“Miishi toiŋjɔlɛ miihã nyɛ; miihã nyɛ mitoiŋjɔlɛ lɛ. Jeee bɔ ni je lɛ kɛhãa lɛ mikɛhãa nyɛ. Nyɛkayea nyɛtsui ni nyɛtsui akafãa hu.”​—Yohane 14:27, Jeŋ Hee Shishitsɔɔmɔ.

 “Hejɔlɛ mishiɔ mahã nyɛ, hejɔlɛ ni ji minɔ lɛ miŋɔhãa nyɛ, jeee bɔ ni je lɛ hãa lɛ, mihãa nyɛ nɛɛ. Nyɛtsui akayea, ni asaŋ ekafãa.”​—Yohane 14:27, Ga Biblia momo.

 Yesu kɛ wiemɔi nɛɛ wo ekaselɔi lɛ hewalɛ ni amɛná nɔmimaa akɛ, kɛ́ amɛkɛ naagbai kpe lɛ esaaa akɛ amɛyeɔ amɛtsui fe nine. Bɔ ni Nyɔŋmɔ ye ebua lɛ lɛ, nakai nɔŋŋ Nyɔŋmɔ baaye ebua amɛ koni amɛná toiŋjɔlɛ.

 Mɛɛ toiŋjɔlɛ nɛkɛ Yesu kɛhã ekaselɔi lɛ loo eshi ehã amɛ lɛ? Yesu hã amɛ etoiŋjɔlɛ lɛ, ni ji toiŋjɔlɛ ni lɛ hu ená lɛ eko. Toiŋjɔlɛ nɛɛ etsɔɔɔ akɛ ta loo amanehulu bɛ. (Yohane 15:20; 16:33) Eyɛ mli akɛ ayeee Yesu jalɛsane, ni ele akɛ no baahã agbe lɛ moŋ nɛ, shi ená mligbɛ toiŋjɔlɛ. (Luka 23:27, 28, 32-34; 1 Petro 2:23) Eyeee etsui fe nine, ejaakɛ ele akɛ e-Tsɛ Yehowa a sumɔɔ lɛ, ni nibii ni efeɔ lɛ saa Yehowa hiɛ.​—Mateo 3:16, 17.

 Yesu kɛ etoiŋjɔlɛ lɛ hã ekaselɔi lɛ, no ji ema nɔ mi ehã ekaselɔi lɛ akɛ lɛ kɛ e-Tsɛ lɛ fɛɛ sumɔɔ amɛ, ni amɛhiɛ sɔɔ bɔ ni ekaselɔi lɛ yeɔ ekɛ e-Tsɛ lɛ wiemɔi anɔ lɛ. (Yohane 14:23; 15:9, 10; Romabii 5:1) Toiŋjɔlɛ nɛɛ damɔ hemɔkɛyeli ni amɛná yɛ Yesu mli akɛ lɛ ji Nyɔŋmɔ Bi lɛ nɔ. Ni no baaye abua amɛ ni amɛkaye amɛtsui fe nine, ni amɛkahao hu. (Yohane 14:1) Eyɛ mli akɛ Yesu baashi amɛ yɛ shikpɔŋ lɛ nɔ, ni amɛnaŋ lɛ hiɛ kɛ hiɛ moŋ, shi ewo amɛ shi akɛ, Nyɔŋmɔ mumɔ krɔŋkrɔŋ lɛ baaye abua amɛ ni amɛná ekãa kɛ mligbɛ toiŋjɔlɛ. (Yohane 14:25-27) Yesu sɛɛnyiɛlɔi lɛ baanyɛ amɛkɛ ekãa akpee shihilɛi ni mli wawai anaa akɛni amɛle akɛ Yehowa kpɛlɛɔ amɛnɔ ni efiɔ amɛsɛɛ lɛ hewɔ.​—Hebribii 13:6.

 Be ni Yesu yɔɔ shikpɔŋ lɛ nɔ lɛ, no mli lɛ toiŋjɔlɛ ni abaa ahãa mɛi yɛ ŋamɔi amli lɛ fata amɛkusumii lɛ ahe. (Mateo 10:12, 13) Kɛ̃lɛ, Yesu biii toiŋjɔlɛ ehãaa ekaselɔi lɛ kɛkɛ, shi ehã amɛ toiŋjɔlɛ. Kɛfata he lɛ, esoro toiŋjɔlɛ ni Yesu hã amɛ lɛ yɛ toiŋjɔlɛ fɛɛ toiŋjɔlɛ ni je lɛ b baanyɛ ekɛhã lɛ he. Je lɛ baanyɛ ahã mɛi toiŋjɔlɛ ko kɛtsɔ mɛi ateŋ wekukpaa, ninamɔ, gbɛ́ihemɔ, loo hegbɛi anɔ. Shi toiŋjɔlɛ ni Yesu kɛhãa lɛ damɔɔɔ nibii ni yaa nɔ yɛ shihilɛ mli lɛ anɔ. Eji mligbɛ toiŋjɔlɛ ni hiɔ shi kɛyaa naanɔ.

 Yesu kɛ ebɔfoi anɔkwafoi lɛ wie wiemɔ nɛɛ gbi gbɛkɛ dani enɔjetsɛremɔ lɛ abaagbe lɛ lɛ. Nakai gbɛkɛ lɛ, ekɛɛ amɛ akɛ etsɛŋ ebaashi amɛ. (Yohane 13:33, 36) Enɛ hã ekaselɔi lɛ awerɛ ho amɛhe waa. (Yohane 16:6) No hewɔ lɛ, Yesu wó amɛ hewalɛ ni ehã amɛle akɛ, kɛ́ eshi amɛ lɛ, amɛkaye amɛtsui yɛ nɔ ni baaba lɛ he.

 Yesu wiemɔi nɛɛ baanyɛ awo Kristofoi ni yɔɔ ŋmɛnɛ lɛ hewalɛ. Wɔ hu wɔbaanyɛ wɔná toiŋjɔlɛ. (2 Tesalonikabii 3:16) Kɛ́ wɔbatsɔmɔ Yesu kaselɔi lɛ, wɔbaleɔ akɛ Yesu kɛ e-Tsɛ Yehowa sumɔɔ wɔ, ni amɛhiɛ sɔɔ wɔ akɛni wɔfeɔ amɛsuɔmɔnaa nii lɛ hewɔ. (Kolosebii 3:15; 1 Yohane 4:16) Enɛ hewɔ lɛ, ehe ehiaaa ni wɔyeɔ wɔtsui fe nine. Mɛni hewɔ? Ejaakɛ Nyɔŋmɔ yɛ wɔmasɛi.​—Lala 118:6; Filipibii 4:6, 7; 2 Petro 1:2.

 Kwɛmɔ Yohane wolo lɛ hiɛkpamɔ vidio kuku nɛɛ.