3 Mose 12:1-8
-
Hetsuumɔ yɛ bifɔmɔ sɛɛ (1-8)
12 Yehowa tee nɔ ekɛɛ Mose akɛ:
2 “Kɛɛmɔ Israelbii lɛ akɛ, ‘Kɛ́ yoo ko ŋɔ hɔ ni efɔ binuu lɛ, ehe tseee gbii kpawo, tamɔ bɔ ni ehe tseee yɛ gbii ni ekɛfeɔ eyei anii lɛ amli lɛ.+
3 Gbi ni ji kpaanyɔ lɛ nɔ lɛ, afo gbekɛ lɛ ketia.+
4 Yoo lɛ kɛ gbii 33 ni baanyiɛ sɛɛ lɛ aya nɔ atsuu ehe kɛjɛ lá lɛ mli. Ekata nɔ ko ni yɔɔ krɔŋkrɔŋ he, ni ekaba he krɔŋkrɔŋ lɛ hu, kɛyashi ebaagbe ehetsuumɔ gbii lɛ anaa.
5 “‘Kɛ́ efɔ biyoo lɛ, no lɛ, ehe tseee gbii 14, tamɔ bɔ ni ehe tseee kɛ́ eefee eyei anii lɛ. Ekɛ gbii 66 ni baanyiɛ sɛɛ lɛ aya nɔ atsuu ehe kɛjɛ lá lɛ mli.
6 Kɛ́ gbii ni ekɛtsuɔ ehe yɛ binuu loo biyoo hewɔ lɛ ba naagbee lɛ, ekɛ gwantɛŋnuu ni náko fe afi aba ni akɛshã shãa afɔle,+ kɛ shĩa okpobi kome loo ŋa mli okpo kome ni akɛshã esha afɔle; ekɛ nibii nɛɛ aba kpee buu lɛ shinaa lɛ naa ni ekɛbahã osɔfo lɛ.
7 Osɔfo lɛ kɛba Yehowa hiɛ, ní ekɛkpãtã ehã yoo lɛ, ni ehe baatse kɛjɛ lá ni hoɔ lɛ lɛ mli. Enɛ ji mla ni kɔɔ yoo ni fɔɔ binuu loo biyoo lɛ he lɛ.
8 Shi kɛji enyɛɛɛ ehé gwantɛŋ lɛ, no lɛ, ekɛ ŋa mli okpoi enyɔ loo shĩa okpoi bibii enyɔ aba,+ ekome kɛhã shãa afɔle, ni ekome hu kɛhã esha afɔle, ni osɔfo lɛ baakpãtã ahã lɛ, ni ehe baatse.’”
