4 Mose 26:1-65
-
Akane Israelbii lɛ awekui lɛ shii enyɔ nɔ (1-65)
26 Amanehulu lɛ sɛɛ lɛ,+ Yehowa kɛɛ Mose kɛ Eleazar, osɔfo Aaron binuu lɛ akɛ:
2 “Nyɛkanea Israel maŋ muu lɛ fɛɛ, mɛi ni eye kɛjɛ afii 20 kɛyaa lɛ, yɛ amɛtsɛmɛi ashĩai lɛ anaa, nyɛkanea mɛi fɛɛ ni baanyɛ asɔmɔ akɛ asraafoi yɛ Israel lɛ.”+
3 No hewɔ lɛ, Mose kɛ osɔfo Eleazar+ kɛ amɛ wie yɛ Moab ŋa kpataa lɛ nɔ,+ yɛ Yordan lɛ naa, yɛ Yeriko+ amɛkɛɛ:
4 “Nyɛkanea amɛ, mɛi ni eye kɛjɛ afii 20 kɛyaa lɛ, tamɔ bɔ ni Yehowa fã Mose lɛ pɛpɛɛpɛ.”+
Israelbii ni shi Ejipt shikpɔŋ lɛ nɔ lɛ nɛ:
5 Ruben,+ Israel kromɔbi lɛ; Ruben bihii+ lɛ nɛ: Hanok, lɛ emli Hanokbii lɛ aweku lɛ jɛ; Palu, lɛ emli Palubii lɛ aweku lɛ jɛ;
6 Hezron, lɛ emli Hezronbii lɛ aweku lɛ jɛ; Karmi, lɛ emli Karmibii lɛ aweku lɛ jɛ.
7 Mɛnɛɛmɛi ji Rubenbii lɛ awekui lɛ, ni amɛwebii ni aŋmala amɛgbɛ́ii lɛ ayifalɛ ji 43,730.+
8 Palu binuu ji Eliab.
9 Ni Eliab bihii ji Nemuel kɛ Datan kɛ Abiram. Nɛkɛ Datan kɛ Abiram nɛɛ ji maŋbii lɛ ateŋ mɛi ni ahala, mɛi ni yafata Kora kuu+ lɛ he ní amɛwu amɛshi Mose+ kɛ Aaron, be ni mɛi nɛɛ wu amɛshi Yehowa lɛ.+
10 Ni shikpɔŋ lɛ gbele enaa* ni emi amɛ. Shi Kora lɛ, ekɛ esɛɛfilɔi lɛ fɛɛ gboi be ni la lɛ shã hii 250 lɛ wɛlɛŋŋ lɛ.+ Ni amɛtsɔ nɔkwɛmɔnɔ ni bɔɔ mɔ kɔkɔ.+
11 Shi Kora bihii lɛ gboiii.+
12 Simeon bihii+ lɛ yɛ amɛwekui lɛ anaa nɛ: Nemuel,* lɛ emli Nemuelbii lɛ aweku lɛ jɛ; Yamin, lɛ emli Yaminbii lɛ aweku lɛ jɛ; Yakin, lɛ emli Yakinbii lɛ aweku lɛ jɛ;
13 Zera,* lɛ emli Zerabii lɛ aweku lɛ jɛ; Shaul, lɛ emli Shaulbii lɛ aweku lɛ jɛ.
14 Mɛnɛɛmɛi ji Simeonbii lɛ awekui lɛ, amɛyifalɛ ji 22,200.+
15 Gad bihii+ lɛ yɛ amɛwekui lɛ anaa nɛ: Zefon,* lɛ emli Zefonbii lɛ aweku lɛ jɛ; Hagi, lɛ emli Hagibii lɛ aweku lɛ jɛ; Shuni, lɛ emli Shunibii lɛ aweku lɛ jɛ;
16 Ozni,* lɛ emli Oznibii lɛ aweku lɛ jɛ; Eri, lɛ emli Eribii lɛ aweku lɛ jɛ;
17 Arod,* lɛ emli Arodbii lɛ aweku lɛ jɛ; Areli, lɛ emli Arelibii lɛ aweku lɛ jɛ.
18 Mɛnɛɛmɛi ji Gad bihii lɛ awekui lɛ, ni amɛwebii ni aŋmala amɛgbɛ́ii lɛ ayifalɛ ji 40,500.+
19 Yuda bihii+ ji Er kɛ Onan.+ Shi Er kɛ Onan gboi yɛ Kanaan shikpɔŋ lɛ nɔ.+
20 Ni Yuda bihii lɛ yɛ amɛwekui lɛ anaa nɛ: Shela,+ lɛ emli Shelabii lɛ aweku lɛ jɛ; Perez,+ lɛ emli Perezbii lɛ aweku lɛ jɛ; Zera,+ lɛ emli Zerabii lɛ aweku lɛ jɛ.
21 Ni Perez bihii ji: Hezron,+ lɛ emli Hezronbii lɛ aweku lɛ jɛ; Hamul,+ lɛ emli Hamulbii lɛ aweku lɛ jɛ.
22 Mɛnɛɛmɛi ji Yuda wekui lɛ, ni amɛwebii ni aŋmala amɛgbɛ́ii lɛ ayifalɛ ji 76,500.+
23 Isakar bihii+ lɛ yɛ amɛwekui lɛ anaa nɛ: Tola,+ lɛ emli Tolabii lɛ aweku lɛ jɛ; Puva, lɛ emli Puvabii lɛ aweku lɛ jɛ;
24 Yashub,* lɛ emli Yashubbii lɛ aweku lɛ jɛ; Shimron, lɛ emli Shimronbii lɛ aweku lɛ jɛ.
25 Mɛnɛɛmɛi ji Isakar wekui lɛ, ni amɛwebii ni aŋmala amɛgbɛ́ii lɛ ayifalɛ ji 64,300.+
26 Zebulon bihii+ lɛ yɛ amɛwekui lɛ anaa nɛ: Sered, lɛ emli Seredbii lɛ aweku lɛ jɛ; Elon, lɛ emli Elonbii lɛ aweku lɛ jɛ; Yahleel, lɛ emli Yahleelbii lɛ aweku lɛ jɛ.
27 Mɛnɛɛmɛi ji Zebulonbii lɛ awekui lɛ, ni amɛwebii ni aŋmala amɛgbɛ́ii lɛ ayifalɛ ji 60,500.+
28 Yosef bihii+ lɛ yɛ amɛwekui lɛ anaa nɛ: Manase kɛ Efraim.+
29 Manase+ bihii lɛ nɛ: Makir,+ lɛ emli Makirbii lɛ aweku lɛ jɛ; ni Makir fɔ Gilead;+ ni Gilead lɛ, lɛ emli Gileadbii lɛ aweku lɛ jɛ.
30 Gilead bihii lɛ nɛ: Yezer, lɛ emli Yezerbii lɛ aweku lɛ jɛ; Helek, lɛ emli Helekbii lɛ aweku lɛ jɛ;
31 Asriel, lɛ emli Asrielbii lɛ aweku lɛ jɛ; Shekem, lɛ emli Shekembii lɛ aweku lɛ jɛ;
32 Shemida, lɛ emli Shemidabii lɛ aweku lɛ jɛ; Hefer, lɛ emli Heferbii lɛ aweku lɛ jɛ.
33 Ni Zelofehad, ni ji Hefer binuu lɛ bɛ bihii, biyei pɛ eyɔɔ,+ ni Zelofehad biyei+ lɛ agbɛ́ii ji Mala kɛ Noa kɛ Hogla kɛ Milka kɛ Tirza.
34 Mɛnɛɛmɛi ji Manase wekui lɛ, ni amɛwebii ni aŋmala amɛgbɛ́ii lɛ ayifalɛ ji 52,700.+
35 Efraim+ bihii lɛ yɛ amɛwekui lɛ anaa nɛ: Shutela,+ lɛ emli Shutelabii lɛ aweku lɛ jɛ; Beker, lɛ emli Bekerbii lɛ aweku lɛ jɛ; Tahan, lɛ emli Tahanbii lɛ aweku lɛ jɛ.
36 Ni Shutela bihii lɛ nɛ: Eran, lɛ emli Eranbii lɛ aweku lɛ jɛ.
37 Mɛnɛɛmɛi ji Efraim bihii lɛ awekui lɛ, ni amɛwebii ni aŋmala amɛgbɛ́ii lɛ ayifalɛ ji 32,500.+ Mɛnɛɛmɛi ji Yosef bihii lɛ yɛ amɛwekui lɛ anaa.
38 Benyamin bihii+ lɛ yɛ amɛwekui lɛ anaa nɛ: Bela,+ lɛ emli Belabii lɛ aweku lɛ jɛ; Ashbel, lɛ emli Ashbelbii lɛ aweku lɛ jɛ; Ahiram,* lɛ emli Ahirambii lɛ aweku lɛ jɛ;
39 Shefufam,* lɛ emli Shufambii lɛ aweku lɛ jɛ; Hufam,* lɛ emli Hufambii lɛ aweku lɛ jɛ.
40 Bela bihii ji Ard kɛ Naaman:+ Ard, lɛ emli Ardbii lɛ aweku lɛ jɛ; Naaman, lɛ emli Naamanbii lɛ aweku lɛ jɛ.
41 Mɛnɛɛmɛi ji Benyamin bihii lɛ yɛ amɛwekui lɛ anaa, ni amɛwebii ni aŋmala amɛgbɛ́ii lɛ ayifalɛ ji 45,600.+
42 Dan+ bihii lɛ yɛ amɛwekui lɛ anaa nɛ: Shuham,* lɛ emli Shuhambii lɛ aweku lɛ jɛ. Mɛnɛɛmɛi ji Dan wekui lɛ yɛ amɛwekui lɛ anaa.
43 Shuhambii lɛ awekui lɛ fɛɛ lɛ, amɛwebii ni aŋmala amɛgbɛ́ii lɛ ayifalɛ ji 64,400.+
44 Asher bihii+ lɛ yɛ amɛwekui lɛ anaa nɛ: Imna, lɛ emli Imnabii lɛ aweku lɛ jɛ; Ishvi, lɛ emli Ishvibii lɛ aweku lɛ jɛ; Beria, lɛ emli Beriabii lɛ aweku lɛ jɛ;
45 Beria bihii lɛ nɛ: Heber, lɛ emli Heberbii lɛ aweku lɛ jɛ; Malkiel, lɛ emli Malkielbii lɛ aweku lɛ jɛ.
46 Asher biyoo lɛ gbɛ́i ji Sera.
47 Mɛnɛɛmɛi ji Asher bihii lɛ awekui lɛ, ni amɛwebii ni aŋmala amɛgbɛ́ii lɛ ayifalɛ ji 53,400.+
48 Naftali bihii+ lɛ yɛ amɛwekui lɛ anaa nɛ: Yahzeel, lɛ emli Yahzeelbii lɛ aweku lɛ jɛ; Guni, lɛ emli Gunibii lɛ aweku lɛ jɛ;
49 Yezer, lɛ emli Yezerbii lɛ aweku lɛ jɛ; Shilem, lɛ emli Shilembii lɛ aweku lɛ jɛ.
50 Mɛnɛɛmɛi ji Naftalibii lɛ awekui lɛ yɛ amɛwekui lɛ anaa, ni amɛwebii ni aŋmala amɛgbɛ́ii lɛ ayifalɛ ji 45,400.+
51 Israelbii lɛ ateŋ mɛi fɛɛ ni aŋmala amɛgbɛ́ii lɛ ayifalɛ ji: 601,730.+
52 No sɛɛ lɛ, Yehowa kɛɛ Mose akɛ:
53 “Aja shikpɔŋ lɛ ahã mɛi nɛɛ akɛ amɛgboshinii, yɛ gbɛ́ii ni aŋmala lɛ naa.*+
54 Kui ni dara lɛ, hã amɛgboshinii lɛ afa, ni kui ni daraaa lɛ, tse amɛgboshinii lɛ nɔ.+ Kuu fɛɛ kuu lɛ, adamɔ mɛi ni aŋmala amɛgbɛ́ii lɛ ayifalɛ lɛ nɔ ahã amɛ amɛgboshinii.
55 Shi afɔ̃ oshiki kɛja shikpɔŋ lɛ.+ Ahã amɛná amɛgboshinii lɛ yɛ amɛtsɛmɛi awekui lɛ agbɛ́ii lɛ anaa.
56 Afɔ̃ oshiki kɛja gboshinii lɛ eko fɛɛ eko ahã kui ni dara kɛ kui ni daraaa lɛ fɛɛ.”
57 Ni Levibii+ ni aŋmala amɛgbɛ́ii yɛ amɛwekui lɛ anaa nɛ: Gershon, lɛ emli Gershonbii lɛ aweku lɛ jɛ; Kohat,+ lɛ emli Kohatbii lɛ aweku lɛ jɛ; Merari, lɛ emli Meraribii lɛ aweku lɛ jɛ.
58 Levibii lɛ awekui lɛ nɛ: Libnibii lɛ aweku+ lɛ kɛ Hebronbii lɛ aweku+ lɛ kɛ Malibii lɛ aweku+ lɛ kɛ Mushibii lɛ aweku+ lɛ kɛ Korabii lɛ aweku+ lɛ.
Kohat fɔ Amram.+
59 Ni Amram ŋa lɛ gbɛ́i ji Yokebed,+ Levi biyoo lɛ, mɔ ni Levi ŋa lɛ fɔ ehã lɛ yɛ Ejipt lɛ. Ni Amram kɛ Yokebed fɔ Aaron kɛ Mose kɛ amɛnyɛmi yoo Miriam.+
60 Ni Aaron fɔ Nadab kɛ Abihu kɛ Eleazar kɛ Itamar.+
61 Shi Nadab kɛ Abihu gboi akɛni amɛkɛ la ni mla eŋmɛɛɛ gbɛ tee Yehowa hiɛ lɛ hewɔ.+
62 Mɛi fɛɛ ni aŋmala amɛgbɛ́ii lɛ ayifalɛ ji 23,000, hii fɛɛ ni eye kɛjɛ nyɔɔŋ kome kɛyaa lɛ.+ Shi aŋmalaaa amɛgbɛ́ii afataaa Israelbii lɛ ahe,+ ejaakɛ ahãaa amɛ gboshinii ko yɛ Israelbii lɛ ateŋ.+
63 Mɛnɛɛmɛi ji mɛi ni Mose kɛ osɔfo Eleazar ŋmala amɛgbɛ́ii be ni amɛŋmala Israelbii lɛ agbɛ́ii yɛ Moab ŋa kpataa lɛ nɔ, yɛ Yordan lɛ naa, yɛ Yeriko lɛ.
64 Shi mɛi ni Mose kɛ osɔfo Aaron ŋmala amɛgbɛ́ii be ni amɛkane Israelbii lɛ yɛ Sinai ŋa lɛ nɔ lɛ ateŋ mɔ kome folo po bɛ mɛnɛɛmɛi ateŋ.+
65 Ejaakɛ Yehowa kɛɛ yɛ amɛhe akɛ: “Bɔ fɛɛ bɔ ni fee lɛ, amɛbaagboi yɛ ŋa lɛ nɔ.”+ No hewɔ lɛ, eshwɛɛɛ amɛteŋ nuu kome po, ja Kaleb, Yefune binuu lɛ, kɛ Yoshua, Nun binuu lɛ.+
