3 Mose 5:1-19
5 “‘Kɛ́ mɔ* ko nu akɛ aatswa adafi koni mɔ ko abaye odase*+ yɛ sane ko he, ni lɛ ji sane lɛ he odasefonyo loo ena loo ená ele he nɔ ko ni eyawieee lɛ, efee esha, ni ehe sɔ̃ lɛ kã enɔ.
2 “‘Aloo kɛ́ mɔ* ko ta nɔ ko ni he tseee he, ŋa mli kooloo ko ni he tseee ni egbo jio, shĩa kooloo ko ni he tseee ni egbo jio, aloo kooloi bibiibibii ni he tseee ni yi fa babaoo lɛ eko jio,+ kɛji mɔ lɛ leee po lɛ, ehe tseee ni eyeɔ fɔ.
3 Aloo kɛ́ mɔ ko ta gbɔmɔ he nɔ ko ni he tseee he+—nɔ fɛɛ nɔ ni he tseee ni baanyɛ ahã mɔ lɛ afee mɔ ni he tseee—ni eleee akɛ eta he, ni sɛɛ mli lɛ ená ele lɛ, no lɛ, eyeɔ fɔ.
4 “‘Aloo kɛ́ mɔ* ko ye ehe oyai kɛkã kitã akɛ ebaafee nɔ ko—nɔ kpakpa jio, nɔ fɔŋ jio, ekɔɔɔ he eko nɔ ni ji—ni eleee akɛ efee nakai, shi sɛɛ mli lɛ eyɔse akɛ eye ehe oyai tsɔ kɛkã kitã lɛ, no lɛ, eyeɔ fɔ.*+
5 “‘Kɛ́ mɔ lɛ yeɔ fɔ yɛ nibii nɛɛ ateŋ eko mli lɛ, no lɛ, ejaje+ esha ni efee lɛ etsɔɔ.
6 Agbɛnɛ hu, ekɛ esɔ̃ afɔle abahã Yehowa yɛ esha ni efee lɛ hewɔ,+ no ji akɛ, ekɛ tooyoo abahã akɛ esha afɔle, gwantɛŋbi ni ji yoo loo abotiabi ni ji yoo. Kɛkɛ lɛ, osɔfo lɛ baakpãtã ehã lɛ yɛ esha ni efee lɛ hewɔ.
7 “‘Shi kɛ́ enyɛɛɛ too ehé lɛ, no lɛ, ekɛ ŋa mli okpoi enyɔ loo shĩa okpoi bibii enyɔ+ abahã Yehowa akɛ esɔ̃ afɔle yɛ esha lɛ hewɔ, ekome kɛhã esha afɔle, ekome hu kɛhã shãa afɔle.+
8 Ekɛ amɛ aba osɔfo lɛ ŋɔɔ, ni lɛ hu ebaahe esha afɔle nɔ lɛ klɛŋklɛŋ, ni ebaatse ekuɛŋshi, shi ehãŋ eyitso aje nɔ.
9 Ekɛ esha afɔle loofɔlɔ lɛ lá lɛ eko ashwã afɔleshaa latɛ lɛ he, shi ehã lá ni baashwɛ lɛ atsere ashwie afɔleshaa latɛ lɛ shishi.+ Esha afɔle ni.
10 Etsu ekroko lɛ he nii akɛ shãa afɔle, tamɔ bɔ ni afeɔ daa lɛ;+ ni osɔfo lɛ baakpãtã ahã lɛ yɛ esha ni efee lɛ hewɔ, ni akɛ ehe esha lɛ baake lɛ.+
11 “‘Shi kɛ́ enyɛɛɛ ehé ŋa mli okpoi enyɔ loo shĩa okpoi bibii enyɔ lɛ, no lɛ, ekɛ ashikishaŋ kpakpa efa mlijai nyɔŋma mli ekome*+ aba akɛ esha afɔle yɛ esha ni efee lɛ hewɔ. Ekɛ mu akafata he, ni ekɛ frankinsɛnsi hu akashwie nɔ, ejaakɛ esha afɔle ni.
12 Ekɛba osɔfo lɛ ŋɔɔ, ni osɔfo lɛ akpiti ekɔkɔ obɔ akɛ kaimɔ afɔle,* ni ekɛshwie afɔlei ni akɛ la shãa ahãa Yehowa lɛ anɔ yɛ afɔleshaa latɛ lɛ nɔ, ni eshã. Esha afɔle ni.
13 Osɔfo lɛ baakpãtã ahã lɛ yɛ eshai nɛɛ ateŋ eko fɛɛ eko ni efee lɛ hewɔ, ni akɛ ehe esha lɛ baake lɛ.+ Afɔle lɛ mli nɔ ni baashwɛ lɛ baatsɔ osɔfo lɛ nɔ,+ tamɔ ŋmaa* afɔle lɛ nɔŋŋ.’”+
14 Yehowa tee nɔ ekɛ Mose wie ekɛɛ:
15 “Kɛ́ mɔ* ko eyayeee anɔkwa akɛni ejeee gbɛ eku mla ni kɔɔ Yehowa nibii krɔŋkrɔŋi lɛ ahe lɛ mli hewɔ lɛ,+ ekɛ gwantɛŋnuu ni kpa ko bɛ ehe abahã Yehowa akɛ sɔ̃ afɔle;+ shekel ni akɛtsuɔ nii yɛ he krɔŋkrɔŋ* lɛ nɔ adamɔ atsɔɔ gwantɛŋnuu lɛ jara yɛ jwiɛtɛi shekeli* mli.+
16 Ni ewo nakai jara lɛ yɛ esha ni efee eshi he krɔŋkrɔŋ lɛ hewɔ, ni ekɛ nakai jara lɛ mlijai enumɔ mli ekome afata he.+ Ekɛhã osɔfo lɛ koni osɔfo lɛ kɛ sɔ̃ afɔle gwantɛŋnuu lɛ akpãtã+ ahã lɛ, ni akɛ ehe esha lɛ baake lɛ.+
17 “Kɛ́ mɔ* ko fee esha akɛni efee nibii ni Yehowa efã akɛ akafee lɛ eko hewɔ lɛ, kɛji eleee po lɛ, eyeɔ fɔ kɛ̃, ni ehe sɔ̃ lɛ kã enɔ.+
18 Ekɛ gwantɛŋnuu ni kpa ko bɛ ehe abahã osɔfo lɛ akɛ sɔ̃ afɔle, yɛ jara ni atsɔɔ lɛ naa.+ Kɛkɛ lɛ, osɔfo lɛ baakpãtã ehã lɛ yɛ tɔmɔ ni ejeee gbɛ etɔ̃ lɛ hewɔ, ni akɛ ehe esha lɛ baake lɛ.
19 Sɔ̃ afɔle ni. Eye fɔ kɛ̃ yɛ Yehowa hiɛ akɛni efee esha eshi lɛ lɛ hewɔ.”
Shishigbɛ Niŋmaa
^ Hebri sht. ŋm., “nu gbee ko miilomɔ (miikã kitã).” Eeenyɛ efee akɛ, eji adafi ni atswaa yɛ efɔŋ ko ni afee he, ni nɔ ni fata adafitswaa lɛ he ji akɛ, alomɔɔ mɔ ni fee efɔŋ lɛ loo mɔ ni ji sane lɛ he odasefonyo lɛ koni kɛ́ eyawieee lɛ loomɔ lɛ amɔ lɛ.
^ Loo “susuma.”
^ Loo “susuma.”
^ Loo “susuma.”
^ Eeenyɛ efee akɛ, nɔ ni enɛ tsɔɔ ji, mɔ lɛ yeee eshiwoo lɛ nɔ.
^ Efa mlijai nyɔŋma mli ekome feɔ litai 2.2 (kwat 2). Kwɛmɔ Saji Krokomɛi B14 lɛ.
^ Kwɛmɔ Wiemɔi Titrii Amligbalamɔ lɛ.
^ Ŋmaa ní awieɔ he yɛ biɛ lɛ ji wiiti, abele, omɔ, kɛ amɛhenɔi lɛ eko.
^ Loo “susuma.”
^ Shekel kome feɔ gram 11.4 (oz t 0.367). Kwɛmɔ Saji Krokomɛi B14 lɛ.
^ Loo “shekel krɔŋkrɔŋ.”
^ Loo “susuma.”
