2 Kronika 30:1-27
-
Hezekia ye Hehoo lɛ (1-27)
30 Hezekia tsu ni ayakɛɛ Israel+ kɛ Yuda fɛɛ, ni eŋmala woji po eyahã Efraim kɛ Manase+ koni amɛba Yehowa shĩa lɛ yɛ Yerusalem ni amɛbaye Hehoo lɛ amɛhã Yehowa, Israel Nyɔŋmɔ lɛ.+
2 Shi maŋtsɛ lɛ, kɛ elumɛi lɛ, kɛ asafo muu lɛ fɛɛ ni yɔɔ Yerusalem lɛ kpɛ mli akɛ amɛbaaye Hehoo lɛ yɛ nyɔɔŋ ni ji enyɔ lɛ nɔ.+
3 Akɛni no mli lɛ, osɔfoi lɛ ateŋ mɛi babaoo efeko amɛhe krɔŋkrɔŋ+ ni maŋbii lɛ hu eyabuako amɛhe naa yɛ Yerusalem hewɔ lɛ, amɛnyɛɛɛ amɛye Hehoo lɛ yɛ be ni akɛyeɔ lɛ nɔ.+
4 Yiŋkpɛɛ nɛɛ sa maŋtsɛ lɛ kɛ asafo muu lɛ fɛɛ hiɛ.
5 No hewɔ lɛ amɛkpɛ mli akɛ, ayatswa adafi yɛ Israel fɛɛ, kɛjɛ Beer-sheba kɛyashi Dan,+ koni maŋbii lɛ aba ni amɛbaye Hehoo lɛ amɛhã Yehowa, Israel Nyɔŋmɔ lɛ, yɛ Yerusalem, ejaakɛ amɛyeko Hehoo lɛ kɛ mɛi babaoo nakai pɛŋ tamɔ bɔ ni aŋma lɛ.+
6 Kɛkɛ ni maŋtsɛ lɛ kɛ elumɛi lɛ ŋmala woji ni amɛkɛtsu mɛi* kɛtee Israel kɛ Yuda fɛɛ tamɔ bɔ ni maŋtsɛ lɛ efã lɛ akɛ: “Israelbii, nyɛkua nyɛsɛɛ kɛbaa Yehowa, Abraham kɛ Isak, kɛ Israel Nyɔŋmɔ lɛ ŋɔɔ, koni lɛ hu eku esɛɛ kɛba nyɛteŋ mɛi ni eshwɛ ni je Asiria maŋtsɛmɛi lɛ adɛŋ lɛ aŋɔɔ.+
7 Nyɛkafea nyɛnii tamɔ nyɛtsɛmɛi lɛ kɛ nyɛnyɛmimɛi lɛ ni tɔ̃ Yehowa, nyɛtsɛmɛi a-Nyɔŋmɔ lɛ nɔ lɛ, ni ehã mɛi ahe jɔ̃ amɛhe yɛ amɛhewɔ, tamɔ bɔ ni nyɛkɛ nyɛhiŋmɛii naa nɛɛ.+
8 Agbɛnɛ, nyɛkafea nyɛhe kuɛŋtilɔi tamɔ nyɛtsɛmɛi lɛ.+ Nyɛboa Yehowa toi, ni nyɛbaa esɔlemɔtsu+ ni efee lɛ krɔŋkrɔŋ kɛmiiya naanɔ lɛ mli, ni nyɛsɔmɔ Yehowa, nyɛ-Nyɔŋmɔ lɛ, koni emlifu ni naa wa lɛ aje nyɛnɔ.+
9 Ejaakɛ, kɛ́ nyɛku nyɛsɛɛ kɛba Yehowa ŋɔɔ lɛ, mɛi ni eŋɔ nyɛnyɛmimɛi lɛ kɛ nyɛbii lɛ nom kɛtee lɛ baana amɛ mɔbɔ+ ni amɛbaahã amɛku amɛsɛɛ kɛba shikpɔŋ nɛɛ nɔ,+ ejaakɛ musuŋtsɔlɔ* kɛ mɔbɔnalɔ ji Yehowa, nyɛ-Nyɔŋmɔ lɛ,+ ni kɛ́ nyɛku nyɛsɛɛ kɛba eŋɔɔ lɛ, etsɔŋ ehiɛ etoŋ afã.”+
10 No hewɔ lɛ, mɛi ni atsu* lɛ yakpa maŋ fɛɛ maŋ ni yɔɔ Efraim kɛ Manase shikpɔŋ lɛ nɔ lɛ nɔ,+ amɛtee Zebulon po, shi maŋbii lɛ ŋmɔ amɛ ni amɛye amɛhe fɛo.+
11 Shi Asherbii, kɛ Manasebii, kɛ Zebulonbii komɛi ba amɛhe shi ni amɛba Yerusalem.+
12 Agbɛnɛ hu, anɔkwa Nyɔŋmɔ lɛ nine yɛ Yuda he koni ehã amɛfee ekome* ni amɛye famɔ ni maŋtsɛ lɛ kɛ lumɛi lɛ efã amɛ yɛ Yehowa wiemɔ lɛ naa lɛ nɔ.
13 Yɛ nyɔɔŋ ni ji enyɔ lɛ nɔ lɛ, mɛi babaoo babua amɛhe naa yɛ Yerusalem koni amɛye Blodo Ni Ashikishaŋ-sha* Bɛ Mli Gbi Jurɔ+ lɛ;+ asafo babaoo diɛŋtsɛ.
14 Amɛte shi ni amɛjie afɔleshaa latɛi ni yɔɔ Yerusalem lɛ,+ ni amɛjie afɔleshaa latɛi ni akɛshãa tsofa-kɛ-ŋma lɛ fɛɛ,+ ni amɛyashɛrɛ amɛshwie Kidron Jɔɔ lɛ mli.
15 Kɛkɛ ni amɛgbe kooloo ni akɛbaaye Hehoo lɛ yɛ nyɔɔŋ ni ji enyɔ lɛ gbi ni ji 14 lɛ nɔ. Osɔfoi lɛ kɛ Levibii lɛ ahiɛ gboi, no hewɔ lɛ, amɛfee amɛhe krɔŋkrɔŋ ni amɛkɛ shãa afɔlei lɛ ba Yehowa shĩa lɛ.
16 Amɛyadamɔ amɛshidaamɔhei lɛ tamɔ bɔ ni ato ahã amɛ yɛ Mose, anɔkwa Nyɔŋmɔ lɛ gbɔmɔ lɛ Mla lɛ naa lɛ; kɛkɛ ni osɔfoi lɛ he lá lɛ yɛ Levibii lɛ adɛŋ ni amɛkɛshwã afɔleshaa latɛ lɛ nɔ.+
17 No mli lɛ, mɛi babaoo yɛ asafo lɛ mli ni amɛfeko amɛhe krɔŋkrɔŋ, ni Levibii lɛ ji mɛi ni gbeɔ kooloi ni akɛbaaye Hehoo lɛ amɛhãa mɛi fɛɛ ni he tseee lɛ,+ koni amɛfee amɛ krɔŋkrɔŋ amɛhã Yehowa.
18 Ejaakɛ mɛi lɛ ateŋ mɛi babaoo, titri lɛ mɛi ni jɛ Efraim, kɛ Manase,+ kɛ Isakar, kɛ Zebulon lɛ efeko amɛhe krɔŋkrɔŋ, shi amɛye Hehoo lɛ, ni no kɛ nɔ ni aŋma lɛ kpãaa gbee. Shi Hezekia sɔle ehã amɛ ekɛɛ: “Yehowa, bo mɔ ni ohi,+ kɛke
19 mɔ fɛɛ mɔ ni esaa etsui eto akɛ ebaatao anɔkwa Nyɔŋmɔ lɛ, ni ji Yehowa, etsɛmɛi a-Nyɔŋmɔ lɛ sɛɛ gbɛ lɛ,+ tsɛbelɛ mɔ lɛ efeko ehe krɔŋkrɔŋ yɛ bɔ ni abiɔ ni mɔ afee ehe krɔŋkrɔŋ lɛ naa lɛ.”+
20 Ni Yehowa bo Hezekia toi, ni ekɛ mɛi lɛ ahe ke amɛ.*
21 No hewɔ lɛ, Israelbii ni eba Yerusalem lɛ kɛ miishɛɛ babaoo+ ye Blodo Ni Ashikishaŋ-sha* Bɛ Mli Gbi Jurɔ+ lɛ gbii kpawo sɔŋŋ, ni daa gbi lɛ, Levibii lɛ kɛ osɔfoi lɛ jieɔ Yehowa yi, ni amɛtswaa amɛnibii ni akɛtswaa lala lɛ waa amɛhãa Yehowa.+
22 Agbɛnɛ hu, Levibii lɛ fɛɛ ni kɛ hiɛshikamɔ sɔmɔɔ Yehowa lɛ, Hezekia kɛ amɛ wie ni ewo amɛ hewalɛ.* Ni amɛye nii yɛ gbii kpawo ni akɛye gbi jurɔ lɛ mli fɛɛ,+ amɛshã naanyobɔɔ afɔlei+ ni amɛda Yehowa, amɛtsɛmɛi a-Nyɔŋmɔ lɛ shi.
23 Kɛkɛ ni asafo muu lɛ fɛɛ kpɛ mli akɛ amɛbaaye Hehoo lɛ gbii kpawo amɛfata he, ni amɛkɛ miishɛɛ ye Hehoo lɛ gbii kpawo amɛfata he.+
24 Ni Yuda maŋtsɛ Hezekia hã asafo lɛ tsinahii 1,000 kɛ gwantɛŋi 7,000, ni lumɛi lɛ hã asafo lɛ tsinahii 1,000 kɛ gwantɛŋi 10,000;+ ni osɔfoi babaoo fee amɛhe krɔŋkrɔŋ.+
25 Ni Yuda asafo lɛ fɛɛ, kɛ osɔfoi lɛ, kɛ Levibii lɛ, kɛ asafo muu lɛ fɛɛ ni jɛ Israel ba lɛ,+ kɛ gbɔi ni jɛ Israel shikpɔŋ lɛ nɔ ba lɛ,+ kɛ gbɔi ni yɔɔ Yuda lɛ tee nɔ amɛnya.
26 Ni aná miishɛɛ waa yɛ Yerusalem, ejaakɛ kɛjɛ Israel maŋtsɛ Solomon, David binuu lɛ, gbii lɛ amli kɛbashi nakai beiaŋ lɛ, nɔ ko tamɔ nakai bako Yerusalem pɛŋ.+
27 Kɛkɛ ni osɔfoi ni ji Levibii lɛ te shi amɛdamɔ shi ni amɛjɔɔ maŋ lɛ;+ ni Nyɔŋmɔ nu amɛgbee, ni amɛsɔlemɔ lɛ yashɛ eshihilɛhe krɔŋkrɔŋ lɛ yɛ ŋwɛi tɔ̃ɔ.
Shishigbɛ Niŋmaa
^ Hebri sht. ŋm., “foijelɔi.”
^ Loo “drolɔ.”
^ Hebri sht. ŋm., “foijelɔi.”
^ Hebri sht. ŋm., “ehã amɛ tsui kome.”
^ Kwɛmɔ Wiemɔi Titrii Amligbalamɔ lɛ.
^ Loo “etsa mɛi lɛ.”
^ Kwɛmɔ Wiemɔi Titrii Amligbalamɔ lɛ.
^ Hebri sht. ŋm., “kɛ amɛtsui wie.”
