+ ŋa mli gbei ashihilɛhe,+Ni mahã Yuda maji lɛ atsɔ amaŋfɔ, mɔ ko mɔ ko ehiŋ amɛmli.+
12 Namɔ le nii* bɔ ni ebaanu enɛ shishi?
Namɔ Yehowa naabu kɛ lɛ ewie koni ejaje enɛ?
Mɛni hewɔ shikpɔŋ lɛ hiɛ ekpãtã?
Mɛni hewɔ enɔ egbi tamɔ ŋa nɔ,Ni no hewɔ lɛ, mɔ ko mɔ ko tsɔɔɔ nɔ lɛ?”
13 Yehowa here nɔ akɛ: “Ejaakɛ amɛkpoo mimla* ni mikɛma amɛhiɛ lɛ, ni amɛkɛtsuuu nii, ni amɛbooo migbee toi.
14 Shi moŋ, amɛkɛ kuɛŋtimɔ fee nɔ ni amɛ diɛŋtsɛ amɛtsuii sumɔɔ,+ ni amɛyanyiɛ Baal amagai lɛ asɛɛ tamɔ bɔ ni amɛtsɛmɛi lɛ tsɔɔ amɛ akɛ amɛfee lɛ.+
15 No hewɔ lɛ, nɔ ni Yehowa, taiatsɛ lɛ, Israel Nyɔŋmɔ lɛ kɛɛ nɛ, ‘Naa, mahã maŋ nɛɛ aye joomɔtso, ni mahã amɛnu nu ni pɔizin yɔɔ mli.+
16 Magbɛ amɛ mashwã jeŋmaji ni amɛ kɛ amɛtsɛmɛi lɛ leee lɛ anɔ,+ ni matsu klante kɛnyiɛ amɛsɛɛ kɛyashi makpãtã amɛhiɛ kwraa.’+
17 Nɔ ni Yehowa, taiatsɛ lɛ kɛɛ nɛ,‘Nyɛjwɛŋa sane nɛɛ nɔ.
Nyɛbuaa yei ni láa yaafo lalai* lɛ anaa,+Ni nyɛtsua ni ayatsɛa yei ni he esa lɛ kɛba,
18 Koni amɛhe afee oya ni amɛwo yara yɛ wɔhewɔ,Koni wɔhiŋmɛii afɔse yaafonui ashwie shiNi wɔhiŋmɛii asɛɛ atsere nu.+
19 Ejaakɛ anu akɛ awo yara kɛjɛ Zion+ akɛ:
“Kwɛ bɔ ni akpãtã wɔhiɛ ahã!
Ashwie wɔhiɛ shi waa diɛŋtsɛ!
Ejaakɛ wɔshi shikpɔŋ lɛ nɔ, ni akumɔ wɔshĩai lɛ hu ashwie shi.”+
20 Nyɛ yei, nyɛboa Yehowa wiemɔ lɛ toi.
Nyɛhãa enaa wiemɔ lɛ abotea nyɛtoiiaŋ.
Nyɛtsɔa nyɛbiyei lɛ yaafo nɛɛ,Ni mɔ fɛɛ mɔ atsɔɔ enaanyo yaafo lala* nɛɛ.+
21 Ejaakɛ gbele ekwɔ kɛtsɔ wɔsamfɛji lɛ amli;Ebote wɔmɔji ni atswa gbogboi awo he lɛ amliKoni ejie gbekɛbii lɛ kɛje gbɛjegbɛi lɛ anɔKɛ oblahii lɛ hu kɛje henaabuamɔhei lɛ.’+
22 Kɛɛmɔ akɛ, ‘Nɔ ni Yehowa kɛɛ nɛ:
“Mɛi ni egboi lɛ agbohii lɛ baajwere shi tamɔ kooloi afei yɛ ŋa lɛ nɔ,Tamɔ ŋmaa* kuikui ni afo etsɛko ni jwere shi sɛrɛnɛɛ yɛ nikpalɔ lɛ sɛɛ,Ni mɔ ko mɔ ko bɛ ni baabua naa lɛ.”’”+
23 Nɔ ni Yehowa kɛɛ nɛ:
“Mɔ ni hiɛ kã shi lɛ akashwã yɛ ehiɛshikamɔ lɛ hewɔ;+Mɔ ni he wa lɛ hu akashwã yɛ ehewalɛ lɛ hewɔ;Ni niiatsɛ lɛ hu akashwã yɛ nii babaoo ni eyɔɔ lɛ hewɔ.”+
24 “Shi mɔ ni shwãa lɛ, eshwã yɛ enɛ moŋ hewɔ:
Akɛ eyoɔ nibii ni kɔɔ mihe lɛ asɛɛ, ni eyɛ mihe nilee hu,+Akɛ miji Yehowa, mɔ ni jieɔ suɔmɔ ni tsakeee kpo ni yeɔ jalɛ sane, ni feɔ jalɛ nii yɛ shikpɔŋ lɛ nɔ,+Ejaakɛ nibii nɛɛ ahe miishɛɛ mináa,”+ Yehowa kɛɛ.
25 “Naa! Gbii miiba,” Yehowa kɛɛ, “ni mɔ fɛɛ mɔ ni afo lɛ ketia shi afoko lɛ ketia lɛ, mahã ebu ehe akɔntaa ehã mi,+
26 mahã Ejipt+ kɛ Yuda+ kɛ Edom+ kɛ Amonbii+ lɛ kɛ Moab+ kɛ mɛi ni yɔɔ ŋa lɛ nɔ ni shɛɔ amɛyitsei ahe+ lɛ hu abu amɛhe akɔntaa amɛhã mi; ejaakɛ jeŋmaji lɛ fɛɛ lɛ, afoko amɛ ketia, ni Israel shĩa lɛ fɛɛ lɛ, afoko amɛtsui ketia.”+
Shishigbɛ Niŋmaa
^ Loo “misusuma tɔɔ ehe.”
^ Loo “awerɛhoyeli lala.”
^ Loo “hiɛ kã shi.”
^ Loo “migbɛtsɔɔmɔ.”
^ Loo “awerɛhoyeli lalai.”
^ Loo “awerɛhoyeli lala.”
^ Ŋmaa ní awieɔ he yɛ biɛ lɛ ji wiiti, abele, omɔ, kɛ amɛhenɔi lɛ eko.
