Kojolɔi 13:1-25
13 Ni Israelbii lɛ fee efɔŋ yɛ Yehowa hiɛ ekoŋŋ,+ ni Yehowa kɛ amɛ wo Filistibii+ lɛ adɛŋ afii 40.
2 No mli lɛ, nuu ko yɛ Zora,+ ni jɛ Dan+ weku lɛ mli ni atsɛɔ lɛ Manoa.+ Eŋa lɛ, kene ji lɛ, ni ebɛ bi ko.+
3 Be ko lɛ, Yehowa bɔfo jie ehe kpo etsɔɔ yoo lɛ ni ekɛɛ lɛ akɛ: “Naa, kene ji bo ni obɛ bi ko. Shi obaaná musu ni obaafɔ binuu.+
4 No hewɔ lɛ, agbɛnɛ kwɛmɔ jogbaŋŋ ni okanu wain loo dãa ni wa ko,+ ni kaaye nɔ ko ni he tseee hu.+
5 Naa! Obaaná musu ni obaafɔ binuu, ni esaaa akɛ yishɛɛ kakla naa saa eyiteŋ,+ ejaakɛ gbekɛ lɛ baatsɔ Nazirnyo* ehã Nyɔŋmɔ kɛjɛ efɔmɔ* mli, ni lɛ ebaanyiɛ hiɛ kɛhere Israel kɛje Filistibii lɛ adɛŋ.”+
6 Kɛkɛ ni yoo lɛ tee ni eyakɛɛ ewu akɛ: “Anɔkwa Nyɔŋmɔ lɛ gbɔmɔ ko ba miŋɔɔ, ni esu tamɔ anɔkwa Nyɔŋmɔ lɛ bɔfo, ehe yɛ gbeyei waa. Mibiii lɛ he ni ejɛ, ni lɛ hu etsɔɔɔ mi egbɛ́i.+
7 Shi ekɛɛ mi akɛ: ‘Naa! Obaaná musu ni obaafɔ binuu. No hewɔ lɛ, kaanu wain loo dãa ni wa ko, ni kaaye nɔ ko ni he tseee hu, ejaakɛ gbekɛ lɛ baatsɔ Nazirnyo* ehã Nyɔŋmɔ kɛjɛ efɔmɔ* mli aahu kɛyashi gbi ni ebaagbo.’”
8 Manoa kpa Yehowa fai ekɛɛ: “Miikpa bo fai Yehowa. Ofainɛ hã anɔkwa Nyɔŋmɔ lɛ gbɔmɔ ni otsu kɛba lɛ aba ekoŋŋ koni ebatsɔɔ wɔ bɔ ni esa akɛ wɔhiɛ gbekɛ lɛ ni abaafɔ lɛ wɔhã.”
9 No hewɔ lɛ, anɔkwa Nyɔŋmɔ lɛ bo Manoa toi, ni anɔkwa Nyɔŋmɔ lɛ bɔfo lɛ ba yoo lɛ ŋɔɔ ekoŋŋ be ni eta shi yɛ agbó lɛ naa; no mli lɛ, ewu, Manoa bɛ emasɛi.
10 Amrɔ nɔŋŋ ni yoo lɛ sha foi eyakɛɛ ewu lɛ akɛ: “Naa! Nuu lɛ ni ba miŋɔɔ nyɛsɛɛ ko lɛ, ejie ehe kpo etsɔɔ mi ekoŋŋ.”+
11 Kɛkɛ ni Manoa te shi ni ekɛ eŋa lɛ tee. Eba nuu lɛ ŋɔɔ ni ebi lɛ akɛ: “Bo ji mɔ ni kɛ miŋa wie lɛ?” Ekɛɛ akɛ: “Mi ni.”
12 Kɛkɛ ni Manoa kɛɛ akɛ: “Owiemɔi lɛ aba mli! Te gbekɛ lɛ baahi shi ahã tɛŋŋ, ni mɛni ebaatsu?”+
13 No hewɔ lɛ, Yehowa bɔfo lɛ kɛɛ Manoa akɛ: “Esa akɛ oŋa lɛ atsi ehe kɛje nibii fɛɛ ni mikɛɛ lɛ lɛ ahe.+
14 Esaaa akɛ eyeɔ nɔ ko nɔ ko ni anáa kɛjɛɔ wain tso mli, esaaa akɛ enuɔ wain loo dãa ni wa ko,+ ni esaaa akɛ eyeɔ nɔ ko ni he tseee hu.+ Eye nɔ fɛɛ nɔ ni mifã lɛ lɛ nɔ.”
15 Ni Manoa kɛɛ Yehowa bɔfo lɛ akɛ: “Ofainɛ, mɛɛ ni wɔsaa abotia ni edako tsɔ ko wɔhã bo.”+
16 Shi Yehowa bɔfo lɛ kɛɛ Manoa akɛ: “Kɛ́ mimɛ po lɛ, miyeŋ oniyenii lɛ; shi kɛ́ ootao okɛ shãa afɔle ahã Yehowa lɛ, obaanyɛ okɛhã.” No mli lɛ, Manoa leee akɛ Yehowa bɔfo ni.
17 Kɛkɛ ni Manoa bi Yehowa bɔfo lɛ akɛ: “Te atsɛɔ bo tɛŋŋ,+ koni kɛ́ owiemɔ lɛ ba mli lɛ wɔwo ohiɛ nyam?”
18 Shi Yehowa bɔfo lɛ kɛɛ lɛ akɛ: “Mɛni hewɔ obiɔ migbɛ́i? Ejaakɛ migbɛ́i yɛ naakpɛɛ.”
19 Kɛkɛ ni Manoa ŋɔ abotia ni edako tsɔ lɛ kɛ ŋmaa* afɔle lɛ ni ekɛshã afɔle yɛ tɛsaa lɛ nɔ ehã Yehowa. Ni eefee* nɔ ko ni yɔɔ naakpɛɛ; no mli lɛ, Manoa kɛ eŋa lɛ miikwɛ.
20 Be ni lalilɛi lɛ yaa ŋwɛi kɛjɛɔ afɔleshaa latɛ lɛ nɔ lɛ, Yehowa bɔfo lɛ tsɔ lalilɛi lɛ mli yɛ afɔleshaa latɛ lɛ nɔ ekwɔ kɛtee ŋwɛi; no mli lɛ, Manoa kɛ eŋa lɛ miikwɛ. Amrɔ nɔŋŋ ni amɛkɛ amɛhiɛ bumɔ shi.
21 Yehowa bɔfo lɛ ejieee ehe kpo etsɔɔɔ Manoa kɛ eŋa lɛ dɔŋŋ. Kɛkɛ ni Manoa yɔse akɛ Yehowa bɔfo ni.+
22 Kɛkɛ ni Manoa kɛɛ eŋa lɛ akɛ: “Wɔbaagboi kɛ̃, ejaakɛ wɔna Nyɔŋmɔ.”+
23 Shi eŋa lɛ kɛɛ lɛ akɛ: “Eji Yehowa miitao egbe wɔ kulɛ, eheŋ shãa afɔle lɛ kɛ niyenii afɔle lɛ yɛ wɔdɛŋ,+ ni kulɛ ehãŋ wɔna nibii nɛɛ fɛɛ, ni kulɛ ekɛŋ wɔ nibii nɛɛ ateŋ eko eko hu.”
24 Sɛɛ mli lɛ, yoo lɛ fɔ binuu, ni ewo lɛ Samson;+ ni Yehowa tee nɔ ejɔɔ gbekɛ nuu lɛ be ni edaa lɛ.
25 Ni Yehowa mumɔ lɛ bɔi nitsumɔ yɛ enɔ+ yɛ Mahane-dan,+ ni yɔɔ Zora kɛ Eshtaol teŋ lɛ.+
Shishigbɛ Niŋmaa
^ Eshishi ji, “mɔ ni ejɔɔ ehe nɔ; mɔ ni ajie lɛ ato afã.”
^ Hebri sht. ŋm., “musu.”
^ Hebri sht. ŋm., “musu.”
^ Eshishi ji, “mɔ ni ejɔɔ ehe nɔ; mɔ ni ajie lɛ ato afã.”
^ Ŋmaa ní awieɔ he yɛ biɛ lɛ ji wiiti, abele, omɔ, kɛ amɛhenɔi lɛ eko.
^ Loo “Yehowa miifee.”
