Ezekiel 23:1-49
23 Yehowa kɛɛ mi ekoŋŋ akɛ:
2 “Gbɔmɔ bi,* yei enyɔ komɛi ni ji yoo kome musuŋbii hi shi.+
3 Amɛtsɔmɔ ashawo yei yɛ Ejipt;+ amɛje amɛshawofeemɔ lɛ shishi kɛjɛ amɛblayeiaŋ tɔ̃ɔ. Amia amɛfufɔi yɛ jɛmɛ, ni akɛ nine shwɛ amɛblayoo fro tsitsi lɛ nɔ.
4 Atsɛɔ onukpa lɛ Ohola,* ni atsɛɔ enyɛmi yoo lɛ Oholiba.* Amɛbatsɔmɔ minii ni amɛfɔ bihii kɛ biyei. Mɔ ni atsɛɔ lɛ Ohola lɛ ji Samaria,+ ni mɔ ni atsɛɔ lɛ Oholiba lɛ ji Yerusalem.
5 “Ohola je eshawo+ lɛ shishi be ni eji minii lɛ beebe. Ekɔnɔ te shi ehã mɛi ni sumɔɔ lɛ waa lɛ,+ ni ji Asiriabii ni bɛŋkɛ lɛ lɛ.+
6 Amralofoi ni woɔ atade bluu kɛ nɔkwɛlɔi—amɛ fɛɛ lɛ, oblahii ni he yɔɔ akɔnɔ ni taraa okpɔŋɔi anɔ ji amɛ.
7 Etee nɔ ekɛ Asiria hii fɛɛ ni hiɛ yɔɔ nyam lɛ bɔ ajwamaŋ, ni ekɛ mɛi ni ekɔnɔ te shi ehã amɛ lɛ amagai ni yɔɔ nyaŋemɔ* lɛ bule ehe.+
8 Ekpaaa ashawo ni efee yɛ Ejipt lɛ, ejaakɛ amɛkɛ lɛ wɔ yɛ eblayeiaŋ tɔ̃ɔ, ni amɛkɛ amɛnine shwɛ eblayoo fro tsitsi lɛ nɔ, ni amɛfɔse amɛkɔnɔ lɛ amɛshwie enɔ.*+
9 No hewɔ lɛ, miŋmɛɛ ehe mihã mɛi ni sumɔɔ lɛ waa lɛ, Asiria hii lɛ,+ mɛi ni ekɔnɔ te shi ehã amɛ lɛ.
10 Amɛjie ehe folo+ ni amɛmɔmɔ ebihii kɛ ebiyei lɛ,+ ni amɛkɛ klante gbe lɛ. Ebaná gbɛ́i gbonyo yɛ yei ateŋ, ni amɛgbala etoi.
11 “Be ni enyɛmi yoo Oholiba na nɔ ni etee nɔ lɛ, ekɔnɔ lɛ mli bawa kwraa po fe tsutsu lɛ, ni eshawo lɛ mli bawa kwraa fe enyɛmi yoo lɛ nɔ lɛ.+
12 Ekɔnɔ te shi ehã mɛi ni bɛŋkɛ lɛ, ni ji Asiria hii lɛ,+ amralofoi kɛ nɔkwɛlɔi ni woɔ atadei fɛfɛji ni taraa okpɔŋɔi anɔ lɛ—amɛ fɛɛ lɛ, oblahii ni he yɔɔ akɔnɔ ji amɛ.
13 Be ni ebule ehe lɛ, mina akɛ amɛyi enyɔ lɛ fɛɛ amɛkɔ gbɛ kome.+
14 Shi ehã eshawofeemɔ lɛ mli wo wu. Ena hii ni akpɛ́ yɛ gbogbo he, Kaldeabii ahe mfonirii ni akɛ pɛnte tsuru* ekpa nɔ,
15 ni amɛkɛ bɛlti efi amɛhɛ, ni amɛkɛ yitsofiinii kakadaji efimɔ amɛyitsei, ni amɛtamɔ tawulɔi, amɛ fɛɛ amɛtamɔ Babilonbii ni afɔ amɛ yɛ Kaldeabii lɛ ashikpɔŋ lɛ nɔ.
16 Be ni ena amɛ nɔŋŋ lɛ, ekɔnɔ te shi ehã amɛ, ni etsu mɛi kɛtee amɛŋɔɔ yɛ Kaldea.+
17 No hewɔ lɛ, Babilon hii lɛ tee nɔ amɛkwɔ ebɔlɛnamɔ saa lɛ, ni amɛkɛ amɛjwamaŋbɔɔ lɛ bule lɛ. Be ni amɛbule lɛ sɛɛ lɛ, amɛje etsine ni eshi* amɛ.
18 “Be ni etee nɔ efee ashawo ni efeee lɛ hiɛgbele ni ejie ehe folo lɛ,+ eje mitsine ni mishi lɛ, tamɔ bɔ ni enyɛmi yoo lɛ je mitsine ni mishi* lɛ lɛ.+
19 Ni ehã eshawofeemɔ lɛ mli wo wu,+ ni ekai eblayeiaŋ gbii lɛ, be ni efeɔ ashawo yɛ Ejipt shikpɔŋ lɛ nɔ lɛ.+
20 Ekɔnɔ te shi ehã amɛ tamɔ bɔ ni hii ni amɛloo tamɔ teji nɔ ni amɛnuutso tamɔ okpɔŋɔ nɔ lɛ ahemɛi akɔnɔ teɔ shi lɛ.
21 Jeŋba sha ni okɛ ohe wo mli yɛ oblayeiaŋ yɛ Ejipt+ be ni amɛkɛ amɛnine shwɛ otsitsi nɔ, ni ji oblayeiaŋ fufɔi lɛ ahe lɛ, ba otsine.+
22 “No hewɔ lɛ, Oholiba, nɔ ni Nuŋtsɔ Ofe Yehowa kɛɛ nɛ: ‘Naa, miitee osuɔlɔi ni je otsine ni oshi* amɛ lɛ ashi miiwo bo,+ ni mahã amɛjɛ he fɛɛ he amɛba onɔ,+
23 Babilon+ hii lɛ kɛ Kaldeabii+ lɛ fɛɛ, Pekod+ kɛ Shoa kɛ Koa hii lɛ, kɛ Asiria hii lɛ fɛɛ. Amɛ fɛɛ lɛ, oblahii ni he yɔɔ akɔnɔ ji amɛ, amralofoi kɛ nɔkwɛlɔi, tawulɔi kɛ mɛi ni ahala,* amɛ fɛɛ amɛtaraa okpɔŋɔi anɔ.
24 Amɛkɛ ta shwiilii kɛ eshishi taii* ni miigbɛɛ kɛ asraafoi babaoo ni hiɛ tsɛŋi wuji kɛ tsɛŋi bibii* ni bumɔ dade faii ni baaba onɔ. Amɛbaabɔle ohe kɛkpe ni mafã amɛ ni amɛkojo bo, ni amɛbaakojo bo bɔ ni amɛsumɔɔ.+
25 Majie mimlifu lɛ kpo mawo bo, ni amɛkɛ bo baaye yɛ amɛmlila lɛ mli. Amɛbaafolɔ ogugɔ kɛ otoii, ni nyɛteŋ mɛi ni baashwɛ lɛ baanyɔ yɛ klante naa. Amɛbaamɔmɔ obihii kɛ obiyei lɛ kɛya, ni la baashã nyɛteŋ mɛi ni baashwɛ lɛ.+
26 Amɛbaajie otadei lɛ yɛ ohe+ ni amɛbaaloo ojwinei* fɛfɛji lɛ kɛya.+
27 Mafo ojeŋba sha lɛ kɛ oshawofeemɔ+ ni oje shishi yɛ Ejipt shikpɔŋ lɛ nɔ lɛ sɛɛ.+ Obaakpa amɛ kwɛmɔ, ni okaiŋ Ejipt dɔŋŋ.’
28 “Nɔ ni Nuŋtsɔ Ofe Yehowa kɛɛ nɛ: ‘Naa, miiba maŋmɛɛ ohe mawo mɛi ni nyɛɔ bo, mɛi ni je otsine ni oshi* amɛ lɛ adɛŋ.+
29 Amɛbaajɛ nyɛɛ mli amɛkɛ bo aye ni amɛbaaloo nɔ fɛɛ nɔ ni ogbo deŋme kɛná lɛ kɛya+ ni amɛbaashi bo kɛ ohe folo ni abaana ohe. Abaahã ana ajwamaŋ ni obɔɔ kɛ jeŋba sha ni okɛ ohe woɔ mli kɛ ashawo ni ofeɔ ni efeee bo hiɛgbele lɛ faŋŋ.+
30 Abaafee bo nibii nɛɛ ejaakɛ onyiɛ jeŋmaji lɛ asɛɛ tamɔ ashawo,+ ni okɛ amɛmagai ni yɔɔ nyaŋemɔ lɛ bule ohe.+
31 Okɔ gbɛ ni onyɛmi yoo lɛ kɔ lɛ nɔŋŋ,+ ni mikɛ ekɔɔpoo lɛ baawo odɛŋ.’+
32 “Nɔ ni Nuŋtsɔ Ofe Yehowa kɛɛ nɛ:
‘Obaanu onyɛmi yoo lɛ kɔɔpoo ni mli kwɔ ni lɛɛ lɛ naa,+Ni obaatsɔ nɔ ko ni aŋmɔɔ kɛ nɔ ko ni ayeɔ he fɛo, ejaakɛ babaoo yɛ kɔɔpoo lɛ mli.+
33 Obaatɔ dãa ni owerɛ baaho ohe,*Kɔɔpoo ni hãa mɔ he jɔ̃ɔ ehe ni kɛ hiɛkpatamɔ baa,Onyɛmi yoo Samaria, kɔɔpoo lɛ.
34 Obaanu ni obaashɔ mli fɛɛ+ ni obaakɔmɔ esũkoi lɛNi no sɛɛ lɛ, obaatserɛ ofufɔi.
“Ejaakɛ mi diɛŋtsɛ miwie,” Nuŋtsɔ Ofe Yehowa kɛɛ.’
35 “No hewɔ lɛ, nɔ ni Nuŋtsɔ Ofe Yehowa kɛɛ nɛ: ‘Akɛni ohiɛ ekpa minɔ, ni ojie ojwɛŋmɔ kɛje minɔ kwraa* hewɔ lɛ,+ obaatere nɔ ni baajɛ ojeŋba sha lɛ kɛ oshawofeemɔ lɛ mli kɛba lɛ.’”
36 Kɛkɛ ni Yehowa kɛɛ mi akɛ: “Gbɔmɔ bi,* ani obaakojo Ohola kɛ Oholiba+ ni okɛɛ amɛ amɛnifeemɔi ni yɔɔ nyaŋemɔ lɛ?
37 Amɛfite gbãla*+ ni lá ewu amɛniji ahe. Jeee amɛmagai ni yɔɔ nyaŋemɔ lɛ kɛkɛ amɛkɛfite gbãla, shi amɛkɛ amɛbihii ni amɛfɔ amɛhã mi lɛ tsɔ la mli akɛ niyenii amɛhã amagai.+
38 Agbɛnɛ hu, nɔ ni amɛfee mi nɛ: Amɛbule mijamɔhe lɛ yɛ nakai gbi lɛ nɔ, ni amɛwo mihejɔɔmɔ gbii lɛ ahe muji.
39 Be ni amɛgbe amɛbihii lɛ akɛ afɔlei amɛhã amɛmagai ni yɔɔ nyaŋemɔ lɛ sɛɛ lɛ,+ amɛba mijamɔhe lɛ koni amɛbabule jɛmɛ+ yɛ nakai gbi lɛ nɔŋŋ nɔ. Nɔ ni amɛfee yɛ mi diɛŋtsɛ mishĩa lɛ nɛ.
40 Amɛtsu ni ayatsɛ hii kɛjɛ shɔŋŋ kɛba po.+ Be ni amɛbaa lɛ, oju ohe ni owo ohiŋmɛii asɛɛ, ni okɛ hewulamɔnii ewula ohe.+
41 Ni oho ota shi yɛ sɛi saatso ni yɔɔ fɛo+ ni okpɔlɔ ma hiɛ nɔ,+ ni okɛ mitsofa-kɛ-ŋma+ kɛ mimu lɛ mamɔ nɔ.+
42 Anu mɛi ni miifee hoo ni amɛmii eshɛ amɛhe gbee yɛ jɛmɛ, dãatɔlɔi ni akɛ amɛ jɛ ŋa lɛ nɔ kɛba fata he. Amɛkɛ nineshinii wo yei lɛ, ni amɛkɛ akekerei ni yɔɔ fɛo bumɔ amɛyitsei.
43 “Kɛkɛ ni miwie mɔ ni gbalafitemɔ ehã etɔ lɛ lɛ he akɛ: ‘Ebaaya nɔ efee eshawo lɛ lolo.’
44 No hewɔ lɛ, amɛtee nɔ amɛtee eŋɔɔ, tamɔ bɔ ni ayaa ashawo yoo ŋɔɔ lɛ. Nakai amɛtee Ohola kɛ Oholiba, yei ni kɛ amɛhe woɔ jeŋba sha mli lɛ aŋɔɔ.
45 Shi hii ni ji jalɔi baakojo lɛ kɛ kojomɔ ni sa gbalafitelɔi+ kɛ lashishwielɔi;+ ejaakɛ gbalafitelɔi ji amɛ, ni lá ewu amɛniji ahe.+
46 “Ejaakɛ nɔ ni Nuŋtsɔ Ofe Yehowa kɛɛ nɛ: ‘Abaatee asraafoi ashi awo amɛ koni amɛhã amɛtsɔmɔ nɔ ko ni hãa mɔ he jɔ̃ɔ ehe kɛ nɔ ko ni aloɔ yɛ ta mli kɛyaa.+
47 Asraafoi lɛ baatswia amɛ tɛi+ ni amɛkɛ amɛklantei lɛ baafolɔ amɛ ashwie. Amɛbaagbe amɛbihii kɛ amɛbiyei+ lɛ ni amɛkɛ la baashã amɛshĩai lɛ.+
48 Mafo jeŋba sha sɛɛ yɛ shikpɔŋ lɛ nɔ, ni yei lɛ fɛɛ kɛbaakase nii, ni amɛkaseŋ ojeŋba sha lɛ.+
49 Amɛkɛ nɔ ni baajɛ ojeŋba sha lɛ mli kɛ nɔ ni baajɛ eshai ni okɛ omagai ni yɔɔ nyaŋemɔ lɛ fee lɛ mli lɛ kɛba lɛ baaba onɔ; ni obaaná ole akɛ miji Nuŋtsɔ Ofe Yehowa.’”+
Shishigbɛ Niŋmaa
^ Hebri sht. ŋm., “binuu.”
^ Eshishi ji, “Emama Tsũ.”
^ Eshishi ji, “Mimama Tsũ Lɛ Yɛ Emli.”
^ Hebri wiemɔ ni akɛtsu nii yɛ biɛ lɛ kɛ wiemɔ ko ni amɛkɛtsɛɔ “fei” lɛ yɛ tsakpaa, ni akɛtsuɔ nii kɛgbeɔ nii ahe guɔ.
^ Loo “ni amɛkɛ lɛ bɔ ajwamaŋ.”
^ Loo “akɛ vɛmilion.”
^ Loo “esusuma shi.”
^ Loo “misusuma shi.”
^ Loo “osusuma shi.”
^ Hebri sht. ŋm., “mɛi ni atsɛ.”
^ Loo “koklolontoi.”
^ Tsɛŋ bibioo ko ni gãitsɛlɔi fɔɔ hiɛmɔ.
^ Loo “ohewulamɔnii.”
^ Loo “osusuma shi.”
^ Hebri sht. ŋm., “Dãatɔɔ kɛ awerɛho baayi omli.”
^ Hebri sht. ŋm., “ni oshɛ mi ofɔ̃ osɛɛ.”
^ Hebri sht. ŋm., “binuu.”
^ Ni tsɔɔ akɛ, amɛyajá nyɔŋmɔi krokomɛi.
