Biblia lɛ fãa wɔ akɛ wɔkaye lá. No hewɔ lɛ, esaaa akɛ wɔheɔ lá loo efãi titri lɛ yɛ gbɛ ko kwraa nɔ, kɛ́ akɛmiihã wɔ akɛ niyenii jio, akɛmiima wɔ nɔ loo aagbala awo wɔmli jio. Kadimɔ ŋmalɛi ni nyiɛ sɛɛ nɛɛ:

•   Mose Klɛŋklɛŋ Wolo 9:4. Yɛ Nu Afua lɛ sɛɛ lɛ, Nyɔŋmɔ ŋmɛ Noa kɛ eweku lɛ gbɛ koni amɛkɛ kooloi aloo afata niyenii ni amɛyeɔ lɛ he, shi efã amɛ akɛ amɛkaye lá lɛ. Nyɔŋmɔ kɛɛ Noa akɛ: “Loo kɛ ewala, ni ji elá lɛ, kɛkɛ nyɛkayea.” Nɛkɛ famɔ nɛɛ yɛ kɛhã adesai fɛɛ kɛjɛ nakai beiaŋ kɛbaa, ejaakɛ wɔ fɛɛ lɛ, Noa shwiei ji wɔ.

•   Mose Wolo Ni Ji Etɛ 17:14. “Nyɛkayea heloo ko heloo ko lá, ejaakɛ heloo fɛɛ heloo wala ji elá lɛ. Mɔ fɛɛ mɔ ni yeɔ lɛ, abaafo lɛ ashɛ afɔ.” Nyɔŋmɔ naa susuma lɛ loo wala lɛ akɛ eyɛ lá lɛ mli, ni lɛ enɔ ni. Eyɛ mli akɛ, akɛ mla nɛɛ hã Israelbii lɛ pɛ moŋ, shi ehãa wɔnaa akɛ Nyɔŋmɔ buɔ mla ni ewo akɛ akaye lá lɛ akɛ eji hiɛdɔɔ sane.

•   Bɔfoi 15:20. ‘Nyɛtsia nyɛhe kɛjea . . . lá he.’ Nyɔŋmɔ kɛ famɔ ni ekɛhã Noa lɛ nɔŋŋ hã Kristofoi. Yinɔsane etsɔɔ akɛ, mra beiaŋ Kristofoi lɛ yeee lá, ni amɛkɛtsuuu nii hu yɛ helatsamɔ mli.

Mɛni hewɔ Nyɔŋmɔ fã wɔ akɛ wɔtsi wɔhe kɛje lá he lɛ?

 Odaseyelii yɛ ni tsɔɔ akɛ lá ni akɛmaa mɔ nɔ loo akɛhãa mɔ yɛ helatsamɔ mli lɛ yɛ oshãra waa. Shi nɔ ni he hiaa fe fɛɛ ji akɛ, Nyɔŋmɔ fã ni wɔtsi wɔhe kɛje lá he akɛni nɔ ni lá damɔ shi kɛhã lɛ yɛ krɔŋkrɔŋ kɛhã lɛ lɛ hewɔ.​—3 Mose 17:11; Kolosebii 1:20.