Kojolɔi 14:1-20
14 Kɛkɛ ni Samson kpeleke shi kɛtee Timna, ni eyana Filisti yoo* ko yɛ Timna.
2 No hewɔ lɛ, ekwɔ kɛtee ni eyakɛɛ epapa kɛ emami akɛ: “Mihiŋmɛi egba Filisti yoo ko nɔ yɛ Timna, ni miitao ni nyɛyaŋɔ lɛ nyɛhã mi akɛ ŋa.”
3 Shi epapa kɛ emami kɛɛ lɛ akɛ: “Ani onáaa yoo ko yɛ owekumɛi lɛ kɛ wɔmaŋbii lɛ fɛɛ ateŋ?+ Ani Filistibii ni afolɔko amɛ ketia lɛ ateŋ esa akɛ oyaŋɔ yoo yɛ akɛ ŋa?” Shi Samson kɛɛ epapa akɛ: “Yaaŋɔ lɛ ohã mi, ejaakɛ lɛ ji mɔ ni sa yɛ mihiŋmɛiiaŋ.”
4 Epapa kɛ emami yɔseee akɛ enɛ jɛ Yehowa, ejaakɛ no mli lɛ, eetao Filistibii lɛ ahe gbɛ, akɛni nakai beiaŋ lɛ Filistibii lɛ ji mɛi ni yeɔ Israel nɔ lɛ hewɔ.+
5 No hewɔ lɛ, Samson kɛ epapa kɛ emami kpeleke shi kɛtee Timna. Be ni eshɛ Timna wain ŋmɔji lɛ ahe lɛ, naa! jata* ko hũu kɛba enɔ.
6 Kɛkɛ ni Yehowa mumɔ lɛ ba enɔ,+ ni etserɛ emli enyɔ tamɔ bɔ ni mɔ ko kɛ eniji folo tserɛɔ abotia ni edako tsɔ mli enyɔ lɛ. Shi ekɛɛɛ epapa kɛ emami nɔ ni efee lɛ.
7 Kɛkɛ ni ekpeleke shi kɛtee Timna ni ekɛ yoo lɛ yawie, ni yoo lɛ ji mɔ ni sa yɛ Samson hiŋmɛiiaŋ lolo.+
8 Be ko sɛɛ be ni eku esɛɛ koni eyaŋɔ yoo lɛ kɛba eshĩa lɛ,+ egba kɛtee koni eyakwɛ jata lɛ gbonyo lɛ, ni ena wobii pii ni eto wo yɛ jata lɛ gbonyo lɛ mli.
9 No hewɔ lɛ, ejie wo lɛ ewo edɛŋ ni eye kɛnyiɛ gbɛ lɛ nɔ. Be ni eyanina epapa kɛ emami ekoŋŋ lɛ, ehã amɛ eko koni amɛye. Shi ekɛɛɛ amɛ akɛ ejie wo lɛ kɛjɛ jata ko gbonyo mli.
10 Epapa kpeleke shi kɛtee yoo lɛ ŋɔɔ ni Samson ŋmɛ okpɔlɔ yɛ jɛmɛ, ejaakɛ no mli lɛ, nakai oblahii lɛ fɔɔ feemɔ.
11 Be ni amɛna lɛ lɛ, amɛyaŋɔ oblahii 30 amɛbafata ehe akɛ ayemforo wu hefatalɔi.
12 Kɛkɛ ni Samson kɛɛ amɛ akɛ: “Nyɛfainɛ mibagbá nyɛ ajenu ko. Kɛ́ nyɛnyɛ nyɛna nɔ ni ji, ni nyɛtsɔɔ mi shishi yɛ gbii kpawo ni akɛŋmɛɔ okpɔlɔ lɛ mli lɛ, no lɛ, mahã nyɛ klala atadei 30 kɛ hewulamɔ atadei 30.
13 Shi kɛ́ nyɛnyɛɛɛ nyɛtsɔɔ mi shishi lɛ, no lɛ, nyɛbaahã mi klala atadei 30 kɛ hewulamɔ atadei 30.” Amɛkɛɛ akɛ: “Gbá ojenu lɛ; wɔmiibo bo toi.”
14 No hewɔ lɛ, ekɛɛ amɛ akɛ:
“Nɔ ko ni ayeɔ jɛ niyelɔ lɛ mli,Ni nɔ ko ni ŋɔɔ jɛ hewalɔ lɛ mli.”+
Gbii etɛ ho ni amɛnyɛko amɛtsɔɔ ajenu lɛ shishi.
15 Gbi ni ji ejwɛ lɛ nɔ lɛ, amɛkɛɛ Samson ŋa* lɛ akɛ: “Lakamɔ owu*+ lɛ koni etsɔɔ wɔ ajenu lɛ shishi. Kɛjeee nakai lɛ, wɔkɛ la baashã bo kɛ opapa shĩabii lɛ fɛɛ. Ani otsɛ wɔ biɛ ni obashɔ̃ nibii ni wɔyɔɔ lɛ yɛ wɔdɛŋ?”
16 No hewɔ lɛ, Samson ŋa lɛ fó eshwie enɔ ekɛɛ: “Onyɛɔ mi; osumɔɔɔ mi.+ Ogbá mimaŋbii lɛ ajenu ko, shi otsɔko mi shishi.” Ni ekɛɛ yoo lɛ akɛ: “Mipapa kɛ mimami po, mitsɔko amɛ shishi! Mɛni hewɔ esa akɛ matsɔɔ bo shishi?”
17 Shi etee nɔ efó eshwie enɔ yɛ gbii ni eshwɛ yɛ okpɔlɔŋmɛɛ gbii kpawo lɛ mli fɛɛ. Naagbee lɛ, etsɔɔ yoo lɛ shishi yɛ gbi ni ji kpawo lɛ nɔ ejaakɛ eesu etsui. Ni yoo lɛ yatsɔɔ emaŋbii lɛ ajenu lɛ shishi.+
18 No hewɔ lɛ, dani hulu baanyɔ shi yɛ gbi ni ji kpawo lɛ nɔ lɛ,* maŋ lɛ mli hii lɛ kɛɛ lɛ akɛ:
“Mɛni ŋɔɔ fe wo,Ni mɛni he wa fe jata?”+
Ni ekɛɛ amɛ akɛ:
“Eji nyɛkɛ mitsinayoo bibioo lɛ eyahuuu kulɛ,+Nyɛnyɛŋ nyɛtsɔɔ mijenu lɛ shishi.”
19 Kɛkɛ ni Yehowa mumɔ lɛ ba enɔ+ ni ekpeleke shi kɛtee Ashkelon+ ni eyagbe amɛteŋ hii 30, ni eŋɔ amɛtadei lɛ, ni ekɛ hewulamɔ atadei lɛ bahã mɛi ni tsɔɔ ajenu lɛ shishi lɛ.+ Ekɛ mlifu ku esɛɛ kɛtee epapa shĩa lɛ.
20 Kɛkɛ ni aŋɔ Samson ŋa+ lɛ ahã oblahii ni fata ehe akɛ ayemforo wu hefatalɔi lɛ ateŋ mɔ kome.+
Shishigbɛ Niŋmaa
^ Hebri sht. ŋm., “Filistibii lɛ abiyei lɛ ateŋ yoo.”
^ Loo “jata oblanyo kɛ ekuɛ he tsɔi kusuu.”
^ Yɛ Hebri kusum naa lɛ, abaanyɛ atsɛ nuu ko ni ebi yoo ko shi loo etsɛ yoo ko he baa lɛ akɛ yoo lɛ wu.
^ Yɛ Hebri kusum naa lɛ, abaanyɛ atsɛ yoo ni abi eshi loo atsɛ ehe baa lɛ akɛ nuu lɛ ŋa.
^ Shishitsɔɔmɔi komɛi kɛɔ akɛ, “dani ebaaya sɛɛtsu lɛ mli lɛ.”
