“Nyɛkahãa je nɛɛ shɔ̃a nyɛ dɔŋŋ, shi moŋ, nyɛtsakea nyɛhe kɛtsɔ nyɛjwɛŋmɔ ni nyɛbaaya nɔ nyɛtsake lɛ nɔ, koni nyɛ diɛŋtsɛ nyɛnyɛ nyɛka nyɛkwɛ ni nyɛyɔse nɔ ni ji Nyɔŋmɔ suɔmɔnaa nii kpakpa ni enáa he miishɛɛ ni hi kɛwula shi lɛ.”​—Romabii 12:2, Jeŋ Hee Shishitsɔɔmɔ.

 “Nyɛjeŋba akatamɔ jeŋbii ajeŋba, shi moŋ nyɛkɛ nyɛjwɛŋmɔ ní etsɔ ehee lɛ atsakea nyɛhe, koni nyɛyoo nii ni ji Nyɔŋmɔ suɔmɔnaa nii kpakpai ní sa ehiɛ jogbaŋŋ ní hi kɛwula shi lɛ.”​—Romabii 12:2, Ga Biblia momo.

 Esa akɛ mɛi ni miitao amɛsa Nyɔŋmɔ hiɛ lɛ atsake amɛjeŋba, jeee nibii gbohii ni ená amɛnɔ hewalɛ lɛ pɛ esa akɛ amɛtsake. Nyɔŋmɔ enyɛɛɛ amɛnɔ ni amɛtsake; amɛfeɔ nakai akɛni amɛsumɔɔ lɛ lɛ hewɔ, ni amɛyɔseɔ akɛ etaomɔ nii lɛ waaa, nilee yɛ mli ni amɛnáa he sɛɛ.​—Yesaia 48:17.

 “Nyɛkahãa je nɛɛ shɔ̃a nyɛ dɔŋŋ.” “Je lɛ,” ni ji adesai aje lɛ kɛ esusumɔi, nifeemɔi, kɛ bɔ ni amɛhiɔ shi amɛhãa lɛ teɔ shi ewoɔ bɔ ni Nyɔŋmɔ miisumɔ ni ahi shi ahã lɛ. (1 Yohane 2:15-17) Ni enɛ baanyɛ eshɔ̃ amɛ loo etsake amɛsubaŋ, loo nɔ gbɔmɛi ni amɛji. Kɛ́ mɔ ko miitao ejá Nyɔŋmɔ bɔ ni Nyɔŋmɔ kpɛlɛɔ nɔ lɛ, esa akɛ ekwa je lɛ sui lɛ, kɛ́ jeee nakai lɛ, mɔ lɛ baaná sui ni baaye lɛ diɛŋtsɛ awui, ni Nyɔŋmɔ ekpɛlɛɛɛ sui nɛɛ anɔ.​—Efesobii 2:1-3; 4:17-19.

 “Nyɛtsakea nyɛhe kɛtsɔ nyɛjwɛŋmɔ ni nyɛbaaya nɔ nyɛtsake lɛ nɔ.” Agbɛnɛ hu, esa akɛ mɔ lɛ aya nɔ atsake emli gbɛ sui kɛ ehenumɔi. Wɔnaa bɔ ni esa akɛ afee enɛ ahã lɛ yɛ Greek wiemɔ ni atsɔɔ shishi akɛ “nyɛtsakea” lɛ mli. Enɛ tsɔɔ tsakemɔ ni tamɔ bɔ ni gɔgɔmi tsakeɔ kwraa ni etsɔɔ abɛi lɛ. Esa akɛ mɛi ni jáa Nyɔŋmɔ lɛ awo “subaŋ hee” lɛ.​—Efesobii 4:23, 24; Kolosebii 3:9, 10.

 “Nyɛ diɛŋtsɛ nyɛnyɛ nyɛka nyɛkwɛ ni nyɛyɔse nɔ ni ji Nyɔŋmɔ suɔmɔnaa nii.” Nyɔŋmɔ miisumɔ ni mɛi ni jáa lɛ lɛ aná nɔmimaa diɛŋtsɛ yɛ nɔ ni amɛheɔ amɛyeɔ lɛ he. Amɛfeɔ enɛ kɛtsɔ Nyɔŋmɔ Wiemɔ lɛ ni amɛkaseɔ jogbaŋŋ ni amɛkɛtsuɔ nii lɛ nɔ, ni no hãa amɛnáa Nyɔŋmɔ shishitoo mlai ni amɛhiɔ shi yɛ naa lɛ he sɛɛ. Nɛkɛ gbɛ nɔ amɛtsɔɔ amɛkaa amɛkwɛɔ ni amɛyɔseɔ akɛ Nyɔŋmɔ gbɛi lɛ anɔ bɛ.​—Lala 34:8.

 Romabii yitso 12 lɛ tsɔɔ nibii ni esa akɛ mɔ afee dani Nyɔŋmɔ baakpɛlɛ ejamɔ nɔ. Jamɔ ni tamɔ nakai lɛ saa wɔshihilɛ mli nɔ fɛɛ nɔ ni wɔfeɔ lɛ he, ni ebiɔ ni mɔ kɛ ejwɛŋmɔ atsu nii kɛsusu nii ahe moŋ fe ni ebaahã hemɔkɛyeli ni bɛ nɔdaamɔnɔ loo henumɔi gbohii akudɔ lɛ. (Romabii 12:1, 3) Ŋaawoi kpakpai ni tsɔɔ bɔ ni wɔbaafee wɔjie sui kpakpai akpo, bɔ ni wɔkɛ mɛi krokomɛi baaye ahã, kɛ bɔ ni esa akɛ wɔfee wɔnii wɔhã kɛ́ akɛ wɔ yeee jogbaŋŋ lɛ yɛ yitso nɛɛ mli.​—Romabii 12:9-21.