2 Kronika 23:1-21
23 Yɛ afi ni ji kpawo lɛ nɔ lɛ, Yehoiada fee ekãa ni ekɛ mɛi oha nɔkwɛlɔi lɛ kpaŋ,+ amɛji Azaria, Yeroham binuu lɛ, kɛ Ishmael, Yehohanan binuu lɛ, kɛ Azaria, Obed binuu lɛ, kɛ Maaseia, Adaia binuu lɛ, kɛ Elishafat, Zikri binuu lɛ.
2 Kɛkɛ ni amɛyakpa Yuda fɛɛ, ni amɛbua Levibii+ lɛ anaa kɛjɛ Yuda maji lɛ fɛɛ amli, ni amɛbua Israel tsɛmɛi ashĩai lɛ onukpai lɛ hu anaa. Be ni amɛba Yerusalem lɛ,
3 asafo muu lɛ fɛɛ kɛ maŋtsɛ lɛ kpaŋ+ yɛ anɔkwa Nyɔŋmɔ lɛ shĩa lɛ, no sɛɛ lɛ, Yehoiada kɛɛ amɛ akɛ:
“Naa! Maŋtsɛ lɛ binuu lɛ baaye nɔ tamɔ bɔ ni Yehowa wo shi yɛ David bihii lɛ ahe lɛ.+
4 Nɔ ni nyɛbaafee nɛ: Nyɛjaa osɔfoi lɛ kɛ Levibii lɛ ni baaba amɛbabu yɛ Hejɔɔmɔ Gbi lɛ nɔ lɛ mli nyɛwoa kui etɛ mli.+ Kuu kome baabu shinai lɛ anaa;+
5 kuu kroko baabu maŋtsɛ shĩa+ lɛ he, ni kuu ni ji etɛ lɛ baabu Faneshi Agbó lɛ naa, ni maŋbii lɛ fɛɛ baahi Yehowa shĩa lɛ kpoi lɛ anɔ.+
6 Nyɛkahãa mɔ ko mɔ ko botea Yehowa shĩa lɛ mli, ja osɔfoi lɛ kɛ Levibii lɛ ni sɔmɔɔ lɛ.+ Amɛbaanyɛ amɛbote mli ejaakɛ amɛyɛ krɔŋkrɔŋ, shi esa akɛ maŋbii lɛ fɛɛ aye Yehowa famɔ lɛ nɔ.
7 Levibii lɛ baabɔle maŋtsɛ lɛ he kɛkpe, ni amɛteŋ mɔ fɛɛ mɔ baahiɛ etawuu nii yɛ edɛŋ. Mɔ fɛɛ mɔ ni baabote shĩa lɛ mli lɛ, abaagbe lɛ. Nyɛhia maŋtsɛ lɛ he kɛyaa he fɛɛ he ni ebaaya.”*
8 Ni Levibii kɛ Yudabii lɛ fɛɛ fee nɔ ni osɔfo Yehoiada wo amɛ kitã yɛ he lɛ pɛpɛɛpɛ. No hewɔ lɛ, amɛteŋ mɔ fɛɛ mɔ yatsɛ ehii ni baatsu nii yɛ Hejɔɔmɔ Gbi lɛ nɔ lɛ, kɛ mɛi ni tsuuu nii yɛ Hejɔɔmɔ Gbi lɛ nɔ lɛ fɛɛ,+ ejaakɛ no mli lɛ, osɔfo Yehoiada kpako kui+ lɛ akɛ amɛya shĩa.
9 Kɛkɛ ni osɔfo Yehoiada kɛ Maŋtsɛ David akpɔlɔi kɛ etsɛŋi bibii* kɛ etsɛŋi koklobii+ lɛ ni yɔɔ anɔkwa Nyɔŋmɔ lɛ shĩa+ lɛ hã mɛi oha nɔkwɛlɔi+ lɛ.
10 Kɛkɛ ni ehã maŋbii lɛ fɛɛ yadamɔ amɛgbɛhei lɛ, kɛjɛ shĩa lɛ ninejurɔgbɛ kɛyashi shĩa lɛ abɛkugbɛ, yɛ afɔleshaa latɛ lɛ kɛ shĩa lɛ he, ni amɛbɔle maŋtsɛ lɛ he kɛkpe, mɔ fɛɛ mɔ hiɛ etawuu nii* yɛ edɛŋ.
11 Kɛkɛ ni amɛkɛ maŋtsɛ lɛ binuu+ lɛ je kpo ni amɛkɛ maŋtsɛ fai* lɛ bu lɛ, ni amɛkɛ Odase*+ lɛ fɔ̃ enɔ, ni amɛwó lɛ maŋtsɛ, ni Yehoiada kɛ ebihii lɛ fɔ lɛ mu. Kɛkɛ ni amɛkɛɛ akɛ: “Maŋtsɛ yi aná wala!”+
12 Be ni Atalia nu maŋbii ni hiɛ foi ni amɛmiijie maŋtsɛ lɛ yi lɛ ahoofeemɔ lɛ, amrɔ nɔŋŋ ni etee maŋbii lɛ aŋɔɔ yɛ Yehowa shĩa lɛ.+
13 Ni ena maŋtsɛ lɛ ni edamɔ ekulashiŋ lɛ he yɛ agbó lɛ naa. No mli lɛ, lumɛi+ lɛ kɛ tɛtɛrɛmantɛrɛ kpãlɔi lɛ yɛ maŋtsɛ lɛ masɛi, ni shikpɔŋ lɛ nɔ bii lɛ fɛɛ miinya+ ni amɛmiikpã tɛtɛrɛmantɛrɛi lɛ, ni lalɔi ni hiɛ nibii ni akɛtswaa lala lɛ wóɔ yijiemɔ lala lɛ nɔ. Kɛkɛ ni Atalia gbála etadei lɛ ni ebo akɛ: “Akpaŋ miyi nɔ! Akpaŋ miyi nɔ!”
14 Shi osɔfo Yehoiada tsu mɛi oha nɔkwɛlɔi lɛ, ni ji mɛi ni ahala akɛ amɛkwɛ asraafoi lɛ anɔ lɛ, ni ekɛɛ amɛ akɛ: “Nyɛmɔa lɛ kɛjea asraafoi lɛ ateŋ, ni mɔ fɛɛ mɔ ni baanyiɛ esɛɛ lɛ, nyɛkɛ klante agbea lɛ!” Ejaakɛ osɔfo lɛ ekɛɛ akɛ: “Akagbe lɛ yɛ Yehowa shĩa lɛ.”
15 No hewɔ lɛ, amɛmɔ lɛ, ni be ni amɛkɛ lɛ shɛ Okpɔŋɔi Agbó ni yɔɔ maŋtsɛ lɛ shĩa lɛ naa lɛ, amɛgbe lɛ amrɔ nɔŋŋ yɛ jɛmɛ.
16 Kɛkɛ ni Yehoiada kɛ maŋbii lɛ fɛɛ kɛ maŋtsɛ lɛ kpaŋ akɛ amɛbaaya nɔ amɛhi shi akɛ Yehowa maŋ.+
17 No sɛɛ lɛ, maŋbii lɛ fɛɛ tee Baal jamɔhe* lɛ ni amɛyakumɔ amɛshwie shi,+ ni amɛyakumɔ efɔleshaa latɛi kɛ emagai lɛ hu amɛshwie shi,+ ni amɛgbe Matan, Baal osɔfo+ lɛ yɛ afɔleshaa latɛi lɛ ahiɛ.
18 Kɛkɛ ni Yehoiada hole osɔfoi lɛ kɛ Levibii lɛ akɛ amɛkwɛ Yehowa shĩa lɛ nɔ, amɛji mɛi ni David ja amɛmli kuikui ni amɛkwɛ Yehowa shĩa lɛ nɔ koni amɛshã shãa afɔlei amɛhã Yehowa+ tamɔ bɔ ni aŋma yɛ Mose Mla lɛ mli lɛ,+ koni amɛkɛ nyamɔ kɛ lala afee enɛ tamɔ bɔ ni David fã akɛ afee lɛ.*
19 Ni agbɛnɛ hu, eto agbonaakwɛlɔi+ ewo Yehowa shĩa lɛ agbói lɛ anaa koni mɔ ko ni he tseee yɛ gbɛ ko nɔ lɛ akabote mli.
20 Kɛkɛ ni ehã mɛi oha nɔkwɛlɔi+ lɛ, kɛ abladei lɛ, kɛ mɛi ni yeɔ maŋbii lɛ anɔ lɛ, kɛ shikpɔŋ lɛ nɔ bii lɛ fɛɛ fata ehe koni amɛkɛ maŋtsɛ lɛ akpeleke shi kɛjɛ Yehowa shĩa lɛ kɛyajie lɛ gbɛ. Kɛkɛ ni amɛtsɔ ŋwɛigbɛ agbo lɛ mli kɛtee maŋtsɛ shĩa lɛ, ni amɛkɛ maŋtsɛ lɛ yata maŋtsɛyeli sɛi+ lɛ nɔ.+
21 No hewɔ lɛ, shikpɔŋ lɛ nɔ bii lɛ fɛɛ nya, ni maŋ lɛ mli jɔ, ejaakɛ amɛkɛ klante egbe Atalia.
Shishigbɛ Niŋmaa
^ Loo “Kɛ́ maŋtsɛ lɛ miije kpo jio, eeba shĩa jio, nyɛhia ehe.”
^ Tsɛŋ bibioo ko ni gãitsɛlɔi fɔɔ hiɛmɔ.
^ Loo “etawuu nii ni afɔ̃ɔ.”
^ Eeenyɛ efee akɛ, eji wolokpo ko ni aŋmala Nyɔŋmɔ Mla lɛ yɛ mli.
^ Loo “akekere.”
^ Loo “sɔlemɔ shĩa.”
^ Hebri sht. ŋm., “yɛ David nine naa.”
