Hosea 6:1-11
6 “Nyɛbaa, nyɛhãa wɔkua wɔsɛɛ kɛyaa Yehowa ŋɔɔ,Ejaakɛ etserɛ wɔmli dukuduku,+ shi ebaatsa wɔ.
Etswia wɔ nii, shi ebaato wɔpilamɔi lɛ anɔ.
2 Gbii enyɔ sɛɛ lɛ, ebaatsĩɛ wɔ.
Gbi ni ji etɛ lɛ nɔ lɛ, ebaatee wɔ shi,Ni wɔbaahi shi yɛ ehiɛ.
3 Wɔbaaná wɔle Yehowa, wɔkɛ hiɛdɔɔ baatao lɛ koni wɔle lɛ.
Bɔ ni je tsɛreɔ be fɛɛ be lɛ, nakai nɔŋŋ bɔ fɛɛ bɔ ni fee lɛ, ebaaje kpo;Ebaaba wɔŋɔɔ tamɔ nugbɔ ni miinɛ,Tamɔ sɛɛkpee nugbɔ* ni hãa shikpɔŋ lɛ nu lɛ.”
4 “Efraim, mɛni esa akɛ mafee bo?
Yuda, mɛni esa akɛ mafee bo?
Ejaakɛ nyɛsuɔmɔ* lɛ tamɔ leebi atatui,Tamɔ bɔ́ ni kpalaa oya.
5 No hewɔ ni matsɔ gbalɔi lɛ anɔ mafolɔ amɛ mashwie lɛ;+Mikɛ midaaŋ wiemɔi lɛ baagbe amɛ.+
Ni kojomɔ ni baaba onɔ lɛ baakpɛ tamɔ la.+
6 Ejaakɛ mináa suɔmɔ ni tsakeee* he miishɛɛ, jeee afɔle,Ni mináa Nyɔŋmɔ he nilee hu he miishɛɛ moŋ fe shãa afɔlei.+
7 Shi amɛ lɛ, amɛku kpaŋmɔ lɛ mli,+ tamɔ gbɔmɛi adesai.
Jɛmɛ amɛkwa mi yɛ.
8 Gilead lɛ, efɔŋfeelɔi amaŋ ni,+Najiamaamɔhei ni eyi kɛ lá ewu mli fɛɛ.+
9 Osɔfoi akuu lɛ tamɔ ojotswalɔi akui ni woɔ mɔ antɛo.
Amɛgbeɔ mɛi yɛ Shekem gbɛ lɛ nɔ,+Ejaakɛ amɛfeɔ hiɛgbejianii.
10 Mina nii ni hãa mɔ he jɔ̃ɔ ehe yɛ Israel shĩa lɛ.
Jɛmɛ Efraim feɔ ashawo yɛ;+Israel ebule ehe.+
11 Agbɛnɛ hu, bo Yuda, ato nikpamɔ ko ahã bo,Be mli ni mabua miwebii ni aŋɔ amɛ nom lɛ anaa kɛku sɛɛ kɛba lɛ.”+
Shishigbɛ Niŋmaa
^ Yɛ Biblia lɛ mli lɛ, “sɛɛkpee nugbɔ” ji nugbɔnɛmɔ ni jeɔ shishi aaafee April teŋgbɛ.
^ Loo “nyɛsuɔmɔ ni tsakeee.”
^ Loo “mɔbɔnalɛ.”
