Mɛɛ Gbɛ Nɔ Yesu Afɔleshaa Lɛ Ji ‘Kpɔmɔnɔ Kɛhã Mɛi Babaoo’?
HETOO NI BIBLIA LƐ KƐHÃA
Yesu afɔleshaa lɛ nɔ Nyɔŋmɔ tsɔɔ ekpɔ̃ɔ adesai loo ehereɔ amɛ kɛjeɔ esha kɛ gbele mli. Biblia lɛ tsɛɔ Yesu lá ni efɔse eshwie shi lɛ akɛ kpɔmɔnɔ. (Efesobii 1:7; 1 Petro 1:18, 19) No hewɔ lɛ, Yesu kɛɛ akɛ, eba koni “ebaŋɔ esusuma [ewala] ahã yɛ mɛi pii akpɔ̃mɔ hewɔ.”—Mateo 20:28, Ga Biblia hee.
Mɛni hewɔ ehe bahia ni aná “kpɔmɔnɔ kɛhã mɛi babaoo” lɛ?
Abɔ klɛŋklɛŋ gbɔmɔ ni ji Adam lɛ akɛ mɔ ko ni eye emuu loo mɔ ko ni esha ko bɛ ehe. Kulɛ eyɛ hegbɛ akɛ ebaahi shi kɛyaa naanɔ, shi akɛni eyabooo Nyɔŋmɔ toi hewɔ lɛ, hegbɛ nɛɛ ŋmɛɛ lɛ. (1 Mose 3:17-19) Akɛni ebatsɔ eshafeelɔ hewɔ lɛ, ekɛ esha lɛ tsɛŋe ebii ni efɔ lɛ. (Romabii 5:12) Enɛ hewɔ lɛ, Biblia lɛ tsɔɔ mli akɛ, Adam “hɔ̃ɔ” lɛ kɛ ebii lɛ ewo esha kɛ gbele nyɔŋyeli shishi. (Romabii 7:14) Akɛni ebii lɛ fɛɛ yeee emuu hewɔ lɛ, amɛteŋ mɔ ko kwraa bɛ ni baanyɛ akpɔ̃ nɔ ni ŋmɛɛ Adam lɛ.—Lala 49:7, 8,NWT.
Nyɔŋmɔ musuŋ tsɔ lɛ yɛ Adam shwiei lɛ ahewɔ, ejaakɛ amɛbɛ hiɛnɔkamɔ ko. (Yohane 3:16) Kɛ̃lɛ, Nyɔŋmɔ shishitoo mla kɛhã jalɛsaneyeli biɔ koni ená yiŋtoo kpakpa ni ebaadamɔ nɔ ekɛ amɛhe eshai lɛ ake amɛ. (Lala 89:14; Romabii 3:23-26) Nyɔŋmɔ sumɔɔ adesai, no hewɔ lɛ etsɔ mla gbɛ nɔ eto gbɛjianɔ koni ekɛ amɛhe eshai lɛ ake amɛ, ni ejie kɛya kwraa. (Romabii 5:6-8) Kpɔmɔnɔ lɛ ji nakai mla gbɛ lɛ.
Te kpɔmɔnɔ lɛ tsuɔ nii ehãa tɛŋŋ?
Kɛ́ akɛ wiemɔ ni ji “kpɔmɔnɔ” lɛ tsu nii yɛ Biblia lɛ mli lɛ, ehiɛ shishinumɔ etɛ:
Akɛwoɔ nɔ ko he nyɔmɔ.—4 Mose3:46, 47.
Akɛhãa mɔ ko yeɔ ehe loo akɛjieɔ mɔ ko.—2 Mose 21:30.
Ekɛ nɔ ni awoɔ he nyɔmɔ lɛ jara yeɔ egbɔ, loo etsĩɔ nɔ. a
Hã wɔsusu bɔ ni shishinumɔi nɛɛ kɔɔ Yesu Kristo kpɔmɔ afɔleshaa lɛ he wɔkwɛ.
Nyɔmɔwoo. Biblia lɛ kɛɔ akɛ, ahé Kristofoi kɛ “jara ni wa.” (1 Korintobii 6:20; 7:23) Nakai jara lɛ ji Yesu lá lɛ ní ‘ekɛhé mɛi ehã Nyɔŋmɔ kɛjɛ weku fɛɛ weku kɛ wiemɔ fɛɛ wiemɔ kɛ gbɔmɛi srɔtoi fɛɛ kɛ jeŋmaŋ fɛɛ jeŋmaŋ’ mli lɛ.—Kpojiemɔ 5:8, 9.
Jiemɔ. Yesu afɔleshaa lɛ ehã ‘atsɔ kpɔmɔnɔ lɛ nɔ ajie wɔ’ kɛjɛ esha mli.—1 Korintobii1:30; Kolosebii 1:14; Hebribii 9:15.
Eyeɔ hegbɔ. Yesu afɔleshaa lɛ kɛ nɔ ni ŋmɛɛ Adam, ni ji adesa wala ni eye emuu lɛ fɛɛ yeɔ egbɔ. (1 Korintobii1 15:21, 22, 45, 46) Biblia lɛ kɛɔ akɛ: “Ejaakɛ bɔ ni gbɔmɔ kome [Adam] toigbele lɛ hã mɛi pii tsɔmɔ eshafeelɔi lɛ, nakai nɔŋŋ hu gbɔmɔ kome [Yesu Kristo] toiboo lɛ baahã mɛi pii atsɔmɔ jalɔi.” (Romabii 5:19) Enɛ hãa wɔnaa nɔ hewɔ ni gbɔmɔ kome gbele baanyɛ awo kpɔmɔnɔ lɛ he nyɔmɔ ehã eshafeelɔi babaoo. Anɔkwa, Yesu afɔleshaa lɛ kɛ ‘nɔ ni sa akɛ akɛkpɔ mɛi fɛɛ’ lɛ yeɔ egbɔ. Mɛi ni kɔɔ gbɛ ni ja lɛ ji mɛi ni baaná he sɛɛ.—1 Timoteo 2:5, 6.
a Yɛ Biblia lɛ mli lɛ, wiemɔ ni atsɔɔ shishi akɛ “kpɔmɔnɔ” lɛ hiɛ shishinumɔ akɛ, nɔ ko jara, loo nɔ ko ni jara wa ni awo he nyɔmɔ. Ákɛ nɔkwɛmɔnɔ lɛ, Hebri feemɔ wiemɔ ni ji ka·pharʹ lɛ shishinumɔ ji, “ni aha nɔ ko nɔ.” (1 Mose 6:14) Bei pii lɛ, ekɔɔ eshai ni aha nɔ lɛ he. (Lala 65:3, NWT) Ni wiemɔ ni akɛtsuɔ nii ahãa nɔ ni awoɔ akɛ nyɔmɔ koni akɛha nii lɛ nɔ ji koʹpher. (2 Mose 21:30) Nakai nɔŋŋ atsɔɔ Hela wiemɔ ni ji lyʹtron lɛ shishi akɛ “kpɔmɔnɔ”, ni abaanyɛ atsɔɔ shishi hu akɛ “nyɔmɔ ni awoɔ kɛjieɔ mɔ ko.” (Mateo 20:28; The New Testament in Modern Speech, ni R. F. Weymouth tsɔɔ shishi) Hela woloŋmalɔi kɛ wiemɔ nɛɛ tsu nii kɛkɔ nyɔmɔ ni awoɔ koni aŋmɛɛ tabilɔ ko ni maŋ ko eŋɔ lɛ nom akɛ gboklɛfonyo lɛ he loo nyɔmɔ ni awoɔ koni aŋmɛɛ nyɔŋ ko he lɛ he.
Ekolɛ Obaasumɔ Enɛ Hu
BIBLIA MLI ŊMALƐI NI AGBALA MLI
Romabii 5:8 Lɛ Mligbalamɔ—“Be Mli Ni Wɔji Eshafeelɔi Lɛ Beebe Ni Kristo Bagbo Yɛ Wɔnajiaŋ”
Efɔɔ kaa akɛ bɔ ni adesai susuɔ nii ahe kɛ bɔ ni amɛhiɔ shi amɛhãa lɛ teɔ shi ewoɔ Nyɔŋmɔ jalɛ shishitoo mlai. Te amɛbaafee tɛŋŋ amɛhã wekukpaa kpakpa ahi amɛ kɛ Nyɔŋmɔ teŋ bianɛ kɛ agbɛnɛ hu kɛya naanɔ lɛ?
SANEBIMƆI NI BIBLIA LƐ EHÃ HETOO
Mɛɛ Gbɛ Nɔ Yesu Hereɔ Mɛi Ayiwala?
Mɛni hewɔ ehe miihia ni Yesu akpa fai ehã wɔ lɛ? Ani hemɔkɛyeli ni wɔbaaná yɛ Yesu mli lɛ pɛ ji nɔ ni baahã ahere wɔyiwala?
BIBLIA TSƆƆMƆI NI HE HIAA WAA
Mɛni Hewɔ Yesu Gbo?
Ekolɛ, onu pɛŋ akɛ egbo yɛ wɔhe eshai lɛ ahewɔ. Shi ani mɛi akpekpei abɔ baanyɛ aná afɔle kome he sɛɛ?
BIBLIA TSƆƆMƆI
Kaa Wɔ-Biblia Kasemɔ Lɛ Okwɛ
Biblia kasemɔ ni baafee sanegbaa ni mɔ ko baawa bo; aheee shika.