4 Mose 30:1-16
30 Ni Mose kɛ Israel wekui lɛ anɔ onukpai+ lɛ wie ekɛɛ: “Nɔ ni Yehowa efã nɛ:
2 Kɛ́ nuu ko wo Yehowa shi+ loo ekã kitã+ akɛ ebaatsĩ ehe naa yɛ nɔ ko he* lɛ, ekaku ewiemɔ lɛ mli.+ Efee nɔ fɛɛ nɔ ni ewo shi akɛ ebaafee lɛ.+
3 “Kɛ́ yoo ko wo Yehowa shi loo ekã kitã akɛ ebaatsĩ ehe naa yɛ nɔ ko he be ni eji oblayoo ni eyɔɔ epapa shĩa lolo,
4 ni epapa nu shi ni ewo lɛ loo kitã ni ekã akɛ ebaatsĩ ehe naa yɛ nɔ ko he lɛ, ni epapa ewieee nɔ ko yɛ he lɛ, no lɛ, eshiwoi lɛ fɛɛ baama shi, ni kitã fɛɛ kitã ni ekã akɛ ebaatsĩ ehe naa yɛ nɔ ko he lɛ hu baama shi.
5 Shi kɛji be ni epapa nu akɛ ewo shi loo ekã kitã ko akɛ ebaatsĩ ehe naa yɛ nɔ ko he lɛ, epapa ekpɛlɛɛɛ nɔ lɛ, no lɛ, eshiwoo lɛ emaŋ shi. Yehowa kɛbaake lɛ, ejaakɛ epapa ekpɛlɛɛɛ nɔ.+
6 “Shi kɛ́ ekɛ nuu ko bote gbalashihilɛ mli be mli ni eshiwoo lɛ loo nɔ ni ekɛ oyaiyeli kã kitã akɛ ebaafee lɛ kã enɔ lolo,
7 ni ewu lɛ nu, ni ewieee nɔ ko yɛ he yɛ gbi ni enu lɛ nɔ lɛ, no lɛ, eshiwoi lɛ loo kitã ni ekã akɛ ebaatsĩ ehe naa yɛ nɔ ko he lɛ baama shi.
8 Shi kɛji ewu lɛ ekpɛlɛɛɛ nɔ yɛ gbi ni enu lɛ nɔ lɛ, no lɛ, ebaanyɛ efo shi ni yoo lɛ wo lɛ loo kitã ni ekɛ oyaiyeli kã akɛ ebaatsĩ ehe naa yɛ nɔ ko he lɛ mli,+ ni Yehowa kɛbaake yoo lɛ.
9 “Shi kɛ́ yoo okulafo loo yoo ni ewu eshwie lɛ wo shi ko lɛ, nɔ fɛɛ nɔ ni etsĩ ehe naa yɛ he lɛ baama shi.
10 “Shi kɛ́ yoo ko wo shi loo ekã kitã akɛ ebaatsĩ ehe naa yɛ nɔ ko he be mli ni eyɔɔ ewu shĩa lolo,
11 ni ewu lɛ nu, ni ewieee nɔ ko yɛ he loo ekuuu mli lɛ, no lɛ, eshiwoi lɛ fɛɛ loo kitã ni ekã akɛ ebaatsĩ ehe naa yɛ nɔ ko he lɛ baama shi.
12 Shi kɛji gbi ni ewu lɛ nu lɛ, ewu lɛ fo shiwoo loo kitã ni ekã akɛ ebaatsĩ ehe naa yɛ nɔ ko he lɛ mli kwraa lɛ, no lɛ, shiwoo lɛ loo kitã lɛ emaŋ shi.+ Ewu lɛ efo mli, ni Yehowa kɛbaake yoo lɛ.
13 Shi fɛɛ shi ni yoo ko baawo loo kitã fɛɛ kitã ni ebaakã akɛ ebaatsi ehe kɛje nɔ ko he koni ekɛtsĩ ehe naa yɛ nɔ ko he* lɛ, ewu ji mɔ ni sa akɛ ekpɛlɛ nɔ loo efo mli.
14 Shi kɛ́ gbii ho ni ewu lɛ ewieee nɔ ko kwraa yɛ he lɛ, no lɛ, lɛ hu ekpɛlɛ yoo lɛ shiwoi lɛ fɛɛ loo kitãi fɛɛ ni ekã akɛ ebaatsĩ ehe naa yɛ nɔ ko he lɛ anɔ. Ekpɛlɛ nɔ, ejaakɛ gbi nɔ ni enu akɛ yoo lɛ ewo shi loo ekã kitã lɛ, ewieee nɔ ko yɛ he.
15 Shi kɛ́ sɛɛ mli, ni ji gbi nɔ ni enu lɛ sɛɛ kwraa dani efo mli lɛ, no lɛ, ebaatere yoo lɛ fɔyeli lɛ he sɔ̃ lɛ.+
16 “Enɛɛmɛi ji mlai* ni Yehowa kɛhã Mose ní kɔɔ nuu kɛ eŋa, kɛ tsɛ kɛ ebi oblayoo ni kɛ lɛ yɔɔ shĩa lɛ he lɛ.”
Shishigbɛ Niŋmaa
^ Loo “ekã kitã akɛ ekɛ sɔ̃ ko baafɔ̃ esusuma nɔ.”
^ Loo “koni ekɛwa esusuma yi.”
^ Loo “taomɔ nii.”
