Abɛi 25:1-28
25 Enɛɛmɛi hu ji Solomon+ abɛi ni Yuda maŋtsɛ Hezekia+ hii lɛ ŋmala ekoŋŋ ni amɛbua naa:
2 Eji anunyam kɛhã Nyɔŋmɔ akɛ ekɛ sane aaato,+Ni eji anunyam kɛhã maŋtsɛmɛi akɛ amɛaatao sane mli.
3 Bɔ ni ŋwɛi kwɔ ni shikpɔŋ lɛ hu mli kwɔ lɛ,Nakai anyɛɛɛ maŋtsɛmɛi atsui mli atao.
4 Jiemɔ jwiɛtɛi lɛ mli muji lɛ,Ni ebaatsɔ jwiɛtɛi krɔŋŋ.+
5 Jiemɔ mɔ fɔŋ lɛ yɛ maŋtsɛ lɛ hiɛ,Ni emaŋtsɛ sɛi lɛ baama shi shiŋŋ yɛ jalɛ mli.+
6 Kaawo bo diɛŋtsɛ ohiɛ nyam yɛ maŋtsɛ hiɛ,+Ni kaayata gbɔmɛi wuji ashitaramɔhe,+
7 Ejaakɛ ehi akɛ ebaakɛɛ bo akɛ, “Ba ni obata ŋwɛigbɛ nɛɛ,”
Fe nɔ ni ebaawo bo hiɛgbele yɛ ablade hiɛ.+
8 Kaaye ohe oyai ni okɛ sane tee saneyelihe,Ejaakɛ te obaafee tɛŋŋ, kɛ́ sɛɛ mli lɛ mɔ lɛ bawo bo hiɛgbele?+
9 Okɛ mɔ lɛ sɔŋŋ awie he,+Shi kaajie sane ni akɛɛ bo pɛ lɛ kpo,*+
10 Koni mɔ ni boɔ toi lɛ akawo bo hiɛgbeleNi obatsɔ mɔ ko ni gbɛɔ sane fɔŋ* ni anyɛɛɛ sɛɛ agbala eshwãa.
11 Wiemɔ ni awieɔ yɛ be ni sa mli lɛ+Eyɛ fɛo tamɔ apol ni akɛ shika tsuru efee ewo jwiɛtɛi nii amli.*
12 Tamɔ bɔ ni shika tsuru toiiaŋnii kɛ shika tsuru ni atsuu he jwine ji lɛ,Nakai nɔŋŋ hiɛshikalɔ ni jajeɔ mɔ lɛ ji kɛhã mɔ ni boɔ lɛ toi lɛ.+
13 Tamɔ bɔ ni snoo ni mli ejɔ ŋanii ji yɛ nikpamɔ gbi nɔ lɛ,Nakai tsulɔ anɔkwafo ji kɛhã mɔ ni tsu lɛ lɛ,Ejaakɛ ehãa enuŋtsɔ lɛ* tsui nyɔɔ emli.+
14 Tamɔ bɔ ni atatui kɛ kɔɔyɔɔ ni nugbɔnɛmɔ enyiɛɛɛ sɛɛ ji lɛ,Nakai mɔ ni shwãa akɛ ebaake nii shi enáaa eke* lɛ ji.+
15 Tsuishitoo akɛkɔneɔ hiɛnyiɛlɔ yiŋ,Ni naajɔlɛ lilɛi lɛ, enyɛɔ ekuɔ wu.+
16 Kɛ́ oná wo lɛ, ye bɔ ni baashɛ onaa,Ejaakɛ kɛ́ oye fe nine lɛ, obaashwe fɛɛ oshwie.+
17 Onane akafɔ onyɛmi gbɔmɔ shĩa nyiɛmɔ,Koni osane akaje etsine ni enyɛ bo.
18 Mɔ ni yeɔ amale odase eshiɔ enyɛmi gbɔmɔ lɛ,+Etamɔ tawuu tsokpoti kɛ klante kɛ gãimlibi ni naa ba.
19 Kɛ́ okɛ ohiɛ fɔ̃ gbɔmɔ ni anyɛɛɛ amu afɔ enɔ* nɔ yɛ haomɔ beiaŋ lɛ,Etamɔ nyanyɔŋ ni eku ni akɛmiita nii loo nane ni nyɛɛɛ shi adamɔ ni akɛmiinyiɛ.
20 Mɔ ni láa lalai ehãa tsui ni werɛ eho ehe lɛ,+Etamɔ mɔ ko ni jieɔ etade yɛ fɛi mli,Kɛ viniga ni akɛshwie soda* nɔ.
21 Kɛ́ hɔmɔ miiye mɔ ni nyɛɔ bo lɛ, hã lɛ niyenii* ni eye;Kɛ́ kumai miiye lɛ lɛ, hã lɛ nu ni enu,+
22 Ejaakɛ ŋai kɛ la naa obuaa oshwieɔ eyiteŋ lɛ,*+Ni Yehowa baajɔɔ bo.
23 Bɔ ni kooyi kɔɔyɔɔ kɛ nugbɔnɛmɔ baa lɛ,Nakai lilɛi ni wieɔ mɛi ahe lɛ kɛ hiɛtumɔ baa.+
24 Ehi akɛ obaayahi tsuyiteŋ koji lɛ eko mliFe nɔ ni okɛ yoo* béilɔ* baahi shĩa kome mli.+
25 Bɔ ni nu ni mli ejɔ ji kɛhã susuma* ni etɔ lɛ lɛ,Nakai sane kpakpa ni jɛ maŋsɛɛ shɔŋŋ lɛ ji.+
26 Jalɔ ni ŋmɛɔ ehe ehãa mɔ fɔŋ* lɛ,Etamɔ nuhiŋmɛi ni hiɛ ewo muji kɛ nubu ni awo mli muji.
27 Wo babaoo yeli ehiii,+Ni nakai nɔŋŋ kɛ́ mɔ ko tao anunyam ehã lɛ diɛŋtsɛ ehe lɛ, ejeee anunyam kpakpa.+
28 Mɔ ni nyɛɛɛ etsui* nɔ eye lɛ,Etamɔ maŋ ni akumɔ ni gbogbo bɛ he.+
Shishigbɛ Niŋmaa
^ Loo “mɛi krokomɛi ateemɔŋ saji akpo.”
^ Loo “mɔ ko ni tãa sane fɔŋ ni bɛ mli.”
^ Loo “ewo jwiɛtɛi nii anɔ.”
^ Loo “enuŋtsɔ susuma.”
^ Loo “mɔ ni shwãa yɛ amale nikeenii he.”
^ Shishitsɔɔmɔi komɛi kɛɔ akɛ, “gbɔmɔ ni yeee anɔkwa.”
^ Eji tsofa ni akɛfeɔ samala.
^ Hebri sht. ŋm., “blodo.” Kwɛmɔ Wiemɔi Titrii Amligbalamɔ lɛ.
^ Ni tsɔɔ akɛ, ebaahã mɔ lɛ he ajɔ, ni ebaahã etsuiŋwalɛ lɛ he ajɔ.
^ Loo “ni wieɔ nii ahe; ni suɔ mɔ tsui.”
^ Loo “ŋa.”
^ Kwɛmɔ Wiemɔi Titrii Amligbalamɔ lɛ.
^ Hebri sht. ŋm., “didãa yɛ mɔ fɔŋ hiɛ.”
^ Loo “emumɔ.”
