Hiob 5:1-27
5 “Ofainɛ, boo otsɛ! Ani mɔ ko yɛ ni baahere bo nɔ?
Mɛi krɔŋkrɔŋi lɛ ateŋ namɔ ŋɔɔ obaaya?
2 Ejaakɛ buulu lɛ, mlifu baagbe lɛ,Ni mɔ ni lakamɔ waaa lɛ, hiɛkɔ̃ɔ baagbe lɛ.
3 Mina buulu ko ni shishifãi miimɔmɔ shi,Shi trukaa lɛ, alomɔ eshihilɛhe lɛ.
4 Ebii lɛ kɛ shweshweeshwefeemɔ teŋ jekɛ waa,Ni akpɔtɔɔ amɛ yɛ maŋ lɛ agbó lɛ naa,+ ni mɔ ko bɛ ni baahere amɛ.
5 Nii ni ekpaa lɛ, mɔ ni hɔmɔ yeɔ lɛ lɛ yeɔ,Ekɔɔ yɛ ŋmeii ateŋ po,Ni akɛ akpa duɔ nibii ni amɛyɔɔ lɛ.
6 Ejaakɛ nibii fɔji lɛ, jeee sũ* mli amɛkwɛ̃ɔ kɛjɛɔ,Ni haomɔ hu, jeee shikpɔŋ etsɛ̃ɔ kɛjɛɔ.
7 Ejaakɛ afɔɔ gbɔmɔ ahãa haomɔ,Tamɔ bɔ pɛ ni lalilɛii tsɛ̃ɔ kɛyaa ŋwɛigbɛ lɛ.
8 Shi mi lɛ, makpa Nyɔŋmɔ fai,Ni mikɛ misane lɛ baahã Nyɔŋmɔ,
9 Mɔ ni feɔ nibii wuji ni anyɛɛɛ naa ana,Naakpɛɛ nibii ni aleee amɛyibɔ lɛ.
10 Ehãa nugbɔ nɛɔ yɛ shikpɔŋ lɛ nɔNi etsuɔ nu kɛbaa ŋa nɔ.
11 Ewóɔ mɔ ni bɛ yelikɛbualɔ lɛ nɔ gojoo,Ni ewóɔ mɔ ni nii yɔɔ mɔbɔ lɛ nɔ ni ehereɔ eyiwala.
12 Ehãa ŋaatsɔlɔi aŋaatsɔi feɔ yaka,Ni no hewɔ lɛ, amɛninenaa nitsumɔ lɛ yeee omanye.
13 Emɔɔ hiɛshikalɔi yɛ amɛŋaatsɔɔ lɛ mli,+Ni no hewɔ lɛ, hiɛtɛ̃lɔi ayiŋtoi lɛ fiteɔ.
14 Amɛkɛ duŋ kpeɔ be ni je etsɛre,Ni amɛtatraa shwane fintiŋŋ, oookɛɛ je ena.
15 Ehereɔ mɔ yiwala kɛjeɔ amɛdaaŋ klante lɛ naa,Ehereɔ ohiafoi ayiwala kɛjeɔ mɔ ni he wa lɛ dɛŋ,
16 No hewɔ lɛ, mɛi ni bɛ yelikɛbualɔ lɛ yɛ hiɛnɔkamɔ,Shi ahãa nifɔjianii feɔ diŋŋ.
17 Naa! Mɔ ni Nyɔŋmɔ jajeɔ lɛ lɛ yɛ miishɛɛ;No hewɔ lɛ, kaakpoo Ofe lɛ tsɔsemɔ lɛ!
18 Ejaakɛ epilaa mɔ,* shi lɛ nɔŋŋ efimɔɔ pilamɔ lɛ nɔ;Ekumɔɔ mɔ, shi ekɛ lɛ diɛŋtsɛ eniji tsaa mɔ.
19 Ebaajie bo yɛ amanehului ekpaa amli,Ni nɔ ni ji kpawo nɔ lɛ po yeŋ bo awui.
20 Hɔmɔ beiaŋ lɛ, ebaakpɔ̃ bo kɛje gbele mli,Ni ta beiaŋ lɛ, ebaakpɔ̃ bo kɛje klante hewalɛ dɛŋ.
21 Abaabu ohe kɛje gwaomɔ ni lilɛi lɛ gwaoɔ mɔ lɛ he,+Ni kɛ́ hiɛkpatamɔ ba lɛ, osheŋ gbeyei.
22 Obaaŋmɔ hiɛkpatamɔ kɛ hɔmɔ fɛɛ,Ni osheŋ shikpɔŋ lɛ nɔ kooloi awuiyelɔi gbeyei.
23 Ejaakɛ tɛi ni yɔɔ ŋa mli lɛ yeŋ bo awui ko,*Ni toiŋjɔlɛ baahi okɛ ŋa mli kooloi awuiyelɔi ateŋ.
24 Obaaná ole akɛ omama tsũ lɛ yɛ shweshweeshwe,*
Ni kɛ́ oyakwɛ okooloi aniyelihe lɛ, obaana akɛ nɔ ko nɔ ko elaajeko.
25 Obaaná bii babaoo,Ni oseshibii lɛ ayi baafa babaoo tamɔ shikpɔŋ lɛ nɔ jwɛi.
26 Be ni obaaya gbonyobu lɛ mli lɛ, okã he oji mɔ ni yɔɔ hewalɛ kpintiŋŋ,Tamɔ ŋmaa* kei ni abua naa yɛ amɛbe mli.
27 Naa! Wɔtao enɛ mli, ni wɔna akɛ nakai eji.
Bo toi ni okpɛlɛ nɔ.”
Shishigbɛ Niŋmaa
^ Hebri sht. ŋm., “mulu.”
^ Loo “ehãa mɔ piŋɔ.”
^ Loo “tɛi ni yɔɔ ŋa mli lɛ kɛ bo baakpaŋ kpaŋmɔ (kɛ bo baaba gbeekpamɔ).”
^ Hebri sht. ŋm., “toiŋjɔlɛ ji omama tsũ lɛ.”
^ Ŋmaa ní awieɔ he yɛ biɛ lɛ ji wiiti, abele, omɔ, kɛ amɛhenɔi lɛ eko.
