“Bei komɛi lɛ, minyɛɔ mikudɔɔ mililɛi, shi bei komɛi hu lɛ, efeɔ tamɔ nɔ ni mijwɛŋŋ ni miwieɔ!”​—James.

“Kɛ́ mihao lɛ, miwieɔ ni misusuuu he, ni kɛ́ nɔ ko gbaaa minaa lɛ, miwieɔ babaoo. No hewɔ lɛ, etamɔ nɔ ni be fɛɛ be lɛ nibii eyaaa lɛ jogbaŋŋ ehãaa mi.”​—Marie.

Biblia lɛ kɛɔ akɛ: “Lilɛi lɛ . . . la ni” ni “kwɛ bɔ ni la bibioo nyɛɔ eshãa koo kpele!” (Yakobo 3:​5, 6) Ani efɔɔ kaa akɛ owiemɔi kɛ bo woɔ sane mli? Kɛ́ nakai ni lɛ, no lɛ sane ni wɔbaasusu he nɛɛ baawa bo.

• Mɛni hewɔ miwieɔ nibii ni ejaaa?

• Kudɔmɔ olilɛi

• Nɔ ni otipɛŋfoi lɛ kɛɔ

Emuu ni ayeee. Biblia lɛ kɛɔ akɛ: “Wɔ fɛɛ wɔtɔ̃ɔ babaoo. Kɛ́ mɔ ko tɔ̃ɔɔ yɛ wiemɔ mli lɛ, no lɛ gbɔmɔ ni eye emuu ji lɛ.” (Yakobo 3:2) Emuu ni wɔyeee lɛ hewɔ lɛ, kɛ́ wɔmiinyiɛ lɛ wɔtɛrɛɔ, ni nakai nɔŋŋ wɔtɔ̃ɔ yɛ wɔwiemɔi amli.

“Akɛni mijwɛŋmɔ yeee emuu ni mililɛi hu yeee emuu hewɔ lɛ, kɛ́ mikɛɛ minyɛɔ mikudɔɔ amɛ jogbaŋŋ lɛ, no lɛ, miilaka mihe.”​—Anna.

Wiemɔ babaoo. Biblia lɛ kɛɔ akɛ: “Mɔ ni wieɔ babaoo lɛ, ewaaa akɛ ebaatɔ.” (Abɛi 10:19) Ewaaa kwraa akɛ mɛi ni wieɔ babaoo ni amɛbooo sane toi jogbaŋŋ lɛ, baawie wiemɔi ni baagba mɛi anaa.

“Bei pii lɛ, kɛ́ ayɛ tsũ mli ni aagba sane lɛ, jeee mɛi ni hiɛ kã shi waa lɛ ji mɛi ni wieɔ babaoo lɛ. Yesu ji gbɔmɔ ni hiɛ kã shi fe mɔ fɛɛ mɔ ni ehi shikpɔŋ lɛ nɔ dã, kɛ̃lɛ, be ni eyɔɔ shikpɔŋ lɛ nɔ lɛ, bei pii lɛ, efeɔ diŋŋ.”​—Julia.

Wiemɔi ni dɔɔ mɔ ni akɛshwieɔ mɔ hiɛ shi. Biblia lɛ kɛɔ akɛ: “Wiemɔ ni awieɔ ni asusuuu he lɛ, etamɔ nɔ ni aabamɔ klante.” (Abɛi 12:18) Wiemɔ ni awieɔ ni asusuuu he lɛ eko ji wiemɔi ni dɔɔ mɔ ni akɛyeɔ mɔ he fɛo koni akɛshwieɔ mɔ hiɛ shi. Bei pii lɛ, mɛi ni feɔ nakai lɛ kɛɔ akɛ, “Mikɛ bo miishwɛ kɛkɛ!” Shi esaaa akɛ wɔnaa mɔ hiɛshishwiemɔ akɛ shwɛmɔ. Biblia lɛ kɛɔ wɔ akɛ wɔshɛrɛ “wiemɔ fɔŋ fɛɛ, kɛ nɔ fɛɛ nɔ ni yeɔ mɔ awui” lɛ wɔshwie.​—Efesobii 4:​31.

“Miyeɔ fɛo, ni mifɔɔ mɛi anaaŋmɔlɔ woo hu​—eji sui ni hãa mɔ ko nyɛɔ ewieɔ wiemɔi ni dɔɔ mɔ kɛshwieɔ mɔ hiɛ shi, ni bei pii lɛ, ehãa mináa sane.”​—Oksana.

Ekolɛ, onáŋ lɛ mlɛo akɛ obaakudɔ olilɛi, shi Biblia shishitoo mlai baanyɛ aye abua bo. Bo lɛ susumɔ shishitoo mlai ni nyiɛ sɛɛ nɛɛ ahe okwɛ:

“Nyɛwiea yɛ nyɛtsui mli, . . . ni nyɛfea diŋŋ.”​—Lala 4:4.

Bei komɛi lɛ, kɛ́ mɔ ko wie nɔ ko ni egba onaa lɛ, ebaahi jogbaŋŋ akɛ ofee diŋŋ loo okajie naa. Yoo ko ni atsɛɔ lɛ Laura lɛ wie akɛ: “Kɛ́ mimlifu lɛ, bɔ ni minuɔ he mihãa lɛ, jeee nakai nɔŋŋ minuɔ he sɛɛ mli. Kɛ́ mitsui he jɔ lɛ, mináa miishɛɛ akɛ miwieee nɔ ni no mli lɛ mitaoɔ mawie lɛ.” Kɛ́ oto otsui shi sɛkɛnsi fioo lɛ, ebaaye ebua bo ni okawie nɔ ko ni ejaaa.

“Ani toi ekaaa wiemɔi ekwɛɛɛ tamɔ bɔ ni lilɛi hu saa niyenii naa lɛ?”​—Hiob 12:11.

Kɛ́ obi ohe saji ni nyiɛ sɛɛ nɛɛ dani owie lɛ ehãŋ owie nibii ni sɛɛ mli lɛ obaashwa ohe:

• Ani eji anɔkwale? Ani etsɔɔ mlihilɛ? Ani ehe miihia?​—Romabii 14:19.

• Kɛ́ mɔ ko kɛɛ mi nakai lɛ, te manu he tɛŋŋ?​—Mateo 7:​12.

• Ani ebaatsɔɔ akɛ miyɛ bulɛ kɛhã mɔ lɛ susumɔ?​—Romabii 12:10.

• Ani be ni sa akɛ mawie nɛ?​—Jajelɔ 3:7.

“Nyɛkɛ heshibaa abua mɛi krokomɛi akɛ amɛnɔ kwɔlɔ fe nyɛ.”​—Filipibii 2:3.

Ŋaawoo nɛɛ baaye abua bo ni oná jwɛŋmɔ ni ja yɛ mɛi ahe, koni ofee diŋŋ ni ojwɛŋ dani owie. Kɛ́ owie nɔ ko ni egba mɔ ko naa po lɛ, heshibaa baaye abua bo koni okpa fai, ni esa akɛ ofee nakai oya nɔŋŋ! (Mateo 5:​23, 24) No sɛɛ lɛ, bɔɔ mɔdɛŋ koni okudɔ olilɛi kɛ́ obaawie.