“Kaashe gbeyei, ejaakɛ mikɛ bo yɛ. Kaaye otsui, ejaakɛ miji o-Nyɔŋmɔ lɛ, mawaje bo, anɔkwa, maye mabua bo, lɛɛlɛŋ, mikɛ mijalɛ ninejurɔ lɛ baahiɛ omli kpɛŋŋ.”​—Yesaia 41:10, Jeŋ Hee Shishitsɔɔmɔ.

 “Kaashe gbeyei, shi mi, mikɛo yɔɔ! Kaakwɛkwɛɛ ohe, shi mi ji o-Nyɔŋmɔ lɛ! Mawajeo, ni maye mabuao; ni mahiɛ omli kɛ mijalɛ ninejurɔ lɛ.”​—Yesaia 41:10, Ga Biblia Momo.

 Yehowa a Nyɔŋmɔ maa nɔ mi ehãa enɔkwa jálɔi akɛ, ekɔɔɔ he eko naagba ni amɛkɛkpeɔ lɛ, eyeɔ ebuaa amɛ.

 “Mikɛ bo yɛ.” Yehowa hãa jálɔi lɛ leɔ yiŋtoo hewɔ ni esaaa akɛ amɛsheɔ gbeyei lɛ​—no ji akɛ eshwɛko amɛkome. Akɛni enaa shihilɛi ni amɛtsɔɔ mli, ni enuɔ amɛsɔlemɔi hu hewɔ lɛ, etamɔ nɔ ni eyɛ amɛmasɛi kpaakpa.​—Lala 34:15; 1 Petro 3:12.

 “Miji o-Nyɔŋmɔ lɛ.” Yehowa hãa ewebii lɛ tsui kɛtsɔ kaimɔ ni ekaiɔ amɛ akɛ, ekɔɔɔ he eko shihilɛ ni amɛtsɔɔ mli lɛ, lɛ ji amɛ-Nyɔŋmɔ ni ekpɛlɛɔ amɛnɔ akɛ ejalɔi. Amɛbaanyɛ amɛná nɔmimaa akɛ, shihilɛ ko bɛ ni baatsĩ Nyɔŋmɔ naa ni ekaye ebua amɛ.​—Lala 118:6; Romabii 8:32; Hebribii 13:6.

 “Mawaje bo, anɔkwa, maye mabua bo, lɛɛlɛŋ, mikɛ mijalɛ ninejurɔ lɛ baahiɛ omli kpɛŋŋ.” Yehowa wie sane kome too lɛ nɔŋŋ he yɛ gbɛi etɛ nɔ kɛma nɔ mi akɛ, bɔ fɛɛ bɔ ni fee lɛ, ebaaye ebua amɛ. Ekɛ wiemɔ ni ji ‘mikɛ mijalɛ ninejurɔ lɛ baahiɛ omli’ lɛ tsu nii kɛtsɔɔ bɔ ni efeɔ enii ehãa kɛ́ yelikɛbuamɔ he miihia ewebii. Kɛ́ mɔ ko gbee shi lɛ, Nyɔŋmɔ baanyɛ ekɛ eninejurɔ lɛ awo enɔ kɛte shi ekoŋŋ.​—Yesaia 41:13.

 Nyɔŋmɔ Wiemɔ ni ji Biblia lɛ ji gbɛ titri ni Nyɔŋmɔ tsɔɔ nɔ ewajeɔ mɛi ni jáa lɛ lɛ, ni eyeɔ ebuaa amɛ. (Yoshua 1:8; Hebribii 4:12) Akɛ nɔkwɛmɔnɔ lɛ, Nyɔŋmɔ Wiemɔ lɛ kɛ ŋaawoo kpakpa hãa mɛi ni miiye ohia, mɛi ni hela miigba amɛnaa, loo mɛi ni suɔlɔi egboi. (Abɛi 2:6, 7) Nyɔŋmɔ baanyɛ ekɛ emumɔ krɔŋkrɔŋ lɛ loo ehewalɛ ni miitsu nii lɛ aye abua mɛi ni jáa lɛ lɛ ni amɛjwɛŋ jogbaŋŋ koni amɛnaagbai lɛ akaye amɛnɔ.​—Yesaia 40:29; Luka 11:13.

 Wiemɔi nɛɛ shɛje Yudafoi anɔkwafoi ni sɛɛ mli lɛ aŋɔ amɛ nom kɛtee Babilon lɛ amii. No mli lɛ, Yehowa etsɔ hiɛ egba efɔ̃ shi akɛ, yɛ Yudafoi lɛ anomŋɔɔ lɛ naagbee gbɛ lɛ, amɛbaanu amaniɛbɔɔ he akɛ, henyɛlɔ ko miiba ebatutua maji ni bɔle Babilon lɛ, ni ebaawo Babilon he gbeyei. (Yesaia 41:2-4; 44:1-4) Eyɛ mli akɛ sane nɛɛ baawo Babilonbii lɛ kɛ ehewɔŋ maji lɛ ahe gbeyei moŋ, shi esaaa akɛ Yudafoi lɛ yeɔ amɛtsui, ejaakɛ Yehowa baabu amɛhe. Ekɛ wiemɔ ni ji “kaashe gbeyei” lɛ ma enɛ nɔ mi ehã amɛ shii etɛ sɔŋŋ.​— Yesaia 41:5, 6, 10, 13, 14.

 Eyɛ mli akɛ Yudafoi anɔkwafoi ni no mli lɛ amɛyɔɔ nomŋɔɔ mli yɛ Babilon lɛ ji mɛi ni Yehowa wie wiemɔi ni yɔɔ Yesaia 41:10 lɛ mli lɛ etsɔɔ moŋ, shi ehã abaa wiemɔi nɛɛ ayi koni ekɛshɛje mɛi ni jáa lɛ lɛ fɛɛ amii. (Yesaia 40:8; Romabii 15:4) Eyeɔ ebuaa amɛ ŋmɛnɛ tamɔ bɔ ni eye ebua etsuji ni hi shi yɛ blema lɛ.”