2 Mose 17:1-16
17 Israelbii lɛ fɛɛ fã kɛjɛ Sin ŋa lɛ nɔ.+ Ni be ni amɛyaa lɛ, amɛto shi yɛ gbɛ lɛ nɔ fiofio yɛ Yehowa famɔ naa.+ Sɛɛ mli lɛ, amɛyabɔ nsara yɛ Refidim.+ Shi maŋbii lɛ náaa nu yɛ jɛmɛ amɛnu.
2 No hewɔ lɛ, maŋbii lɛ wo Mose béi+ amɛkɛɛ: “Hã wɔ nu wɔnu.” Shi Mose bi amɛ akɛ: “Mɛni hewɔ nyɛwoɔ mi béi? Mɛni hewɔ nyɛyaa nɔ nyɛkaa Yehowa?”+
3 Shi kumai ye Israelbii lɛ waa yɛ jɛmɛ, ni amɛwie amɛshi Mose+ amɛkɛɛ: “Mɛni hewɔ ojie wɔ kɛje Ejipt koni okɛ kumai abagbe wɔ kɛ wɔbii kɛ wɔkooloi lɛ?”
4 Agbɛnɛ, Mose bo etsɛ Yehowa ekɛɛ: “Te mafee maŋ nɛɛ mahã tɛŋŋ? Tɛi po amɛheɔ amɛtswia mi nɛɛ!”
5 Kɛkɛ ni Yehowa kɛɛ Mose akɛ: “Kɔ otso lɛ ni okɛtswa Nilo Faa lɛ mli lɛ ohiɛ odɛ̃,+ ni oŋɔ Israel onukpai lɛ eko ofata ohe, ni okɛ amɛ atsɔ Israelbii lɛ ahiɛ kɛya. Kɔ otso lɛ ohiɛ odɛ̃ ni oya.
6 Naa! Madamɔ ohiɛ yɛ tɛsaa ni yɔɔ Horeb lɛ nɔ. Okɛ tso lɛ atswa tɛsaa lɛ, ni nu baajɛ mli aba koni maŋ lɛ anu.”+ Ni Mose fee nakai yɛ Israel onukpai lɛ ahiɛ.
7 No hewɔ lɛ, Mose wo jɛmɛ gbɛ́i akɛ, Masa*+ kɛ Meriba,*+ yɛ béi ni Israelbii lɛ wo lɛ lɛ, kɛ kɛɛmɔ ni amɛkɛɛ akɛ: “Ani Yehowa yɛ wɔteŋ, aloo ebɛ wɔteŋ?” ni amɛkɛka Yehowa+ lɛ hewɔ.
8 Ni Amalekbii+ lɛ ba koni amɛkɛ Israelbii lɛ abawu yɛ Refidim.+
9 Kɛkɛ ni Mose kɛɛ Yoshua*+ akɛ: “Halamɔ hii komɛi yɛ wɔteŋ ni oya okɛ Amalekbii lɛ ayawu ohã wɔ. Wɔ́ lɛ, madamɔ gɔŋkpɔ lɛ yiteŋ, ni mahiɛ anɔkwa Nyɔŋmɔ lɛ tso lɛ yɛ midɛ̃.”
10 Ni Yoshua fee tamɔ bɔ ni Mose kɛɛ lɛ lɛ pɛpɛɛpɛ,+ ni ekɛ Amalekbii lɛ yawu. Ni Mose kɛ Aaron kɛ Hur+ kwɔ kɛyadamɔ gɔŋkpɔ lɛ yiteŋ.
11 Kɛ́ Mose hã eniji ni ehole nɔ lɛ tee nɔ ehi ŋwɛi lɛ, kɛkɛ lɛ Israelbii lɛ miiye kunim, shi kɛ́ ekɛ eniji ba shi nɔŋŋ pɛ lɛ, kɛkɛ lɛ Amalekbii lɛ miiye kunim.
12 Be ni etɔ Mose niji lɛ, amɛwó tɛ amɛhã lɛ koni eta nɔ, ni eta nɔ. Kɛkɛ ni Aaron kɛ Hur hiɛ eniji lɛ amli yɛ ŋwɛi, mɔ kome yɛ biɛ ni mɔ kome hu yɛ biɛ, ni eniji lɛ tsiii amɛhe kɛyashi be ni hulu lɛ nyɔ shi.
13 Ni Yoshua kɛ klante ye Amalek kɛ ewebii lɛ anɔ kunim.+
14 Agbɛnɛ, Yehowa kɛɛ Mose akɛ: “Ŋmaa enɛ owo wolo lɛ mli ofɔ̃ shi koni etsɔ kaimɔ nɔ, ni otĩ mli ohã Yoshua akɛ, ‘Makpãtã Amalek hiɛ kɛje ŋwɛi shishi, ni akaiŋ amɛ dɔŋŋ.’”+
15 Ni Mose ma afɔleshaa latɛ, ni ewo lɛ gbɛ́i akɛ, Yehowa-nisi,*
16 ni ekɛɛ: “Akɛni Amalek ete shi ewo* Yah+ maŋtsɛ sɛi lɛ hewɔ lɛ, Yehowa kɛ amɛ baawu yɛ amɛyinɔi fɛɛ ni baaba lɛ amli.”+
Shishigbɛ Niŋmaa
^ Eshishi ji, “Naataamɔ.”
^ Eshishi ji, “Kaa; Jaramɔ Shihilɛ.”
^ Hebri sht. ŋm., “Yehoshua,” eshishi ji, “Yehowa Ji Yiwalaheremɔ.”
^ Eshishi ji, “Yehowa Ji Migbɛtsɔɔmɔ Tso.”
^ Loo “Akɛni Amalek ewó enine nɔ eshi.”
