1 Maŋtsɛmɛi 3:1-28
3 Solomon kɛ Ejipt maŋtsɛ Farao kpaŋ gbãla kpaŋmɔ. Ekɛ Farao biyoo bote gbalashihilɛ mli*+ ni ekɛ lɛ ba David Maŋ+ lɛ mli kɛyashi ema lɛ diɛŋtsɛ eshĩa,+ kɛ Yehowa shĩa lɛ egbe naa,+ ni etswa gbogboi hu ewo Yerusalem he egbe naa.+
2 Shi no mli lɛ, maŋbii lɛ miishã afɔlei yɛ hei grɔŋŋi+ lɛ lolo, ejaakɛ kɛbashi nakai beiaŋ lɛ, amako shĩa ko ahãko Yehowa gbɛ́i lɛ.+
3 Solomon tee nɔ esumɔ Yehowa, ni enyiɛ yɛ epapa David mlai lɛ anaa, shi no mli lɛ, eshãa afɔlei kɛ lasu afɔlei yɛ hei grɔŋŋi lɛ lolo.+
4 Maŋtsɛ lɛ tee Gibeon koni eyashã afɔle yɛ jɛmɛ, ejaakɛ no mli lɛ, jɛmɛ ji he ni he grɔŋŋ+ ni fe fɛɛ* lɛ yɔɔ. Solomon shã shãa afɔlei 1,000 yɛ nakai afɔleshaa latɛ lɛ nɔ.+
5 Yehowa jie ehe kpo etsɔɔ Solomon yɛ lamɔ mli nyɔɔŋ yɛ Gibeon, ni Nyɔŋmɔ kɛɛ akɛ: “Bi nɔ ni osumɔɔ ni mahã bo.”+
6 Kɛkɛ ni Solomon kɛɛ akɛ: “Ojie suɔmɔ ni tsakeee ni fa babaoo kpo otsɔɔ mitsɛ, otsulɔ David, ejaakɛ enyiɛ yɛ anɔkwayeli kɛ jalɛ kɛ tsui krɔŋŋ* mli yɛ ohiɛ. Otee nɔ ojie suɔmɔ ni tsakeee ni fa babaoo kpo otsɔɔ lɛ kɛbashi ŋmɛnɛ gbi nɛɛ, ejaakɛ ohã lɛ binuu koni eta emaŋtsɛ sɛi lɛ nɔ.+
7 Ni agbɛnɛ Yehowa, mi-Nyɔŋmɔ, owó otsulɔ maŋtsɛ yɛ mipapa David sɛɛ, eyɛ mli akɛ oblanyo* ji mi, ni mibɛ niiashikpamɔ* ko.+
8 Otsulɔ yɛ maŋ ni ohala+ lɛ teŋ, maŋ ni yi fa aahu akɛ anyɛŋ amɛ akane loo amɛnaa abu lɛ.
9 No hewɔ lɛ, hã otsulɔ toiboo tsui koni ekɛkojo omaŋbii lɛ,+ koni enyɛ ekpa ekpakpa kɛ efɔŋ mli,+ ejaakɛ namɔ po baanyɛ akojo omaŋbii babaoo* nɛɛ?”
10 Nɔ ni Solomon bi nɛɛ sa Yehowa hiɛ.+
11 Kɛkɛ ni Nyɔŋmɔ kɛɛ lɛ akɛ: “Akɛni obi enɛ, ni obiii walasɛɛtsɛlɛ* loo ninámɔ, loo ni ohenyɛlɔi lɛ agboi,* shi obi niiashishinumɔ koni okɛkojo saji hewɔ lɛ,+
12 mafee nɔ ni obi lɛ mahã bo.+ Mahã bo hiɛshikamɔ kɛ niiashishinumɔ tsui+ fe bɔ ni mɔ fɛɛ mɔ ni ehi shi pɛŋ ná, ni osɛɛ lɛ, mɔ ko hu ehiŋ shi ni baatamɔ bo.+
13 Agbɛnɛ hu, mahã bo nɔ ni obiko lɛ hu,+ ninámɔ kɛ anunyam fɛɛ,+ bɔ ni maŋtsɛ ko maŋtsɛ ko kɛ bo yeŋ egbɔ yɛ ogbii lɛ amli fɛɛ.+
14 Ni kɛ́ onyiɛ migbɛi lɛ anɔ, ni oye mitaomɔ nii lɛ kɛ mikitãi lɛ anɔ tamɔ bɔ ni otsɛ David fee lɛ,+ no lɛ mahã owala sɛɛ atsɛ.”*+
15 Be ni Solomon hiɛ tsɛ̃ lɛ, ena akɛ lamɔ ni. Kɛkɛ ni etee Yerusalem ni eyadamɔ Yehowa kpaŋmɔ adeka lɛ hiɛ, ni eshã shãa afɔlei kɛ naanyobɔɔ afɔlei,+ ni eŋmɛ etsuji lɛ fɛɛ okpɔlɔ.
16 Nakai be lɛ mli lɛ, ashawo yei enyɔ komɛi ba maŋtsɛ lɛ hiɛ.
17 Klɛŋklɛŋ yoo lɛ kɛɛ akɛ: “Minuŋtsɔ, ofainɛ, mikɛ yoo nɛɛ yɔɔ shĩa kome mli, ni eyɛ shĩa lɛ be ni mifɔ lɛ.
18 Be ni mifɔ lɛ sɛɛ gbii etɛ lɛ, yoo nɛɛ hu fɔ. Wɔyɛ he kome, wɔyi enyɔ lɛ pɛ; ni mɔ ko kwraa fataaa wɔhe yɛ shĩa lɛ.
19 Nyɔɔŋ lɛ, yoo nɛɛ binuu lɛ gbo, ejaakɛ eyakã enɔ.
20 No hewɔ lɛ, nyɔɔŋteŋ be ni onyɔŋ yoo ewɔ lɛ, ete shi ni ebawó mibinuu lɛ yɛ mimasɛi, ni ekɛ lɛ yawo ekpɔkɔiaŋ,* ni ekɛ ebinuu ni egbo lɛ bawo mikpɔkɔiaŋ.
21 Be ni mite shi leebi ni mahã mibinuu lɛ fufɔ lɛ, mina akɛ egbo. No hewɔ lɛ, leebi lɛ mikwɛ lɛ jogbaŋŋ ni mina akɛ jeee mibinuu lɛ ni mifɔ lɛ lɛ ni.”
22 Shi yoo kroko lɛ kɛɛ akɛ: “Dabi, mibinuu lɛ ji mɔ ni hiɛ kã lɛ, ni obinuu lɛ ji mɔ ni egbo lɛ!” Shi klɛŋklɛŋ yoo lɛ kɛɛ akɛ: “Dabi, obinuu lɛ ji mɔ ni egbo lɛ, ni mibinuu lɛ ji mɔ ni hiɛ kã lɛ.” Nɛkɛ ji bɔ ni amɛtaa saji anaa yɛ maŋtsɛ lɛ hiɛ.
23 Agbɛnɛ maŋtsɛ lɛ kɛɛ akɛ: “Mɔ nɛ kɛɛ, ‘Mibinuu lɛ ji mɔ ni hiɛ kã lɛ, ni obinuu lɛ ji mɔ ni egbo lɛ!’ ni mɔ nɛ hu kɛɛ, ‘Dabi, obinuu lɛ ji mɔ ni egbo lɛ, ni mibinuu lɛ ji mɔ ni hiɛ kã lɛ!’”
24 Maŋtsɛ lɛ kɛɛ akɛ: “Nyɛbahãa mi klante.” No hewɔ lɛ, abahã maŋtsɛ lɛ klante.
25 Kɛkɛ ni maŋtsɛ lɛ kɛɛ akɛ: “Nyɛjaa bi ni hiɛ kã lɛ mli enyɔ, ni nyɛkɛ fã ahã yei lɛ ateŋ mɔ kome, ni nyɛkɛ fã hu ahã yoo kroko lɛ.”
26 Amrɔ nɔŋŋ ni yei lɛ ateŋ mɔ ni binuu ji mɔ ni hiɛ kã lɛ, kpa maŋtsɛ lɛ fai, ejaakɛ emusuŋ tsɔ lɛ yɛ ebinuu lɛ he. Kɛkɛ ni ekɛɛ akɛ: “Minuŋtsɔ, ofainɛ! Okɛ bi ni hiɛ kã lɛ ahã yoo lɛ! Nyɛkagbea lɛ!” Shi yoo kroko lɛ kɛɛ akɛ: “Akɛ lɛ hãŋ mi, ni akɛ lɛ hãŋ bo hu! Nyɛjaa emli enyɔ!”
27 Kɛkɛ ni maŋtsɛ lɛ kɛɛ akɛ: “Nyɛkɛ bi ni hiɛ kã lɛ ahãa klɛŋklɛŋ yoo lɛ! Nyɛkagbea lɛ, ejaakɛ lɛ ji enyɛ.”
28 Ni Israel fɛɛ nu kojomɔ ni maŋtsɛ lɛ ekojo lɛ he, ni amɛnaa kpɛ amɛhe* yɛ maŋtsɛ lɛ hewɔ,+ ejaakɛ amɛna akɛ eyɛ hiɛshikamɔ ni jɛ Nyɔŋmɔ ŋɔɔ, ni no ekɛkojoɔ.+
Shishigbɛ Niŋmaa
^ Loo “Eŋɔ Farao biyoo.”
^ Hebri sht. ŋm., “he grɔŋŋ wulu.”
^ Loo “tsui ni ja.”
^ Loo “gbekɛ nuu bibioo.”
^ Hebri sht. ŋm., “ni mileee kpojee kɛ mlibaa.”
^ Shishitsɔɔmɔi komɛi kɛɔ akɛ, “ni sane wa.” Hebri sht. ŋm., “ni tsii.”
^ Hebri sht. ŋm., “gbii pii.”
^ Loo “obiii ohenyɛlɔi lɛ asusuma.”
^ Hebri sht. ŋm., “mahã ogbii asɛɛ akɛ.”
^ Hebri sht. ŋm., “emiinaa.”
^ Hebri sht. ŋm., “amɛshe gbeyei.”
