Abɛi 26:1-28
26 Bɔ ni snoo ji yɛ latsa beiaŋ kɛ bɔ ni nugbɔnɛmɔ hu ji yɛ nikpamɔ beiaŋ lɛ,Nakai nɔŋŋ hiɛnyam esaaa kwashia.+
2 Bɔ ni loofɔlɔ ejooo foi efolo, ni nyɔŋmɔbitɛte hu filikiii efolo lɛ,Nakai nɔŋŋ loomɔ hu baaa efolo.*
3 Kpãa sa okpɔŋɔ, ni manyoflɛ hu sa teji+Ni tso sa kwashiai akotosɛɛ.+
4 Kaahã kwashia hetoo yɛ ebuulufeemɔ lɛ naa,Koni okatsɔ tamɔ lɛ.*
5 Hã kwashia hetoo yɛ ebuulufeemɔ lɛ naa,Koni ekabu ehe hiɛshikalɔ.+
6 Bɔ ni mɔ ko ni kumɔɔ enaji kɛyeɔ ehe awui lɛ* ji lɛ,Nakai mɔ ni kɛ saji woɔ kwashia dɛŋ lɛ ji.
7 Bɔ ni obubuafo naji yɔɔ* ehe efolo lɛ,Nakai abɛ ji yɛ kwashiai adaaŋ.+
8 Bɔ ni tɛ ni afi akpɛtɛ akromia he ji lɛ,Nakai kwashia hiɛnyam ni awoɔ lɛ ji.+
9 Bɔ ni ŋmei tso yɔɔ yɛ dãatɔlɔ dɛŋ lɛ,Nakai abɛ ji yɛ kwashiai adaaŋ.
10 Bɔ ni gãitsɛlɔ ni tsɛ̃ɔ gãi kɛkɛ kɛpilaa mɛi* ji lɛ,Nakai mɔ ni bɔɔ kwashia loo mɔ fɛɛ mɔ kɛkɛ ni miiho apaa lɛ ji.
11 Bɔ ni gbee kuɔ esɛɛ kɛyaa eshwee he lɛ,Nakai kwashia kuɔ esɛɛ eyafeɔ ebuuluianii lɛ ekoŋŋ.+
12 Ani ona mɔ ko ni buɔ ehe hiɛshikalɔ?+
Hiɛnɔkamɔ yɛ kɛhã kwashia fe lɛ.
13 Anihaolɔ kɛɔ akɛ: “Jata* yɛ gbɛ lɛ nɔ,Jata yɛ henaabuamɔhe lɛ!”+
14 Bɔ ni shinaa tsɔmɔɔ yɛ esɛɛ dadei* anɔ lɛ,Nakai anihaolɔ tsɔmɔɔ ehe yɛ esaa nɔ.+
15 Anihaolɔ kɛ enine ewo kã mli,Shi edaaŋ kɛkɛ ni ekɛaawo lɛ, eetɔ lɛ.+
16 Anihaolɔ susuɔ akɛ ehiɛ kã shiFe mɛi kpawo ni hãa hetoo ni jwɛŋmɔ yɔɔ mli.
17 Bɔ ni mɔ ni mɔɔ gbee toii amli ji lɛ,Nakai mɔ ni miiho ni emli fuɔ yɛ béi ni kɔɔɔ ehe lɛ he* lɛ ji.+
18 Bɔ ni sɛkɛyelɔ ni fɔ̃ɔ tawuu nii kɛ amɛnaa la, ni etsɛ̃ɔ gãimlibii, kɛ gbele* ji lɛ,
19 Nakai mɔ ni lakaa enyɛmi gbɔmɔ ni ekɛɔ akɛ, “Shwɛ kɛkɛ mishwɛɔ!” lɛ ji.+
20 Kɛ́ lai tã lɛ, la gboɔ,Ni kɛ́ mɔ ni wieɔ mɔ he efɔŋ bɛ lɛ, béi sɛɛ foɔ.+
21 Bɔ ni ŋai hãa la tsɛ̃ɔ ni lai hãa la tsoɔ lɛ,Nakai mɔ ni sumɔɔ béi lɛ hãa béi naa waa.+
22 Mɔ ni wieɔ mɔ he efɔŋ lɛ, ewiemɔi tamɔ niyenii* ni ŋɔɔ;*Amiɔ lɛ oyayaayai awoɔ musuŋ.+
23 Bɔ ni jwiɛtɛi ni ha sũ nii he ji lɛ,Nakai wiemɔi ni ŋɔɔ ni jɛ tsui fɔŋ mli lɛ* ji.+
24 Mɔ ni nyɛɔ mɛi lɛ, ekɛ enaabu tsimɔɔ nɔ,Shi ekɛ lakamɔ toɔ etsui mli.
25 Eyɛ mli akɛ ewieɔ wiemɔi ni yɔɔ nyam moŋ, shi kaahe lɛ oye,Ejaakɛ nibii kpawo ni ahiɔ yɛ etsui mli.*
26 Eyɛ mli akɛ ekɛ lakamɔ etsimɔ enyɛɛ lɛ nɔ moŋ,Shi abaajie enɔ fɔŋ lɛ kpo yɛ asafo lɛ hiɛ.
27 Mɔ ni tsaa bu lɛ, ebaagbee mli,Ni mɔ ni kokloɔ tɛ kɛyaa afã lɛ—tɛ lɛ baaku sɛɛ kɛba enɔ.+
28 Malemɔ lilɛi nyɛɔ mɛi ni eyeɔ amɛ awui lɛ,Ni naabu ni woɔ mɔ yiteŋ mulu lɛ, ekɛ hiɛkpatamɔ baa.+
Shishigbɛ Niŋmaa
^ Shishitsɔɔmɔi komɛi kɛɔ akɛ, “Nakai nɔŋŋ loomɔ ni alomɔɔ mɔ ni sane ko bɛ ehe lɛ hu baŋ mli.”
^ Loo “Koni okɛ lɛ akaye egbɔ.”
^ Hebri sht. ŋm., “nuɔ yiwalɛ.”
^ Loo “tsotsoro.”
^ Loo “gãitsɛlɔ ni pilaa mɔ fɛɛ mɔ.”
^ Loo “Jata oblanyo.”
^ Loo “iŋtsisii.”
^ Shishitsɔɔmɔi komɛi kɛɔ akɛ, “ni ekɛ ehe woɔ béi ni kɔɔɔ ehe lɛ mli.”
^ Loo “gãimlibii ni gbeɔ mɔ.”
^ Loo “atrɔmai.”
^ Loo “tamɔ nii ni ayeɔ lɛ hwaŋhwaŋ.”
^ Hebri sht. ŋm., “Nakai ekãa naabu kɛ tsui fɔŋ.”
^ Loo “Ejaakɛ ahiɔ etsui kwraa.”
