Niiamlitaolɔi kɛɛ akɛ, gbei baanyɛ amɛkɛ amɛgugɔ afu nii kɛle afii abɔ ni gbee ko eye, kɛji gbee ko ji nuu loo yoo, loo kɛji gbee ko yɛ miishɛɛ loo ebɛ miishɛɛ. Abaanyɛ atsɔse gbei ni amɛnyɛ amɛle kɛji okplɛmi ko loo tsofai ni mla eŋmɛɛɛ gbɛ ni ahiɛ lɛ yɛ he ko. Adesai kɛ amɛhiŋmɛi tsuɔ nii kɛleɔ nibii ni ebɔle amɛ, shi gbei kɛ amɛgugɔ fuɔ nii kɛtsuɔ enɛ. Amɛgugɔ amɛkɛyɔseɔ nii.

 Susumɔ he okwɛ: Nyɛmɔ ni gbee kɛfuɔ nii lɛ naa wa shii akpei abɔ kwraa fe wɔnɔ lɛ. U.S. National Institute of Standards and Technology lɛ bɔ amaniɛ akɛ, gbee baanyɛ ekɛ egugɔ afu nii ni eyɔse nibii bibii kwraa ni yɔɔ nɔ ni efuɔ lɛ mli po. Akɛ nɔkwɛmɔnɔ lɛ, kɛ́ akɛ awale bibioo ka sikli, ni aja sikli lɛ mli ejwɛ, ni akɛ ekome wo swimming pool agbo waa mli ni osa onaa lɛ, onuŋ sikli lɛ he, shi kɛ́ gbee fu lɛ, ebaana akɛ akɛ sikli ewo mli.”

 Mɛni hã nyɛmɔ ni gbei kɛfuɔ nii lɛ naa wa kwraa fe adesai anɔ lɛ?

•   Akɛni daanɛɛ gbei agugɔ naa efɔ hewɔ lɛ, amɛnyɛɔ amɛnuɔ fu loo ŋma he oya waa.

•   Gbɛi enyɔ yɛ gbee gugɔ mli​—ekɛ ekome muɔ, ni ekɛ ekome fuɔ nii. Kɛ́ gbee fu nɔ ko lɛ, nii lɛ ŋma loo efu lɛ tsɔɔ egugɔ mli gbɛ ni nuɔ ŋma loo fu he lɛ mli.

•   Gbee gugɔ mli he ni fuɔ nii lɛ dalɛ ji sɛntimitai 130 (20 sq in.) kɛbɔle loo nɔ ni fe nakai, shi gbɔmɔ nɔ dalɛ ji sɛntimitai 5 (0.8 sq in.) pɛ kɛbɔle.

•   Wala yibii ni yɔɔ gbee gugɔ mli ni hãa enyɛɔ efuɔ nii lɛ fa kwraa fe wɔnɔ lɛ aaafee toi 50.

 Enɛɛmɛi fɛɛ yeɔ ebuaa gbee ni enuɔ nibii ahe fu loo amɛŋma, shi jeee no pɛ kɛkɛ, enyɛɔ enuɔ nibii srɔtoi fɛɛ ni yɔɔ nakai nii lɛ mli lɛ afu loo amɛŋma hu. Akɛ nɔkwɛmɔnɔ lɛ, nilelɔi komɛi kɛɛ akɛ, wɔnuɔ wonu ŋma he, shi gbee nyɛɔ enuɔ nibii srɔtoi fɛɛ ni akɛhoo wonu lɛ ŋma he.

 Niiamlitaolɔi ni yɔɔ Pine Street Foundation, ni eji nitsumɔhe ko ni taoɔ kansa mli lɛ wie akɛ, gbee ansɔ lɛ kɛ egugɔ lɛ feɔ ekome kɛtsuɔ nii akɛ “nibii ni nuɔ ŋma loo fu he fe fɛɛ yɛ shikpɔŋ nɛɛ nɔ lɛ atɛŋ ekome.” Jeŋ shikpalɔi miifee ilɛtrɔnik dɛŋdadei komɛi ni baanyɛ anu okplɛmii, nibii ni mɛi kɛjuɔ shi kɛyaa maŋsɛɛ, kɛ helai tamɔ kansa ahe fu loo aŋma.

 Te osusuɔ tɛŋŋ? Ani nɔ ni hãa gbee nyɛɔ efuɔ nii waa lɛ ba kɛtsɔ sutsakemɔ nɔ? Aloo mɔ ko ni fee?