Bɔfoi Lɛ Anitsumɔi 3:1-26
3 Agbɛnɛ, Petro kɛ Yohane miikwɔ kɛmiiya sɔlemɔ shĩa lɛ yɛ sɔlemɔ ŋmɛlɛtswaa lɛ mli, ŋmɛlɛtswaa ni ji nɛɛhu lɛ nɔ,*
2 ni atere nuu ko ni ji obubuafo* kɛjɛ fɔmɔ mli. Daa gbi lɛ, amɛkɛ lɛ baŋmɛɔ sɔlemɔ shĩa lɛ shinaa ni atsɛɔ lɛ Fɛfɛo lɛ masɛi, koni enyɛ ebi mɛi ni boteɔ sɔlemɔ shĩa lɛ koni amɛfee lɛ ejurɔ.
3 Be ni ehiŋmɛi gba Petro kɛ Yohane nɔ akɛ amɛmiihe amɛbote sɔlemɔ shĩa lɛ, ebɔi amɛ bimɔ akɛ amɛfee lɛ ejurɔ.
4 Shi Petro kɛ Yohane fɛɛ kwɛ lɛ gãa ni amɛkɛɛ: “Kwɛmɔ wɔ.”
5 No hewɔ lɛ, ekwɛ amɛ gãa kɛ gbɛkpamɔ akɛ ebaaná nɔ ko kɛjɛ amɛdɛŋ.
6 Shi Petro kɛɛ: “Jwiɛtɛi kɛ shika tsuru lɛ, mibɛ eko, shi nɔ ni miyɔɔ lɛ, no mikɛhãa bo nɛɛ. Yɛ Yesu Kristo, Nazaretnyo lɛ gbɛ́i mli lɛ, nyiɛmɔ!”+
7 Kɛkɛ ni emɔ eninejurɔ mli ni ewó enɔ edamɔ shi.+ Amrɔ lɛ, enaji kɛ enanetalɔi lɛ amli wala;+
8 ni ehuru edamɔ shi,+ ni ebɔi nyiɛmɔ, ni ekɛ amɛ bote sɔlemɔ shĩa lɛ ni eenyiɛ ni eetumɔ ni eejie Nyɔŋmɔ yi.
9 Ni maŋbii lɛ fɛɛ na lɛ ni eenyiɛ ni eejie Nyɔŋmɔ yi.
10 Ni amɛyoo lɛ akɛ lɛ ji nuu ni tsutsu ko lɛ etaa sɔlemɔ shĩa lɛ Agbó Fɛfɛo lɛ naa ebiɔ ni afee lɛ ejurɔ lɛ,+ ni amɛhe jɔ̃ amɛhe ni amɛnaa kpɛ amɛhe waa diɛŋtsɛ yɛ nɔ ni eba nuu lɛ nɔ lɛ hewɔ.
11 Be ni nuu nɛɛ hiɛ Petro kɛ Yohane mli lolo lɛ, maŋbii lɛ fɛɛ ké yuu kɛba amɛŋɔɔ yɛ he ni atsɛɔ jɛmɛ Solomon Ablanaa lɛ nɔ,+ ni amɛnaa ekpɛ amɛhe waa.
12 Be ni Petro na enɛ lɛ, ekɛɛ maŋbii lɛ akɛ: “Israel hii, mɛni hewɔ enɛ feɔ nyɛ naakpɛɛ nɛkɛ, ni mɛni hewɔ nyɛkwɛɔ wɔ tamɔ nɔ ni wɔ diɛŋtsɛ wɔhewalɛ naa loo wɔ-Nyɔŋmɔjamɔ naa wɔkɛhã nuu nɛɛ nyiɛɔ nɛɛ?
13 Abraham kɛ Isak kɛ Yakob Nyɔŋmɔ lɛ,+ wɔtsɛmɛi lɛ a-Nyɔŋmɔ lɛ, ewo e-Tsulɔ Yesu hiɛ nyam,+ mɔ ni nyɛkɛ lɛ hã+ ni nyɛkwa lɛ yɛ Pilato hiɛ, eyɛ mli akɛ Pilato kpɛ mli akɛ ebaaŋmɛɛ ehe lɛ.
14 Hɛɛ, nyɛkwa nakai mɔ krɔŋkrɔŋ kɛ jalɔ lɛ, ni nyɛbi ni akɛ nuu ni ji gbɔmɔgbelɔ lɛ moŋ ahã nyɛ,+
15 ni nyɛgbe wala Hiɛnyiɛlɔ-Nukpa lɛ.+ Shi Nyɔŋmɔ tee lɛ shi kɛjɛ gbohii ateŋ, ni wɔji anɔkwa sane nɛɛ he odasefoi.+
16 Ni atsɔ egbɛ́i lɛ nɔ, kɛ agbɛnɛ hu hemɔkɛyeli ni wɔyɔɔ yɛ egbɛ́i lɛ mli lɛ nɔ ahã nuu nɛɛ ni nyɛnaa ni nyɛle lɛ hu lɛ ená hewalɛ. Emli hemɔkɛyeli lɛ ji nɔ ni ehã nuu nɛɛ ená hewalɛ yɛ nyɛ fɛɛ nyɛhiɛ nɛɛ.
17 Ni agbɛnɛ, nyɛmimɛi, mile akɛ lé ni nyɛleee hewɔ ni nyɛfee lɛ,+ tamɔ nyɛnɔyelɔi lɛ hu fee lɛ nɔŋŋ.+
18 Shi yɛ nɛkɛ gbɛ nɔ lɛ, Nyɔŋmɔ ehã nibii ni etsɔ gbalɔi lɛ fɛɛ anaa etsɔ hiɛ ejaje akɛ, e-Kristo lɛ baana nɔ lɛ eba mli.+
19 “No hewɔ lɛ, nyɛtsakea nyɛtsui+ ni nyɛkua nyɛsɛɛ+ koni agbe nyɛhe eshai lɛ,+ koni Yehowa diɛŋtsɛ* ahã nyɛ hejɔlɛ daa,
20 koni etsu Kristo lɛ, Yesu, mɔ ni ahala ahã nyɛ lɛ kɛba.
21 Mɔ nɛ ji mɔ ni esa akɛ ŋwɛi ato lɛ kɛyashi bei ni abaasaa nibii fɛɛ ni Nyɔŋmɔ wie he yɛ egbalɔi krɔŋkrɔŋi ni hi shi yɛ blema lɛ anaa lɛ.
22 Yɛ anɔkwale mli lɛ, Mose kɛɛ akɛ: ‘Yehowa,* nyɛ-Nyɔŋmɔ lɛ, baawó gbalɔ ko ni tamɔ mi kɛbaajɛ nyɛnyɛmimɛi lɛ ateŋ ahã nyɛ.+ Nyɛboa nɔ fɛɛ nɔ ni ebaakɛɛ nyɛ lɛ toi.+
23 Anɔkwa, mɔ fɛɛ mɔ* ni booo nakai Gbalɔ lɛ toi lɛ, abaakpãtã ehiɛ kwraa kɛbaaje mɛi lɛ ateŋ.’+
24 Ni gbalɔi babaoo ni wie lɛ fɛɛ, kɛjɛ Samuel kɛ mɛi ni nyiɛ esɛɛ lɛ anɔ lɛ, amɛ hu amɛjaje gbii nɛɛ faŋŋ amɛtsɔɔ.+
25 Nyɛji gbalɔi lɛ kɛ kpaŋmɔ ni Nyɔŋmɔ kɛ nyɛtsɛmɛi lɛ kpaŋ lɛ bii,+ be ni ekɛɛ Abraham akɛ: ‘Ni oseshi* lɛ nɔ abaatsɔ ajɔɔ shikpɔŋ lɛ nɔ wekui fɛɛ’ lɛ.+
26 Be ni Nyɔŋmɔ tsu e-Tsulɔ lɛ, etsu lɛ kɛba nyɛŋɔɔ klɛŋklɛŋ,+ koni ebajɔɔ nyɛ ni ehã nyɛteŋ mɔ fɛɛ mɔ aku esɛɛ kɛjɛ enifɔjianii lɛ amli.”
Shishigbɛ Niŋmaa
^ Ni ji, aaafee shwane ŋmɛji 3.
^ Loo “akpaketsɛ.”
^ Greek sht. ŋm., “koni Yehowa hiɛ.” Kwɛmɔ Saji Krokomɛi A5 lɛ.
^ Kwɛmɔ Saji Krokomɛi A5 lɛ.
^ Loo “susuma fɛɛ susuma.”
^ Greek sht. ŋm., “odumɔwu.”
