Yeremia 35:1-19
-
Rekabbii lɛ fee toiboo he nɔkwɛmɔnɔ kpakpa (1-19)
35 Wiemɔ ni jɛ Yehowa ŋɔɔ ba Yeremia ŋɔɔ yɛ Yehoiakim,+ Yosia binuu lɛ, ni ji Yuda maŋtsɛ lɛ gbii lɛ amli lɛ nɛ:
2 “Yaa Rekabbii+ lɛ ashĩa lɛ ni okɛ amɛ ayawie ni okɛ amɛ aba Yehowa shĩa lɛ yɛ niyelihei* lɛ ateŋ ekome mli; ni ohã amɛ wain koni amɛnu.”
3 No hewɔ lɛ, mitee ni miyaŋɔ Yaazania, Habazinia binuu Yeremia binuu lɛ, kɛ enyɛmimɛi hii lɛ, kɛ ebihii lɛ fɛɛ, kɛ Rekabbii lɛ ashĩa lɛ mli bii lɛ fɛɛ
4 kɛtee Yehowa shĩa lɛ mli. Mikɛ amɛ tee anɔkwa Nyɔŋmɔ lɛ gbɔmɔ lɛ, Hanan, Igdalia binuu lɛ bihii lɛ aniyelihe lɛ ni yɔɔ lumɛi lɛ aniyelihe lɛ masɛi yɛ Shalum, shinaanaakwɛlɔ lɛ binuu Maaseia niyelihe lɛ yiteŋgbɛ lɛ.
5 Kɛkɛ ni mikɛ kɔɔpoi kɛ wain kɔɔpoi ni eyimɔ obɔbɔ kɛ wain mamɔ hii ni jɛ Rekabbii lɛ ashĩa lɛ ahiɛ, ni mikɛɛ amɛ akɛ: “Nyɛnua wain.”
6 Shi amɛkɛɛ akɛ: “Wɔnuuu wain, ejaakɛ Yehonadab,*+ Rekab binuu lɛ, ni ji wɔtsɛ lɛ, ewo wɔ kitã akɛ, ‘Nyɛkanua wain kɔkɔɔkɔ, nyɛ kɛ nyɛbihii fɛɛ.
7 Ni nyɛkamaa tsũ, nyɛkadua nii, ni nyɛkafea wain ŋmɔ, ni eko hu akatsɔ nyɛnɔ. Moŋ lɛ, nyɛhia mama tsũi amli daa koni nyɛhi shi ni nyɛsɛɛ atsɛ yɛ shikpɔŋ ni nyɛbato gbɔ yɛ nɔ lɛ nɔ.’
8 No hewɔ lɛ, wɔboɔ Yehonadab, wɔtsɛ Rekab binuu lɛ gbee toi be fɛɛ be yɛ nibii fɛɛ ni ewo wɔ kitã yɛ he lɛ amli, ni wɔnuuu wain kɔkɔɔkɔ—wɔ, kɛ wɔŋamɛi, kɛ wɔbihii, kɛ wɔbiyei fɛɛ.
9 Ni wɔmamɔɔɔ tsũi ni wɔhi mli, ni wɔbɛ wain ŋmɔji, kɛ shikpɔji, kɛ dumɔwui.
10 Wɔhiɔ mama tsũi amli be fɛɛ be, ni wɔboɔ nɔ fɛɛ nɔ ni wɔtsɛ Yehonadab* ewo wɔ kitã akɛ wɔfee lɛ toi.
11 Shi be ni Babilon maŋtsɛ Nebukadnezar* kwɔ kɛba koni ebatutua shikpɔŋ lɛ,+ wɔkɛɛ akɛ, ‘Nyɛbaa ni wɔyaa Yerusalem koni wɔje Kaldeabii lɛ asraafoi lɛ kɛ Siriabii lɛ asraafoi lɛ adɛŋ, ni no ji Yerusalem ni wɔyɔɔ amrɔ nɛɛ.’”
12 Ni Yehowa kɛɛ Yeremia akɛ:
13 “Nɔ ni Yehowa, taiatsɛ lɛ, Israel Nyɔŋmɔ lɛ kɛɛ nɛ, ‘Yaa ni oyakɛɛ Yuda hii lɛ kɛ mɛi ni yɔɔ Yerusalem lɛ akɛ: “Ani akɛko nyɛ shii abɔ akɛ nyɛbo miwiemɔi lɛ atoi?”+ Yehowa kɛɛ.
14 “Yehonadab, Rekab binuu lɛ wo eseshibii lɛ kitã akɛ amɛkanu wain, ni amɛye ewiemɔi lɛ anɔ ni amɛnuuu wain kɛbashi ŋmɛnɛ gbi nɛɛ, ni enɛ tsɔɔ akɛ amɛboɔ amɛtsɛ lɛ mla lɛ toi.+ Shi mikɛ nyɛ wieɔ daa kɛ daa,* shi nyɛbooo mi toi.+
15 Ni mitsuɔ mitsuji gbalɔi lɛ fɛɛ kɛbaa nyɛŋɔɔ, mitsuɔ amɛ daa kɛ daa,*+ ni amɛkɛɔ nyɛ akɛ, ‘Nyɛfainɛ, nyɛkua nyɛsɛɛ, nyɛteŋ mɔ fɛɛ mɔ akua esɛɛ kɛjea egbɛi fɔji lɛ anɔ+ ni efee nɔ ni ja! Nyɛkanyiɛa nyɔŋmɔi krokomɛi lɛ asɛɛ ni nyɛkasɔmɔa amɛ hu. Kɛ́ nyɛfee nakai lɛ, nyɛbaaya nɔ nyɛhi shikpɔŋ ni mikɛhã nyɛ kɛ nyɛtsɛmɛi lɛ nɔ.’+ Shi nyɛbaaa nyɛtoi shi nyɛhãaa mi, ni nyɛbooo mi toi hu.
16 Yehonadab, Rekab binuu lɛ seshibii lɛ yeɔ mla ni amɛtsɛ kɛhã amɛ lɛ nɔ,+ shi maŋ nɛɛ booo mi toi.”’”
17 “No hewɔ lɛ, nɔ ni Yehowa, Nyɔŋmɔ taiatsɛ lɛ, Israel Nyɔŋmɔ lɛ kɛɛ nɛ: ‘Naa, mikɛ saji fɔji fɛɛ ni mibɔ Yuda kɛ mɛi fɛɛ ni yɔɔ Yerusalem lɛ kɔkɔ yɛ he lɛ miiba amɛnɔ,+ ejaakɛ mikɛ amɛ ewie, shi amɛbooo toi, ni mitee nɔ mitsɛ amɛ, shi amɛhereee nɔ.’”+
18 Ni Yeremia kɛɛ Rekabbii lɛ ashĩa lɛ mli bii lɛ akɛ: “Nɔ ni Yehowa, taiatsɛ lɛ, Israel Nyɔŋmɔ lɛ kɛɛ nɛ, ‘Akɛni nyɛyeɔ nyɛtsɛ Yehonadab mla lɛ nɔ, ni nyɛyaa nɔ nyɛyeɔ efamɔi lɛ fɛɛ anɔ, ni nyɛfeɔ bɔ ni efã nyɛ lɛ pɛpɛɛpɛ hewɔ lɛ,
19 nɔ ni Yehowa, taiatsɛ lɛ, Israel Nyɔŋmɔ lɛ, kɛɛ nɛ: “Ebaŋ kɔkɔɔkɔ akɛ be ko baashɛ ni anáŋ Yehonadab,* Rekab binuu lɛ seshinyo ko ni baasɔmɔ yɛ mihiɛ.”’”
Shishigbɛ Niŋmaa
^ Loo “piai.”
^ Hebri sht. ŋm., “Yonadab,” gbɛ́i Yehonadab lɛ ni afo lɛ kuku.
^ Hebri sht. ŋm., “Yonadab,” gbɛ́i Yehonadab lɛ ni afo lɛ kuku.
^ Hebri sht. ŋm., “Nebukadrezar,” gbɛ kroko ni aŋmaa egbɛ́i lɛ.
^ Hebri sht. ŋm., “miteɔ shi leebi maŋkpa ni miwieɔ.”
^ Hebri sht. ŋm., “miteɔ shi leebi maŋkpa ni mitsuɔ amɛ.”
^ Hebri sht. ŋm., “Yonadab,” gbɛ́i Yehonadab lɛ ni afo lɛ kuku.
