Bɔfoi Lɛ Anitsumɔi 5:1-42
5 Shi nuu ko ni atsɛɔ lɛ Anania, kɛ eŋa Safira hɔ̃ɔ amɛshikpɔŋ ko.
2 Shi ekɛ shika ni ená lɛ eko to sɛɛ, ni eŋa hu le he eko, ni ekɛ nɔ ni shwɛ lɛ ba ni ekɛbashwie bɔfoi lɛ anaji anaa.+
3 Shi Petro kɛɛ: “Anania, mɛni hewɔ Satan eyi otsuiŋ obɔ koni omale+ otsɔɔ mumɔ krɔŋkrɔŋ+ lɛ ni okɛ shikpɔŋ lɛ shika lɛ eko ato sɛɛ lɛ?
4 Bei abɔ ni eyɔɔ odɛŋ lɛ, ani jeee onɔ ni? Ni be ni ohɔ̃ɔ hu lɛ, ani shika lɛ jeee bo diɛŋtsɛ onɔ ni? Mɛni hewɔ oto nɛkɛ yiŋ yɛ otsuiŋ? Jeee gbɔmɛi omale otsɔɔ nɛɛ, shi Nyɔŋmɔ moŋ ni.”
5 Be ni Anania nu wiemɔi nɛɛ, egbee shi* ni egbo. Ni gbeyei kpele mɔmɔ mɛi fɛɛ ni nu lɛ.
6 Kɛkɛ ni oblahii lɛ te shi, ni amɛkɛ mamai bala lɛ, ni amɛwó lɛ kɛje kpo ni amɛyafu lɛ.
7 Agbɛnɛ, aaafee ŋmɛlɛtswai etɛ sɛɛ lɛ, eŋa ba jɛmɛ, shi eleee nɔ ni eba.
8 Petro bi lɛ akɛ: “Kɛɛmɔ mi, ani nɛkɛ ji bɔ ni nyɛyi enyɔ lɛ hɔ̃ɔ shikpɔŋ lɛ nyɛhe?” Ekɛɛ akɛ: “Hɛɛ, nɛkɛ ni.”
9 No hewɔ lɛ, Petro kɛɛ lɛ akɛ: “Mɛni hewɔ nyɛyi enyɔ lɛ fɛɛ nyɛkpaŋ akɛ nyɛbaaka Yehowa* mumɔ lɛ? Naa! Mɛi ni yafu owu lɛ anaji yɔɔ shinaa lɛ naa lɛ, ni amɛbaawó bo hu kɛya.”
10 Amrɔ nɔŋŋ lɛ, egbee shi* yɛ Petro naji anaa ni egbo. Be ni oblahii lɛ ba mli lɛ, amɛbana akɛ egbo, ni amɛwó lɛ kɛje kpo ni amɛyafu lɛ yɛ ewu lɛ masɛi.
11 No hewɔ lɛ, gbeyei kpele mɔ asafo muu lɛ fɛɛ kɛ mɛi fɛɛ ni nu nibii nɛɛ ahe lɛ.
12 Agbɛnɛ hu, atsɔ bɔfoi lɛ aniji anɔ atee nɔ afee okadii kɛ naakpɛɛ nii babaoo yɛ maŋbii lɛ ateŋ;+ ni amɛ fɛɛ amɛkpeɔ yɛ Solomon Ablanaa lɛ nɔ.+
13 Lɛɛlɛŋ, mɛi krokomɛi lɛ ateŋ mɔ ko mɔ ko náaa ekãa ni eyafata amɛhe; shi maŋbii lɛ wieɔ amɛhe ekpakpa.
14 Ni mɛi ni heɔ Nuŋtsɔ lɛ nɔ amɛyeɔ, hii kɛ yei babaoo, bafataa amɛhe.+
15 Amɛkɛ helatsɛmɛi po baa gbɛjegbɛi wuji lɛ anɔ ni amɛkɛ amɛ bashwieɔ sai kɛ saatsei bibii anɔ, koni kɛ́ Petro miiho lɛ, ehɔɔŋ kɛkɛ atsɔ amɛteŋ mɛi komɛi anɔ.+
16 Agbɛnɛ hu, mɛi babaoo jɛɔ maji ni jwere Yerusalem hewɔ lɛ amli amɛbaa ni amɛbabuaa amɛhe naa, ni amɛkɛ helatsɛmɛi kɛ mɛi ni mumɔi ni he tseee gbaa amɛnaa lɛ baa, ni atsaa amɛ fɛɛ.
17 Shi osɔfonukpa lɛ kɛ mɛi fɛɛ ni fata ehe, ni ji Sadukifoi lɛ ajamɔ kuu lɛ mli bii lɛ te shi kɛ awuŋayeli babaoo.
18 Ni amɛmɔmɔ bɔfoi lɛ ni amɛkɛ amɛ yawo maŋ tsuŋwoohe lɛ.+
19 Shi nyɔɔŋ lɛ mli lɛ, Yehowa* bɔfo gbele tsuŋwoohe lɛ shinai lɛ,+ ni ejie amɛ, ni ekɛɛ:
20 “Nyɛyaa nyɛyadamɔa shi yɛ sɔlemɔ shĩa lɛ, ni nyɛyaa nɔ nyɛwiea wiemɔi fɛɛ ni kɔɔ wala nɛɛ he lɛ nyɛtsɔa maŋbii lɛ.”
21 Be ni amɛnu enɛ lɛ, amɛbote sɔlemɔ shĩa lɛ leebi maŋkpa ni amɛbɔi nitsɔɔmɔ.
Agbɛnɛ, be ni osɔfonukpa lɛ kɛ mɛi ni fata ehe lɛ ba lɛ, amɛtsɛ Sanhedrin* lɛ kɛ Israel onukpai lɛ fɛɛ kɛkpe, ni amɛtsu kɛtee tsuŋwoohe lɛ koni ayajie bɔfoi lɛ kɛba amɛhiɛ.
22 Shi be ni bulɔi lɛ shɛ jɛmɛ lɛ, amɛnaaa amɛ yɛ tsuŋwoohe lɛ. No hewɔ lɛ, amɛku amɛsɛɛ ni amɛbabɔ amaniɛ
23 amɛkɛɛ: “Wɔna akɛ aŋa tsuŋwoohe lɛ naa kpɛŋŋ, ni bulɔi lɛ damɔ shinai lɛ anaa, shi be ni wɔgbele lɛ, wɔnaaa mɔ ko yɛ mli.”
24 Anɔkwa, be ni sɔlemɔ shĩa nɔkwɛlɔ lɛ kɛ osɔfoi hiɛnaanɔbii lɛ fɛɛ nu wiemɔi nɛɛ, amɛhiɛ fee amɛ yaa yɛ bɔ ni enɛ naa baayakpa ahã lɛ hewɔ.
25 Shi mɔ ko ba ni ebabɔ amɛ amaniɛ akɛ: “Naa! Hii lɛ ni nyɛkɛ amɛ wo tsuŋwoohe lɛ yɛ sɔlemɔ shĩa lɛ, amɛdamɔ shi ni amɛmiitsɔɔ maŋbii lɛ nii.”
26 Kɛkɛ ni sɔlemɔ shĩa lɛ nɔkwɛlɔ lɛ kɛ ebulɔi lɛ yiŋ amɛtee ni amɛyamɔ amɛ kɛba, shi jeee nɔnyɛɛ naa, ejaakɛ amɛmiishe gbeyei akɛ maŋbii lɛ baatswia amɛ tɛi.+
27 No hewɔ lɛ, amɛkɛ amɛ ba ni amɛkɛ amɛ badamɔ Sanhedrin lɛ hiɛ. Ni osɔfonukpa lɛ bibii amɛ saji
28 ni ekɛɛ: “Wɔwo nyɛ kitã veveeve akɛ nyɛkatsɔa nii yɛ gbɛ́i nɛɛ mli dɔŋŋ,+ shi naa! nyɛhã Yerusalem eyi obɔ kɛ nyɛtsɔɔmɔ lɛ, ni nyɛtswa nyɛfai shi akɛ nyɛkɛ nuu nɛɛ lá baaba wɔnɔ.”+
29 Petro kɛ bɔfoi krokomɛi lɛ hã amɛ hetoo akɛ: “Esa akɛ wɔbo Nyɔŋmɔ moŋ toi akɛ nɔyelɔ fe gbɔmɛi.+
30 Wɔtsɛmɛi lɛ a-Nyɔŋmɔ lɛ tee Yesu, mɔ ni nyɛsɛŋ lɛ yɛ tso jaŋŋ* nɔ, ni nyɛgbe lɛ lɛ shi.+
31 Nyɔŋmɔ wó mɔ nɛ nɔ akɛ Hiɛnyiɛlɔ-Nukpa+ kɛ Yiwalaherelɔ+ kɛtee eninejurɔ nɔ,+ koni Israel atsake amɛtsui ni akɛ amɛhe eshai ake amɛ.+
32 Ni wɔji saji nɛɛ ahe odasefoi,+ ni nakai nɔŋŋ ji mumɔ krɔŋkrɔŋ+ lɛ hu ni Nyɔŋmɔ kɛhãa mɛi ni boɔ lɛ toi akɛ nɔyelɔ lɛ.”
33 Be ni amɛnu enɛ lɛ, amɛmli wo la* ni amɛtao akɛ amɛgbe amɛ.
34 Shi Farisifonyo ko ni atsɛɔ lɛ Gamaliel+ lɛ te shi edamɔ shi yɛ Sanhedrin lɛ mli; eji Mlatsɔɔlɔ ni maŋbii lɛ fɛɛ buɔ lɛ waa, ni efã akɛ akɛ hii lɛ aje kpo fioo.
35 Ni ekɛɛ amɛ akɛ: “Israel hii, nyɛkwɛa jogbaŋŋ yɛ nɔ ni nyɛto nyɛyiŋ akɛ nyɛbaafee hii nɛɛ he.
36 Akɛ nɔkwɛmɔnɔ lɛ, be ko ni eho lɛ, Teuda te shi ni ekɛɛ mɔ ko ji lɛ, ni hii komɛi, aaafee 400 yafata ehe. Shi agbe lɛ, ni mɛi ni nyiɛɔ esɛɛ lɛ fɛɛ gbɛ amɛshwã ni anaaa amɛ dɔŋŋ.
37 Yɛ mɔ nɛ sɛɛ lɛ, Yuda, Galileanyo lɛ te shi yɛ gbɛ́iŋmaa gbii lɛ amli, ni egbala mɛi kɛnyiɛ esɛɛ. Nakai nuu lɛ hu hiɛ kpãtã, ni mɛi fɛɛ ni nyiɛɔ esɛɛ lɛ gbɛ amɛshwã.
38 No hewɔ lɛ, yɛ shihilɛ ni yaa nɔ amrɔ nɛɛ mli lɛ, miikɛɛ nyɛ akɛ, nyɛkɛ nyɛhe akawoa hii nɛɛ asane mli, shi nyɛshia amɛ. Ejaakɛ kɛ́ gbɔmɛi adɛŋ yiŋtoo nɛɛ loo nitsumɔ nɛɛ jɛ lɛ, ebaagu;
39 shi kɛ́ Nyɔŋmɔ dɛŋ ejɛ lɛ, nyɛnyɛŋ amɛ nyɛgu.+ Kɛjeee nakai lɛ, no lɛ abaana nyɛ po akɛ mɛi ni kɛ Nyɔŋmɔ diɛŋtsɛ miinɔ.”+
40 Ni amɛbo eŋaawoo lɛ toi, ni amɛtsɛ bɔfoi lɛ, ni amɛgwao* amɛ,+ ni amɛfã amɛ akɛ amɛkpa wiemɔ yɛ Yesu gbɛ́i mli, ni amɛŋmɛɛ amɛhe.
41 No hewɔ lɛ, amɛshi Sanhedrin lɛ hiɛ amɛtee kɛ miishɛɛ babaoo+ ejaakɛ egbɛ́i lɛ hewɔ lɛ, abu amɛ akɛ mɛi ni sa akɛ ashwie amɛhiɛ shi.
42 Ni amɛtee nɔ amɛtsɔɔ nii ni amɛjaje Kristo lɛ, Yesu, he sane kpakpa lɛ daa gbi yɛ sɔlemɔ shĩa lɛ kɛ shĩa fɛɛ shĩa,+ ni amɛkpaaa.+
Shishigbɛ Niŋmaa
^ Loo “eflaŋ.”
^ Kwɛmɔ Saji Krokomɛi A5 lɛ.
^ Loo “eflaŋ.”
^ Kwɛmɔ Saji Krokomɛi A5 lɛ.
^ Sanhedrin lɛ ji Yudafoi asaneyelihe wulu lɛ.
^ Loo “yɛ tso.”
^ Loo “efolɔ amɛtsuiiaŋ.”
^ Loo “amɛyi.”
