Akɛmaje Hebribii Lɛ 4:1-16
4 No hewɔ lɛ, akɛni ehejɔɔmɔ lɛ mlibotemɔ he shiwoo yɛ lolo hewɔ lɛ, nyɛhãa wɔkwɛa jogbaŋŋ* koni ekaba lɛ akɛ nyɛteŋ mɔ ko shɛɛɛ he.+
2 Ejaakɛ wɔ hu ajaje sane kpakpa lɛ atsɔɔ wɔ,+ tamɔ bɔ ni ajaje atsɔɔ amɛ lɛ nɔŋŋ; shi wiemɔ lɛ ni amɛnu lɛ he eyabaaa sɛɛnamɔ ko kɛhãaa amɛ, ejaakɛ amɛkɛ mɛi ni bo toi lɛ fɛɛ náaa hemɔkɛyeli kome.
3 Ejaakɛ wɔ mɛi ni wɔheɔ wɔyeɔ* lɛ, wɔmiibote hejɔɔmɔ lɛ mli, tamɔ bɔ ni ekɛɛ lɛ akɛ: “No hewɔ lɛ mikã kitã yɛ mimlifu lɛ mli akɛ, ‘Amɛboteŋ mihejɔɔmɔ lɛ mli,’”+ tsɛbelɛ agbe enitsumɔi lɛ anaa kɛjɛ be ni ato je lɛ shishi lɛ.*+
4 Ejaakɛ bɔ ni ewie yɛ he ko yɛ gbi ni ji kpawo lɛ he nɛ: “Ni Nyɔŋmɔ jɔɔ ehe yɛ gbi ni ji kpawo lɛ nɔ kɛjɛ enitsumɔi lɛ fɛɛ amli,”+
5 ni esaa ekɛɛ yɛ biɛ nɛɛ akɛ: “Amɛboteŋ mihejɔɔmɔ lɛ mli.”+
6 No hewɔ lɛ, akɛni emlibotemɔ lɛ yɛ lolo kɛhã mɛi komɛi, ni mɛi ni ajaje sane kpakpa lɛ atsɔɔ amɛ klɛŋklɛŋ lɛ boteee mli yɛ toigbele hewɔ lɛ,+
7 esaa eto gbi ko ekoŋŋ yɛ no sɛɛ be kplaŋŋ be ni ekɛɛ yɛ David lala lɛ mli akɛ, “Ŋmɛnɛ” lɛ; tamɔ bɔ ni awie kɛtsɔ hiɛ lɛ, “Ŋmɛnɛ lɛ, kɛ́ nyɛbo egbee toi lɛ, nyɛkakpiliŋa nyɛtsuii” lɛ.+
8 Ejaakɛ eji Yoshua+ nyiɛ amɛhiɛ kɛtee hejɔɔmɔhe ko kulɛ, Nyɔŋmɔ ewieŋ gbi kroko he dɔŋŋ yɛ sɛɛ mli.
9 No hewɔ lɛ, hejɔɔmɔgbiyeli ko yɛ lolo kɛhã Nyɔŋmɔ maŋ lɛ.+
10 Ejaakɛ mɔ ni ebote Nyɔŋmɔ hejɔɔmɔ lɛ mli lɛ, lɛ hu ejɔɔ ehe kɛjɛ lɛ diɛŋtsɛ enitsumɔi amli, tamɔ bɔ ni Nyɔŋmɔ jɔɔ ehe kɛjɛ enɔ lɛ mli lɛ.+
11 No hewɔ lɛ, nyɛhãa wɔbɔa mɔdɛŋ fɛɛ ni wɔɔnyɛ koni wɔbote nakai hejɔɔmɔ lɛ mli, koni mɔ ko mɔ ko akagbee shi tamɔ nakai toigbele he nɔkwɛmɔnɔ lɛ nɔŋŋ.+
12 Ejaakɛ Nyɔŋmɔ wiemɔ lɛ hiɛ kã+ ni eyɛ hewalɛ ni enaa ba fe klante fɛɛ klante ni hiɛ kɛ esɛɛ fɛɛ naa ba,+ ni egbuɔ kɛboteɔ gbɔmɔ mli aahu kɛyashi egbálaa susuma* kɛ mumɔ* mli, kɛ agbɛnɛ hu, talɔi kɛ wuiaŋfɔ lɛ mli, ni enyɛɔ ekɔɔ tsui lɛ mli susumɔi kɛ yiŋtoi asɛɛ.
13 Ni bɔɔ nɔ ko bɔɔ nɔ ko bɛ ni Nyɔŋmɔ enaaa lɛ,+ shi nibii fɛɛ he kã ni agbele nɔ kpetekplee yɛ lɛ mɔ ni esa akɛ wɔbu wɔhe akɔntaa wɔhã lɛ lɛ hiŋmɛiiaŋ.+
14 No hewɔ lɛ, akɛni wɔyɔɔ osɔfonukpa kpeteŋkpele ni efo mli kɛtsɔ ŋwɛii amli, ni ji Yesu, Nyɔŋmɔ Bi+ lɛ hewɔ lɛ, nyɛhãa wɔhiɛa jajemɔ ni wɔjajeɔ Yesu wɔtsɔɔ lɛ mli kpɛŋŋ.+
15 Ejaakɛ osɔfonukpa ni wɔyɔɔ lɛ, ejeee mɔ ni nyɛɛɛ anu wɔgbɔjɔmɔi lɛ ahe ehã wɔ,+ shi moŋ eji mɔ ni aka lɛ akwɛ yɛ nibii fɛɛ mli tamɔ wɔ nɔŋŋ, shi esha ko bɛ ehe.+
16 No hewɔ lɛ, nyɛhãa wɔkɛ wiemɔ ni awieɔ kɛ nɔmimaa abɛŋkɛa dromɔ sɛi lɛ,+ koni wɔnine ashɛ mɔbɔnalɛ kɛ dromɔ ni baaye abua wɔ yɛ be ni sa mli lɛ nɔ.
Shishigbɛ Niŋmaa
^ Greek sht. ŋm., “wɔshea gbeyei.”
^ Loo “wɔjieɔ hemɔkɛyeli kpo.”
^ Greek sht. ŋm., “be ni ashɛ (dumɔwu) afɔ̃ shi,” ni tsɔɔ akɛ, be ni Adam kɛ Hawa bɔi amɛbii lɛ ahɔŋɔɔ.
^ Kwɛmɔ Wiemɔi Titrii Amligbalamɔ lɛ.
^ Kwɛmɔ Wiemɔi Titrii Amligbalamɔ lɛ.
